Fa “Nianatsy” ho Afa-po va Iha?

1. Manao akory olo afa-po zao, le tsy midika ino raha zay?

AFA-PO amy ty raha anananao va iha? Falifaly noho milamin-tsay ty olo afa-po satria mifantoky amy fitahia amean’i Jehovah azy. Tsy masiatsiaky ie na meloky lafa misy raha tsy ananany. Fe tsy midika zay hoe tsy midary ty fiainantsika tsika laha miezaky ho afa-po. Tena soa, ohatsy, laha miezaky mafy ty Kristiana mba hampitombo ty fanompoany an’i Jehovah. (Rom. 12:1; 1 Tim. 3:1) Fe laha miezaky ho afa-po tsika, le ho falifaly avao ndre mbo tsy azontsika aza ty tombontsoa teantsika ho azo.

2. Manino ro raty ty hoe tsy mety afa-po?

² Laha tsy afa-po amy ty raha ananantsika tsika, le mety handramby fanapahan-kevitsy raty. Mety handany fotoa amy asa avao, ohatsy, ty olo tsy mety afa-po mba hahazoany ty raha tsy tena ilàny. Mampahaleho fa nisy Kristiana vitsivitsy lasa nangalatsy ty raha teany hanàna na nangalatsy drala mihintsy. Mety nieritseritsy rozy hoe: ‘Tokony ho ahy mihintsy toy,’ na ‘Tena mila an’ny toy aho henanizao,’ na ‘Alako tse drala toy, bakeo ampoliko avao.’ Fe ndre ino ndre ino ty antony angalaran’olo raiky, le mampalahelo an’i Jehovah noho tsy manome voninahitsy azy. (Ohab. 30:9) Diso fanantenà koa ty olo sisany lafa tsy mahazo tombontsoam-panompoa, ka lasa tsy manompo an’i Jehovah sasy. (Gal. 6:9) Manino ty olo raiky nanokam-bata ho an’i Jehovah ro mety hieritseritsy hanao ani-zay? Satria lasa tsy miezaky ho afa-po sasy ie.

3. Manome toky antsika amin’ino ty Filipianina 4:11, 12?

³ Afaky miezaky ho afa-po tsika iaby. Niresaky apostoly Paoly hoe: ‘Fa nianatsy ho afa-po amy ze raha misy eo ie.’ (Vakio Filipianina 4:11, 12.) Tamy fotoa nahagadra azy ty nanoratany an’ny safà reo. Fe ndre zay, le nifalifaly avao ie. Tsy maintsy “nianatsy ho afa-po avao” ie. Laha sarotsy amintsika ty ho afa-po, le manome toky antsika safàn’i Paoly reo noho ty raha niainany hoe afaky ho afa-po koa tsika ndre ino ndre ino ty raha iainantsika. Fe tsy tokony hieritseritsy tsika hoe mandeha ho azy miezaky ho afa-po amy ze misy eo zao. Tsy maintsy mianatsy ho afa-po tsika. Amy fomba akory? Ndao tsika handiniky toetsy raiky afaky manampy antsika ho afa-po.

MIEZAHA HAHAY HANKASITRAKY

4. Manino tsika ro ho afa-po laha mahay mankasitraky? (1 Tesalonianina 5:18)

⁴ Afa-po amy ze ananany ty olo mahay mankasitraky. (Vakio 1 Tesalonianina 5:18.) Laha fa mana ty raha tena ilàntsika, ohatsy, tsika le tokony hankasitraky ani-zay. Laha manao ani-zay tsika, le tsy hiasa loha marè amy ty raha mbo tsy ananantsika. Laha mankasitraky ty tombontsoam-panompoa ananantsika henanizao tsika, le hiezaky hamita soa azy, fa tsy hila fomba hahazoa tombontsoa hafa teantsika hanàna. Zay mahavy ty Soratsy Masy mampirisiky antsika hankasitraky an’i Jehovah io lafa tsika mivavaky! Laha mahay mankasitraky tsika, le hahatsapa “an’ny fiadana-Ndranahary, azy ambony lavitsy mandilatsy ze faran’ny hain’olombelo iny.”​—Fil. 4:6, 7.

