Ino ty Vaovao Soa Mikasiky ty Fivavaha?

1. Marina iaby va ze kila fivavaha?

Misy olo tea sady ta hanompo Ndranahary amy ty fivavaha iaby. Vaovao soa ty hoe hita Ndranahary noho karakarany olo reny. Fe misy olo mampiasa fivavaha, soa hanaovany raha raty. (2 Korintianina 4:3, 4; 11:13-15) Hita baka amy vaovao maro fa misy fivavaha militsy amy aly, mampitahotsy noho mamono olo, mandrava ajà. Kivy ty olo ta hivavaky amy Ndranahary mahitaky raha reo.—Vakio Matio 24:3-5, 11, 12.

Manome voninahitsy Ndranahary ty olo amy fivavaha marina. Tsy teany sady mangala baraka azy ty olo amy fivavaha diso, satria tsy mampianatsy hevitsy baka amy Baiboly. Anaty raha zay ty fampianara diso mikasiky Ndranahary noho mikasiky ty olo fa nimaty. Fe tea Jehovah hahay ty marina mikasiky azy ty olo.—Vakio Ezekiela 18:4; 1 Timoty 2:3-5.

2. Hatao Ndranahary akory ty fivavaha diso?

Tsy tea Jehovah ty fivavaha diso satria tea noho minama amy tontolo andesy Satana toy. (Jakoba 4:4) ‘Babylona be’ ro ikaiha ty Baiboly ze kila fivavaha diso. Tanà nisy tafara ty ranobe tamy fotoa nahavelo Noa Babylona io, bakao ro niavia ty fivavaha diso, mamitaky noho mamerivery olo. Sisa kely le horavà Ndranahary ty fivavaha diso.—Vakio Apokalypsy 17:1, 2, 5, 16, 17; 18:8.

Fe toy misy vaovao soa: Havory Jehovah ze olo tea azy, mbo amy fivavaha diso any. Fa manao raha zay ie henanizao, ka ampianariny raha marina baka amy Baiboly ao ze olo tea azy.—Vakio Mika 4:2, 5.

3. Mila manao ino ty olo laha teany Ndranahary?

Mikarakara ty olo tea manao raha marina Jehovah. Volaniny rozy hiala amy fivavaha diso. Manaraky safà io ze olo tea azy, noho miala amy ty fanaova raha raty.—Vakio Apokalypsy 18:4.

Falifaly ty olo tamy taonjato voalohany lafa naharè vaovao soa nambara apostoly reo. Ohatsy soa ho ahintsika rozy satria naneky ty vaovao soa. Nataony voalohany amy ty fiainany avao ze raha tea Jehovah. Nanjary sambatsy rozy, satria misy raha kendrea noho raha tamany ty fiainan-drozy.—Vakio 1 Tesalonianina 1:8, 9; 2:13.

Maro ty olo miala amy fivavaha diso. Rambesy Jehovah soa miaraky amy ty mpivavaky aminy olo reo. Laha manoriky safà Jehovah iha, le hanjary ho namany, hahazo fianakavia vaovao tea anao sady ho velo tsy misy farany.—Vakio Marka 10:29, 30; 2 Korintianina 6:17, 18.

4. Ino ty raha soa hatao Jehovah an-tany etoy?

Vaovao soa ty hoe sisa kely le handrava ty fivavaha diso Ndranahary. Tsy hijaly sasy ty olo amy fotoa zay, satria fa tsy misy sasy ty fivavaha diso mamitaky noho mampialy olo. Hifandramby soa iaby ty olo amy fotoa zay, ka hiaraky hivavaky amy Ndranahary marina raiky avao.—Vakio Apokalypsy 18:20, 21; 21:3, 4.