Maro ty Fitahia Ananantsika Satria Tea Antsika Jehovah

1. Ino ty azontsika atao mba hahafalifaly an’i Jehovah?

ERITSERETO hoe manome fanomeza lafovily ho an’olo raiky teanao iha. Soasoa biby raha iny sady tena ilàn’olo iny! Ka manao akory laha hajarìny avao raha nameanao azy iny sady tsy ampiasany mihintsy? Tsy maintsy halahelo iha. Fe azo antoky fa ho falifaly iha laha ampiasany soa raha iny sady mankasitraky anao ie. Ino ty teantsika hiavia amy ohatsy io? Namean’i Jehovah antsika koa Anakilahiny iny. Azo antoky fa ho falifaly Jehovah laha mankasitraky an’ny fanomeza lafovily io noho ty fitiavany tsika, satria zay ty antony nanosiky azy nanome ty vilim-panavota!​—Jaona 3:16; Rom. 5:7, 8.

2. Ino ty hodinihintsika amy lahatsoratsy toy ato?

² Fe lafa mandeha ty fotoa, le mety manomboky tsy hihevitsy ty vilim-panavota ho fanomeza lafovily tsika. Sahala manajary an’ny fanomeza soasoa baka amy Ndranahary io tsika amy zay. Ka mba tsy hisehoan’ny raha zay, le tokony ho vetsevetsentsika avao ty raha natao-Ndranahary noho Kristy ho antsika. Hanampy antsika hanao ani-zay lahatsoratsy toy. Hodinihintsika hoe ino ty soa azontsika baka amy vilim-panavota henanizao noho amy hoavy. Ho henteantsika koa ty fomba ampisehoantsika hoe mankasitraky ty fitiavan’i Jehovah tsika, sirtò amy vanim-potoan’ny Fahatiarova zao.

INO TY SOA AZONTSIKA HENANIZAO?

3. Ino ty soa rambesintsika baka amy vilim-panavota henanizao?

³ Fa mandramby soa baka amy sorom-panavotan’i Kristy tsika henanizao. Ty vilim-panavota zao ro mahavy antsika hahazo fanengà hadisoa baka amy Jehovah. Tsy voatery hanenga ty hadisoantsika ie, fa ie mihintsy ro ta hanao ani-zay. Nankasitraky an’i Jehovah ty mpanao salamo raiky le nihira hoe: “Soa toetsy noho parè hanenga hadisoa lahy iha, Jehovah!”​—Sal. 86:5; 103:3, 10-13.

4. Nataon’i Jehovah ho an’ia ty vilim-panavota? (Lioka 5:32; 1 Timoty 1:15)

⁴ Mieritseritsy ty olo sisany hoe tsy maeva hahazo fanenga hadisoa amy Jehovah ie. Fe laha ty marina, tsika iaby ro tsy maeva hahazo ani-zay. Hain’i Paoly fa “tsy maeva ho kaihy hoe apostoly” ie. Fe nivola ie hoe: “Ty hasoam-panahy miavaky naseho-Ndranahary ro nahavy ahy hanahaky ani-zao.” (1 Kor. 15:9, 10) Manenga ty hadisoantsika Jehovah lafa mibebaky tsika. Ino ty antony? Satria tea antsika ie, fa tsy hoe tsika ro maeva ani-zay. Ka laha mahatsapa zany iha hoe tsy maeva hahazo fanengà hadisoa, le tiarovo hoe namean’i Jehovah ho an’ny mpanota mibebaky ty vilim-panavota fa tsy ho an’olo tsy nanota.​—Vakio Lioka 5:32; 1 Timoty 1:15.

5. Tokony hieritseritsy va tsika hoe tsy maintsy manenga ty hadisoantsika Jehovah? Hazavao.

⁵ Tsy tokony hieritseritsy tsika hoe tsy maintsy hanenga ty hadisoantsika Jehovah satria fa nanompo azy tanatin’ny tao maro tsika. Marina aloha fa ankasitrahan’i Jehovah ty tsy fivalihantsika aminy. (Heb. 6:10) Fe nameany antsika maimaim-poana ty vilim-panavota, fa tsy hoe mba ho takalon’ny fanompoantsika azy. Tsy mety zany laha mieritseritsy tsika hoe tsy maintsy hahazo fanengà hadisoa satria fa nanao raha maro ho an’i Jehovah. Ino ty antony? Satria sahala ta hivola tsika amy zay hoe tsy mila vilim-panavota.​—Ampitovizo amy Galatianina 2:21.

