Ka Halino ty Mivavaky ho an’Olo Hafa

1. Akory ty ahaizantsika hoe vatan-draha amy Jehovah ty vavaky ataontsika?

FANOMEZA tena miavaky ty vavaky. Mba eritsereto moa zao: Namean’i Jehovah andraikitsy sisany ty anjely. (Sal. 91:11) Nameany andraikitsy bevata koa Anakilahiny iny. (Mat. 28:18) Fe ia ty nitendren’i Jehovah hijanjy ty vavaky ataontsika? Tsy misy, fa ie raiky avao ro manao an’ny raha zay. Jehovah mihintsy ro mijanjy ty vavaky ataontsika satria “Mpijanjy vavaky” ie.​—Sal. 65:2.

2. Ino ty modely namean’ny apostoly Paoly mikasiky ty vavaky?

² Marina fa tokony hivavaky mikasiky ty raha mampiasa loha antsika tsika, fe tokony hivavaky ho an’olo hafa koa tsika. Zay mihintsy ty nataon’ny apostoly Paoly. Zao, ohatsy, ty nisoratiny ho an’ny fiangonan’i Efesosy: “Mivavaky ho anareo aho.” (Efes. 1:16) Nivavaky ho an’olo kiraidraiky koa Paoly. Nivola tamy Timoty, ohatsy, ie hoe: “Misaotsy a-Ndranahary aho, . . . le mahatiaro anao avao aho lafa misoloho amy vavaky maraintsihariva.” (2 Tim. 1:3) Nivavaky mikasiky ty raha sarotsy nahazo azy Paoly. (2 Kor. 11:23; 12:7, 8) Fe ndre zay, mbo nanoka fotoa hivavaha ho an’olo hafa koa ie.

3. Ino ty antony mety hahavy antsika tsy hivavaky ho an’olo hafa?

³ Mety ho halinontsika kindraiky ty mivavaky ho an’olo hafa. Ino ty antony? Niresaky antony raiky mahavy ani-zay ranabavy atao hoe Sabrinaa zay. Zao ty nivolaniny: “Tsy mora ty fiaina amy tontolo toy eto. Vokatsini-zay, le mety hifantoky amy ty raha manahira antsika tsika, ka lasa zay avao ro ataontsika antom-bavaky.” Fa niseho aminao va raha zay? Laha zay ie, le hanampy anao lahatsoratsy toy. Retoa ty raha hodinihintsika ato: 1) Manino ro tena ilà ty mivavaky ho an’olo hafa. 2) Ino ty soso-kevitsy hanampy antsika hanao ani-zay.

MANINO TSIKA RO TOKONY HIVAVAKY HO AN’OLO HAFA?

4-5. “Misy vokany bevata” va ty vavaky ataontsika ho an’olo hafa? (Jakoba 5:16)

⁴ “Misy vokany bevata” ty vavaky atao ho an’olo hafa. (Vakio Jakoba 5:16.) Tena misy vokany vatany va ty vavaky atao ho an’olo hafa? Eka, misy! Hain’i Jesosy fa handà azy apostoly Petera tsy ho ela, ka zao ty nivolaniny: “Fa nangataky ho anao aho mba tsy ho rava ty finoanao.” (Lioka 22:32) Hain’i Paoly koa hoe afaky manova raha ty vavaky. Lafa nigadrà tsy ara-drariny ta Roma any ie, le zao ty nisoratiny ho an’i Filemona: “Mitamà aho hoe habototsy ka ho avy aminareo any ndraiky, satria mivavaky ho ahy nareo.” (Filem. 22) Nabototsy vatany Paoly tsy ela tafarani-zay, ka afaky nitory ndraiky.

⁵ Mazava ho azy, fa tsy voatery ho tanterahin’i Jehovah iaby ze raha angatahintsika amy vavaky. Dinihiny soa ty raha angatahin’ny mpanompony, le anjarany ty manapa-kevitsy na hovaleany raha zay na tsy hovaleany. Manampy antsika ty fahaiza ani-zay mba hivavaky mafy mikasiky ty raha mahazo antsika sady hatòky hoe mahita fomba soa handamìna an’ny raha iny Jehovah.​—Sal. 37:5.

