Manoha ty Jiosy va ty Vavolombelo Jehovah?

Aha. Kristiana ty Vavolombelo Jehovah, ka mifototsy amy Soratsy Masy ty raha inoany. Misy fivavaha mivola fa manatanteraky faminania amy Soratsy Masy ao ty famoria ty Jiosy a Palestina any. Fe tsy mitovy hevitsy amy zay ty Vavolombelo Jehovah. Tsy mino rozy hoe misy faminania mikasiky raha zay amy Soratsy Masy ao. Volany ty Soratsy Masy aza hoe tsy mety ty mandrengy ty fanjakànolombelo sady tsy volaniny ao hoe misy foko na firenena anabo mandilatsy ty sisany. Hoy ty gazety ty Vavolombelo Jehovah atao hoe Ny Tilikambo Fiambenana: “Tsy manoha ty fihetsiketseha ara-politiky atao ty Jiosy mihintsy ty Soratsy Masy.”

Mivola Ty Bokim-pahaia Britannica (anglisy) fa ty hanangana noho hanohana ty fanjakà Jiosy a Palestina any, ro raha kendrè ty fihetsiketseha atao ho fanohana ty Jiosy. Sady fihetsiketseha ara-pivavaha raha zay no ara-politiky. Fe tsy mampianatsy mikasiky fanohana ty Jiosy ty Vavolombelo Jehovah sady tsy manoha ty atia na ty aroa mihintsy amy fihetsiketseha manahaky rey.

Fikambana ara-pivavaha ty Vavolombelo Jehovah, ka tsy manoha fihetsiketseha ara-politiky, tafilitsy amy zay ty fanohana ty Jiosy. Tsy manao politiky mihintsy ty Vavolombelo Jehovah sady maro ty porofo manamarina raha zay. Misy amin-drozy aza enjehy amy tany sisany satria tsy manao politiky. Mino rozy fa ty Fanjakà Ndranahary raiky avao ro handay fiadana zisiky farany an-tany etoy. Tsy misy mahavita raha zay, ndre ty fanjakànolombelo ndre ty fihetsiketseha ara-politiky.

Manoriky ty lalàm-panjakà ty Vavolombelo Jehovah, ndre aia ndre aia ty misy azy. Tsy manohitsy ty fanjakà rozy sady tsy mandramby anjara amy aly.