6. Manino Paoly ro niezaky ho be atao tamy fanompoa an’i Jehovah?

⁶ Hain’i Paoly fa tsy voatery hanenga ty hadisoany Jehovah ndre ino ino ty raha nataony ho azy. Fe nanino ie ro niezaky ho be atao tamy fanompoa an’i Jehovah? Nanao ani-zay ie satria teany haseho hoe mankasitraky ty hasoam-panahy miavaky nasehon’i Jehovah taminy ie. (Efes. 3:7) Manahaky an’i Paoly, le mazoto manompo an’i Jehovah avao tsika satria mankasitraky ty famindram-pony, fa tsy hoe ta hahazo fanenga hadisoa.

7. Ino koa ty soa azontsika baka amy vilim-panavota henanizao? (Romanina 5:1; Jakoba 2:23)

⁷ Mandramby soa baka amy vilim-panavota koa tsika henanizao satria afaky mifandramby marìny amy Jehovah.a Fa nihitantsika tamy lahatsoratsy taloha teo hoe vo teraky tsika, le fa tsy afaky nifandramby tamy Ndranahary. Fe lafa nisy ty vilim-panavota, le afaky “milongo amy Ndranahary” tsika ka afaky mifandramby soa aminy.​—Vakio Romanina 5:1; Jakoba 2:23.

8. Tombotsoa ty hoe mivavaky. Manino raha zay ro tokony hahavy antsika hankasitraky an’i Jehovah?

⁸ Mana tombotsoa miavaky tsika lafa mifandramby amy Jehovah satria afaky mivavaky aminy. Tsy hoe ty vavaky ataon’ny mpanompony am-pivoria any avao ro janjinin’i Jehovah, fa janjininy koa ty vavaky ataontsika kiraidraiky. Manampy antsika ho kalma noho hilamin-tsay ty vavaky. Fe tsy zay avao, fa mahavy antsika hifandramby marìny amy Ndranahary koa. (Sal. 65:2; Jak. 4:8; 1 Jaona 5:14) Nivavaky matetiky Jesosy tamin’ie tan-tany etoy satria hainy hoe mijanjy azy Jehovah, sady amy zay koa hifandramby marìny amy Babany avao ie. (Lioka 5:16) Tena falifaly tsika satria afaky minama amy Jehovah noho mivavaky aminy mihintsy, vokatsin’ny soro nataon’i Jesosy!

INO TY SOA HO AZONTSIKA AMY HOAVY?

9. Ino ty soa ho azon’ny mpanompon’i Jehovah tsy mivaliky amy hoavy vokatsin’ny vilim-panavota?

⁹ Ino ty soa ho azon’ny mpanompon’i Jehovah tsy mivaliky amy hoavy vokatsin’ny vilim-panavota? Hahazo fiaina mandrakizay rozy. Tsy mino ani-zay ty ankamaroan’olo satria nimaty avao ty olo bakanibakany zay. Fe ty fikasàn’i Jehovah tam-boalohany tany le hoe ho velo mandrakizay ty olombelo. Laha tsy nanota Adama, le tsy ho nisy olo nieritseritsy hoe tsy hisy fiaina mandrakizay zao. Ndre atao raha sarotsy inoa aza henanizao ty hoe hiay mandrakizay, le afaky matoky tsika fa hisy raha zay satria fa nanome an’ny Anakilahiny tena teany iny Jehovah mba hahatanteraky an’ny raha zay.​—Rom. 8:32.

