Jehovah ro Afaky Manome Antsika ty ‘Tena Fifalea’

1-2. a) Ino ty raha tsapan’ny ankamaroan’olo henanizao? b) Ino ty hodinihintsika amy lahatsoratsy toy ato?

MANAO ze azony atao ty ankaramaroan’olo henanizao mba ho falifaly. Fe ndre miezaky manao akory rozy, le mbo tsy falifaly avao. Maro, ohatsy, henanizao ty olo kivy noho malahelo. Ndre ty mpanompon’i Jehovah sisany koa aza mahatsapa ani-zay. Miay amy “andro farany” tsika henanizao, ka tsy mahatseriky laha miatriky problemo sankarazany mety hahakivy.​—2 Tim. 3:1.

² Hodinihintsika amy lahatsoratsy toy ato hoe ino ty raha mety hahavy antsika tsy ho falifaly, le ino ty azontsika atao mba ho falifaly ndraiky. Fe ho henteantsika tse hoe ia ty afaky manampy antsika tena ho falifaly.

AFAKY MANAMPY ANTSIKA TENA HO FALIFALY JEHOVAH

3. Ino ty raha haintsika mikasiky an’i Jehovah lafa hentea ty raha niforoniny? (Henteo koa sary reo.)

³ Tozoro falifaly avao Jehovah, ka teany ho falifaly koa tsika. Hitantsika amy raha niforoniny hoe Ndranahary falifaly ie. Falifaly, ohatsy, tsika lafa mahita an’ny tany soasoa misy antsika toy, mahita loko sankarazany, mahita biby mihisa, noho mihina sakafo tena teantsika. Tea antsika vatany Jehovah sady teany hahazo tavy ty fiainantsika tsika!

Anak’elefan: Image © Romi Gamit/Shutterstock; anakin’ny pingouin: Vladimir Seliverstov/500px via Getty Images; anak’aosy: Rita Kochmarjova/stock.adobe.com; dauphin roe: georgeclerk/E+ via Getty Images

4. a) Manino Jehovah ro mbo falifaly avao ndre hitany aza ty fijalean’olombelo? b) Ino ty fanomeza namean’i Jehovah antsika? (Salamo 16:11)

⁴ Ndre “Ndranahary falifaly” aza Jehovah, le hainy soa ty raha mampijaly noho mampalahelo ty olombelo. (1 Tim. 1:11) Fe tsy nengany hampihena ty hafaleany raha zay. Hainy hoe mandalo avao ty fijalea sady fa nametraky fotoa hanamperany tanteraky an’ny raha zay ie. Fe zisiky hiavian’ny fotoa zay, le miaritsy avao ie sady manam-pahareta. Tsapany ty raha mahazo antsika, ka manampy noho mikarakara antsika ie. Akory ty anampeany antsika? Anisan’ny fomba anaovany ani-zay ty fanomezany antsika fifalea. (Vakio Salamo 16:11.) Ndao ho henteantsika hoe akory ty nahavy an’i Jesosy hahazo an’ny fanomeza baka amy Jehovah zay.

5-6. Manino Jesosy ro nifalifaly avao?

⁵ Jesosy ro falifaly marè mandilatsy ty zavaboary iaby niforonin’i Jehovah. Manino tsika ro mivola ani-zay? Misy antony roe retoa: 1) Manahaky an’ny Babany Jesosy, le zay ty antony mahavy azy ho falifaly. (Kol. 1:15) 2) Fa niaraky niay tamy Babany, azy Loharanon’ny fifalea iny tanatin’ny fotoa lava ie.

⁶ Nifalifaly avao Jesosy tamy ze raha iaby nampanaovin’ny Babany azy. (Ohab. 8:30, 31; Jaona 8:29) Tena nahazo hatò tamy Jehovah ie vokatsin’ny raha zay.​—Mat. 3:17.

