Ia ty Hanavotsy ty Olo Tsotra?​—Ino ty Volanin’ny Baiboly?

Nanao tatitsy hozao ty Firenena Mikambana:

• Nanomboky tamy 7 Oktobra zisiky tamy 23 Oktobra 2023 teo avao, le fa mandilatsin’ny 6 400 ty maty, le 15 200 mahery ty naratsy vokatsin’ny alin’ny Gaza noho Israely. Ty ankamaroany olo tsotra, fa tsy maramila na mpandramby anjara amy aly io. Mbo misy olo maro koa henanizao lasa tsy maintsy nafindra pilasy.

• Zisiky tamy 24 Septambra 2023 teo, le olo tsotra 9 701 ty nimaty, le 17 748 ty naratsy vokatsin’ny alin’ny Russie noho Ukraine.

Ino ty raha ampitamanin’ny Baiboly ho ahin’olo mijaly vokatsin’ny aly rey?

Mbo misy raha tamany

Mampitamà ty Baiboly fa hatao-Ndranahary “tsy misy aly sasy ty amy tany toy iaby.” (Salamo 46:9) Hampiasa fanjakà raiky an-danitsy any ie, le hosoloany ty fanjakàn’olombelo iaby. (Daniela 2:44) Fanjakà-Ndranahary ty ikaiha azy, le handay fiadana ho ahi-ty olo iaby fanjakà io.

Amy maha mpanjakan’ny fanjakà io an’i Jesosy Kristy, le retoa ty raha hataony:

• “Hanavotsy ani-ze mahantra mila fanampea ie. Hiferinay ty maliniky noho ty mahantra ie, le hanavotsy ty ain’ny mahantra. Hanavotsy an-drozy amy fampijalea noho hasatà ie, le ho lafovily aminy ty lion-drozy.”​—Salamo 72:12-14.

Hampiasa ty fanjakàny Ndranahary, mba hanafaha tanteraky ty fahantrà noho ty fijalea vokatsin’ny aly noho hasatà.

• “Hofafàny ty ranomaso iaby amy ty mason-drozy, ka tsy hisy sasy ty fahafatesa, sady tsy hisy sasy ty alahelo na ty fitaraina na ty raha mahararirary, fa fa lasa ty raha taloha.”​—Apokalypsy 21:4.

Kely sisa le handay fanovà an-tany etoy ty Fanjakà-Ndranahary. Fa nivola mialoha ty Baiboly fa ‘haharè aly ty olo sady hisy hivola hoe misy aly amy pilasy hafa any,’ le zay mihintsy raha hitantsika henanizao io. (Matio 24:6) Hita amy raha miseho henanizao io noho ty maro hafa, fa miay amy “andro farany” tsika henanizao, le fa kely sisa ty fotoa andaisan’ny fanjakàn’olombelo.​—2 Timoty 3:1.