Matokisa fa Nanenga ty Hadisoanao Jehovah

1-2. Ino ty tsapantsika lafa haintsika hoe nanenga ty fahotantsika Jehovah? (Henteo koa sary amy .)

TENA nampalahelo an’i Davida Mpanjaka ty hadisoa bevata nataony taloha. (Sal. 40:12; 51:3; safà mampilitsy azy) Fe tena nibebaky ie, le nanenga ty hadisoany Jehovah. (2 Sam. 12:13) Nifalifaly amy zay Davida lafa nihainy hoe nanenga ty hadisoany Jehovah.​—Sal. 32:1.

² Ho falifaly manahaky an’i Davida koa tsika lafa haintsika hoe niferinay antsika Jehovah, sady nanenga ty hadisoantsika. Ndre nanao fahota bevata aza tsika, le mampahery antsika ty mahay hoe hanenga ty hadisoantsika Jehovah laha tena mibebaky tsika, mieky ty fahotantsika, sady manao ze azo atao mba tsy hampimpoly an’ny raha zay sasy. (Ohab. 28:13; Asan’ny Apostoly 26:20; 1 Jaona 1:9) Mampahery antsika koa ty mahay hoe manenga tanteraky ty fahotantsika Jehovah, sady tsy ampiasany mba hanasazia antsika sasy raha zay!​—Ezek. 33:16.

3-4. Ino ty raha nitsapan’i Jennifer ndre fa nivita batisa aza ie, le ino ty hodinihintsika amy lahatsoratsy toy ato?

³ Mety sarotsy amin’olo sisany kindraiky ty hatòky hoe nanenga ty hadisoany Jehovah. Diniho moa ty tantaran’i Jennifer, ranabavy raiky nitezà tamy fahamarina zay. Naloto fandaisam-bata ie tamy ie mbo nitanora, sady namonivony ty raha raty nataony. Fe nimpoly amy Jehovah ie tao maro tafara atoy, le nahafeno fepetra hatao batisa. Hoy ty asany: “Olo nitea drala aho taloha, nijangajanga, mamolava, noho nimora meloky. Haiko aloha hoe fa nanenga ty hadisoako Jehovah satria fa nanao soro ty ainy Kristy. Fe ndre zay, le tsy tena mino aho hoe nanenga ty hadisoako vatany Jehovah ndre fa nibebaky aza aho.”

⁴ Sarotsy aminao koa va kindraiky ty matoky hoe tena nanenga ty hadisoanao Jehovah tamy ty fahadisoa nataonao taloha? Laha zay ie, le tiarovo ty raha nitsapan’i Davida. Nahatsapa ie hoe niferinay azy Jehovah, le tean’i Jehovah hahatsapa ho zay koa iha. Hodinihintsika amy lahatsoratsy toy ato hoe manino tsika ro mila matoky fa nanenga ty hadisoantsika vatany Jehovah, le ino ty hanampy antsika hatòky an’ny raha zay.

MANINO TSIKA RO MILA MATOKY HOE NANENGA TY HADISOANTSIKA JEHOVAH?

5. Ino ty raha tean’i Satana hinoantsika? Manomeza ohatsy.

⁵ Tsy ho voafandrikin’i Satana tsika laha matoky hoe nanenga ty hadisoantsika Jehovah. Tiarovo fa manao ze azony atao Satana mba hahavy antsika tsy hanompo an’i Jehovah sasy. Ka mba hanatratsirany an’ny raha kendreny zay, le ataony ze hahavy antsika hino hoe tsy nanenga ty hadisoantsika Jehovah. Diniho moa ty raha niainan’ny lahilahy raiky ta Korinto any zay. Nalà tsy ho anisan’ny fiangona ie satria nijangajanga. (1 Kor. 5:1, 5, 13) Lafa nibebaky lahilahy io tafara atoy, le nataon’i Satana ze hahavy ty olo amy fiangona eo tsy hanenga ty hadisoany noho tsy handramby azy soa. Tean’i Satana hahatsapa koa ie hoe tsy hanenga ty hadisoany mihintsy Jehovah. Vokatsini-zay, le mety ho nalahelo marè ie, ka hijano tsy hanompo an’i Jehovah sasy. Mbo tsy niova ty raha kendren’i Satana. Fe fa “haintsika ty tetikiny” noho ty fomba anohera an’ny raha zay.​—2 Kor. 2:5-11.

