FIANARA 02

Mampitamà Hoavy Soasoa ty Baiboly

Poziny vita printy

Miatriky problemo sankarazany ty olo amy tany toy iaby, le miteraky alahelo noho fiasan-doha voho fijalea raha zay. Fa nandalo problemo nahavy anao hahatsapa ho reo va iha? Mety hoe mijaly vasa iha satria marary, na nisy olo marìny anao nimaty. Mety ho avy an-tsainao ao fanontanea toy: ‘Mbo hihasoa avao va ty fiaina?’ Manome toky antsika ty fomba amaleani-Baiboly ani-fanontanea io.

1. Ino ty raha ampitamanini-Baiboly antsika?

Hazavanini-Baiboly ty antony maha maro problemo mahazo antsika io. Fe resahiny koa hoe sisa kely le tsy hisy sasy raha raty rey. Hanampy anao ‘hana ty hoavinao noho hana raha tamany’ raha resahini-Baiboly rey. (Vakio Jeremia 29:11, 12.) Manampy antsika hiaritsy noho ho falifaly avao fampitamana reo sady manome toky antsika hoe tsy maintsy ho sambatsy zisiky farany tsika amy hoavy.

2. Hanao akory ty hoavy laha hentea ty Baiboly?

Ho zao ty volanini-Baiboly mikasiky ty hoavy: “Tsy hisy fahafatesa sasy, sady tsy hisy sasy ty alahelo, na ty fitaraina, na ty raha mahararirary.” (Vakio Apokalypsy 21:4.) Tsy hisy sasy raha mampijaly antsika henanizao reo, anatini-zay ty fahantrà, ty tsy rariny, ty arety, noho ty fahafatesa. Mampitamà ty Baiboly fa hanjary Paradisa tany toy, le ho azontsika olombelo tavy zisiky farany ty fiainantsika.

3. Ino ty hanampy anao hatòky hoe ho tanteraky ty raha ampitamanini-Baiboly?

Maro ty raha soa tamanin’olo, fe tsy afaky matoky rozy hoe tsy maintsy ho tanteraky raha rey. Tsy ho zay mihintsy ty raha ampitamanini-Baiboly. Hatòky ty raha volaniny tsika laha ‘mandiniky soa ty Soratsy Masy.’ (Asan’ny Apostoly 17:11) Lafa iha mianatsy Baiboly, le hazava soa aminao ty raha volaniny mikasiky ty hoavy. Anjaranao amy zay ro manapa-kevitsy hoe hino na tsy hino ani-zay.

DINIHO LALIKY

Diniho ty raha sisany ampitamanini-Baiboly amy hoavy. Henteo hoe manino raha rey ro fa afaky manampy olo sandrany henanizao.

Sary maromaro: Sary mifanohitsy ahità ty fiaina henanizao noho ty fiaina ampitamanini-Baiboly. Misy sary ho zay koa ambany eny.

4. Mampitamà ty Baiboly fa afaky ho velo zisiky farany tsika sady tsy hijaly sasy

Henteo amy lista ambany eo reo ty raha ampitamanini-Baiboly. Aia amy reo ro teanao marè? Ino ty antony?

Vakio andinin-teny miaraky aminy eo reo, le iaraho midiniky fanontanea retoa:

Akory ty hevitsinao, mahavy anao hana raha tamany va andinin-teny reo? Mety hahasoa ty fianakavianao na ty namanao va laha mahay ani-andinin-teny reo koa rozy?

Vetsevetseo ty fiaina lafa

TSY HISY SASY RETOA:	HO TANTERAKY RETOA:
Olo mijaly, mihaantitsy, na maty.—Isaia 25:8.	Ho hitantsika ndraiky ty longontsika na ty namantsika fa nimaty.—Jaona 5:28, 29.
Marary na misy handra.—Isaia 33:24; 35:5, 6.	Ho salama soa noho hatanjaky.—Joba 33:25.
Tratsini-tsy rariny.—Isaia 32:16, 17.	Ho maro ty hany, samby hana trano soasoa noho asa mahafa-po ty olo.—Salamo 72:16; Isaia 65:21, 22.
Mijaly vokatsini-aly.—Salamo 46:9.	Hilamy soa ty tany.—Salamo 37:11.
Mieritseritsy na mahatiaro raha mahakivy.—Isaia 65:17.	Ho velo zisiky farany tsika sady tsy hijaly sasy.—Salamo 37:29.

