Miezaha Hianatsy Raha Vaovao baka amy Fampianara Fototsy amy Baiboly ao Rey

1. Ino ty vokatsin’ny fampianaran’ny Baiboly taminao tamin’iha vo nianatsy fahamarina?

NANOVA ty fiainantsika ty fampianara fototsy amy Baiboly ao. Lafa nihaintsika, ohatsy, hoe Jehovah ty anara-Ndranahary, le nanomboky ninama aminy tsika. (Isa. 42:8) Lafa nahay ty marina mikasiky ty maty tsika, le tsy nieritseritsy sasy hoe mijaly longontsika fa nimaty rey. (Mpto. 9:10) Lafa nihaintsika koa hoe mampitamà Paradisa an-tany etoy Ndranahary, le tsy niasa loha marè mikasiky ty hoavintsika tsika. Natoky tsika fa afaky hiay mandrakizay, fa tsy hoe hiay anatin’ny 70 na 80 tao avao.​—Sal. 37:29; 90:10.

2. Manino Petera ro nampahatiaro ani-azy fa nanompo an’i Jehovah fa ela rey hoe soa laha tiarovin-drozy avao fampianara fototsy amy Baiboly ao rey? (2 Petera 1:12, 13)

² Tsy tokony ataontsika ambanin-draha mihintsy ty fampianara fototsy amy Baiboly ao. Nanoratsy tamy Kristiana ‘niory soa tamy fahamarina’ rey apostoly Petera amy taratasiny faharoe ao. (Vakio 2 Petera 1:12, 13.) Fe tamy fotoa zay, nisy mpampianatsy sandoky noho olo tsy matahotsy a-Ndranahary tamy fiangona eo ta hitariky ty rahalahy noho anabavy hiala amy fahamarina. (2 Pet. 2:1-3) Ta hampahery ty mpiara-manompo aminy Petera, mba hanampea an-drozy ho voaro amy fampianaran-diso ataon’olo reo. Mba hanampea an-drozy amy zay, le nampahatiaroviny an-drozy ty fampianara sisany fa nianaran-drozy. Hanampy an-drozy tsy hivaliky zisiky farany fampianara rey.

3. Hazavao amy ohatsy hoe manino ty Kristiana iaby ro tokony handiniky ty fampianara fototsy amy Baiboly ao avao?

³ Ndre fa ela aza ty naha Kristiana antsika, le mety hianatsy raha vaovao baka amy fampianara fototsy amy Baiboly ao rey tsika. Toy misy ohatsy: Ndao atao hoe misy mpiketriky raiky fa ela noho mpiketriky raiky vaovao samby hiketriky lasopy legimy. Ndre mitovy aza ty raha ampiasàn-drozy, le azo antoky fa mpiketriky fa ela iny ro mahita fomba sankarazany hiketreha an’ny lasopy iny noho hampatsiro azy. Manahaky ani-zay koa, fa mpanompon’i Jehovah fa ela rey ro mahita hevitsy sankarazany azo anoriha ty fampianara fototsy amy Baiboly ao laha ampitovizy amin’olo vo mianatsy Baiboly. Azo inoa fa niova ty raha iainantsika na ty tombontsoa ananantsika liany nahavita batisa antsika. Ka lafa mandiniky an’ny fampianaran’ny Baiboly nianarantsika taloha rey tsika, le mety hahita raha vaovao azontsika ianara. Ndao hohenteantsika hoe ino ty azon’ny Kristiana fa nanompo an’i Jehovah fa ela rey ianara baka fampianara fototsy telo retoa.

JEHOVAH RO MPAMORO

4. Ino ty vokany lafa nihaintsika hoe Jehovah ro Mpamoro?

⁴ Ndranahary ro namboatsy ty raha iaby. (Heb. 3:4) Haintsika fa hendry noho farani-ze mahery azy Mpamoro an’ny tanintsika toy noho ty raha mananay iaby iny. Ie ro namboatsy antsika, ka hainy soa amy an-tsipiriany tsika. Tsy vitani-zay, fa mikarakara antsika koa ie. Hainy hoe ino ty tena mahasoa antsika. Tena nanova noho nampisy dikany ty fiainantsika ty fampianara fototsy hoe Jehovah ro Mpamoro.