6. Ino ty hanampy antsika tsy hanome tsiny ty vatantsika tamy fahotà nataontsika taloha?

⁶ Tsy ho kivy na hanome tsiny ty vatantsika tsika laha matoky hoe nanenga ty hadisoantsika Jehovah. Lafa nanao fahotà tsika, le ara-dalàna laha malahelo. (Sal. 51:17) Tena soa laha mahatsapa ani-zay tsika. Satria laha malahelo tsika hoe nanao raha raty, le hanampy antsika hiova hanao raha soa raha zay. (2 Kor. 7:10, 11) Fe laha mbo manome tsiny ty vatantsika tsika ndre fa nibebaky aza, le mety ho kivy ka tsy hanompo an’i Jehovah. Fa laha matoky tsika hoe nanenga ty hadisoantsika Jehovah, le tsy hanome tsiny ty vatantsika sasy tsika na ho kivy. Afaky hanompo an’i Jehovah amy fomba itiavany azy tsika amy zay, sady ho falifaly noho hana feon’ny fieritsereta malio. (Kol. 1:10, 11; 2 Tim. 1:3) Ka ino ty hanampy antsika hatòky hoe nanenga ty hadisoantsika vatany Ndranahary?

INO TY HANAMPY ANTSIKA HATÒKY HOE NANENGA TY HADISOANTSIKA JEHOVAH?

7-8. Ino ty raha nivolanin’i Jehovah mikasiky azy tamy Mosesy, le manome toky antsika amin’ino raha zay? (Eksodosy 34:6, 7)

⁷ Eritsereto ty raha resahin’i Jehovah mikasiky azy. Mariho moa ty raha nivolanin’i Jehovah tamy Mosesy tamy Vohitsy Sinaya teo. (Vakio Eksodosy 34:6, 7.) Ndre maro aza ty toetsy soa ananan’i Jehovah, le retoa avao ty nivolaniny tamy Mosesy: “Ndranahary mamindra fo noho miferinay” ie. Ndranahary manahaky ani-zay va le tsy hanenga ty hadisoan’ny mpanompony tena nibebaky? Tsy zay mihintsy! Tsy mana fo vato Jehovah sady tsy hainy tsy miferinay olo zao.

⁸ Afaky matoky tsika fa Ndranahary marina Jehovah, ka tsy ie mihintsy ro hanao raha mifanipaky amy ty toetsiny. (Sal. 31:5) Afaky matoky ty raha volaniny zany tsika. Laha mbo mahakivy anao ty raha tsy mety nataonao taloha, le eritsereto zao: ‘Mino va aho hoe tena mamindra fo noho miferinay Jehovah sady manenga ze fahotà nataon’olo mibebaky?’ Laha mino ani-zay iha, le afaky matoky hoe nanenga ty hadisoanao koa Jehovah.

9. Ino ty dikan’ny hoe manenga ty fahotantsika Jehovah? (Salamo 32:5)

⁹ Vetsevetseo ty raha ampianarin’i Jehovah antsika amy Baiboly ao mikasiky ty fomba anengany ty hadisoantsika. Eritsereto, ohatsy, ty raha nisoratin’i Davida mikasiky ty fomba anengan’i Jehovah hadisoa. (Vakio Salamo 32:5.) Zao ty nivolanin’i Davida: “Nenganao ty hadisoako noho ty fahotako.” Ty safà Hebreo hoe “manenga” amy andininy io, le midika hoe “manonjo” na “manday.” Lafa nanenga ty hadisoan’i Davida zany Jehovah, le sahala hoe nanonjo noho nanday ty enta nanavesatsy an’i Davida. Lasa nifalifaly amy zay Davida satria hainy hoe nanenga tanteraky ty hadisoany Jehovah. (Sal. 32:2-4) Afaky ho falifaly manahaky ani-zay koa tsika. Laha tena mibebaky amy fahadisoa nataontsika vatany tsika, le tsy tokony hanavesatsy antsika sasy ty hakivia satria fa nionjonin’i Jehovah noho nandesiny raha zay.

10-11. Ino ty haintsika mikasiky an’i Jehovah laha hentea ty safà hoe “parè hanenga hadisoa”? (Salamo 86:5)

¹⁰ Vakio Salamo 86:5. Miresaky Davida eo hoe “parè hanenga hadisoa” Jehovah. Miresaky an’ny safà io ty boky raiky mikasiky Baiboly, le zao ty volaniny mikasiky an’i Jehovah: “‘Mpanenga hadisoa’ ie, zay mihintsy ty ‘maha ie azy.’” Manino Jehovah ro volany hoe mpanenga hadisoa? Manazava ho zao ty tampany manaraky amy andininy io: “Be fitiava noho tsy mivaliky amy ze olo iaby mikaiky anao iha.” Nianarantsika tamy lahatsoratsy taloha teo iny, fa nampitamà Jehovah hoe ho teany mandrakizay ze olo tea azy sady tsy hialany mihintsy. Ka laha nanota zany ty mpanompony, fe nibebaky le mbo hampiseho fitiava amin-drozy avao Jehovah sady hanenga tanteraky ty hadisoan-drozy. (Isa. 55:7) Laha sarotsy aminao ty matoky hoe nanenga ty hadisoanao Jehovah, le eritsereto zao: ‘Mino va aho hoe mpanenga hadisoa Jehovah, ka parè hanenga ze hadisoan’olo iaby tena mibebaky? Laha zay ie, le afaky matoky koa aho fa nanenga ty hadisoako ie lafa nisoloho taminy aho mba hengàny ty hadisoako.’