Ajà lahilahy narary nanjary salama soa, le mandrakoky an-dreniny.

Nahoda be nanjary tanora, le manosiky borety feno legimy.

5. Mahasoa antsika ty raha ampitamanini-Baiboly

Maro ty olo kivy na masiaky mihintsy lafa mahita ty problemo sankarazany miseho henanizao. Miezaky mafy mandamy ani-raha rey ty olo sisany. Henteo hoe manino ty raha soa ampitamanini-Baiboly ro afaky manampy olo sandrany henanizao. Alefaso VIDEO toy, le iaraho midiniky fanontanea retoa:

VIDEO: Tiako Hanjaka ny Rariny (4:07)

Sary maromaro: Sary baka amy video hoe ‘Tiako Hanjaka ny Rariny.’ 1. Nihaza hasy miaraky amin’olo karaza raiky aminy Rafika tamy ie mbo nikely. 2 Falifaly Rafika tamy ie vo sambany namonjy fivoriambeni-Vavolombeloni-Jehovah, satria nihitany hoe olo samby hafa loko noho karaza kanefa mifandramby soa.

Laha hentea video iny, ino ty tsy rariny nampiasa loha ani-Rafika?
Mbo teo avao tsy rariny iny, fe akory ty nanampeani-Baiboly azy?

Manampy antsika tsy ho kivy sady hiaritsy avao ty raha ampitamanini-Baiboly, ndre eo ty problemo sankarazany. Vakio Ohabolana 17:22 noho Romanina 12:12, le iaraho midiniky fanontanea retoa:

Akory ty hevitsinao, afaky manasoa ty fiainanao henanizao va ty raha ampitamanini-Baiboly? Ino ty antony?

MIERITSERITSY TY OLO SISANY HOE: “Sarotsy inoa raha ampitamanini-Baiboly zao.”

Akory ty hevitsinao, manino ro tena ilà ty mila porofo ahità hoe ho tanteraky vatany ty raha ampitamanini-Baiboly?

FAMINTINA

Maro biby ty raha ampitamanini-Baiboly antsika mikasiky ty hoavy. Mahavy antsika hana raha tamany raha zay sady manasoa ty fiainantsika henanizao.

Famerena

Manino ty olo ro mila mahay ty raha ampitamani-Ndranahary?
Ino ty raha volanini-Baiboly mikasiky ty hoavy?
Manino ro afaky manampy anao henanizao ty fanana raha tamany?

Daty nahavita ani-fianara toy:

Raha Kendrè

Miezaha hahay soa ty raha ampitamanini-Baiboly, ka vakio iaby ze andinin-teny amy fianara toy ato..

Raha hafa:

Raha hafa kendrènao

DINIHO KOA RETOA

Hianaranao ato hoe manino ty fanana raha tamany ro afaky manampy anao lafa iha tratsini-raha manahira.

“Ahoana no Hananana Fanantenana?” (Mifohaza! 8 Mey 2004)

Henteo ato hoe manino ty raha ampitamanini-Baiboly ro afaky manampy ty olo mana arety miteza.

“Afaka Manampy Ahy ve ny Baiboly Raha Manana Aretina Mitaiza Aho?” (Lahatsoratsy amy jw.org ao)

Alefaso hira toy, le vetsevetseo hoe miay amy Paradisa ampitamanini-Baiboly iny ao iha noho ty fianakavianao.

Alao Sary An-tsaina (3:37)

Ho hitanao ato hoe nanino ro niova ty fiainani-mpanao grevy raiky nafana fo, lafa nahay ty raha ampitamanini-Baiboly ie.

“Tsy Mieritreritra ny Hanova An’izao Tontolo Izao Intsony Aho” (Ny Tilikambo Fiambenana 1 Jolay 2013)