Ty taratasy voalohany ho ahi-ty Korintianina
3 Ka zao zany rahalahy, tsy afaky niresaky taminareo manahaky miresaky amin’olo arakin’ny fanahy aho, fa sahala miresaky amin’olo arakin’ny nofotsy, manahaky miresaky amy ajà amy Kristy ao. 2 Nifahanako ronono nareo fa tsy ventin-kany, satria mbo tsy natanjaky soa. Fe mbo tsy matanjaky soa avao nareo henanizao, 3 fa mbo olo arakin’ny nofotsy avao. Tsy olo arakin’ny nofotsy va nareo sady manao manahaky ty ataon’olo amy zao tontolo zao eo, laha mbo mifampialona noho mifamaly? 4 Fa laha mivola ty raiky hoe: “Zaho ahin’i Paoly”, fe ty raiky mivola hoe: “Zaho ahin’i Apolosy”, tsy mitovy amy ty raha ataon’olo iaby avao va ty ataonareo?
5 Manino nareo ro mieritseritsy hoe miavaky Apolosy? Na miavaky Paoly? Mpanompo nahavy anareo ho mpino avao zahay, araky ty fanompoa namean’ny Tompo anay kiraidraiky. 6 Zaho namboly, Apolosy nanondraky, fa Ndranahary ro tsy nieny nampitombo. 7 Ka tsy azy mamboly na azy manondraky iny zany ro maeva hamea voninahitsy, fa Ndranahary azy mampitombo iny. 8 Raiky avao azy* mamboly noho azy manondraky iny, fe samby hahazo ty valisoan-drozy rozy, arakaraky ty asa mafy nataon-drozy. 9 Satria mpiaraky miasa amy Ndranahary zahay, le baibò ambolea-Ndranahary noho trano amboari-Ndranahary nareo.
10 Vokatsin’ny hasoam-panahy miavaky naseho-Ndranahary tamiko, le nametraky fototsy aho, manahaky ataon’olo mpamboatsy trano tena mahay* rey, kanefa olo hafa ro mamboatsy raha anabon’ny fototsy iny eo. Fe tokony hitandrina soa avao ty olo kiraidraiky amy ty raha amboariny anabon’ny fototsy zay eo. 11 Satria tsy misy olo afaky mametraky fototsy hafa ankoatsini-ze fa napetraky, zany hoe Jesosy Kristy. 12 Laha misy mamboatsy raha amy volamena, volafoty, vatosoa, hazo, akata, na tsatsango* anabon’ny fototsy iny eo, 13 le ho hita hoe manao akory* ty asan’olo kiraidraiky, lafa avy ty andro fisedrà. Tsy zay fa hampiseho mazava an’ny raha zay ty afo, ka hatorony hoe manao akory ty asa nataon’olo kiraidraiky. 14 Laha mbo eo avao ty asa namboarin’olo tanabon’ny fototsy iny eo, le hahazo valisoa ie. 15 Fa laha may ty asany, le ho matiantoky ie. Fe havota avao ie, kanefa sahala hoe havota baka anaty afo ao.
16 Tsy hainareo va fa nareo ro tempoli-Ndranahary, le anainareo ao ty fanahi-Ndranahary? 17 Laha misy olo mandrava ty tempoli-Ndranahary, le haripaki-Ndranahary olo zay. Tsy zay fa masy ty tempoli-Ndranahary, le nareo tempoly zay.
18 Tsy tokony hamita-bata nareo: Laha misy aminareo mieritseritsy ty vatany ho hendry amy zao tontolo zao eto,* le tokony ho gegy ie, amy zay ho hendry. 19 Tsy zay fa hagegea amy Ndranahary ty fahendreani-zao tontolo zao, satria voasoratsy hoe: “Ty fahihiran’olo hendry avao ro amandrihany an-drozy.” 20 Voasoratsy koa hoe: “Hain’i Jehovah fa tsy misy dikany ty hevitsin’olo hendry.” 21 Tsy tokony hisy hanao olo ho rengirenginy zany, satria ahinareo ty raha iaby: 22 Ndre Paoly zay, ndre Apolosy, ndre Kefasy,* ndre zao tontolo zao, ndre fiaina, ndre fahafatesa, ndre raha henanizao, ndre raha ho avy. Ahinareo ty raha iaby. 23 Fa nareo ahin’i Kristy, le Kristy ahi-Ndranahary.