¹¹ Resahin’ny Baiboly koa hoe hain’i Jehovah soa tsika sady hainy hoe tsy lavorary. Tena mampahery antsika raha zay. (Sal. 139:1, 2) Ndao koa tsika handiniky salamo hafa nivolanin’i Davida, le hohenteantsika hoe manino raha zay ro manampy antsika hino fa ta hanenga ty hadisoantsika Jehovah.

INO TY RAHA TIARON’I JEHOVAH MIKASIKY ANTSIKA?

12-13. Laha hentea ty Salamo 103:14, ino ty raha tiaron’i Jehovah mikasiky antsika, le manosiky azy hanao ino raha zay?

¹² Vakio Salamo 103:14. Nivola Davida eo hoe “tiaron’i Jehovah fa lemboky avao tsika.” Nanazava ty antony raiky mahavy an’i Jehovah parè hanenga ty hadisoan’ny mpanompony nibebaky Davida amy safà reo ao. Hoy ty asany: Tiaron’i Jehovah hoe lemboky avao tsika. Midika raha zay hoe hain’i Jehovah soa fa tsy lavorary tsika. Ndao hodinihintsika soa ty raha tean’i Davida hovolany.

¹³ Nivola Davida hoe “hain’i Jehovah soa ty nanamboara antsika.” Lafa namoro an’i Adama ie, le “bon-tany” ty nanamboarany azy. Midika raha zay fa hainy soa ty namorona antsika olombelo sady hainy ty raha ilàntsika. Hainy, ohatsy, hoe mila mihina, miroro, noho miay tsika. Ndre ty olo lavorary aza mila an’ny raha rezay. (Gen. 2:7) Fe lafa nanota Adama noho Eva, le nanjary lemboky amy fomba hafa koa tsika olombelo. Lemboky zao tsika satria tsy lavorary, le miezaky mafy avao mba tsy hanao raha raty. Ka lafa nivola Davida hoe ‘tiaron’i Jehovah’ fa lemboky tsika, le ta hivola koa ie hoe ferinesany tsika satria hainy hoe tsy lavorary. Azontsika adika ho zao zany safàn’i Davida iny: Hain’i Jehovah hoe manao hadisoa tsika kindraiky, fe lafa hitany hoe tena mibebaky tsika, le ferinesany sady engàny ty hadisoantsika.​—Sal. 78:38, 39.

14. a) Ino koa ty raha nivolanin’i Davida mikasiky ty fomba anengan’i Jehovah ty hadisoantsika? (Salamo 103:12) b) Ino ty raha ianarantsika mikasiky ty fomba nanengan’i Jehovah ty hadisoan’i Davida? (Henteo ty efajoro hoe “Ty Fomba Anengan’i Jehovah Hadisoa.”)

¹⁴ Ino koa ty raha afaky manampy antsika hatòky hoe manenga ty hadisoantsika Jehovah? (Vakio Salamo 103:12.) Mivola Davida amy andininy io hoe lafa manenga ty hadisoantsika Jehovah, le ataony lavitsy biby antsika raha zay “manahaky ty halavitsin’ny antinana amy andrefa” io. Tena mifankalavitsy ty antinana noho ty andrefa, ka tsy afaky hifamonjy mihintsy. Manambara ino amintsika raha zay mikasiky ty fanengan’i Jehovah ty hadisoantsika? Manazava an’ny andininy io ho zao boky raiky zay: “Lafa Ndranahary mangalaky ty hadisoantsika ho lavitsy antsika, le sahala hoe mangalaky ty fofon-draha raiky mba tsy ho rentsika sasy.” Afaky matoky zany tsika, fa tsy teany ho eritseretintsika na hotiarovintsika ndraiky fahotantsika rey. Mety ho tiarontsika kindraiky ty raha tsy mety nataontsika taloha any. Fe lafa nanenga ty hadisoantsika Jehovah, le tsy mampiasa an’ny hadisoantsika iny sasy mba hanasazia na hanelofa antsika.​—Ezek. 18:21, 22; Asan’ny Apostoly 3:19.