10. Ino ty raha fa tsy linin’ny voahosotsy noho ty aondry hafa?

¹⁰ Tean’i Jehovah hieritseritsy mikasiky fiaina mandrakizay tsika henanizao ndre amy hoavy aza vo ho tanteraky raha zay. Fa tsy linin’ny voahosotsy reo ty hiay an-danitsy any satria hiaraky manjaka amy Kristy rozy ka handay an’ny tany toy. (Apok. 20:6) Tsy linin’ny aondry hafa koa ty hiay amy paradisa an-tany etoy satria fa tsy hisy sasy ty fijalea noho ty alahelo amy fotoa zay. (Apok. 21:3, 4) Anisan’ny aondry hafa mitamà hiay mandrakizay an-tany etoy va iha? Tsy ambany valisoanao zay laha ohary amy fiaina an-danitsy any! Ino ty antony? Satria niforonin’i Jehovah hiay an-tany etoy ty olombelo. Ka lafa hiay mandrakizay an-tany etoy tsika le ho sambatsy tanteraky.

11-12. Ino ty fitahia sisany miamby antsika amy Paradisa ao? (Henteo koa sary io.)

¹¹ Mba eritsereto moa hoe hanao akory ty fiainanao lafa amy paradisa ao. Fa tsy hiasa loha mikasiky arety noho fahafatesa sasy iha. (Isa. 25:8; 33:24) Hamean’i Jehovah anao koa ze raha iaby irinao. Ino iaby, ohatsy, ty raha teanao hianara? Ta hahay soa mikasikasiky ty biby va iha? Sa ta hahay moziky? Sa ta hahay hamboatsy sary? Azo antoky fa hila olo mahay manao plan trano, noho mpamboatsy trano tsika lafa amy paradisa ao. Hilà koa ty olo hamboly, hiketriky hany, hamboatsy fitaova, noho hikarakara zaridein. (Isa. 35:1; 65:21) Hanam-potoa hianara ze raha teanao hianara iha satria hiay mandrakizay.

¹² Tena ho falifaly tsika lafa hitsena an’olo hovelomy amy maty rey! (Asa. 24:15) Ho falifaly koa iha satria hitombo ty raha hainao mikasiky an’i Jehovah lafa mianatsy ty raha sankarazany niforoniny iha. (Sal. 104:24; Isa. 11:9) Fa ty tena vatan-draha, ho falifaly avao iha lafa manompo an’i Jehovah satria fa tsy hanao raha mampalahelo azy noho fa tsy hangataky fanenga hadisoa sasy! Fitahia soasoa manao ani-reo va le hatakalonao ‘fifalea tsielatsiela avao, ka hanotanao’? (Heb. 11:25) Azo antoky fa tsy hanao ani-zay iha! Tsy misy raha soa mandilatsy an’ny fitahia ho azontsika reo laha mbo amy tontolo toy eto. Tiarovo fa tsy hoe raha tamàny avao ty Paradisa, fa raha tena hiainantsika mihintsy amy farany. Ho tanteraky raha iaby reo satria tena tea antsika Jehovah ka nameany ho vilim-panavota ho antsika Anakilahiny iny.

ASEHÒ HOE ANKASITRAHANAO TY FITIAVAN’I JEHOVAH

13. Akory ty ampisehoantsika hoe ankasitrahantsika ty fitiavan’i Jehovah antsika? (2 Korintianina 6:1)

¹³ Akory ty ampisehoantsika hoe mankasitraky an’i Jehovah tsika noho ie nanome ty vilim-panavota? Amy fanaova ty asany amy pilasy voalohany. (Mat. 6:33) Laha ty marina, nimaty Jesosy “mba tsy ho velo ho ahi-ty vatany sasy ze velo, fa ho ani-azy fa nimaty ho an-drozy sady fa nivelomy iny.” (2 Kor. 5:15) Tena soa fanahy Jehovah sady nanenga tanteraky ty hadisoantsika, ka tokony hanao ze azontsika atao tsika mba hanompoa azy ho fankasitrahantsika ty raha nataony ho antsika.​—Vakio 2 Korintianina 6:1.

14. Akory ty ampisehoantsika hoe matoky noho manoriky ty tari-dalan’i Jehovah tsika?

¹⁴ Asehontsika koa hoe mankasitraky ty fitiavan’i Jehovah tsika laha matoky azy noho manoriky ty tari-dalany. Akory ty anaovantsika ani-zay? Lafa tsika, ohatsy, hanapa-kevitsy hoe zisiky aia ty fianara hataontsika na ino ty asa hataontsika, le tokony dinihintsika hoe ino ty tean’i Jehovah hataontsika. (1 Kor. 10:31; 2 Kor. 5:7) Vomaiky tsika hino an’i Jehovah noho hifandramby marìny aminy laha mandramby fanapahan-kevitsy miory amy finoantsika. Vomaiky ho azontsika antoky koa ty fanantenantsika hiay mandrakizay.​—Rom. 5:3-5; Jak. 2:21, 22.