5. Ino iaby ty antony tokony nahavy ty Israelita hankasitraky an’i Jehovah? (Henteo koa sary io.)

⁵ Diniho ty raha niseho tamy Israelita reo. Nimenimeny matetiky tamy Jehovah rozy satria ta hihina sakafo nihanin-drozy ta Ejipta tany rey. (Nom. 11:4-6) Marina fa tsy mora ty fiaina tan-diomonto any. Fe ino ty hanampy an-drozy ho afa-po? Tokony nivetsevetsen-drozy noho nankasitrahan-drozy ty raha fa nataon’i Jehovah ho an-drozy. Niandevo noho nampijalijalỳ rozy ta Ejipta any, fe nandefasan’i Jehovah loza folo Ejipsianina rey mba hanavota an-drozy. Lafa niala baka Ejipta any rozy, le nampean’i Jehovah, ka nahazo volafoty, volamena, noho akanjo baka amy Ejipsianina rey. (Eks. 12:35, 36) Lafa ho nitratsin’ny maramilan’i Farao rey tamy Riaky Mena eo ty Israelita, le nanao fahagagà Jehovah ka nisarahiny roe riaky iny. Lafa tan-diomonto any koa rozy, le namean’i Jehovah mana ho sakafon-drozy sanandro. Ka ino avao mbo nampimenimeny an-drozy io? Satria tsy nety afa-po rozy sady tsy nankasitraky ty raha nananan-drozy, fa tsy hoe ty sakafon-drozy ro tsy niampy.

6. Ino iaby ty raha hanampy antsika hahay hankasitraky?

⁶ Ino zany ty azonao atao mba hahay hankasitraky? Voalohany, manokàna fotoa sanandro mba hametsevetsea ty raha nahafalifaly anao. Azonao soraty mihintsy ty raha roe na telo nahafalifaly anao. (Fitom. 3:22, 23) Faharoe, mahaiza mankasitraky. Isaoro ty olo nanao raha ho anao. Fa ty tena vatan-draha, misaora an’i Jehovah avao sanandro. (Sal. 75:1) Fahatelo, olo mahay mankasitraky ro ataovo nama. Laha olo tsy mahay mankasitraky ro ataonao nama, le hanahaky azy koa iha. Fa laha olo mahay mankasitraky ro inamànao, le hanahaky azy koa iha. (Deot. 1:26-28; 2 Tim. 3:1, 2, 5) Laha miezaky hahay hankasitraky tsika, le tsy hasiatsiaky lafa miatriky raha sarotsy na tsy mahazo ty raha teantsika.

7. Ino ty nanampy an’i Aci hahay hankasitraky, le ino ty vokany?

⁷ Diniho ty raha niseho tamy Aci, mipetraky Indonezỳ any. Nivola ie hoe: “Nanomboky nampitaha ty raha niainako tamy mpiara-manompo amiko reo aho, tamy arety miparitaky COVID-19 iny. Lasa tsy niafa-po aho vokatsini-zay.” (Gal. 6:4) Ino ty nanampy azy hiova? Nivola Aci hoe: “Nivetsevetseko ty raha soa amean’i Jehovah ahy sanandro, noho ty raha soa maro niazoko lafa zaho tanatin’ny fandamina-Ndranahary. Bakeo nisaotsy an’i Jehovah aho. Nanampy ahy ho afa-po raha zay.” Afaky manao an’ny raha nataon’i Aci reo koa va iha laha mahatsapa hoe tsy mety afa-po?

MIEZAHA HIAMBANY AVAO

8. Ino ty raha fa ho namandriky an’i Baroka?

⁸ Nisy fotoa Baroka mpitan-tsoratsin’i Jeremia tsy niafa-po tamy fiainany. Sarotsy tamy Baroka, ohatsy, ty nanoha an’i Jeremia lafa nanambara hafatsy tamy firenena raiky tsy nahay nankasitraky Jeremia. Lasa tsy nifantoky sasy Baroka. Tsy nifantoky tamy raha tean’i Jehovah hataony ie, fa atao raha lasa nieritseritsy marè ty vatany noho ty raha teany hatao. Nampiasa an’i Jeremia, Jehovah, ka nivola tamy Baroka hoe: “Iha mila raha bevata ho anao avao. Ka mila an’ny raha zay sasy.” (Jer. 45:3-5) Ta hivola zany Jeremia hoe: “Miezaha ho afa-po amy ze raha fa anananao.” Nijanjy an’ny fananara zay Baroka, ka ninama marìny amy Jehovah avao.

9. Manino ty 1 Korintianina 4:6, 7 ro manampy antsika hana toe-tsay soa mikasiky ty tombontsoam-panompoa? (Henteo koa sary reo.)

⁹ Mety hisy Kristiana hieritseritsy hoe ie ro maeva hahazo ty tombontsoam-panompoa raiky. Mety hoe tena mahay raha ie, mazoto miasa, na ampy traikefa, na samby ananany iaby raha telo reo. Fe mety olo hafa ro nahazo an’ny tombontsoa teany iny. Ino ty hanampy azy tsy ho meloky? Afaky vetsevetseny ty raha nivolanin’ny apostoly Paoly amy 1 Korintianina 4:6, 7 ao. (Vakio.) Baka amy Jehovah ty tombontsoa noho ty fahaiza iaby ananantsika. Tsy maeva hahazo an’ny fanomeza reo tsika. Fe namean’i Jehovah antsika raha reo satria tena soa fanahy ie sady tea antsika.​—Rom. 12:3, 6; Efes. 2:8, 9.

