LAHATSORATSY FIANARA 7
HIRA 15 Derao ny Lahimatoan’i Jehovah!
Ino ty Soa Azonao Satria Manenga Hadisoa Jehovah?
“Aminao ao ty tena fanengà hadisoa.”—SAL. 130:4.
INO TY HIANARA ATO?
Handiniky sarin-teny vitsivitsy amy Baiboly ao tsika, mampiseho fa tena miavaky Jehovah lafa manenga hadisoa. Hanampy antsika vomaiky hankasitraky an’i Jehovah lahatsoratsy toy.
1. Manino ro sarotsy ty mahazo ty raha tean’olo hovolany lafa ie mivola hoe manenga ty hadisoanao aho?
“MANENGA ty hadisoanao aho.” Tena mamelombelo safà reo, sirtò lafa iha nivola na nanao raha nampalahelo olo! Fe ino marina ty dikan’ny safà reo? Ta hivola va olo iny hoe mbo mpinama soa avao nareo? Sa nivola an’io ie satria tsy ta hiresadresaky an’ny raha iny sasy? Sarotsy ty mahay ty tena tean’olo hovolany lafa ie mivola hoe manenga ty hadisoanao.
2. Manao akory Jehovah lafa manenga hadisoa, le akory ty fomba ivolanan’ny Soratsy Masy an’ny raha zay? (Henteo koa ty fanamariha ambany pejy.)
2 Ka manao akory Jehovah? Tena tsy mitovy amintsika olombelo ie lafa manenga hadisoa. Miavaky mihintsy Jehovah lafa manenga hadisoa. Ho zao ty nivolanin’ny mpanao salamo mikasiky an’i Jehovah: “Aminao ao ty tena fanengà hadisoa, mba hanajan’olo anao.”a (Sal. 130:4) ‘Tena manenga hadisoa’ vatany Jehovah. Ie avao ro afaky manampy antsika hahay hoe manao akory marina manenga hadisoa zao. Laha hentea ty andininy sisany amy Baiboly Soratsy Hebreo, le nampiasa safà tsy nampiasà tamin’olo mihintsy ty mpanoratsy Baiboly lafa niresaky mikasiky fanengà hadisoa. Amy Jehovah avao ro nampiasan-drozy an’ny safà rey.
3. Ino ty tsy mampitovy antsika amy Jehovah lafa manenga hadisoa? (Isaia 55:6, 7)
3 Lafa manenga ty hadisoan’olo raiky Jehovah, le fafàny tanteraky raha iny. Mbo afaky mifandramby soa aminy ndraiky olo iny, ndre fa nisimba aza raha zay taloha. Tena misaotsy an’i Jehovah tsika fa tena manenga ty hadisoantsika avao ie.—Vakio Isaia 55:6, 7.
4. Akory ty anampean’i Jehovah antsika hahay ty tena dikan’ny hoe manenga hadisoa?
4 Hitantsika teo fa tsy mitovy amy Jehovah tsika lafa manenga hadisoa. Ka manao akory zany ty ahaizantsika ty tena dikan’ny raha io? Mampiasa sarin-teny midosiky fo Jehovah mba hanampea antsika hahay hoe akory ty ataony lafa ie manenga ty hadisoantsika. Handiniky ty sisany amy raha rey tsika ato. Ho hitantsika amy sarin-teny rey fa laha mibebaky tsika, le afahin’i Jehovah ty fahotantsika sady engàny hinama aminy ndraiky tsika. Vomaiky tsika ho tea noho hankasitraky an’ny Babantsika soa fanahy noho mamindra fo iny, lafa mandiniky an’ny sarin-teny reo.
