Manampy Antsika Hiaritsy Jehovah

1. Manino tsika ro mila miaritsy, le ino ty hanampy antsika hahavita ani-zay? (1 Petera 5:10)

MILA miaritsy ty vahoakin’i Jehovah satria miatriky raha sarotsy sankarazany. Ty sisany, ohatsy, tratsin’ny arety miteza, ty hafa maty longo, ao ty miatriky fanenjeha baka amy fianakaviany na baka amy manam-pahefà. (Mat. 10:18, 36, 37) Fe matokisa fa ndre ino ndre ino ty raha sarotsy atrehinao, le hanampy anao hiaritsy Jehovah.​—Vakio 1 Petera 5:10.

2. Ino ty manampy antsika hiaritsy?

² Ty hoe miaritsy le midika hoe tsy mivaliky amy Jehovah sady tsy kivy tanteraky lafa miatriky raha sarotsy, fanenjeha, noho fakam-panahy. Tsy ty herintsika manoka avao ro ahavitantsika miaritsy, fa Jehovah ro manampy antsika satria ameany “hery mandilatsy ty ahin’olombelo” tsika. (2 Kor. 4:7) Handiniky raha efatsy anampean’i Jehovah antsika tsika amy lahatsoratsy toy ato. Ho hitantsika koa hoe ino ty azontsika atao mba hahasoa antsika raha reo.

TY VAVAKY

3. Manino tsika ro afaky mivola hoe raha tena miavaky ty vavaky?

³ Nanome raha miavaky ho antsika Jehovah mba hahavitantsika miaritsy. Nataony afaky mifandramby aminy tsika ndre mpanota aza. (Heb. 4:16) Eritsereto zao: Afaky mivavaky amy Jehovah tsika ndre ombia ndre ombia, ndre ino ndre ino ty raha miseho. Afaky mijanjy antsika ie ndre ino ino ty fivolanantsika, ndre aia ty misy antsika, ndre mitoka tsika, ndre am-prizon any. (Jona 2:1, 2; Asan’ny Apostoly 16:25, 26) Ndre miasa loha marè aza tsika, ka tsy hitantsika ty raha hovolanintsika, le hain’i Jehovah avao ty raha teantsika hovolany. (Rom. 8:26, 27) Tena miavaky vatany ty vavaky!

4. Manino tsika ro afaky mivola fa mifanaraky amy sitrapon’i Jehovah ty hoe mivavaky mba hahavita hiaritsy?

⁴ Manome toky antsika Jehovah amy Safàny ao hoe: “Ndre ino ndre ino angatahintsika aminy, ka mifanaraky amy sitrapony, le mijanjy antsika ie.” (1 Jaona 5:14) Afaky mangataky amy Jehovah va tsika mba hampeany hiaritsy? Eka, satria mifanaraky amy sitrapony raha zay. Manino tsika ro mivola ani-zay? Lafa miaritsy fitsapà tsika, le afaky mamaly an’ny mpanaraty azy iny Jehovah, tsy ia zay fa Satana Devoly. (Ohab. 27:11) Mivola koa ty Baiboly hoe tena ta ‘hampiasa ty heriny Jehovah mba hanampea ty olo manompo azy amy fo iaby.’ (2 Tant. 16:9) Afaky matoky zany tsika hoe ta hanampy antsika Jehovah sady afaky manome hery ahafahantsika miaritsy.​—Isa. 30:18; 41:10; Lioka 11:13.

5. Manino ty vavaky ro manampy antsika hilamin-tsay? (Isaia 26:3)

⁵ Mivola ty Baiboly fa lafa mivavaky amy Jehovah tsika, le ‘hiamby ty fontsika noho ty saintsika ty fiadana-Ndranahary, azy ambony lavitsy mandilatsy ze faran’ny hain’olombelo iny.’ (Fil. 4:7) Tena lafovily amintsika raha zay. Lafa miatriky raha sarotsy ty olo tsy manompo an’i Jehovah, le mety hila fomba sankarazany rozy mba tsy hampiasa loha an-drozy. Ty olo sisany, ohatsy, mampiasa karazan’ny fametsevetsea laliky mba hamafàny ty raha iaby an-tsainy ao, anisani-zay ty raha mampiasa loha azy. Fe tena mampidi-doza raha zay. (Ampitovizo amy Matio 12:43-45.) Fe ndre ino ino ty raha ataon’olo mba tsy hampiasa loha azy, le tsy misy soa mandilatsy ty hoe mivavaky amy Jehovah mba hana ty fiadanany. Lafa mivavaky amy Jehovah tsika, le mampiseho hoe miantehitsy tanteraky aminy, ka hameany ‘fiadana avao.’ (Vakio Isaia 26:3.) Toy ty fomba raiky anaovan’i Jehovah ani-zay: Ampeany tsika mba hahatiaro ty fahamarina mampahery nianarantsika amy Safàny ao. Mahavy ty saintsika noho ty fontsika ho kalma fahamarina rey satria haintsika hoe mikarakara noho tea antsika Jehovah.​—Sal. 62:1, 2.