5. Ino ty fahamarina manampy antsika hiambany? (Isaia 45:9-12)

⁵ Mampianatsy antsika hiambany koa ty fahamarina hoe Jehovah ro Mpamoro. Lafa nanome tsiny an’i Jehovah, Joba sady nihevitsy ty vatany ho tsy nanan-tsiny, le nampahatiarovin’i Jehovah azy hoe Mpamoro farani-ze Mahery ie. (Joba 38:1-4) Nanampy an’i Joba raha zay mba hahatakatsy hoe tozoro marina avao ty raha ataon’i Jehovah. Mifanaraky amy zay mihintsy ty raha nisoratin’Isaia mpaminany tafara atoy hoe: “Ty fotaky va le hivola amy ty Mpamakopako azy hoe: ‘Ino raha ataonao toy?’”​—Vakio Isaia 45:9-12.

6. Lafa manao akory ro tena ilà ty mametsivetsy ty fahendrean’i Jehovah noho ty heriny? (Henteo koa sary reo.)

⁶ Laha fa nanompo an’i Jehovah fa ela ty Kristiana raiky, le mety hanomboky hiantehitsy marè amy ty hevitsiny manoka, fa tsy hiantehitsy amy Jehovah noho ty Safàny mba hahazoa tari-dala. (Joba 37:23, 24) Fe manao akory laha mieritseritsy laliky ty fahendrea miavaky ananan’i Jehovah noho ty heriny ie? (Isa. 40:22; 55:8, 9) Hanampy azy raha zay mba hiambany avao noho hanity ty fomba fihevitsiny.

7. Ino ty nataon’i Rahela mba hahavy azy haneky fanovà?

⁷ Tsapan’i Rahela, ranabavy mipetraky a Slovenỳ any zay hoe nanampy azy haneky fanovà ataon’ny fandamina ty fametsevetseany mikasiky an’ny Mpamoro iny. Nivola ie hoe: “Tsy mora tamiko kindraiky ty naneky ty fanapahan-kevitsy nataoni-azy mitariky reo. Ndre fa baka nanenty an’ny Vaovao Farany Faha-8 baka amy Filan-kevi-pitantana 2023 iny, ohatsy, aho le nihafahafa tse tamy voalohany lafa nahita ranadahy manao lahateny fe misy volom-bava. Farany nivavaky tamy Jehovah aho mba ho zatsy an’ny fanovà iny.” Nihain’i Rahela hoe afaky mitariky ty fandaminany amy fomba tena soa Jehovah, azy Mpamoro ty lanitsy noho ty tany iny. Laha sarotsy aminao ty maneky fanazavà vaovao na toromariky vaovao, manino laha miambany ka mametsivetsy ty fahendrea noho ty herin’ny Mpamoro antsika iny?​—Rom. 11:33-36.

MANINO RO ENGÀ-NDRANAHARY HISY TY FIJALEA?

8. Manino ro mahasoa antsika ty mahay ty antony mbo anengà-Ndranahary ty fijalea hisy?

⁸ Manino ro engà-Ndranahary hisy ty fijalea? Meloky a-Ndranahary ty olo sisany tsy mahay an’ny valin’ny fanontanea io na mieritseritsy mihintsy hoe tsy misy Ndranahary zao! (Ohab. 19:3) Fe haintsika hoe mijaly ty olombelo satria nandova ota ka lasa tsy lavorary, fa tsy hoe Jehovah ro nampisy ty fijalea. Haintsika koa hoe manam-pahareta Jehovah, ka an-tapitrisany ty olo lasa nahay azy noho nahita hoe akory ty hangalan’i Jehovah tanteraky ty fijalea. (2 Pet. 3:9, 15) Nampahery antsika sady nahavy antsika nifandramby marìny amy Jehovah ty fahaizantsika an’ny fahamarina reo.

9. Amy raha manao akory tsika ro tena mila mieritseritsy ty antony mahavy an’i Jehovah mbo manenga ty fijalea hisy?

⁹ Haintsika fa mila manam-pahareta tsika lafa mandiny ty fotoa hangalan’i Jehovah ty fijalea. Fe lafa miatriky raha sarotsy na maty longo tsika, na tratsin’ny tsy rariny tsika na ty fianakaviantsika, le mety hanao ho zao tsika hoe manino Jehovah tsy manao raha malaky io. (Hab. 1:2, 3) Amy fotoa zay, hendry tsika laha mieritseritsy ty antony mahavy an’i Jehovah mbo manenga ty olo marina hijaly.a (Sal. 34:19) Azontsika vetsevetsè koa ty fikasàny hoe hafahiny tsy hisy mandrakizay ty fijalea.