6. Lafa mivavaky ho an’olo hafa tsika, ino ty raha tsapantsika mikasiky an-drozy? (1 Petera 3:8)

⁶ ‘Miferinay olo’ tsika lafa mivavaky ho an’olo hafa. (Vakio 1 Petera 3:8.) Mahatsapa ty fijalean’olo ty olo raiky mahay miferinay olo sady ta hanao raha hanampea azy. (Marka 1:40, 41) Zao ty nivolanin’ny anti-panahy mana anara Michael zay: “Lafa mivavaky ho an’olo hafa aho, le lasa tsapako ty raha mahazo an-drozy sady vomaiky mitombo ty fitiavako an-drozy. Lasa tsapako hoe mihamariny an-drozy aho, ndre mety tsy hain-drozy aza raha zay.” Zao koa ty nivolanin’ny anti-panahy atao hoe Richard zay: “Lafa mivavaky ho an’olo raiky tsika, le vomaiky ta hanao raha hanampea azy.” Nivola koa ie hoe: “Lafa manampy an’olo niresahintsika tamy vavaky iny tsika, le sahala hoe nampiasan’i Jehovah mba hamalea an’ny vavaky nataontsika iny.”

7. Lafa mivavaky ho an’olo hafa tsika, manino raha zay ro manampy antsika tsy hiasa loha marè amy problemo mahazo antsika? (Filipianina 2:3, 4) (Henteo koa sary reo.)

⁷ Manampy antsika tsy ho kivy amy problemo mahazo antsika ty vavaky ataontsika ho an’olo hafa. (Vakio Filipianina 2:3, 4.) Samby miatriky raha sarotsy tsika iaby satria miay amy tontolo ambany fahefàn’ny Devoly toy eto. (1 Jaona 5:19; Apok. 12:12) Lafa zatsy mivavaky ho an’olo hafa tsika, le ho tiarontsika hoe ‘ampijalỳ manahaky ani-zay koa ty rahalahintsika iabiaby amy finoa ao.’ (1 Pet. 5:9) Zao ty nivolanin’ny mpisava lala mana anara Katherine zay: “Lafa mivavaky ho an’olo aho, le tiaroko hoe miatriky raha sarotsy koa ty olo hafa. Manampy ahy tsy hiasa loha marè amy problemo mahazo ahy raha zay.”

MILA TY VAVAKINTSIKA TY OLO HAFA

8. Ia iaby ty azontsika resahy amy vavaky?

⁸ Ia iaby ty azontsika resahy amy vavaky? Afaky mivavaky ho an’olo amy ankapobeny tsika, ohatsy hoe ty olo tsy salama, ty tanora kizakizahin’ny namany na miatriky fakam-panahy an-dakilasy any, na ty be tao miatriky raha sarotsy. Maro koa ty mpiara-manompo miatriky fanenjeha, ndre baka amy fianakaviany zay, ndre baka amy fanjakà. (Mat. 10:18, 36; Asan’ny Apostoly 12:5) Tsy maintsy niala ty tranony koa ty rahalahy noho anabavy sisany satria misy koronta ara-politiky ty faritsy misy an-drozy. Ao koa ty mijaly vokatsin’ny loza arakin’ny natiora. Mety tsy haintsika rahalahy noho anabavy reo. Fe lafa mivavaky ho an-drozy tsika, le asehontsika hoe manoriky an’ny didin’i Jesosy toy tsika: “Mifankatiava nareo.”​—Jaona 13:34.

9. Manino tsika ro tokony hivavaky ho an’ny rahalahy miasa mafy anivon’ny fandaminan’i Jehovah eo reo noho ty valin-drozy?

⁹ Afaky mivavaky ho ani-azy mitariky anivon’ny fandaminan’i Jehovah eo rey koa tsika. Anisani-zay ty Filan-kevi-pitantana noho ty mpanampy an-drozy, ty mpiandraikitsin’ny sampan-draharaha amy sampana any, ty mpiandraikitsin’ny faritsy, ty anti-panahy, noho ty mpikarakara fiangona. Mana ty problemon-drozy manoka rahalahy reo, fe mbo miezaky mikarakara antsika avao. (2 Kor. 12:15) Zao, ohatsy, ty nivolanin’ny mpiandraikitsin’ny faritsy mana anara Mark zay: “Anisan’ny raha tena mafy amiko ty hoe lavitsy ty ray aman-dreniko, kanefa rozy fa be tao sady samby tsy salama. Marina fa mikarakara ze raha ilàn-drozy anabaviko zay noho ty valiny, fe malahelo avao aho satria voafetra ty raha azoko atao ho an-drozy.” Tokony hivavaky ho an’ny rahalahy miasa mafy reo tsika, na tsapantsika ty raha sarotsy atrehin-drozy na tsy tsapantsika. (1 Tes. 5:12, 13) Afaky mivavaky ho an’ny valin’ny rahalahy reo koa tsika, satria miezaky mafy manoha ty valin-drozy avao rozy mba hahavitan’ny rahalahy reo ty asa anendrea an-drozy.