7. Ino ty hanampy antsika tena ho falifaly?

⁷ Afaky tena ho falifaly koa tsika lafa mifandramby marìny amy Jehovah, azy Loharanon’ny fifalea iny. Ho falifaly tsika laha manoka fotoa maro hianara mikasiky an’i Jehovah noho miezaky hanahaky azy. Ho falifaly koa tsika laha manao ty sitrapony noho mahay hoe mahazo hatò aminy.a (Sal. 33:12) Fe manao akory laha mahatsapa tsika kindraiky hoe tsy falifaly? Midika va raha zay fa tsy mahazo hatò amy Jehovah tsika? Tsy zay mihintsy! Tsy lavorary tsika ka mety hijaly kindraiky, halahelo, na ho kivy. Hain’i Jehovah soa raha zay. (Sal. 103:14) Ndao ho henteantsika hoe ino ty raha mety hahavy antsika tsy ho falifaly, le ino ty azontsika atao mba ho falifaly ndraiky.

KA ENGÀ HISY RAHA HANDRAVA TY FIFALEANAO

8. Ino ty vokany lafa miatriky problemo tsika?

⁸ Voalohany: Problemo amy fiainantsika. Miatriky fanenjeha va iha henanizao, sa tratsin’ny loza arakin’ny natiora, fahantrà, arety, na fahantera? Mety ho sarotsy amintsika ty ho falifaly lafa miatriky problemo manahaky ani-reo tsika, sirtò laha tsy misy raha azontsika atao mba handamìna azy. Mivola mihintsy ty Baiboly hoe “kivy ty olo lafa malahelo ty fony.” (Ohab. 15:13) Nahatsapa ani-zay anti-panahy mana anara Babis zay. Tanatin’ny efatsy tao avao, le nimaty ty ray aman-dreniny noho rahalahiny zay. Zao ty nivolaniny: “Nahatiaro mangiky aho sady tsy nisy raha vitako. Tena kivy aho kindraiky, satria ndre ta ho nanoka fotoa hiaraha amy ray aman-dreniko rey noho amy rahalahiko iny aza aho talohan’ny nahafatesan-drozy, le tsy afaky nanao ani-zay.” Hita baka amy zay, fa mety handreraky noho hahakivy antsika ty problemo amy fiainantsika.

9. Ino ty hanampy antsika ho falifaly ndraiky? (Jeremia 29:4-7, 10)

⁹ Ino ty hanampy antsika ho falifaly ndraiky? Ho falifaly tsika laha tsy miasa loha marè amy raha tsy haintsika ovà sady mifantoky amy ty raha azontsika atao. Ampianarin’ny tontolo toy hoe tsy ho falifaly ty olo laha tsy milamy soa ty fiainany. Fe tsy marina raha zay. Niresahin’i Jehovah, ohatsy, Jiosy natao sesitany ta Babylona any rey mba ho falifaly avao ndre vahiny an-tanin’olo any noho miay amy fiaina tsy nahazatsy an-drozy. (Vakio Jeremia 29:4-7, 10.) Ino ty fianara ho antsika? Miezaha mba hifantoky noho hahazo tavy ty raha soa amy fiainanao. Tiarovo fa tsy hanenga anao hialy raiky Jehovah, fa hanampy anao. (Sal. 63:7; 146:5) Nanjary nalemy, ohatsy, ranabavy Effie lafa niaksidan. Zao ty nivolaniny: “Nahazo fanampea noho fanohana maro baka amy Jehovah aho, baka amy fianakaviako, noho baka amy fiangona. Ka laha mbo kivy zany aho, le sahala tsy mankasitraky an’ny fanampea namea ahy rey. Teako haseho an’i Jehovah noho ty mpiara-manompo hoe mankasitraky ty raha nataon-drozy ho ahy aho.”

10. Manino tsika ro afaky ho falifaly avao ndre miatriky problemo aza?

¹⁰ Ndre tsy teantsika aza ty raha iainantsika na miatriky raha sarotsy tsika na ty fianakaviantsika, le mbo afaky ho falifaly avao tsika.b (Sal. 126:5) Manino tsika ro mivola ani-zay? Satria tsy mianky amy ty raha iainantsika ty fifaleantsika. Zao ty nivolanin’ny mpisava lala mana anara Maria zay: “Lafa misy problemo mahazo anao, fe miezaky ho falifaly avao iha, le tsy midika raha zay hoe tsy hitàny mihintsy iha na tsy hampiseho ty alahelonao. Fa ty fiezahanao ho falifaly, le midika hoe tsy halinonao ty raha ampitamanin’i Jehovah. Hanampy antsika ho falifaly avao Babantsika iny, ndre ino ndre ino ty raha mahazo antsika.” Tiarovo fa mandalo avao ty problemo iaby mahazo antsika, manahaky lian-tomboky amy fasy amoron-driaky eny rey. Tsielatsiela avao ty ahità an-drozy eo, bakeo mifafa tanteraky.