MANGALAKY TY FAHOTANTSIKA JEHOVAH
5. Ino ty miseho lafa manenga ty fahotantsika Jehovah?
5 Ampitovizin’ny Baiboly amy enta mavesatsy matetiky ty fahotà. Ho zao ty nivolanin’i Davida Mpanjaka mikasiky ty fahotany: “Fa mandilatsy ty lohako ty fahadisoako; manahaky enta mavesatsy io raha rey ka tsy zakako.” (Sal. 38:4) Fe manenga hadisoa Jehovah laha mibebaky olo nanota iny. (Sal. 25:18; 32:5) Ty safà hebreo nadika hoe ‘manenga’ amy andininy reo, le midika hoe “manonjo” na “manday.” Sahala manday enta mavesatsy tsika lafa manota. Lafa manenga ty hadisoantsika amy zay Jehovah, le sahala alàny baka an-tsorontsika eny raha iny, le bakeo andesiny lavitsy antsika.
“Nanenga” (Sal. 32:5)
6. Zisiky aia ty anarian’i Jehovah ty fahotantsika?
6 Zisiky aia moa lavitsy anandesan’i Jehovah ty fahotantsika io? Misy sarin-teny hafa manampy antsika hahay ani-zay amy Baiboly ao. Hoy ty Salamo 103:12: “Manahaky ty halavitsin’ny antinana amy andrefa, ro angalany ty fahotantsika ho lavitsy antsika.” Mifanalavitsy biby amy antinana ty andrefa. Tsy ho afaky hifankariny mihintsy raha reo. Midika raha zay fa apetrakin’i Jehovah farany lavitsy tsy azontsika eritserety mihintsy ty fahotantsika. Tsy mahavy anao hatòky va raha zay hoe tena manenga hadisoa tanteraky Jehovah!
“Manahaky ty halavitsin’ny antinana amy andrefa” (Sal. 103:12)
7. Akory ty fomba ivolanan’ny Baiboly ty raha ataon’i Jehovah amy ty fahotantsika? (Mika 7:18, 19)
7 Hitantsika teo fa sahala andesin’i Jehovah lavitsy antsika ty fahotantsika, fe mbo tanjahiny avao va raha rey? Aha. Ho zao ty nivolanin’i Hezekia Mpanjaka mikasiky an’i Jehovah: “Narianao an-dambosinao any iaby ty fahotako.” Na “nalànao mba tsy ho hitanao”, arakin’ny fanamariha ambany pejy. (Isaia 38:9, 17, f.a.p.) Hita amy sarin-teny io fa lafa misy olo raiky nanota fe mibebaky, le alàn’i Jehovah fahotany iny ka ariany mba tsy ho hitany sasy. Azo adika manahaky ani-zao koa raha volaniny eo reo: “Nataonao sahala amin’olo tsy nanota io aho.” Mba hahazoantsika azy soa le miresaky sarin-teny hafa koa ty Baiboly, amy Mika 7:18, 19 ao. (Vakio.) Resahin’i Jehovah amy andininy reo fa atorakiny anaty riaky laliky any ty fahotantsika. Tamy andro taloha, lafa misy raha latsaky anaty riaky laliky le fa tsy hita sasy iny.
“Narianao an-dambosinao any iaby ty fahotako” (Isaia 38:17)
“Hatorakinao anaty riaky laliky any ty fahotanay iaby” (Mika 7:19)
8. Ino ty nianarantsika zisiky eto?
8 Hitantsika baka amy sarin-teny reo fa lafa manenga ty hadisoantsika Jehovah, le ariany tanteraky raha iny ka tsy mila manamelo tena sasy tsika. Hoy Davida: “Sambatsy ze mahazo fanengà hadisoa, sady voalimboky ty fahotany. Sambatsy ty olo tsy isahin’i Jehovah mihintsy ty fahotany.” (Rom. 4:7, 8) Zay mihintsy ro atao hoe tena manenga hadisoa!