10. Ino ty nanampy an’i Anne lafa nimaty reniny?

¹⁰ Afaky manampy antsika hiaritsy raha sarotsy ty fahaizantsika ty antony mahavy an’i Jehovah mbo manenga ty fijalea hisy. Zao ty nivolanin’i Anne, ranabavy mipetraky amy nosy Mayotte, an’Ocean Indien any: “Tena nalahelo biby aho lafa nimaty reniko, tao vitsivitsy lasa zay. Fe nitiaroviko avao hoe tsy baka amy Jehovah ty fijalea. Tena fa tsy lininy ty hanafaky ty fijalea iaby noho hamelo an’ny longontsika nimaty rey. Lasa milamin-tsay aho lafa mametsivetsy an’ny fahamarina reo, ndre nalahelo biby aza lafa nimaty reniko.”

11. Manino ro manampy antsika hitory avao ty fahaizantsika ty antony mahavy an’i Jehovah mbo manenga ty fijalea hisy?

¹¹ Handrisiky antsika hitory avao ty fahaizantsika ty antony mahavy a-Ndranahary manenga ty fijalea hisy. Lafa baka nanazava Petera hoe manam-pahareta Jehovah satria teany hibebaky noho ho avotsy ty olo, le zao ty nivolaniny: “Diniho hoe olo tokony hanao akory nareo! Tokony hana fandaisam-bata masy noho hahafoy tena ho a-Ndranahary nareo.” (2 Pet. 3:11) Anisan’ny ‘fahafoizan-tena ho a-Ndranahary’ ty fanompoa ataontsika. Tea olo manahaky an’ny Babantsika iny tsika. Teantsika hiay amy tontolo vaovao ao rozy. Manam-pahareta Jehovah, ka manome fahafaha ty olo mbaminareo eny hanompo azy. Tena tombontsoa ty hoe miaraky miasa amy Ndranahary noho manampy olo maro araky ze azo atao, mba hianatsy mikasiky azy alohan’ny hiavian’ny farany!​—1 Kor. 3:9.

MIAY AMY “ANDRO FARANY” TSIKA

12. Manino ro mahasoa antsika ty mahay hoe miay amy “andro farany” tsika?

¹² Resahin’ny Baiboly mazava soa hoe hanao akory ty toetsin’olo amy “andro farany.” (2 Tim. 3:1-5) Hitantsika ty fahatanterahan’ny faminania io laha vo manenty ty manodidy antsika tsika. Vomaiky tsika resy lahatsy, fa azo atokisa ty Safà-Ndranahary lafa hitantsika hoe miharaty ty toe-tsain’olo.​—2 Tim. 3:13-15.

13. Ino ty tokony hoeritseretintsika baka amy fanohara nivolanin’i Jesosy amy Lioka 12:15-21 iny?

¹³ Ty fahaizantsika hoe miay amy andro farany tsika, le manampy antsika hifantoky amy ze tena vatan-draha koa. Tena ilàntsika ty manao ani-zay laha hentea ty fanoharan’i Jesosy amy Lioka 12:15-21. (Vakio.) Manino lahilahy mpanarivo iny ro nivolany hoe “tsy mandiniky”? Satria diso ty raha nataony amy pilasy voalohany, fa tsy hoe mpanarivo ie. Namory ‘hanàna ho ahi-ty vatany ie, kanefa tsy nimpanarivo anatreha-Ndranahary eo.’ Tena tsy nety ty raha nataony satria tsy nampiasa soa ty fotoany ie. Nivola taminy Ndranahary hoe: “Hisy hamono iha androany haly.” Ino ty ianarantsika baka amy tantara io? Tena kely sisa le ho rava tontolo toy, ka soa tsika laha mieritseritsy hoe: ‘Hita amy raha ataoko va hoe mifantoky amy ze tena vatan-draha aho? Ampirisihiko hifantoky amy ze tena vatan-draha va ty anako? Mampiasa ty heriko, ty fotoako, noho ty dralako va aho mba hahampanarivo ahy sa mba hamoriako hanàna an-danitsy any?’

