Ino Iaby ty Raha Soa Azontsika Lafa Mivory?

Ndre avy marè bibiky ty ora, ndre lala mampatahotsy aza ro andehana vo avy amy fivoria any, le mamonjy fivoria avao zahay. Manino ty Vavolombelo Jehovah ro mamonjy fivoria avao ndre sarotsy ty fiaina na ndre vozaky marè baka niasa rozy?

Hahavy antsika ho sambatsy. Nivola Paoly hoe: ‘Mila mifandiniky tsika.’ Ty olo miaraky mivory amintsika amy fiangona ao ro teany hovolany. (Hebreo 10:24) Midika raha zay fa mila mifankahay soa ty Kristiana. Ta hivola Paoly fa mila haintsika soa ty raha mahazo ty Kristiana namantsika. Mety misy Kristiana nandalo raha sarotsy, fe nivitany avao ty tsy nivaliky ndre teo raha zay. Mety hitovy amy ty raha nahazo azy ty raha mahazo antsika. Hanampy antsika tsy ho kivy ty fahaiza hoe tsy nivaliky ty namantsika.

Mahavy ty olo hifankatea. Tsy hoe miaraky mivory aminolo haintsika avao tsika lafa amy fivoria any, fa miaraky aminolo tea antsika sahala troky raiky amintsika. Misy fotoa koa miaraky mitsangatsanga ty Kristiana. Ino ty raha soa azo amy raha zay? Manjary mifankahay soa tsika le mahavy antsika hifankatea marè raha zay. Lafa misy namantsika sahira, avy le ta hanampy azy avao tsika satria mifankatea. (Ohabolana 17:17) Atorontsika fa ‘mifampikarakara’ tsika lafa miaraky amy ty Kristiana namantsika.—1 Korintianina 12:25, 26.

Mampirisiky anao zahay hinama aminolo manao ze raha tea Ndranahary. Hahitaky nama soa manahaky zay iha amy Vavolombelo Jehovah ao. Ka engà hisy raha hisaka anao tsy hinama aminay.

• Ino ty raha soa azontsika lafa mivory?

• Ombia koa iha vo ho namanay amy fivoria any?