6. Ino iaby ty azonao resahy amy vavaky? (Henteo koa sary io.)

⁶ Ino ty azonao atao? Lafa miatriky raha sarotsy iha, le “apetraho amy Jehovah ze manavesatsy anao” sady mivavaha mba hahazo ty fiadanany. (Sal. 55:22) Mivavaha aminy koa mba hameany fahendrea mba hahaizanao ty tokony hataonao. (Ohab. 2:10, 11) Lafa mivavaky mafy amy Jehovah iha mba hampeany hiaritsy, le ka halino koa ty misaotsy azy. (Fil. 4:6) Miezaha hahita ty fomba anampeany anao sanandro, le ankasitraho ie satria manoha anao. Marina fa miatriky raha sarotsy iha, fe ka atao kisary tsy hita koa ty fitahia maro fa namean’i Jehovah anao.​—Sal. 16:5, 6.

TY SAFÀ-NDRANAHARY

7. Manino ro manampy antsika hiaritsy ty fianara Baiboly?

⁷ Namean’i Jehovah antsika ty Safàny mba hanampea antsika hiaritsy. Maro ty andinin-teny amy Baiboly ao manome toky antsika hoe manampy antsika Jehovah. Ndao moa tsika handiniky ohatsy raiky. Mivola ty Matio 6:8 hoe: “Hain’ny Babanareo ze raha ilànareo, ndre mbo tsy mangataky aminy aza nareo.” Jesosy ro nivola an’ny safà reo, sady ie ro mahay an’i Jehovah mandilatsy ty olo hafa. Afaky matoky zany tsika hoe hain’i Jehovah ty raha ilàntsika lafa miatriky raha sarotsy tsika sady hanampy antsika ie. Maro fampitamana mitovy amy zay amy Baiboly ao, ka afaky manampy antsika hiaritsy.​—Sal. 94:19.

8. a) Ino ohatsy ty torolalan’ny Baiboly manampy antsika hiaritsy? b) Mila manao ino tsika laha ta hahatiaro ty torolalan’ny Baiboly lafa any ty fotoa ilàntsika azy?

⁸ Manome torolala manampy antsika hiaritsy ty Baiboly. Afaky manampy antsika handramby fanapahan-kevitsy soa torolala rey. (Ohab. 2:6, 7) Mampirisiky antsika, ohatsy, ty Baiboly mba hiantehitsy amy Jehovah avao sanandro, fa tsy hiasa loha marè mikasiky ty raha mety hiseho hamaray. (Mat. 6:34) Laha zatsy mamaky ty Soratsy Masy noho mametsivetsy ty raha vakintsika tsika, le tsy ho sarotsy amintsika ty hahatiaro ty torolalan’ny Baiboly lafa any ty fotoa ilàntsika azy.

9. Manino ty tantara amy Baiboly ao ro mahavy antsika hatòky hoe hanampy antsika Jehovah?

⁹ Misy tantaran’olo natoky an’i Jehovah noho nahazo ty fanohanany koa amy Baiboly ao. (Heb. 11:32-34; Jak. 5:17) Lafa mametsivetsy an’ny tantara rey tsika, le hatòky fa Jehovah ro ‘fialofa noho hery ho antsika sady parè hanampy avao ie’ lafa miatriky raha sarotsy tsika. (Sal. 46:1) Lafa mandiniky an’ny mpanompon’i Jehovah tsy nivaliky taloha rey tsika, le lasa ta hanahaky ty finoan-drozy noho ty fiaretan-drozy.​—Jak. 5:10, 11.

