FIANARA 30
Mbo ho Velo Ndraiky Namanao Noho Longonao Fa Nimaty Rey!
Miteraky fijalea noho alahelo maro ty fahafatesa. Zay mahavy ty Baiboly mivola hoe fahavalo raha io. (1 Korintianina 15:26) Nihitantsika tamy Fianara 27 ao, fa horeseni-Jehovah fahavalo io. Fe hanao akory azy olo fa nimaty rey? Ho hitanao amy fianara toy ato ty raha soasoa hafa ampitamani-Ndranahary. Olo an-tapitrisany ro hovelomy ndraiky, le afaky hiay zisiky farany. Tena hisy va raha zay? Hiay an-danitsy any va azy hovelomy amy maty reo sa ho an-tany etoy?
1. Ino ty teani-Jehovah hatao amin’olo fa nimaty rey?
Teani-Jehovah hovelomy ndraiky azy fa nimaty rey. Natoky Joba, azy lahilahy nanam-pinoa iny hoe tsy hanalino azy Ndranahary lafa ie maty. Nivola ie hoe: “Hikaiky iha, le hamaly anao [baka an-dolo ao] aho.”—Vakio Joba 14:13-15.
2. Ino ty ahaizantsika hoe mbo azo velomy ndraiky ty maty?
Nameani-Jehovah hery hamelo ty maty Jesosy tamy ie tan-tany etoy. Nivelominy tamy maty ajà ampela 12 tao iny noho anakilahini-ampela maty valy iny. (Marka 5:41, 42; Lioka 7:12-15) Tafara atoy Jesosy namelo ani-Lazarosy namany. Ndre fa nimaty efatsy andro Lazarosy sady fa nalevy, le mbo nivitani-Jesosy avao ty namelo azy ndraiky. Lafa baka nivavaky tamy Ndranahary ie, le nivola hoe: “Lazarosy, miboaha!” Le “niboaky lahilahy fa nimaty iny.” (Jaona 11:43, 44) Mba vetsevetseo ty hafaleani-nama noho longoni-Lazarosy rey tamy zay!
3. Mbo ho velo ndraiky va namanao noho longonao fa nimaty rey?
Mampitamà ty Baiboly hoe: “Hisy fameloma” ty maty. (Asan’ny Apostoly 24:15) Tsy nandeha an-danitsy any olo nivelomini-Jesosy tamy maty rey. (Jaona 3:13) Falifaly rozy fa afaky niay tan-tany etoy ndraiky. Kely sisa, le hamelo olo fa nimaty an-tapitrisany Jesosy, ka afaky ho velo zisiky farany amy Paradisa an-tany etoy olo rey. Nivola ie hoe mbo ho velo ndraiky ze amy fitadidia-Ndranahary ao, ndre fa halinon’olo aza rozy.—Jaona 5:28, 29.
DINIHO LALIKY
Hohenteantsika ty porofo ahità hoe afaky mamelo ty maty Jesosy sady tena hanao ani-raha zay. Ho hitantsika koa fa mahavy antsika hana raha tamany ty fameloma ty maty sady mampahery antsika.
4. Nasehoni-Jesosy hoe mahavita mamelo ty maty ie
Ino ty nataoni-Jesosy lafa nimaty Lazarosy? Vakio Jaona 11:14, 38-44, bakeo iaraho midiniky fanontanea retoa:
Ino ty ahaizantsika hoe nimaty vatany Lazarosy? (Henteo ty andininy 39.)
Laha niakatsy an-danitsy any Lazarosy, azo volany hoe soa fanahy va Jesosy laha nampizotso azy baka any mba hiay an-tany etoy ndraiky?
5. Maro ty olo hovelomy ndraiky!
Vakio Salamo 37:29, bakeo iaraho midiniky fanontanea toy:
Hiay aia olo an-tapitrisany fa nimaty rey lafa hovelomy ndraiky?
Tsy ze olo nanompo ani-Jehovah avao ro hovelomini-Jesosy ndraiky, fa misy olo maro hafa koa. Vakio Asan’ny Apostoly 24:15, bakeo iaraho midiniky fanontanea toy:
Ia ty olo teanao ho hita lafa hovelomy ndraiky ty maty?
Tiarovo toy: Tsy sarotsy amy Jesosy ty mamelo ty maty. Sahala mamoha olo raiky miroro avao raha zay aminy
6. Mahavy anao hana raha tamany ty fameloma ty maty sady mampahery anao
Nampahery olo maro ty tantarani-anakampelani-Jairo resahini-Baiboly iny. Vakio tantara tena nisy amy Lioka 8:40-42, 49-56.
Nivola tamy Jairo, Jesosy talohani-namelomany ani-anakampelany iny hoe: “Ka matahotsy! Manàna finoa avao.” (Henteo ty andininy 50.) Manino ro manampy anao ty fitamana hoe mbo hovelomy ndraiky ty maty...
laha nimaty ty namanao na ty longonao?
laha misy raha atahora hamono anao?
Alefaso VIDEO toy, bakeo iaraho midiniky fanontanea toy:
Mitamà ty baba noho renini-Phelicity hoe mbo hovelomy ty maty. Nanino fitamana zay ro nampahery an-drozy?
MIERITSERITSY TY OLO SISANY HOE: “Sarotsy inoa aloha hoe mbo hovelomy hiay an-tany etoy ndraiky ty maty.”
Akory ty hevitsinao?
Ino ty andinin-teny azonao ampiasà mba hampisehoa hoe hovelomy ty maty, le hiay an-tany etoy ndraiky?
FAMINTINA
Mampitamà ty Baiboly fa hisy olo an-tapitrisany fa nimaty hovelomy ndraiky. Teani-Jehovah ho velo olo rey, le nameany hery Jesosy mba hameloma an-drozy.
Famerena
Ino ty porofo ahità hoe teani-Jehovah noho Jesosy ho velo ndraiky ty maty?
Hiay an-danitsy any va olo an-tapitrisany fa nimaty rey lafa hovelomy ndraiky sa ho an-tany etoy? Manino iha ro mivola ani-zay?
Manino iha ro resy lahatsy fa hovelomy ndraiky namanao noho longonao fa nimaty rey?
DINIHO KOA RETOA
Ino ty azonao atao laha nisy namanao na longonao nimaty?
“Inona no Hanampy Anao Hizaka ny Fahorianao?” (Mifohaza! No. 3 2018)
Afaky manampy olo nimaty longo va ty torolala amy Baiboly ao?
Ino ty azo atao mba hanampea ty ajà mba tsy halahelo marè lafa misy maty?
Misy olo hovelomy ndraiky mba hiay an-danitsy any va? Olo manao akory ro tsy hovelomy sasy?
“Inona no Atao hoe Fitsanganana Amin’ny Maty?” (Lahatsoratsy amy jw.org ao)