MAMAFA TY FAHOTANTSIKA JEHOVAH
9. Ino koa ty sarin-teny ampiasan’i Jehovah mba hanampea antsika hahay hoe tena manenga hadisoa tanteraky ie?
9 Afaky mamafa ty fahotani-ze olo mibebaky Jehovah satria eo ty vilim-panavota. Diniho moa ty fomba ivolanan’ny Baiboly ty raha ataon’i Jehovah. Lafa mamaky ty Baiboly tsika, le hitantsika ao fa sahala manasa noho manadio ty fahotantsika Jehovah. Vokany, lasa malio olo nanota iny. (Sal. 51:7; Isaia 4:4; Jer. 33:8) Ho zao mihintsy ty volanin’i Jehovah mikasiky ani-zay: “Ndre mena marè aza ty fahotanareo, le hatao foty mangatsakatsaky. Ndre manahaky ravin-damba mena antitsy aza, le hanahaky volon’aondry foty io.” (Isaia 1:18) Tena tsy mora ty mangalaky tasy mena biby amy lamba foty. Fe mampiasa an’ny sarin-teny io Jehovah mba hanomeza toky antsika hoe afaky hosasà malio ty fahotantsika, ka tsy ho hita sasy.
“Ndre mena marè aza ty fahotanareo, le hatao foty mangatsakatsaky” (Isaia 1:18)
10. Ino koa ty sarin-teny ampiasan’i Jehovah mba hanampea antsika hahita hoe tsy manisy fetrany ie lafa manenga hadisoa?
10 Nihitantsika tamy lahatsoratsy taloha teo iny fa ampitovizy amy “trosa” koa ty ota. (Mat. 6:12, f.a.p; Lioka 11:4, f.a.p.) Saky manota amy Jehovah zany tsika, le mihamitombo avao ty trosantsika. Mila mandoa drala be aminy zany tsika! Fe lafa manenga ty hadisoantsika Jehovah, le sahala afoiny trosa iny. Lafa nanenga ty fahotantsika koa ie le tsy takìny amintsika sasy raha iny. Azo antoky fa falifaly tsika lafa manenga ty hadisoantsika Jehovah, sahala amin’olo falifaly lafa tsy ampandoavin’olo trosa.
“Engao ty trosanay” (Mat. 6: 12, f.a.p.)
11. Ino ty tean’ny Baiboly hovolany amy hoe “voafafa” ty fahotantsika? (Asan’ny Apostoly 3:19)
11 Tsy hoe tsy ampandoavin’i Jehovah antsika avao ty trosany amintsika na ty fahotantsika, fa fafàny koa. (Vakio Asan’ny Apostoly 3:19.) Toy misy ohatsy mba hampazava azy: Eritsereto hoe mivola aminao olo mana trosa aminao iny fa tsy hampandoaviny anao trosa iny. Tsipihiny amy zay trosa iny. Fe ndre zay le mbo hita avao soratsy rey. Tsy mitovy amy zay anefa ty hoe mamafa raha. Tamy andro taloha, le tsy sarotsy fafà ty ranomainty nampiasà tamy zay. Mangalaky eponzy lena olo iny le bakeo mamafa an’ny soratsy rey. Ka lafa “voafafa” zany ty trosan’olo raiky, le tsy hita sasy soratsy rey. Tsy afaky mahita an’ny soratsy teo rey sasy ty olo. Sahala tsy nisy mihintsy trosa iny. Manahaky ani-zay koa ty ataon’i Jehovah lafa ie manenga ty fahotantsika. Ataony sahala tsy nisy mihintsy raha iny. Tsy falifaly va iha mahay ani-zay?—Sal. 51:9.
“Mba ho voafafa ty fahotanareo” (Asan’ny Apostoly 3:19)
12. Ino ty ianarantsika baka amy sarin-teny mikasiky rahona matevy io?
12 Mampiasa sarin-teny mitovitovy amy zay Jehovah mba hanampea antsika hahay hoe akory ty ataony lafa ie mamafa ty fahotantsika. Hoy ty asany: “Hokosehiko ty fahadisoanao, sahala hoe hosaroman’ny rahona, le hokosehiko ty fahotanao, sahala hoe hosaroman’ny rahona matevy.” (Isaia 44:22) Lafa manenga ty fahotantsika Jehovah, le sahala saromany amy rahona matevy raha rey amy zay tsy ho hitany sady tsy ho hitantsika koa.
