FIANARA 48
Filio Soa ty Namanao
Miaraky falifaly amintsika ty namantsika lafa misy raha soa, le mampahery antsika koa rozy lafa mandalo raha sarotsy tsika. Fe mampitandrina antsika ty Baiboly fa tsy ze kila olo le nama soa iaby. Ka ino ty hanampy anao hahay hifily nama? Diniho fanontanea retoa.
1. Hisy vokany aminao va ty nama filinao?
Malaky manahaky ani-ze olo ifandrambesantsika marè tsika, ndre amy soa zay ndre amy raty. Misy vokany amintsika zany ty olo ifandrambesantsika ndre mivanta zay, ndre amy internet ao. Mivola ty Baiboly hoe: “Ho hendry ze miaraky amy hendry, fa ho voan-doza ze minama amy ty tsy misy say.” (Ohabolana 13:20) Laha olo tea noho manompo ani-Jehovah ro ataontsika nama, le hanampy antsika hilongo soa amy Jehovah raha zay sady hahavy antsika handramby fanapahan-kevitsy soa. Fa ty nama tsy tea ani-Jehovah, le hahavy antsika hihalavitsy azy koa. Zay mahavy ty Baiboly mampirisiky antsika mba hifily soa ty namantsika! Laha minama amin’olo tea ani-Jehovah tsika, le hisy vokany soa amintsika noho amy namantsika iny raha zay, satria lasa afaky ‘mifampahery noho mifanampy’ amin-drozy tsika.—1 Tesalonianina 5:11.
2. Hisy vokany amy Jehovah va ty nama filinao?
Mifily soa ty olo hataony nama Jehovah. “Ataony nama marìny ... ty olo manao raha mahity.” (Ohabolana 3:32) Manao akory ty fihetseham-poni-Jehovah laha olo tsy tea azy ro ataontsika nama? Tena ho diso fanantenà amintsika ie! (Vakio Jakoba 4:4.) Fe hampifalifaly azy tsika sady hataony nama, laha tsy miaraky amy naman-draty. Hifandramby marìny amy Jehovah noho amy ze olo tea azy koa tsika amy zay.—Salamo 15:1-4.
DINIHO LALIKY
Hodinihintsika hoe manino ro tena ilà ty mahay mifily nama, le ino ty azo atao laha ta hahazo nama soa.
3. Mitandrema amy naman-draty
Ze olo tsy tea a-Ndranahary noho tsy midary ty fitsipikiny ro atao hoe naman-draty. Alefaso VIDEO toy, bakeo iaraho midiniky fanontanea io.
Amy fomba akory ro mety hahavy antsika hinama amy naman-draty, ndre tsy ambintsika raha zay?
Vakio 1 Korintianina 15:33, bakeo iaraho midiniky fanontanea retoa:
Olo manao akory ro volany hoe naman-draty araky ty hevitsinao? Ino ty antony?
Vakio Salamo 119:63, bakeo iaraho midiniky fanontanea toy:
Olo manao akory ro volany hoe nama soa?
Pôma raiky lo avao, le mety hanimba ty pôma hafa miaraky aminy eo. Ino ty vokany laha minama amy naman-draty iha, ndre raiky avao aza?
4. Afaky ho nama soa ho antsika ndre ty olo tsy mitovy amintsika
Miresaky ani-lahilahy israelita roe retoa ty Baiboly, tsy ia zay fa Davida noho Jonatana. Nifankalavitsy ty taon-drozy sady tsy nitovy koa ty raha niainan-drozy. Fe nimpinama tsy nifankafoy rozy roe lahy. Vakio 1 Samoela 18:1, bakeo iaraho midiniky fanontanea toy:
Manino ro afaky ho nama soa ho antsika ndre ty olo tsy mitovy tao noho raha iaina amintsika?
Vakio Romanina 1:11, 12, bakeo iaraho midiniky fanontanea toy:
Afaky mifampahery ty mpinama samby tea ani-Jehovah. Ino ohatsy ty azon-drozy atao?
Hita amy video toy hoe olo tsy nieritseretini-rahalahy toy ro nanjary namany. Alefaso VIDEO toy, bakeo iaraho midiniky fanontanea reo.
Nanino ty ray aman-drenini-Andry ro natahotsy lafa ninama tamy mpiaraky mianatsy aminy rey Andry?
Ino ty nahavy ani-Andry hinama amy mpiaraky mianatsy aminy rey?
Ino ty nanampy azy tsy hahatiaro hoe mangiky?
5. Ino ty atao laha ta hahazo nama soa?
Ino ty hanampy anao hahita tena nama, le ino ty azonao atao mba ho tena nama koa iha? Alefaso VIDEO toy.
Vakio Ohabolana 18:24 noho 27:17, bakeo iaraho midiniky fanontanea retoa:
Mifanampy ty tena mpinama. Ino ty ataon-drozy?
Mana nama soa manahaky zay va iha? Laha mbo tsy mana iha, ino ty azonao atao?
Vakio Filipianina 2:4, bakeo iaraho midiniky fanontanea toy:
Laha ta hahazo nama soa iha, le iha mihintsy ro mila miezaky mba ho nama soa. Ino ty azonao atao mba ho nama soa iha?
Laha ta hahazo nama soa iha, le iha mihintsy ro mila miezaky mba ho nama soa
MIERITSERITSY TY OLO SISANY HOE: “Azo inamà ty olo iaby, amy zay mba maro nama tena.”
Ino ty hovolaninao?
FAMINTINA
Laha mahay mifily nama tsika, le hampifalifaly ani-Jehovah. Hahasoa antsika koa raha zay.
Famerena
Manino ro vatan-draha amy Jehovah ty nama filintsika?
Olo manao akory ro tsy tokony hataontsika nama?
Ino ty azonao atao laha ta hahazo nama soa iha?
DINIHO KOA RETOA
Ho hitanao ato hoe afaky manampy ty tena nama lafa miatriky raha sarotsy iha.
“Miezaha ho Mpinamana Be Dieny Mbola Tsy Tonga ny Farany” (Ny Tilikambo Fiambenana Novambra 2019)
Ino iaby ty azonao atao laha ta hahazo nama soa?
Ino ty tokony ho hainao mikasiky ty nama amy Internet ao?
Mba Mandiniha Soa Lafa Mampiasa Tranonkala Fifandrambesa (4:12)
Nanino ty lahilahy raiky ro tsy niaraky tamy namany rey sasy?
“Manova Olona ny Baiboly” (Ny Tilikambo Fiambenana 1 Aprily 2012)