Manino ty Vavolombelo Jehovah ro Tsy Manao Politiky?
Tsy militsy amy politiky mihintsy ty Vavolombelo Jehovah satria mino fa zay ro ampianary ty Baiboly. Tsy miezaky hanova hevitsy ty mpanday fanjakà zahay sady tsy militsy amy fihetseketseha hanova fanjakà. Tsy manoha kandidà na antoko politiky koa zahay sady tsy milatsaky hofilỳ. Azonay antoky fa tsy tokony hatao vatany raha reo, laha hentea ty raha volany ty Baiboly.
Manoriky ty raha natao Jesosy zahay. Tsy naneky hamea pilasy politiky ie. (Jaona 6: 15) Nampianariny fa “tsy miharo amy zao tontolo zao” ty mpianatsiny. Natorony soa koa fa tsy tokony ho poro aniania rozy, amy resaky politiky.—Jaona 17:14, 16; 18:36; Marka 12:13-17.
Tsy mivaliky amy ty Fanjakà Ndranahary zahay. Nivola Jesosy hoe: “Hotorỳ amy tany toy iaby vaovao soa Fanjakà iny toy.” (Matio 24:14) Misolo tena ty Fanjakà Ndranahary zahay, sady manambara fa ho avy raha io. Zay ro mahavy anay tsy mikasikasiky politiky, ndre aia ndre aia tany misy anay.—2 Korintianina 5:20; Efesianina 6:20.
Tsy manao politiky zahay, ka afaky miresaky soa aminolo iaby mikasiky ty vaovao soa Fanjakà iny, ndre ino ndre ino ty hevitsy tohanany amy politiky. Teanay hatoro amy ty safànay noho ty raha ataonay fa ty Fanjakà Ndranahary avao ro tamàninay hamaha ty raha manahira ty olombelo.—Salamo 56:11.
Tsy ta ho voazarazara ty politiky zahay, ka le miharo raiky manahaky ty mpirahalahy amy tany toy iaby. (Kolosianina 3:14; 1 Petera 2:17) Tsy manahaky zay ty fivavaha mahatakosiky politiky satria mampisaratsaraky ty mpivavaky aminy ao.—1 Korintianina 1:10.
Manaja ty fanjakà zahay. Manaja ty manama-pahefà amy ty tany misy anay zahay, ndre tsy manao politiky. Mifanaraky amy didy amy Baiboly ao toy raha zay: “Soa ty olo iaby laha samby maneky ty manam-pahefà.” (Romanina 13:1) Manara-dalàna zahay, mandoa hetra noho miaraky miasa amy fanjakà amy ty ezaky ataony mba hahasoa ty vahoaky. Tsy manonga fanjakà zahay. Mifanohitsy amy zay aza ty torohevitsy amy Baiboly ao hoe mila mivavaky “ho ahy ty mpanjaka noho ze mana pilasy anabo.” Zay ty ataonay, sirtò lafa misy fanapahan-kevitsy rambesin-drozy ka mety hisy vokany amy ty fahalalaha ty olo hifily ze fivavaha teany.—1 Timoty 2:1, 2.
Manaja ty zo ty hafa handramby ty fanapahan-kevitsiny ambatany koa zahay, amy resaky politiky. Tsy mampikoronta latsa-bato, ohatsy, zahay, sady tsy manakantsaka ty olo ta handatsa-bato.
Raha vaovao niforoninay va tsy fanaova politiky io? Aha. Fa nanao ho zay koa ty apostoly noho ty Kristiana voalohany. Nivola ho zaho ty boky hoe Tsy hoe ta Hanao Soa Avao (anglisy): ‘Resy lahatsy ty kristiana voalohany fa tsy maintsy manaja ty manam-pahefà manampaky, fe tsy nety nanao politiky rozy.’ Nivola koa ty hoe Fa Hivoatsy (anglisy) fa “tsy nety nandramby pilasy politiky” Kristiana taloha tany rey.
Atahora tsy hampilamy tany va raha zay? Aha. Vahoaky tea filamina zahay, ka tsy misy raha tokony hampatahotsy ty manam-pahefà. Tamy 2001, ohatsy, le nisy tatitsy raiky naboaky ty Akademia Nasionaly Iokrenianina. Ho zao ty nivolaniny: ‘Mety tsy ho teanolo sisany raha zay, hoe tsy manao politiky ty Vavolombelo Jehovah. Sady mbo zay avao koa ro nanameloha an-drozy tamy fandaisa Nazia noho Kominista.’ Volaniny ao koa fa ndre nisereserè ty Sovietiky rozy le ‘mbo nanara-dalàna avao. Nataon-drozy soa ty asa mafy nampanaovy an-drozy tamy fambolea noho fiharea voho orinasa rey any. Tsy natahora hanohitsy ty fandaisa kominista rozy.’ Nivola tatitsy iny tamy farany hoe ‘tsy manahira ty filamina noho ty fiharoan-tsay amy ze kila firenena’ misy azy, ty Vavolombelo Jehovah noho ty asa ataony.