“Hokosehiko ty fahadisoanao, sahala hoe hosaromako rahona” (Isaia 44:22)
13. Ino ty tsapanao lafa manenga ty hadisoanao Jehovah?
13 Ino ty ianarantsika baka amy sarin-teny reo? Lafa manenga ty fahotantsika Jehovah, le tsy tokony hanamelo tena marè sasy tsika. Namafa tanteraky ty fahotantsika ty soro nataon’i Jesosy Kristy. Ndre ty raha nisy an’ny trosa rey aza fa tsy ao iaby. Manahaky ani-zay ty ataon’i Jehovah amintsika lafa mibebaky tsika.
RAMBESIN’I JEHOVAH HO NAMANY NDRAIKY TSIKA
Lasa afaky mifandramby soa amy Babantsika an-danitsy any iny tsika lafa manenga ty fahotantsika ie (Fehintsoratsy 14)
14. Manino tsika ro afaky matoky fa hanenga tanteraky ty hadisoantsika Jehovah? (Henteo koa reo.)
14 Lasa mifandramby soa amy Jehovah ndraiky tsika lafa engàny ty fahadisoantsika. Tsy tokony hanamelo tena sasy tsika. Tsy tokony hatahotsy tsika hoe mbo meloky amintsika Jehovah sady mila fomba hanasazia antsika. Tsy hiseho mihintsy raha zay. Lafa mivola Jehovah hoe engàny ty fahadisoantsika, le afaky matoky azy tsika. Ino ty antony? Nivola tamy Jeremia mpaminany ie hoe: “Hengako ty fahadisoan-drozy, le tsy hotiaroviko sasy ty fahotan-drozy.” (Jer. 31:34) Nampiasa safà mitovitovy amy reo ndraiky apostoly Paoly tafara atoy ka nivola hoe: “Tsy hotiaroviko sasy ty fahotan-drozy.” (Heb. 8:12) Fe ino moa ty tena dikan’ny raha zay?
“Tsy hotiaroviko sasy ty fahotan-drozy” (Jer. 31:34)
15. Ino ty dikan’ny hoe tsy tiarovin’i Jehovah sasy ty fahotantsika?
15 Amy Baiboly ao, ty safà hoe ‘mahatiaro’ le tsy voatery hanondro olo mieritseritsy na mahatiaro raha niseho taloha tany avao. Mety mampiseho olo manao raha koa safà io. Nivola tamy Jesosy, ohatsy, malaso raiky nifantsihy tamy tsato-kazo tanilany teo iny hoe: “Jesosy, tiarovo aho lafa avy amy Fanjakànao any iha.” (Lioka 23:42, 43) Tsy hoe nangataky an’i Jesosy avao ie mba hieritseritsy azy lafa avy fotoa zay. Hita tamy valin-tenin’i Jesosy fa hanao raha ho an’ny malaso io ie, le hamelo azy ndraiky. Ka lafa Jehovah koa zany mivola hoe tsy hotiaroviny sasy ty fahotantsika, le midika zay fa tsy hanao raha mba hanameloha antsika ie. Tsy hosaziny vokatsin’ny fahotà nataontsika iny sasy tsika lafa afara any satria fa nengany ty hadisoantsika.
16. Akory ty ivolanan’ny Baiboly ty fahafaha ananantsika lafa tsika mahazo fanengà hadisoa?
16 Mahatiaro maivaiva tsika lafa manenga ty hadisoantsika Jehovah. Mampiasa sarin-teny hafa ty Baiboly mba hanampea antsika hahazo ani-zay. Sahala hoe “mpanompon’ny ota” tsika satria tsy lavorary. Fe lafa manenga ty hadisoantsika Jehovah, le sahala amy mpanompo ‘nafahy tamy ota’ rey tsika. (Rom. 6:17, 18; Apok. 1:5) Lafa haintsika hoe nanenga ty hadisoantsika Jehovah, le lasa falifaly tsika manahaky mpanompo nafahy tsy ho andevo sasy io.
