Ty taratasy voalohany ho ahi-ty Korintianina
1 Baka amy Paoly noho Sostena rahalahintsika. Paoly io nikaihy ho apostolin’i Kristy Jesosy, vokatsin’ny sitrapo-Ndranahary.
2 Ho ahi-ty fiangona-Ndranahary a Korinto any, tsy ia zay fa nareo ze nihamasìny tamy Kristy Jesosy ao sady nikaihy ho olo masy, noho ho ani-ze olo iaby mikaiky ty anaran’i Jesosy Kristy Tompontsika, azy Tompon-drozy sady Tompontsika iny koa, ndre aia ndre aia ty misy an’ny olo rezay,
3 Enganè Ndranahary Babantsika iny noho Jesosy Kristy Tompo, mba hampiseho hasoam-panahy miavaky* aminareo sady hanome anareo fiadana!
4 Tsy mieny misaotsy an’ny Ndranahariko iny ho anareo aho, satria nampisehoany hasoam-panahy miavaky tamy alalan’i Kristy Jesosy nareo. 5 Tsy zay fa miaraky amy Kristy nareo, le lasa manan-kanana amy raha iaby, anisani-zay ty hoe lasa mahay mitory noho mana fahaiza feno nareo, 6 satria natao mafy fototsy taminareo ao ty fitoria mikasiky an’i Kristy. 7 Dikani-zay, le tsy misy mihintsy fanomeza tsy anananareo, aminareo miamby marè henanizao io hoe ombia ro haseho mazava soa Jesosy Kristy Tompontsika. 8 Hanampy anareo ho mafy fototsy zisiky farany koa Ndranahary, mba tsy hisy raha hasara anareo amy andron’i Jesosy Kristy Tompontsika. 9 Tsy mivaliky amy ty safàny Ndranahary, azy nikaiky anareo mba hifandramby marìny* amy Anany iny, tsy ia Anany io fa Jesosy Kristy Tompontsika.
10 Mampirisiky anareo aho rahalahy, amy anaran’i Jesosy Kristy Tompontsika, mba hifanaraky nareo amy ze raha volaninareo. Ka engà hisy fisaratsaraha aminareo eo, fa miezaha hiharo raiky vatany, ka hitovy say noho hitovy hevitsy. 11 Tsy zay rahalahiko fa nisy olo trano raiky amy Kloa niresaky mikasiky anareo tamiko hoe misy tsy mifanaraky zao ty aminareo eo. 12 Zao ty teako hovolany: Misy mivola hoe “Zaho ahin’i Paoly”, na hoe “Zaho ahin’i Apolosy”, le ty hafa mivola hoe “Zaho ahin’i Kefasy”,* na “Zaho ahin’i Kristy.” 13 Voazarazara va Kristy? Paoly va ro nivonoa tamy tsato-kazo eo ho anareo? Sa natao batisa tamy anaran’i Paoly nareo? 14 Misaotsy a-Ndranahary aho fa tsy nisy nataoko batisa nareo, laha tsy Krispo noho Gaio, 15 amy zay tsy hisy hivola hoe natao batisa tamy anarako nareo. 16 Eka, nataoko batisa koa ty olo trano raiky amy Stefanasy. Tsy tiaroko laha mbo nisy olo hafa nataoko batisa koa na tsy nisy. 17 Tsy zay fa tsy naniraky ahy hanao batisa Kristy, fa hitory ty vaovao soa. Fe tsy nampiseho fahendrean’olombelo* aho lafa nitory, tsy no hanjary tsy hisy dikany ty hazo fijalean’i* Kristy.
18 Fa amy ze olo ho ripaky, le hagegea ty fampianara* mikasiky ty hazo fijalea,* fa amintsika ze havota, le heri-Ndranahary raha zay. 19 Tsy zay fa voasoratsy hoe: “Horavàko ty fahendrean’olo hendry, le tsy hekeko* ty fahaizan’olo mahay raha.” 20 Ka aia ty olo hendry? Aia ty mpanora-dalàna?* Aia ty mpialy hevitsy amy zao tontolo zao eto?* Tsy niovà-Ndranahary ho hagegea va ty fahendreani-zao tontolo zao? 21 Tsy zay fa tsy mahay a-Ndranahary zao tontolo zao, satria mieritseritsy ty vatan-drozy ho mana fahendrea. Fe naseho-Ndranahary ty fahendreany, ka hitany hoe mety laha amy alalan’ny hafatsy torinay, azy eritseretin’olo hoe hagegea iny, ro hanavota ani-ze olo mino.
22 Tsy zay fa mangataky famantara ty Jiosy, le mila fahendrea ty Grika, 23 fa tsika mitory mikasiky an’i Kristy nivonoa tamy tsato-kazo eo. Raha maminga an’ny Jiosy reo raha zay, sady hagegea amin’olo firenena hafa. 24 Fe amy ze olo nikaihy, ndre Jiosy zay ndre Grika, le amy alalan’i Kristy ro isehoan’ny heri-Ndranahary noho ty fahendrea-Ndranahary. 25 Tsy zay fa ze raha sahala hagegea baka amy Ndranahary le mbo hendry mandilatsy ty olo, sady ze raha sahala handra baka amy Ndranahary le mbo mahery mandilatsy ty olo.
26 Le hitanareo rahalahy, lafa nikaiky anareo ie le tsy maro taminareo ty hendry araky ty hevitsin’olombelo,* tsy maro ty mahery, le tsy maro ty baka amy fianakavia manan-kaja.* 27 Fe nifily ty raha gegy amy zao tontolo zao Ndranahary, mba hahamenatsy ty olo hendry. Le nifily ty raha malemy amy zao tontolo zao Ndranahary, mba hahamenatsy ty raha mahery. 28 Nifily ty raha tsy misy dikany amy zao tontolo zao noho ty raha tsy darean’olo koa Ndranahary, zany hoe ty raha tsy misy, mba handravany ty raha misy, 29 amy zay tsy hisy olo* hirengirengy amaso-Ndranahary eo. 30 Fa ie ro nahavy anareo hiaraky amy Kristy Jesosy, azy nanambara amintsika ty fahendrea-Ndranahary noho ty fahamarinany iny, sady nahavy antsika ho masy, noho nanafaky antsika tamy alalan’ny vilim-panavota, 31 mba hifanaraky amy azy voasoratsy iny hoe: “Ze mirengirengy, le Jehovah ro tokony hampirengirengy azy.”