Tena Hahasoa Anao ty Miezaky mba Hatao Batisa!

Nivola Jesosy fa raiky amy ty raha takỳ amy Kristiana ty batisa. (Vakio Matio 28:19, 20.) Fe ino ty atao hoe batisa? Le ino ty ezaky mila ataon’olo raiky laha teany ty hatao batisa?

1. Ino ty atao hoe batisa?

Ty safà hoe “manao batisa” le baka amy safà grika midika hoe “mandentiky” anaty rano. Ho zay ty natao ani-Jesosy lafa natao batisa satria nalentiky tamy Vavaranoni-Jordana tao ie. “Niakatsy baka anaty rano ao” Jesosy bakeo. (Marka 1:9, 10) Alentiky soa anaty rano ao manahaky ani-zay koa ty Kristiana marina lafa atao batisa.

2. Mampiseho ino ty batisa?

Lafa atao batisa ty olo raiky, le asehony hoe nanokam-bata ho ani-Jehovah Ndranahary ie. Ino ty ataon’olo raiky manokam-bata zao? Mivavaky ie alohani-batisany, le resahiny amy Jehovah hoe parè hanompo Azy zisiky farany ie. Mampitamà ani-Jehovah ie fa hanompo azy raiky avao sady ty sitrapo-Ndranahary ro hataony vatan-draha marè amy ty fiainany. Tapa-kevitsy ie “handà ty vatany ... sady hanaraky” avao ty fampianarani-Jesosy noho ty raha nataony. (Matio 16:24) Ty fanokanam-bata noho batisany iny, le mahavy azy ho afaky hifankarìny marè amy Jehovah noho ty mpanompony.

3. Ino ty tokony hataon’olo raiky laha ta hatao batisa ie?

Mila mianatsy mikasiky a-Ndranahary noho mino azy ty olo raiky vo azo atao batisa. (Vakio Hebreo 11:6.) Lafa mitombo ty fahaizanao mikasiky ani-Jehovah, le hitombo koa ty finoanao noho ty fitiavanao azy. Bakeo, lasa ho teanao ty hitory mikasiky azy noho hiay mifanaraky amy fitsipikiny. (2 Timoty 4:2; 1 Jaona 5:3) Lafa manjary “maeva ani-Jehovah” noho “mahazo hatò aminy” ty fomba fiainan’olo raiky, le mety hanapa-kevitsy hanoka ty fiainany ho a-Ndranahary noho hatao batisa olo iny.​—Kolosianina 1:9, 10.a

DINIHO LALIKY

4. Ino ty raha ianarantsika baka amy batisani-Jesosy iny?

Vakio Matio 3:13-17 mba hahaiza raha maro mikasiky ani-batisani-Jesosy iny. Bakeo iaraho midiniky fanontanea retoa:

• Anakajà va Jesosy tamy ie natao batisa?

• Akory ty fomba nanaova batisa azy? Nalà va ty rano, le natetè tan-dohany eo?

Nanomboky nanao ty asa manoka nampanaovi-Ndranahary azy Jesosy lafa nivita batisa. Vakio Lioka 3:21-23 noho Jaona 6:38, bakeo iaraho midiniky fanontanea toy:

• Ino ty nataoni-Jesosy vatan’asa lafa nivita batisa ie?

5. Raha kendrè azo tratsiry ty batisa

Atao raha sarotsy marè zay ty fahità fanokanam-bata noho batisa zao. Fe misy raha azonao atao mba hahavy anao tsy hisalasala hilitsy amy fanapahan-kevitsy bevata io. Mba hahità olo nanao ho zay, le alefaso VIDEO toy.

VIDEO: Miezaha Hinama amy Jehovah (1:11)

Vakio Jaona 17:3 noho Jakoba 1:5, bakeo iaraho midiniky fanontanea toy:

• Ino ty hanampy ty olo raiky ho parè hatao batisa?

1. Manokam-bata ho ani-Jehovah tsika lafa miresaky aminy hoe ta hanompo azy zisiky farany

2. Lafa atao batisa tsika, le mampiseho amin’olo iaby hoe fa nanokam-bata ho a-Ndranahary

6. Anatini-fianakaviani-Jehovah tsika lafa vita batisa

Lasa anatini-fianakavia miharo raiky amy tany toy iaby tsika lafa vita batisa. Mitovy raha inoa noho fitsipiky arahy ty Vavolombeloni-Jehovah vita batisa iaby, ndre ino ndre ino ty raha ananany noho ty fiaviany. Vakio Salamo 25:14 noho 1 Petera 2:17, bakeo iaraho midiniky fanontanea toy:

• Lasa manao akory ty fifandrambesan’olo raiky amy Jehovah noho ty mpanompony lafa vita batisa ie?

FAMINTINA

Nivola Jesosy fa tsy maintsy atao batisa ty Kristiana. Laha ta hatao batisa ty olo raiky, le tokony ho fenony retoa: Matanjaky ty finoany ani-Jehovah, miay mifanaraky amy fitsipikiny ie, le manokam-bata ho Azy.

Famerena

• Ino ty atao hoe batisa, le manino raha zay ro tena ilà?

• Mampiseho ino ty batisa?

• Ino iaby ty mila ataon’olo raiky vo afaky manokam-bata noho atao batisa ie?

DINIHO KOA RETOA

Misy fanazavà fanampiny mikasiky batisa ato.

“Inona no Atao hoe Batisa?” (Lahatsoratsy amy jw.org ao)

Henteo ty raha tokony hataon’olo raiky mba ho parè amy batisa.

“Ty Fitiava ani-Jehovah ro Handrisiky Anao Hatao Batisa” (Tilikambo Fiambena Marsa 2020)

Vakio ato ty raha nahavy ty lahilahy raiky ho tapa-kevitsy hatao batisa.

“Izaho Mihitsy no Tian’izy Ireo Hahita ny Marina” (Ny Tilikambo Fiambenana 1 Febroary 2013)

Manino ro tena hahasoa anao ty miezaky mba hatao batisa, le ino ty hanampy anao ho parè amy raha zay?

“Tokony Hatao Batisa ve Aho?” (Manontany ny Tanora​—Torohevitra Mahasoa, Boky Faharoa, toko 37)