“Nafaha tamy ota [nareo]” (Rom. 6: 18)
17. Manino ty fanengà hadisoa ro manasitrana antsika? (Isaia 53:5)
17 Vakio Isaia 53:5. Mivola ty Baiboly fa mitovy amin’olo voan’ny arety mahafaty io tsika satria mpanota. Sahala hoe niafaky arety tsika satria nanome ty Anakilahiny Jehovah mba ho vilim-panavota ho antsika. (1 Pet. 2:24) Vokany, lasa afaky mifandramby amy Jehovah ndraiky tsika, ndre nisimba aza zay lafa tsika nanota. Falifaly biby zao ty olo raiky narary mafy lafa niafaky ty aretiny. Manahaky ani-zay koa tsika. Falifaly biby tsika satria afaky mifandramby amy Jehovah noho mahazo hatò aminy ndraiky lafa manenga ty hadisoantsika ie.
“Ty feriny ro nahavy anay ho janga” (Isaia 53:5)
INO TY SOA AZONTSIKA SATRIA MANENGA TY HADISOANTSIKA JEHOVAH?
18. Ino ty nianarantsika baka amy sarin-teny miresaky mikasiky ty fanengà hadisoa ataon’i Jehovah rey? (Henteo koa ty efajoro hoe “Akory ty Ataon’i Jehovah lafa Manenga ty Fahotantsika?”)
18 Nandiniky sarin-teny baka amy Baiboly ao tsika teo mba hanampea antsika hahay hoe manao akory Jehovah lafa manenga hadisoa. Ino ty nianarantsika baka amy raha rey? Lafa manenga hadisoa Jehovah, le engàny tanteraky raha iny sady tsy ampiasany sasy mba hanasazia antsika. Lasa afaky mifandramby soa amy Babantsika an-danitsy any iny amy zay tsika. Fe haintsika koa fa fanomeza baka amy Jehovah ty fanengà hadisoa. Teany tsika sady matariky ie, le zay ty antony mahavy azy manao ani-zay fa tsy hoe maeva ani-zay tsika.—Rom. 3:24.
19. a) Ino ty tokony hankasitrahantsika an’i Jehovah? (Romanina 4:8) b) Ino ty hodinihintsika amy lahatsoratsy manaraky ao?
19 Vakio Romanina 4:8. Tena mankasitraky an’i Jehovah tsika satria Ndranahary ‘tena manenga hadisoa’ ie! (Sal. 130:4) Fe misy raha bevata zay tsy maintsy ataontsika laha teantsika hengan’i Jehovah ty fahotantsika. Henteo moa raha nivolanin’i Jesosy toy: “Laha tsy manenga ty hadisoan’olo nareo, le tsy hanenga ty hadisoanareo koa Babanareo.” (Mat. 6:14, 15) Tsy maintsy mahay manenga hadisoa manahaky an’i Jehovah zany tsika. Ho hitantsika amy lahatsoratsy manaraky ao hoe akory ty hanaovantsika ani-zay.
HIRA 46 Misaotra, Jehovah
a Mampiasa ty hoe “fanengà hadisoa” ty safà hebreo tam-boalohany tany. Ty tena fanengà hadisoa ro teany hovolany fa tsy fanengà hadisoa hafa. Tsy hita amy ankamaroan’ny Baiboly fiavahany zay, ndre anisan’ny hevitsy tena bevata aza. Fe tsy manahaky ani-zay ty Soratsy Masy Fandikan-tenin’ny Tontolo Vaovao, fa tena avahany soa raha io amy Salamo 130:4 ao.