10. Ino ty hanampy antsika hiambany?

¹⁰ Afaky manampy antsika hiambany ty fandiniha ty modely namean’i Jesosy antsika. Diniho moa ty raha niseho tamy haly nanasàn’i Jesosy ty tombon’ny apostoliny rey. Nivola apostoly Jaona hoe: ‘1) Fa hain’i Jesosy hoe fa namean’ny Baba an-tanany eo ty raha iaby, 2) baka amy Ndranahary ie, le 3) ho amy Ndranahary any ie. ... Bakeo nanomboky nanasa tombon’ny mpianatsiny rey ie.’ (Jaona 13:3-5) Afaky nieritseritsy Jesosy hoe apostoliny rey ro tokony hanasa ty tombony. Fe tsy nieritseritsy mihintsy Jesosy hoe tokony hana trano soa, drala be, na fiaina soasoa ie satria anaki-Ndranahary. (Lioka 9:58) Niambany Jesosy, sady afa-po tamy ze raha nananany. Nanome modely tena soa ho antsika ie.​—Jaona 13:15.

11. Manino ty fiambanea ro nanampy an’i Dennis ho afa-po?

¹¹ Niezaky hiambany manahaky an’i Jesosy, rahalahy Dennis baka a Holandy any, ndre tsy mora aza raha zay. Nivola ie hoe: “Tsapako kindraiky hoe mirengirengy na tsy afa-po aho. Miseho, ohatsy, raha zay lafa azon’olo hafa ty tombontsoam-panompoa teako ho azo. Lafa miseho raha zay, le mianatsy mikasiky ty fiambanea aho. Rambesiko noty amy JW Library^® ao ze andinin-teny miresaky mikasiky fiambanea mba ho mora hitako noho azoko vakỳ ndraiky. Ampiliriko amy telefoniko ao koa ze lahateny mikasiky fiambanea, le janjiniko matetiky.a Nianarako hoe azoko hanomeza voninahitsy an’i Jehovah ty raha iaby ataoko, fa tsy hanomeza voninahitsy ty vatako. Soa fanahy Jehovah, ka ameany anjara asa tsika kiraidraiky, fe ie ro tena manao ze hahavità an’ny asa zay.” Laha manomboky tsy afa-po iha satria tsy azonao ty tombontsoam-panompoa teanao, le miezaha hiambany. Vomaiky iha amy zay hifandramby soa amy Jehovah sady ho afa-po amy ze anananao.​—Jak. 4:6, 8.

VETSEVETSEO TY RAHA AMPITAMANIN’I JEHOVAH

12. Manino ro manampy antsika ho afa-po ty raha tamanintsika amy hoavy? (Isaia 65:21-25)

¹² Vomaiky tsika ho afa-po lafa mametsivetsy ty raha soasoa ampitamanin’i Jehovah antsika amy hoavy. Resahin’i Jehovah amy bokin’Isaia ao hoe hainy ty raha sarotsy mahazo antsika. Fe mampitamà antsika koa ie fa hangalaky an’ny problemo rey. (Vakio Isaia 65:21-25.) Hipetraky amy trano soasoa tsika, hana asa mahafa-po, sady hihina sakafo matsiro noho mahasalama. Fa tsy hiasa loha amy loza mety hahazo antsika na ty anakintsika sasy tsika. (Isa. 32:17, 18; Ezek. 34:25) Tena ho soasoa ty fiainantsika amy hoavy, sady tena hisy vatany.

13. Amy raha manao akory tsika ro tena mila mifantoky amy ty raha tamanintsika?

¹³ Vomaiky tsika henanizao tena mila mifantoky amy ty raha tamanintsika. Ino ty antony? Satria miay amy “andro farany” tsika sady miatriky problemo “sarotsy atrehy.” (2 Tim. 3:1) Manampy antsika hiaritsy Jehovah sanandro, ka ameany tari-dala, hery, noho ty raha ilàntsika tsika. (Sal. 145:14) Afaky manampy antsika koa ty fananantsika fanantenà lafa miatriky raha sarotsy tsika. Mety sahira vasa iha vo mahita hany, siky, na trano ho an’ny fianakavianao. Fe midika va raha zay hoe ho sahira lava avao iha? Tsy zay mihintsy! Nampitamà anao Jehovah, fa hameany anao ze raha ilànao lafa amy Paradisa ao. Tsy hisy raha hijaleanao sasy. (Sal. 9:18; 72:12-14) Mety tratsin’ny arety miteza iha, na kivy marè, na marary mafy. Fe hampijalijaly anao mandrakizay va raha zay sady tsy ho afaky sasy? Tsy zay mihintsy. Tsy hisy arety noho fahafatesa sasy amy tontolo vaovao-Ndranahary ao. (Apok. 21:3, 4) Manampy antsika raha zay mba tsy ho meloky na hasiatsiaky, ndre ino ndre ino ty raha miseho amintsika henanizao. Afaky ho afa-po tsika ndre tratsin’ny tsy rariny, maty longo, marary, na miatriky problemo hafa. Fa manino? Satria ndre sarotsy manao akory aza ty raha mahazo antsika henanizao, le haintsika fa mandalo avao ty fijalea iaretantsika sady fa tsy hisy sasy lafa amy tontolo vaovao ao.​—2 Kor. 4:17, 18.

