Mila Arova ty Ampela​—Ino hoasan’ny Baiboly?

“Tamy zaho mbo nikely, le nampijaly noho nanao safà maharary ahy avao zokiko lahilahy zay sanandro. Mbo nitohy avao raha zay lafa zaho nanambaly, satria nanao hozay koa rafozako ampela iny. Mitovy amy andevo io mihintsy ty nanaovan-drozy amy rafozako lahilahy iny ahy. Farany fa nieritseritsy hamono fo iaby aho.”​—Madhu,a Inde.

Manamafy ty Fikambana Iraisam-pirenena Mikasiky Fahasalamà fa “hita amy tany toy iaby ty fampijalea ampela.” Nivola koa fikambana io fa eo ho eo amy ampela raiky anatin’ny telo eo ty fa nitratsin’ny fampijalea ara-bata na nisy nandrava tamy fiainany.

Laha fa nitratsini-zay iha, le mety hatahotsy hoe ze tany andehananao le mety hisy hampijaly na hanararaotsy anao iaby. Vokatsin’ny hasatà noho tsy fidarea ampela rey koa, le mety hieritseritsy iha hoe ty ankamaroan’olo zany le fa manao ho zao hoe ‘tsy misy dikany ty ampela.’ Fe tena midary ty ampela vatany va Ndranahary?

Manao akory ty fahità-Ndranahary ty ampela?

Andinin-teny: “Lahilahy noho ampela ty namoronany [namorona-Ndranahary] azy.”​—Genesisy 1:27.

Ty teany hovolany: Lafa namoro ty olombelo Ndranahary, le lahilahy noho ampela ty namoronany azy. Samby maeva hohajà ty fahitany an-drozy. Teany koa laha “tea ty valiny manahaky ty vatany” ty lahilahy, fa tsy hifehifehy azy, handraky moa ty hanao safà maharary na hampijaly azy. (Efesianina 5:33; Kolosianina 3:19) Hita baka amy zay fa tena tea-Ndranahary ho voaro vatany ty ampela.

“Niravàn’ny longonay zay aho tamy zaho mbo nikely. Tamy zaho 17 tao koa, le nampitahorin’ny mpampiasa ahy zay hoe horoahiny laha tsy manao firaisa aminy. Lafa nibè koa aho, le niambanimbanin’ny valiko, ray aman-dreniko, noho ty olo manodidy anay. Fe nianatsy mikasiky an’i Jehovah,b azy Mpamoro antsika iny aho tafara atoy. Nianarako hoe manaja ty ampela ie. Nahavy ahy hahatsapa raha zay hoe tea ahy ie sady tsy hoe tsy misy ilà azy ty fahitàny ahy.”​—Maria, Arzantiny.

Ino ty hanampy anao tsy harary fo sasy?

Andinin-teny: “Misy mpinama parè hifamotiky, fe misy nama mivahatsy mandilatsy ty rahalahy koa.”​—Ohabolana 18:24.

Ty teany hovolany: Hanoha anao avao ty tena nama. Ka laha mety, le resaho amin’olo atokisanao ty raha tsapanao.

“Tanatin’ny 20 tao, le tsy nambarako an’ia n’ia hoe nisy nandrava aho. Farany lasa tsy nifalifaly, niasa loha, noho kivy aho lafa nihabe. Fe lafa nitantaraniko amin’olo parè hijanjy ahy zay raha iny, le tena naivaiva aho.”​—Elif, Turquie.

Andinin-teny: “Apetraho aminy [Ndranahary] iaby ze raha mampiasa loha anareo, satria midary anareo ie.”​—1 Petera 5:7.

Ty teany hovolany: Tena mijanjy anao Ndranahary lafa iha mivavaky aminy. (Salamo 55:22; 65:2) Midary anao ie, le teany ho tsapanao hoe tena lafovily iha anatrehany eo. Hanampy anao hahatsapa ani-zay ie.

“Lafa nianatsy mikasiky an’i Jehovah aho le nihajanga tsikelikely ty bay tanatiko ao, zany hoe ty alahelo noho ty aretim-po nitsapako. Henanizao afaky miresaky ty raha iaby amy Ndranahary aho, le mivavaky aminy. Manahaky nama mahay soa ty raha tsapako io ie.”​—Ana, Belize.

Ino ty hatao-Ndranahary mba tsy hisy sasy ty fampijalea ampela?

Andinin-teny: “Hanome rariny ty kamboty rà noho ze ampijalỳ [Jehovah], mba tsy hampitahotsy an-drozy sasy ty olombelo mety maty, le ty olo an-tany etoy.”​—Salamo 10:17, 18.

Ty teany hovolany: Kely sisa le hofoana-Ndranahary ty tsy rariny, anatini-zay ty fampijalea noho hasatà atao amy ty ampela.

“Tena naivaiva aho lafa nahay hoe kely sisa le hofoanan’i Jehovah ty fampijalea ampela noho somonjara. Sahala fanafody nahajanga ahy mihintsy raha zay. Lasa nilamy koa ty saiko.” ​—Roberta, Meksiky.

Laha ta hahay misimisy mikasiky ty raha mampahery ampitamanin’ny Baiboly, ty antony mahavy antsika hatoky ty raha ampitamaniny, noho ty fomba azon’ny Vavolombelon’i Jehovah anampea anao iha, le angataho olo nanome ani-taratasy toy anao iny mba hisy hitsidiky anao.

Alao amy internet ato ty soraky azo atao printy amy lahatsoratsy toy.