14. Manino ty tantaran’i Miki ro manampy antsika?

¹⁴ Lafa hitantsika hoe fa miay amy andro farany vatany tsika, le hohaintsika ty fanapahan-kevitsy tokony hataontsika. Zay mihintsy ty raha niseho amy ranabavy Miki. Zao ty nivolaniny: “Lafa nivita ty fianarako, le naniry mafy aho mba hahita asa ahafahako mianatsy mikasiky ty biby. Fe ta hanao mpisava lala maharitsy koa aho sady ta hanompo amy pilasy mila mpitory maro any. Farany nanoro hevitsy ahy ty namako matotsy tamy fiangonanay eo. Nivola tamiko rozy hoe diniho soa laha ho vitanao ty hoe hanao an’ny asa teanao hatao iny, kanefa mbo hanao mpisava lala sady hanompo amy pilasy mila mpitory maro any. Nampahatiarovin-drozy ahy hoe kely sisa le ho rava tontolo toy. Nivola koa rozy hoe lafa amy tontolo vaovao any, le afaky hianatsy mikasiky ty biby iabiaby aho satria hiay mandrakizay. Farany aho nanapa-kevitsy hanao raha tsy mandany fotoa noho tena mahasoa. Nanao asa ahafahako nanao mpisava lala maharitsy aho sady nifindra amy pilasy mila mpitory maro an’Ekoatera any tafara atoy.” Manao ty asan’ny faritsy amy tany io any henanizao Miki morovaly.

15. Mety hanao akory ty olo lafa maharè ty vaovao soa? Manomeza ohatsy. (Henteo koa sary reo.)

¹⁵ Tsy tokony ho kivy tsika laha tsy maneky ty vaovao soa ty olo amy voalohany. Afaky miova ty olo. Diniho moa Jakoba rahalahin’i Jesosy. Nihitany ty nahabe an’i Jesosy, ty naha lasa Mesia azy, noho ty fahaizany mampianatsy. Fe tsy nanaraky an’i Jesosy, Jakoba tanatin’ny tao maro. Tafaran’ny nameloma an’i Jesosy tamy maty vo nilasa mpianatsy Jakoba sady nibe zotom-po!b (Jaona 7:5; Gal. 2:9) Ka kivy laha mbo tsy kinto amy fahamarina ty longonao. Miezaha koa hitory ndraiky amin’olo tsy nijanjy ty hafatsy mikasiky an’ny Fanjakà iny. Tiarovo fa miay amy andro farany tsika, ka tena malisa ty asa fitoria. Mety hisy vokany amin-drozy afarafara any ty raha resahinao henanizao, mety hoe amy fanombohan’ny fijalea bevata mihintsy aza.c

ANKASITRAHO TY FAMPAHATIAROVA BAKA AMY JEHOVAH

16. Ino ty soa nirambesinao baka amy fampahatiarovan’i Jehovah rey? (Henteo koa ty efajoro hoe “Ampiasao ty Fahamarina amy Baiboly ao mba Hanampea ty Hafa.”)

¹⁶ Natao ho an’olo mbo tsy naharè ty fampianara fototsy amy Baiboly ao mihintsy ty sisany amy sakafo ara-panahy azontsika. Natao ho an’olo tsy Vavolombelo, ohatsy, ty lahateny ho ahi-ty maro atao sankerinandro, ty lahatsoratsy noho video sisany amy jw.org ao, noho ty gazety ho ahi-ty maro. Ndre tsika koa aza mandramby soa baka amy fampahatiarova reo. Mampitombo ty fitiavantsika an’i Jehovah raha reo, vomaiky mahavy antsika hino ty Safàny, sady manampy antsika hahay hampianatsy olo ty fahamarina fototsy.​—Sal. 19:7.

17. Amy raha manao akory iaby iha ro mety hametsivetsy ty fampianara fototsy amy Baiboly ao?

¹⁷ Tena falifaly tsika Vavolombelon’i Jehovah lafa mihamazava amintsika ty fahamarina amy Soratsy Masy ao. Fe tena falifaly koa tsika satria nanampy antsika hahay ty fahamarina fampianara fototsy amy Baiboly ao rey. Lafa mahazo tari-dala baka amy fandamina tsika, fe mieritseritsy hoe ty hevitsintsika na ty fanaovantsika raha ro tena soa, le mila miambany tsika sady tiarovintsika hoe Jehovah, azy Mpamoro hendry noho mahery iny ro mitariky ty fandaminany. Laha miaritsy raha sarotsy tsika na ty longontsika, le azontsika atao ty miezaky hanam-pahareta sady mieritseritsy ty antony mbo anengà-Ndranahary ty fijalea hisy. Laha tapa-kevitsy hampiasa soa ty fotoantsika noho ty hananantsika koa tsika, le asehontsika hoe miay amy andro farany tsika sady kely sisa le ho avy ty farany. Enganè ty fampahatiarova baka amy Jehovah mba hanatanjaky antsika, hanampy antsika ho hendry, noho handrisiky antsika hanompo azy avao.