11. Manino ro mampahery anao ty tantaran’ny apostoly Paoly?

¹¹ Ka manao akory laha mieritseritsy tsika hoe tsy mahazo hatò amy Jehovah kanao miatriky problemo? Laha zay ie, le afaky hanampy antsika ty fandiniha ty raha niainan’ny mpanompon’i Jehovah niatriky raha tena sarotsy rey. Diniho moa apostoly Paoly. Nifilin’i Jesosy ie mba hitory ty vaovao soa “amy firenena hafa any, noho amy mpanjaka any, noho amy anan’Israely any.” (Asan’ny Apostoly 9:15) Tena tombontsoa bevata raha zay! Fe ndre zay, mbo niatriky problemo maro Paoly. (2 Kor. 11:23-27) Midika va raha zay fa tsy nahazo hatò amy Jehovah ie? Tsy zay mihintsy! Mifanohitsy amy zay aza, fa nitahin’i Jehovah ie kanao nahavita niaritsy. (Rom. 5:3-5) Diniho amy zay koa ty raha iainanao. Miaritsy avao iha sady tsy mivaliky amy Jehovah ndre miatriky problemo sankarazany aza. Dikani-zay, afaky matoky koa zany iha hoe manampy anao Jehovah sady mahazo hatò aminy iha.

12. Ino ty raha mety hiseho lafa tsy afaky manao ty raha teantsika hatao amy fanompoa tsika?

¹² Faharoe: Raha tsy vitantsika amy fanompoa an’i Jehovah. (Ohab. 13:12) Mandrisiky antsika hana raha kendrè amy fanompoa an’i Jehovah ty fitiavantsika noho ty fankasitrahantsika azy. Fe laha tsy manenga antsika hanao ani-zay ty raha iainantsika, le mety halahelo tsika. (Ohab. 17:22) Zao ty nivolanin’ny mpisava lala mana anara Holly zay: “Ta hanatriky Sekolin’ny Mpitory Fanjakà Iny aho, ta hanompo an-tany hafa any, noho ta handramby anjara amy asa fanorena a Ramapo any. Fe niova ty raha niainako, ka tsy afaky nanao an’ny raha teako hatao reo aho. Nidiso fanantenà aho. Kivy iha lafa tsy afaky manao ty raha teanao hatao.” Maro ty mpanompon’i Jehovah mahatsapa ani-zay.

13. Ino ty azontsika atao laha voafetra ty raha sisany azontsika atao amy fanompoa?

¹³ Ino ty hanampy antsika ho falifaly ndraiky? Tiarovo fa tsy ampanaovin’i Jehovah raha tsy ho vitantsika mihintsy tsika. Tsy mianky amy hamaron’ny raha vitantsika amy fanompoa azy koa ro mahavy antsika ho lafovily aminy. Tean’i Jehovah tsika laha miambany noho tsy mivaliky aminy. (Mik. 6:8; 1 Kor. 4:2) Ty raha am-pontsika ao, ty eritseritsintsika, noho ty toetsintsika ro hentean’i Jehovah, fa tsy ty raha tsy vitantsika. Mety va laha manao raha tsy ho vitantsika tsika, kanefa tsy mitaky ani-zay amintsika Jehovah?c Tena tsy mety zay! Laha voafetra zany ty raha azonao atao amy fanompoa an’i Jehovah, le miezaha hifantoky amy ze azonao atao. Afaky mampiofana ty tanora va, ohatsy, iha na mampahery ty be tao? Azonao atao koa va ty mitsidiky, na mikaiky an-telefony, na mandefa mesazy amy mpiara-manompo mba hampahereza azy? Hotahin’i Jehovah iha sady ho falifaly laha manao ze azonao atao amy fanompoa azy! Tiarovo koa fa tsy ho ela, le hana fahafaha hanompo an’i Jehovah mandrakizay tsika amy tontolo vaovao ao, sady mandilatsy ty eritseretintsika mihintsy! Zao ty nivolanin’i Holly, azy niresahintsika taloha teo iny: “Lafa kivy aho, le vetsevetseko hoe afaky hanao ze teako hatao ho an’i Jehovah aho amy tontolo vaovao any satria hampeany.”