14. Ino ty hanampy antsika hatòky ty raha ampitamanin’i Jehovah?

¹⁴ Tena manampy antsika ho afa-po ty raha tamanintsika. Fe ino ty hanampy antsika hatòky hoe ho tanteraky vatany ty raha ampitamanin’i Jehovah? Mety mila manao solomaso, ohatsy, ty olo raiky mba hahavy azy hahita lavitsy. Manahaky ani-zay koa, fa mila mametsivetsy ty vatantsika amy Paradisa ao tsika mba hahavy antsika hatòky ty raha tamanintsika. Laha miasa loha amy resaky drala, ohatsy, tsika, le afaky mametsivetsy hoe fa tsy hilàntsika sasy ty drala sady fa tsy hisy sasy ty olo mahantra lafa amy Paradisa ao. Laha misy tombontsoam-panompoa irintsika, fe mbo tsy azontsika, le azontsika vetsevetsè hoe tsy misy dikany tombontsoam-panompoa zay laha ampitovizy amy fiaina soasoa miamby antsika lafa tsika lavorary. Hanompo an’i Jehovah an’arivony tao koa tsika. (1 Tim. 6:19) Maro ty raha mampiasa loha antsika henanizao, ka mety ho sarotsy amintsika ty hametsivetsy ty raha tamanintsika amy hoavy. Fe arakaraky ty hametsevetseantsika ty raha soasoa nampitamanin’i Jehovah antsika ro hahavy antsika tsy hifantoky amy problemo mahazo antsika.

15. Ino ty ianaranao baka amy raha nivolanin’i Christa?

¹⁵ Afaky mandramby fianara baka amy Christa, valin’i Dennis niresahintsika taloha teo iny tsika. Hoy ty asany: “Mihamalemy ty hozatsiko, ka voatery tsy maintsy mampiasa sezy misy larò aho, sady mandry am-pandrea eo avao sanandro. Tena mahatiaro mijaly aho. Nivola tamiko ty dokoterako vo tsiela hoe tsy hihasoa ty fahasalamako. Fe avy le nieritseritsy aho hoe: ‘Tsy mitovy amy fahitany azy ty fahitako ty hoavy.’ Nifantoky tamy ty raha tamaniko aho, ka lasa nilamin-tsay. Mety maro ty raha sarotsy iaretako henanizao, fe mitamà aho fa ho soasoa ty fiainako amy tontolo vaovao ao!”

“TSY MISY RAHA MAMPIJALY ANI-ZE OLO MATAHOTSY AZY”

16. Manino Davida Mpanjaka ro nivola hoe “tsy misy raha mampijaly” ani-ze olo matahotsy an’i Jehovah?

¹⁶ Ndre miezaky ho afa-po aza ty mpanompon’i Jehovah, le mbo hiatriky raha sarotsy avao. Diniho moa Davida Mpanjaka. Telo ty anany nimaty farafahakeliny. Nasaran’olo nanao raha raty ie, nivaliky aminy ty namany, sady nisy mpanjaka ta hamono azy, ka nania azy tanatin’ny tao maro. Fe ndre teo raha sarotsy reo, le zao ty nivolaniny mikasiky an’i Jehovah: “Tsy misy raha mampijaly ani-ze olo matahotsy azy.” (Sal. 34:9, 10) Manino ie ro nivola ani-zay? Satria nihainy hoe ndre nengàn’i Jehovah hiatriky raha sarotsy aza ie, le tozoro namean’i Jehovah azy avao ty raha nilàny. (Sal. 145:16) Afaky matoky manahaky an’i Davida koa tsika hoe hanampy antsika avao Jehovah lafa miatriky raha sarotsy tsika. Afaky ho afa-po zany tsika ndre ino ndre ino ty raha iainantsika.

17. Manino iha ro tapa-kevitsy ho afa-po?

¹⁷ Tean’i Jehovah ho afa-po iha. (Sal. 131:1, 2) Ataovo zany ze azonao atao mba hahavy anao ho afa-po. Laha miezaky mafy hahay hankasitraky iha, miezaky hiambany, noho matoky ty raha tamaninao, le afaky hivola hoe: “Afa-po aho.”​—Sal. 16:5, 6.