10. Ino ty azonao atao mba hahasoa anao ty Safà-Ndranahary?

¹⁰ Ino ty azonao atao? Vakio sanandro ty Baiboly, le ataovo lista ze andinin-teny hitanao hoe tena manampy anao. Maro koa ty mahita hoe soa ty manao teny vakina saky maray. Hitan’ny ranabavy mana anara Mariea zay, fa marina vatany raha zay lafa ie nikarakara ty ray aman-dreniny. Voan’ny kansera ray aman-dreniny reo, le nikarakara an-drozy avao ie zisiky nahafaty an-drozy. Fe ino ty nanampy azy hiaritsy tanatin’ny fotoa zay? Nivola Marie hoe: “Mamaky andinin-teny baka amy bokikely hoe Fandinihana ny Soratra Masina Isan’andro aho, le vetsevetseko andinin-teny rey. Nanampy ahy raha zay mba hifantoky amy raha mampahery, fa tsy hiasa loha marè amy problemo iny avao.”​—Sal. 61:2.

TY MPIARA-MANOMPO

11. Manino ro mampahery ty mahay hoe tsy tsika raiky avao ro miaritsy raha sarotsy?

¹¹ Amean’i Jehovah rahalahy noho anabavy tsika mba hanampy antsika hiaritsy. Manome toky antsika raha zay hoe ‘miatriky fijalea manahaky antsika koa ty rahalahy noho anabavintsika iaby’ maneran-tany. (1 Pet. 5:9) Ndre ino ndre ino zany ty problemo atrehintsika, le miatriky ani-zay koa ty mpiara-manompo amintsika sady miaritsy avao. Midika raha zay fa afaky miaritsy koa tsika!​—Asan’ny Apostoly 14:22.

12. Ino ty azon’ny mpiara-manompo atao mba hanampea antsika, le ino koa ty azontsika atao ho an-drozy? (2 Korintianina 1:3, 4)

¹² Afaky manampy antsika hiaritsy ty mpiara-manompo. Nahatsapa ani-zay mihintsy apostoly Paoly. Matetiky ie ro nankasitraky ty olo nanampy azy lafa ie nigadra, ka nitonony mihintsy ty anaran-drozy. Nisoa fanahy noho nampahery an’i Paoly rozy, sady nanampy azy. (Fil. 2:25, 29, 30; Kol. 4:10, 11) Afaky mampahery noho manampy antsika koa ty rahalahy noho anabavy lafa miatriky raha sarotsy tsika. Afaky manao ani-zay amin-drozy koa tsika lafa mila ani-zay rozy.​—Vakio 2 Korintianina 1:3, 4.

13. Ino ty nanampy an’ny ranabavy Maya hiaritsy?

¹³ Tena nampahery an’ny ranabavy raiky a Russie any mana anara Maya zay ty mpiara-manompo. Nisavan’ny polisy ty tranony tamy 2020 iny, le nitsarà amy tribinaly any ie tafarani-zay satria niresaky ty finoany tamin’olo. Zao ty nivolanin’i Maya: “Tena nivozaky aho tamy fotoa zay, nikivy, sady nalahelo. Fe maro ty mpiara-manompo nikaiky ahy an-telefony, nandefa mesazy noho nanoratsy taratasy. Nanome toky ahy rozy hoe tena tean-drozy aho. Fa tsapako avao bakanibakany zay hoe tea ahy rozy sady fianakaviako. Fe tamy 2020 iny ro tena nahatsapako ani-zay.”

14. Ino ty azontsika atao mba hahafahan’ny mpiara-manompo hanampy antsika hiaritsy? (Henteo koa sary io.)

¹⁴ Ino ty azonao atao? Miresaha amy mpiara-manompo lafa miatriky raha sarotsy sady mifandrambesa matetiky amin-drozy. Ka misalasala mila fanampea amy anti-panahy, satria sahala amy “pilasy fivonia amy tsioky noho fialofa amy oram-baratsy” rozy. (Isa. 32:2, f.a.p.) Tiarovo koa fa miatriky raha sarotsy ty mpiara-manompo aminao. Ho falifaly iha laha manampy ty olo mila fanampea sady hahavita hiaritsy.​—Asan’ny Apostoly 20:35.