10-11. Ankasitrahan’i Jehovah va ty vavaky ataontsika ho an’ny mpiara-manompo amy ankapobeny? Hazavao.

¹⁰ Nihitantsika teo, fa afaky mivavaky ho an’ny rahalahy noho anabavy amy ankapobeny tsika. Ndre tsy misy olo avy an-tsaintsika ao, ohatsy, lafa mivavaky tsika, le azontsika atao ty mangataky amy Jehovah mba hanampeany ani-azy gadra rey na hampaherezany ani-ze olo nimaty longo. Zao ty nivolanin’ny anti-panahy mana anara Donald zay: “Tena maro ty rahalahy noho anabavy miatriky raha sarotsy, ka mivavaky ho an-drozy amy ankapobeny avao zahay kindraiky, amy zay tafilitsy iaby ze mpiara-manompo mijaly.”

¹¹ Ankasitrahan’i Jehovah va ty vavaky manahaky ani-zay? Mazava ho azy! Tsy tena haintsika ty raha tena ilàn’ny rahalahy noho anabavintsika reo kiraidraiky, ka mety zany laha mivavaky ho an-drozy amy ankapobeny tsika. (Jaona 17:20; Efes. 6:18) Asehontsika baka amy zay hoe ‘tea ty rahalahy iaby amy finoa ao tsika.’​—1 Pet. 2:17.

LAFA MIVAVAKY HO AN’NY KIRAIDRAIKY

12. Manino ty fahaiza mandiniky ro manampy antsika hiresaky raha voafaritsy soa lafa mivavaky?

¹² Mahaiza mandiniky. Ankoatsin’ny vavaky ataontsika ho an’ny rahalahy noho anabavy amy ankapobeny, le soa laha mivavaky ho an’olo kiraidraiky koa tsika, ka tononintsika mihintsy ty anarany. Misy olo mana arety miteza va amy fiangonanareo eo? Sa misy tanora kivy satria forosevan’ny mpiaraky mianatsy aminy hanao raha raty? Sa misy baba na reny raiky miezaky mafy miteza ty anany ‘mifanaraky amy ty raha atoron’i Jehovah’? (Efes. 6:4) Laha mahay mandiniky iha, le ho hainao ty raha iainan’ny mpiara-manompo aminao, ka vomaiky iha hivavaky ho an-drozy.b​—Rom. 12:15.

13. Ino ty hanampy antsika hivavaky ho an’ny mpiara-manampo tsy mifankahay amintsika rey?

¹³ Tonono anaran’olo iny lafa mivavaky iha. Afaky manao ani-zay tsika, ndre amin’olo mbo tsy nifankahita amintsika aza. Diniho, ohatsy, ty rahalahy noho anabavintsika gadra a Crimée, Érythrée, Russie, noho a Singapour any. Azonao hentea amy jw.org ao ty anaran-drozy.c Zao ty nivolanin’ny mpiandraikitsin’ny faritsy atao hoe Brian zay: “Hitako hoe lafa soratiko noho tononiko ty anaran’ny mpiara-manompo raiky gadra, le lasa mora amiko ty mahatiaro azy noho mampilitsy azy amy vavaky.”

14-15. Ino ty hanampy antsika hiresaky raha voafaritsy soa lafa mivavaky?