15. Akory ty ampisehoantsika ty fankasitrahantsika amy vanim-potoan’ny Fahatiarova?

¹⁵ Mbo misy fomba hafa koa azontsika ampisehoa hoe mankasitraky ty fitiavan’i Jehovah tsika. Manao ze azontsika atao amy vanim-potoan’ny Fahatiarova zao mba hampisehoa amy Jehovah hoe mankasitraky ty vilim-panavota tsika. Ankoatsin’ny fanomana ataontsika mba hanatreha Fahatiarova, le afaky manasa ty hafa hanatriky Fahatiarova koa tsika. (1 Tim. 2:4) Hazavao amin’olo asànao rey ty raha hatao amy Fahatiarova any. Soa laha atoronao an-drozy ty video amy jw.org ao hoe Nanino Jesosy ro Nimaty? noho ty hoe Tiarovo ty Nahafatesan’i Jesosy. Tsy tokony halinon’ny anti-panahy ty manasa ani-azy fa tsy mitory sasy rey. Mba eritsereto moa ty fifalea hisy an-danitsy any noho an-tany etoy laha misy amy aondrin’i Jehovah nitrobo rey mimpoly miaraky amy ty aondriny ndraiky! (Lioka 15:4-7) Ndao ataontsika raha kendrè ty hiarahaba ze olo manatriky Fahatiarova. Tsy hoe amintsika samby tsika avao, fa amin’olo vaovao na fa ela tsy nanatriky fivoria rey. Teantsika laha mahatsapa voaramby soa rozy!​—Rom. 12:13.

16. Manino tsika ro tokony hampitombo ty fanompoantsika amy vanim-potoan’ny Fahatiarova?

¹⁶ Afaky mampitombo ty fanompoanao an’i Jehovah va iha amy vanim-potoan’ny Fahatiarova? Laha manao ani-zay iha, le asehonao hoe ankasitrahanao ty raha iaby nataon’i Jehovah noho Jesosy ho antsika. Arakaraky ty hampitomboantsika ty fanompoantsika an’i Jehovah ro ahitantsika hoe manoha antsika ie sady vomaiky tsika hatòky azy. (1 Kor. 3:9) Anovo azo antoky koa sanandro hoe ataonao famakia Baiboly amy Fahatiarova amy Fandinihana ny Soratra Masina Isan’andro ao rey na amy tablò amy kahiem-pivoria ao iny. Azonao atao mihintsy aza ty mianatsy soa an’ny andinin-teny reo.

17. Ino ro mahafalifaly an’i Jehovah? (Henteo koa ty efajoro hoe “Akory ty Ampisehoantsika hoe Mankasitraky an’i Jehovah Tsika?”)

¹⁷ Mazava ho azy, fa mety hahavy anao tsy hahavita hanoriky an’ny soso-kevitsy niresahy tamy lahatsoratsy toy ato ty raha iainanao. Fe tiarovo hoe tsy ampitovizin’i Jehovah amy ty raha vitan’olo hafa ty raha vitanao, fa ty am-ponao ao ro henteany. Falifaly ie lafa mahita anao mankasitraky an’ny fanomeza lafovily nameany iny, zany hoe ty vilim-panavota.​—1 Sam. 16:7; Mar. 12:41-44.

18. Manino tsika ro mankasitraky an’i Jehovah Ndranahary noho Jesosy Kristy?

¹⁸ Tsy hoe ahazoantsika fanengà hadisoa avao ty vilim-panavota, fa afaky manampy antsika ho naman’i Jehovah noho mitamà hiay mandrakizay koa. Enganè asehontsika avao hoe ankasitrahantsika ty fitiavan’i Jehovah satria nanome antsika an’ny fitahia soasoa reo ie. (1 Jaona 4:19) Enganè asehontsika koa ty fankasitrahantsika an’i Jesosy, satria tena tea antsika ie ka nanome ty ainy ho antsika!​—Jaona 15:13.