14. Ino koa ty raha mety hahavy antsika tsy ho falifaly?

¹⁴ Fahatelo: Fanaova ze raha teateantsika avao. Mampiasa internet ty olo sisany mba hampisehoa hoe tena ho falifaly iha laha afaky manao ze teanao hatao. Ampirisihy, ohatsy, ty olo mba ho tea fialamboly, hivily ze raha teany hovilỳ, noho handeha amy ze pilasy teany handehana. Tsy raty aloha ty manao ani-reo sady niforonin’i Jehovah ho tea raha soasoa tsika. Fe maro amin’olo niezaky mafy nanao ze raha teateany avao ro nahatsapa hoe tsy tena falifaly. Zao ty nivolanin’ny mpisava lala mana anara Eva zay: “Laha ze raha teateanao avao ro ataonao, le tsy maintsy hisy manky avao ty fiainanao.” Ho diso fanantenà tsika sady tsy ho falifaly laha manao ze raha teateantsika avao.

15. Ino ty raha ianarantsika baka amy tantaran’i Solomona Mpanjaka?

¹⁵ Afaky mandramby fianara baka amy tantaran’i Solomona Mpanjaka tsika. Nanao ze azony atao ie mba hahafalifaly azy, ka nameany fahafaham-po ty faniriany, ohatsy hoe nihina sakafo matsiro, nijanjy moziky soasoa, noho nivily ze raha teany hovilỳ. Fe ndre nanao ty raha teateany avao ie, le tsy nahatsapa afa-po mihintsy. Zao ty nivolaniny: “Tsy entsaky manenty ty maso, le tsy entsaky mijanjy ty sofy.” (Mpito. 1:8; 2:1-11) Mieritseritsy ty olo sisany hoe tena ho falifaly laha manan-drala noho manao ze tean-drozy hatao avao. Fe vandy raha zay! Tsy mianky amy reo mihintsy ty tena fifalea.

16. Manino tsika ro tena ho falifaly laha manampy olo? (Henteo koa sary reo.)

¹⁶ Ino ty hanampy antsika ho falifaly ndraiky? Nivola Jesosy hoe: “Mahasambatsy kokoa ty manome tany ty mandramby.” (Asan’ny Apostoly 20:35) Zao ty nivolan’ny anti-panahy mana anara Alekos zay: “Miezaky manao raha kelikely hanampea olo aho. Lafa manao ani-zay aho, le manjary tsy mifantoky amy ze raha mahasoa ahy avao sady lasa falifaly.” Ino ty azonao atao mba hanampea olo? Lafa mahita olo kivy iha, le miezaha hampahery azy. Mety tsy ho voavahanao problemony iny, fe hampahery azy iha laha mijanjy soa azy, miferinay azy, sady mampirisiky azy mba hiantehitsy amy Jehovah. (Sal. 55:22; 68:19) Azonao ampea koa ie mba hahatakatsy hoe tsy nanary azy Jehovah. (Sal. 37:28; Isa. 59:1) Azonao atao mihintsy aza ty manao raha ho azy, ohatsy hoe miketriky ho azy, na manday azy mitsangatsanga. Asao hiaraky manompo aminao koa ie satria mahafalifaly ty mizara vaovao soa amin’olo. Engao Jehovah hampiasa anao mba hampahery olo. Tena ho falifaly tsika laha mifantoky amy ze raha mahasoa ty hafa, fa tsy amy ze raha mahasoa antsika avao.​—Ohab. 11:25.

17. Tsy maintsy manao ino tsika laha ta ho falifaly? (Salamo 43:4)

¹⁷ Tena ho falifaly tsika laha miezaky hifandramby marìny amy Babantsika an-danitsy any iny avao. Manome toky antsika ty Baiboly hoe Jehovah ro afaky manome antsika ty tena fifalea. (Vakio Salamo 43:4.) Ka ndre mana problemo zany tsika, le tsy tokony hatahotsy na hiasa loha marè. Loniky lahy tsika hinama marè amy Jehovah avao satria ie ro Loharanon’ny fifalea!​—Sal. 144:15.