¹⁴ Miresaha raha voafaritsy soa. Zao ty nivolanin’i Michael, azy niresahintsika taloha teo iny: “Lafa vakiko amy jw.org ao tantaran’ny mpiara-manompo gadra rey, le alàko sary an’eritseritsy hoe ho nanao akory aho laha tamy pilasin-drozy. Haiko hoe tsy maintsy ho niasa loha mikasiky an’ny valiko aho sady teako ho niazo antoky hoe nahita ze raha nilàny avao ie. Manampy ahy raha zay mba hiresaky raha voafaritsy soa lafa mivavaky ho an’ny mpiara-manompo gadra rey aho, sirtò azy manambaly rey.”​—Heb. 13:3, f.a.p.

¹⁵ Hahita raha hafa horesahy amy vavaky koa tsika, laha mandiniky ty raha iainan’ny mpiara-manompo gadra rey. Azontsika atao, ohatsy, ty mivavaky mba ho soa fanahy amin-drozy mpiamby gadra rey, na mba hengan’ny manam-pahefà hanompo an’i Jehovah avao rozy, ndre an-gadra ao. (1 Tim. 2:1, 2) Afaky mivavaky tsika mba hampahery ty fiangona amy faritsy misy an’ny mpiara-manompo gadra iny any ty tsy fivalihany. Na koa mba hijanjy ty hafatsy torintsika ty olo tsy vavolombelo lafa mahita ty fandaisam-bata soa ananan’ny rahalahy na anabavy gadra iny. (1 Pet. 2:12) Afaky manao manahaky ani-zay koa tsika, lafa mivavaky ho an’ny rahalahy noho anabavy miatriky raha sarotsy hafa. Laha mahay mandiniky noho manoño anaran’olo tsika lafa mivavaky, sady miresaky raha voafaritsy soa, le asehontsika hoe ‘mifankatea vatany tsika.’​—1 Tes. 3:12.

MAHAIZA MANDANJALANJA LAFA MIVAVAKY

16. Ino ty hanampy antsika hahay handanjalanja avao lafa mivavaky? (Matio 6:8)

¹⁶ Nihitantsika teo, fa mety hanova raha ty vavaky ataontsika. Fe mila mahay mandanjalanja tsika. Lafa mivavaky tsika, le tsy hoe manambara raha vaovao amy Jehovah na manoro hevitsy azy mikasiky ty fomba handaminany raha raiky. Fa hain’i Jehovah ty raha ilàntsika mpanompony ndre mbo tsy haintsika aza. (Vakio Matio 6:8.) Ka laha zay ie, manino zany tsika ro mila mivavaky ho an’olo hafa? Niresaky antony vitsivitsy tsika tamy lahatsoratsy toy ato. Fe ankoatsini-reo, mivavaky ho an’olo hafa koa tsika mba hampisehoa hoe midary olo tsika. Ty fitiava ro mandrisiky antsika hifampivavaky. Mahafalifaly an’i Jehovah koa ty mahita hoe manam-pitiava manahaky azy ty mpanompony.

17-18. Manino tsika ro tokony hivavaky ho an’ny mpiara-manompo? Hazavao amy ohatsy.

¹⁷ Ndre atao raha tsy misy vokany aza ty vavaky ataontsika, le hita amy vavaky rey hoe tea ty rahalahy noho anabavintsika tsika sady voamarikin’i Jehovah raha zay. Toy misy ohatsy: Ndao atao hoe misy mpivaly mana anaky roe mbo kelikely. Lahilahy ty raiky, le ampela ty raiky. Marary am-pandrea eo anakilahin-drozy iny. Niangavy an’ny babany amy zay anak’ampelan-drozy iny hoe: “Mba karakarao laha baba anadahiko io. Tena marary an’ie io!” Laha ty marina, fa mikarakara ty fahasalaman’ny anadahiny io babany. Teany anakilahiny io, le karakaràny soa. Fe falifaly baban-drozy iny, lafa hitany hoe tena mila ze hahasoa an’ny anadahiny iny anak’ampelan-drozy io, ka niangavy azy mba hikarakara azy.

¹⁸ Manahaky ani-zay koa, fa tean’i Jehovah tsika laha mifampidary noho mifampivavaky. Hita hoe tsy tea tena noho mila ze hahasoa an’ny rahalahy noho anabavintsika reo tsika laha manao ani-zay sady hitan’i Jehovah raha zay. (2 Tes. 1:3; Heb. 6:10) Niresahintsika tato koa, fa mety hanova raha mihintsy ty vavaky ataontsika. Enganè tsika hanao ze azontsika atao ka hifampivavaky avao.