TY RAHA TAMANINTSIKA

15. Ino ty nanampy an’i Jesosy hiaritsy, le manino koa raha zay ro manampy antsika? (Hebreo 12:2)

¹⁵ Nanome fampitamana azo antoky antsika Jehovah mba hanampea antsika hiaritsy. (Rom. 15:13) Tiarovo fa ty fananan’i Jesosy raha tamany ro nanampy azy hiaritsy raha farani-ze sarotsy tamy fiainany. (Vakio Hebreo 12:2.) Hain’i Jesosy fa laha tsy mivaliky ie, le hanaporofo fa vandy iaby ze raha nivolanin’i Satana mikasiky an’i Jehovah. Fa tsy nilinin’i Jesosy koa ty hiaraky amy Babany an-danitsy any noho hiaraky manjaka amy voahosotsy rey. Manahaky ani-zay koa, fa manampy antsika hiaritsy raha sarotsy sankarazany amy tontolon’i Satana toy eto ty fitamanantsika hiay mandrakizay amy tontolo vaovao ao.

16. Ino ty nanampy an’ny ranabavy Anna hiaritsy, le ino ty ianaranao baka amy raha nivolaniny?

¹⁶ Nanampy an’ny ranabavy mana anara Anna zay ty fitamanany hiay amy tontolo vaovao ao. Nisambory valiny, le natao am-prizon any tse zisiky hiavian’ny fotoa hitsarà azy. Zao ty nivolanin’i Anna lafa niseho raha zay: “Mivavaky matetiky mikasiky ty raha ampitamanin’i Jehovah ahy aho sady mametsivetsy an’ny raha zay avao. Nanampy ahy tsy ho kivy raha zay. Haiko fa tsy maintsy mbo ho tampitsy avao ty raha sarotsy. Handresy ty fahavalony Jehovah sady hamaly soa antsika.”

17. Akory ty ampisehoantsika hoe ankasitrahantsika ty raha ampitamanin’i Jehovah? (Henteo koa sary io.)

¹⁷ Ino ty azonao atao? Manokàna fotoa mba hametsevetsea ty raha soasoa ampitamanin’i Jehovah amy hoavy. Eritsereto ty fitahia maro ho azontsika amy tontolo vaovao ao, le vetsevetseo hoe hanao akory ty fiainanao lafa ao iha. Ze raha sarotsy atrehintsika henanizao koa, le mandalo tsielatsiela avao sady maiva. (2 Kor. 4:17) Ataovo koa ze azonao atao mba hiresaha ty raha inoanao amin’olo. Eritsereto hoe tena sarotsy ty fiainan’olo tsy manompo an’i Jehovah. Miatriky raha sarotsy maro rozy, kanefa tsy mahay ty raha soasoa ampitamaniny. Mety hampahery an-drozy iha ndre kelikely avao aza ty raha resahinao mikasiky ty Fanjakà-Ndranahary amin-drozy.

18. Manino tsika ro afaky matoky ty raha ampitamanin’i Jehovah?

¹⁸ Lafa nitampitsy raha sarotsy maro niaretan’i Joba rey, le zao ty nivolaniny tamy Jehovah: “Haiko henanizao fa afaky manao ty kila raha iaby iha, sady tsy misy tsy vitanao ty raha iaby eritseretinao hatao.” (Joba 42:2) Nihain’i Joba hoe tsy misy raha mahasaka an’i Jehovah tsy hanatanteraky ty raha teany hatao. Afaky mampahery antsika koa raha zay lafa miaritsy raha sarotsy tsika. Eritsereto, ohatsy, hoe misy ampela raiky marary, le kivy ie satria fa maro ty dokotera nitsabo azy, kanefa tsy nahajanga azy. Fe lafa nisy dokotera mahay noho azo antoky nahita an’ny aretiny iny sady nanazava ty fomba hitsaboany azy, le fa mahatiaro maivamaiva ie ndre mbo ho elaela aza vo ho janga. Lasa mahavita miaritsy ie satria mitamà hoe mbo hihasoa ty fahasalamany. Manahaky ani-zay koa, fa manampy antsika hiaritsy ty fatokisantsika hoe tsy maintsy ho avy Paradisa ampitamani-Ndranahary antsika iny.

19. Ino ty raha mila ataontsika mba hahavitantsika hiaritsy?

¹⁹ Nihitantsika tato fa manampy antsika hiaritsy raha sarotsy Jehovah, amy alalan’ny vavaky, ty Safàny, ty mpiara-manompo, noho ty raha tamanintsika. Laha ampiasantsika soa fomba anampean’i Jehovah antsika reo, le hanampy antsika Jehovah ndre ino ino ty raha sarotsy mahazo antsika. Hahavita hiaritsy avao tsika amy zay, zisiky haharava ty raha iaby mampijaly antsika amy tontolon’i Satana toy eto.​—Fil. 4:13.