15. Ino ty azontsika atao laha mbo malahelo na manome tsiny ty vatantsika tsika tamy ty fahotà nataontsika taloha?

¹⁵ Manino ty safàn’i Davida amy Salamo 103 ao ro manampy anao hatòky hoe manenga hadisoa Jehovah? Laha mbo malahelo na manome tsiny ty vatanao iha tamy ty fahotà nataonao taloha, le eritsereto ty raha tsapan’i Jehovah. Hainy hoe tsy lavorary iha, le manenga ty hadisoani-ze mpanota mibebaky ie. Fa nanenga ty hadisoanao zany ie satria fa nibebaky iha. Tiarovo koa hoe fa tsy eritseretin’i Jehovah sasy fahotanao fa nengàny rey sady fa tsy ampitiaroviny anao koa. Fa tsy hampiasa an’ny fahotanao rey mba hanasazia na hanelofa anao sasy ie. Fa tsy mifantoky amy ty hadisoa nataonao taloha Jehovah. Tokony hanahaky azy koa iha. (Sal. 130:3) Laha matoky tsika hoe nanenga ty hadisoantsika Jehovah, le tokony tsy ho kivy sasy tsika, fa hanompo an’i Jehovah amim-pifalea avao.

16. Manomeza ohatsy ahità hoe raty ty mifantoky amy hadisoa nataontsika taloha. (Henteo koa sary io.)

¹⁶ Azo ohary amin’olo raiky manday tobily sady manenty retrovizera avao ty olo raiky manome tsiny ty vatany tamy ty fahotà nataony taloha. Soa aloha kindraiky ty manenty retrovizera satria hanampy anao hahita ty loza mety hahazo anao baka afara ao. Fe mba tsy hahavoan-doza anao, le tsy maintsy mifantoky amy lala andehananao iny iha. Mitovy amy zay koa, fa soa kindraiky ty mandiniky ty hadisoa nataontsika taloha any. Manampy antsika raha zay mba tsy hampimpoly sasy an’ny hadisoa iny. Fe laha mifantoky amy hadisoa nataontsika taloha tsika, le hampihena ty fifaleantsika amy fanompoa an’i Jehovah raha zay, sady hahavy antsika tsy hanao ze faran’ny vitantsika ho azy. Soa zany laha mifantoky amy ze lala ombantsika tsika. Mandeha amy lala mana amy fiaina ho amy tontolo vaovao any tsika henanizao. Ka lafa avy any tsika, le “tsy ho tiarovy sasy” ty raha raty nataontsika taloha. ​—Isa. 65:17; Ohab. 4:25.

MATOKISA FA MANENGA TY HADISOANAO NDRANAHARY

17. Manino tsika ro mila matoky avao hoe tea antsika Jehovah sady manenga ty hadisoantsika?

¹⁷ Mila matoky tsika hoe tena tea antsika Jehovah sady parè hanenga ty hadisoantsika avao. (1 Jaona 3:19, f.a.p.) Ino ty antony? Satria ataon’i Satana ze hahavy antsika hieritseritsy hoe mpanota tsika, ka tsy ho tea antsika Jehovah sady tsy hanenga ty hadisoantsika mihintsy. Ndre ino ino ty tetiky ampiasan’i Satana, le mitovy avao ty raha kendreny, tsy ino zay fa ty hoe mba hahavy antsika tsy hanompo an’i Jehovah sasy. Fa ampoizintsika hoe vomaiky hihamafy ty ezaky ataon’i Satana satria hainy fa kelikely ty fotoa ananany. (Apok. 12:12) Fe tsy engàntsika handresy mihintsy ie!

18. Ino ty azonao atao mba hahavy anao hatòky hoe tea anao Jehovah sady parè hanenga ty hadisoanao avao?

¹⁸ Mba hahavy anao hatòky marerè hoe teanao Jehovah, le oriho ty soso-kevitsy nianarantsika tamy lahatsoratsy taloha teo iny. Mba hahavy anao hatòky hoe manenga hadisoa Jehovah, le tiarovo ty fomba ivolanany ty vatany amy Baiboly ao. Vetsevetseo ty raha volanin’ny Baiboly mikasiky ty fomba anengan’i Jehovah hadisoa. Ka halino fa hain’i Jehovah soa hoe tsy lavorary iha sady ferinesany. Tiarovo koa fa lafa manenga hadisoa Jehovah, le engàny tanteraky raha zay. Natoky Davida hoe niferinay azy Jehovah. Afaky hanahaky an’i Davida koa iha, ka hivola hoe “misaotsy anao lahy Jehovah satria ‘nenganao ty hadisoako noho ty fahotako’!”​—Sal. 32:5.