FIANARA 22
Ino ty Azonao Atao mba Hiresaha ty Vaovao Soa?
Lafa nihainao ty marina amy Baiboly ao, le mety nieritseritsy iha hoe: ‘Tokony ho hain’olo iaby raha toy.’ Zay vatany, mila mahay ty marina ty olo! Fe mety hatahotsy hiresaky ty raha nianaranao iha. Ndao hohenteantsika hoe ino ty hanampy anao handresy ani-tahotsy zay sady hazoto hiresaky amin’olo ty vaovao soa amy Baiboly ao.
1. Ino ty azonao atao mba hiresaha ty raha nianaranao amin’olo zatsy anao?
Nivola mpianatsini-Jesosy rey hoe: “Tsy azonay atao ty tsy hivola sasy mikasiky ty raha fa nihitanay noho nirènay.” (Asan’ny Apostoly 4:20) Lafovily amin-drozy ty raha nianaran-drozy, le tean-drozy horesahy amin’olo iaby raha zay. Manahaky zay koa va ty tsapanao? Laha zay ie, le milà fomba hiresaha ty raha nianaranao amy ty nama na longonao. Fe mila ataonao amim-panajà raha zay.—Vakio Kolosianina 4:6.
Anoharo retoa:
Laha ta hiresaky foto-kevitsy amy Baiboly ao amy ty longonao iha, le mivolana hoe: “Nisy raha soa biby nianarako tamy herinandro toy.”
Laha misy namanao marary na miasa loha, le iresaho andinin-teny raiky mampahery ie.
Laha manontany anao ty mpiaraky miasa aminao hoe nanao akory ty farani-herinandro, le volano aminy ty raha nianaranao tamy boky toy ato na tam-pivoria any.
Atorò ani-namanao rey ty tranonkala jw.org.
Taomo ty namanao na ty longonao mba hiaraky hianatsy Baiboly aminao na atorò an-drozy ty fangataha hianatsy Baiboly amy jw.org ao.
2. Manino ro soa ty miezaky hitory miaraky amy fiangona?
Tsy nieny tamy fitoria amin’olo zatsy avao mpianatsini-Jesosy rey. “Naniraky an-drozy kiroedroe mba hialoha lala azy amy tanà iaby any” Jesosy mba hitory. (Lioka 10:1) Voalamy fitoria nataon-drozy io, ka maro ty olo afaky naharè ty vaovao soa. Nifalifaly biby koa mpianatsy rey lafa niaraky nitory. (Lioka 10:17) Afaky miezaky koa va iha mba hitory miaraky amy fiangona?
DINIHO LALIKY
Hodinihintsika ty fomba hanampy anao hahasaky hitory ty vaovao soa. Ho hitantsika koa hoe mahafalifaly ty mitory.
3. Hanampy anao Jehovah
Ta hitory ty olo sisany, fe matahotsy ty mety ho fahitan’olo azy. Matahotsy koa ie tsy no tsy handramby ty olo itoriany.
Matahotsy hiresaky ty raha nianaranao va iha? Ino ty antony?
Alefaso VIDEO toy, bakeo iaraho midiniky fanontanea io.
Ino ty nanampy ani-tanora Vavolombeloni-Jehovah rey tsy hatahotsy?
Vakio Isaia 41:10, bakeo iaraho midiniky fanontanea toy:
Laha matahotsy mitory iha, manino iha ro tokony hivavaky?
Fa nihainao va?
Maro amy ty Vavolombeloni-Jehovah ro nieritseritsy taloha hoe tsy ho vitany mihintsy ty hitory ty vaovao soa. Raiky amy zay Sergey. Tsy natoky ty vatany ie sady sarotsy taminy ty nanazava ty hevitsiny. Fe lafa nianatsy Baiboly ie, le hoy ty asany: “Natahotsy aho, fe niresahiko amin’olo avao ty raha nianarako. Tseriky aho fa lasa natoky tena lafa nitory. Vomaiky tena ninoako ty raha nianarako.”
4. Hajao ty olo iresahanao
Lafa miresaky ty vaovao soa amin’olo iha, le mila dinihinao ty raha hovolaninao, fe tena mila dinihinao koa ty fomba hivolananao azy. Vakio 2 Timoty 2:24 noho 1 Petera 3:15, bakeo iaraho midiniky fanontanea retoa:
Akory ty hanorihanao ani-andinin-teny reo lafa miresaky hevitsy amy Baiboly ao amin’olo iha?
Mety tsy haneky ty hevitsy resahinao ty namanao na ty longonao. Ino ty azonao atao? Le ino ty tsy tokony hataonao?
Manino ro soa marè ty mametraky fanontanea mety soa fa tsy miforosè olo hino ty raha resahintsika avao?
5. Mahafalifaly ty miresaky ty vaovao soa
Nirahini-Jehovah hiresaky ty vaovao soa Jesosy. Akory ty fahitani-Jesosy ani-asa zay? Vakio Jaona 4:34, bakeo iaraho midiniky fanontanea retoa:
Mahavelo noho mahafalifaly antsika ty mihina sakafo soa. Manino ro nampitovizini-Jesosy amy sakafo ty fanaova ty sitrapo-Ndranahary, anatini-zay ty fitoria ty vaovao soa?
Akory ty hevitsinao, ino ty mahafalifaly antsika lafa miresaky ty vaovao soa tsika?
Soso-kevitsy
Manentea fomba azo anomboha resaky amy fivoria andavanandro rey.
Anontaneo ty mpampianatsy anao hoe ino ty atao laha ta handramby anjara amy fianara manompo amy fivoria andavanandro rey. Hanampy anao ho parè hiresaky amin’olo ty raha nianaranao anjara io.
Ampiasao ty fizarà hoe “Mieritseritsy ty Olo Sisany Hoe” na “Mety Hisy Hanontany Hoe” amy boky toy ato. Hanampy anao hahita hevitsy hamalia fanontanea na fanohera raha reo.
METY HISY HANONTANY HOE: “Ino ty vaovao any?”
Akory ty azonao anararaota ani-fanontanea io mba hiresaha ty raha nianaranao amy Baiboly ao?
FAMINTINA
Mahafalifaly ty miresaky ty vaovao soa amin’olo sady mety tsy ho sarotsy araky ty nieritseretanao azy raha zay.
Famerena
Manino ro tokony horesahinao amin’olo ty vaovao soa?
Akory ty ampisehoanao hoe manaja ty olo iresahanao iha?
Ino ty azonao atao mba hahasaky mitory iha?
DINIHO KOA RETOA
Afaky mampiasa karta jw.org iha mba hiresaha ty vaovao soa. Ho hitanao ato ty fomba efatsy azo anaova ani-zay.
Misy toetsy efatsy hanampy anao hiresaky ty vaovao soa. Ino iaby rezay?
“Fa Parè Hanjary Mpihaza Olo va Iha?” (Tilikambo Fiambena Septambra 2020)
Misy tantara raiky amy Baiboly ao afaky manampy antsika hahasaky hitory ty vaovao soa avao, ndre mbo ajà tsika.
Misy longonao mbo tsy mahay mikasiky ani-Jehovah va? Ino ty azonao atao mba hiresaha aminy ty raha amy Baiboly ao?
“Mahaiza Manohina ny Fon’ny Havanao” (Ny Tilikambo Fiambenana 15 Martsa 2014)