FIANARA 16
Ino ty Nataoni-Jesosy Tan-tany Etoy?
Laha vo maharè hoe Jesosy ty ankamaroan’olo, le avy an-tsainy ao ty hoe ajà, mpaminany niavaky, na lahilahy fa miala ay. Fe hahay raha maro mikasiky azy tsika lafa mandiniky ty fiainany tan-tany etoy. Hodinihintsika amy fianara toy ty sisany amy raha bevata nataoni-Jesosy noho ty vokatsini-raha rey amintsika.
1. Ino ty asa bevata marè nataoni-Jesosy?
Vatan’asa tamy Jesosy “ty mitory ty vaovao soani-Fanjakà-Ndranahary.” (Vakio Lioka 4:43.) Vaovao soa nitoriny ty hoe hananga fanjakà raiky Ndranahary, le fanjakà io ro hanafaky ty raha iaby manahira ty olombelo.a Niezaky mafy Jesosy nizara ani-hafatsy mampahery zay tanatini-telo tao noho tampany.—Matio 9:35.
2. Nanino Jesosy ro nanao fahagagà?
Volanini-Baiboly fa maro ty ‘fahagagà, fambara noho famantara natao-Ndranahary tamy alalani-Jesosy.’ (Asan’ny Apostoly 2:22) Namea-Ndranahary hery Jesosy ka afaky nifehy ty toetsandro, nanome hany olo an’arivony, nitaha ty marary, le namelo ty maty mihintsy aza. (Matio 8:23-27; 14:15-21; Marka 6:56; Lioka 7:11-17) Hita baka amy fahagagà nataoni-Jesosy rey fa nirahi-Ndranahary ie. Manaporofo koa raha rey hoe mana hery hanafaha ty raha manahira iaby Jehovah.
3. Ino ty ianarantsika baka amy ty raha nataoni-Jesosy?
Naneky noho nanoriky ty safàni-Jehovah avao Jesosy. (Vakio Jaona 8:29.) Nataony iaby ze raha nampanaovini-Babany azy, ndre maro aza ty fanohera. Tsy nivaliky zisiky farany ie. Natorony baka amy zay hoe azon’olombelo atao soa ty manompo a-Ndranahary ndre miatriky raha sarotsy maro aza. ‘Nanome modely ho antsika’ Jesosy ‘mba hanarahantsika marìny ty liany.’—1 Petera 2:21.
DINIHO LALIKY
Diniho ty raha nataoni-Jesosy mba hanambarà ty vaovao soa amin’olo, le nanino ie ro nanao fahagagà.
4. Nanambara ty vaovao soa Jesosy
Nandeha tomboky an-jatony kilomety amy lala feno lemboky Jesosy mba hanambara ty vaovao soa amin’olo farani-ze maro. Vakio Lioka 8:1, bakeo iaraho midiniky fanontanea retoa:
Ze olo nivorivory tamy Jesosy teo mba hijanjy azy avao va ro nitoriany?
Ino ty ezaky nataoni-Jesosy mba hilà olo?
Fa nivola mialoha Ndranahary hoe hanambara vaovao soa ty Mesia. Vakio Isaia 61:1, 2, bakeo iaraho midiniky fanontanea retoa:
Akory ty nanatanterahani-Jesosy ani-faminania io?
Akory ty hevitsinao, mila maharè ty vaovao soa koa va ty olo henanizao?
5. Nampianatsy fahamarina lafovily Jesosy
Ankoatsini-vaovao soani-Fanjakà-Ndranahary iny, le nampianatsy raha tena ilà koa Jesosy. Ahità vitsivitsy amy raha rezay Toriteniny tamy Vohitsy teo iny. Vakio Matio 6:14, 34, noho 7:12, bakeo iaraho midiniky fanontanea retoa:
Ino ty torohevitsy tena ilà niresahini-Jesosy amy andinin-teny reo?
Akory ty hevitsinao, mbo manampy antsika henanizao va torohevitsy reo?
6. Nanao fahagagà Jesosy
Nameani-Jehovah hery Jesosy, le afaky nanao fahagagà. Ino, ohatsy, ty fahagagà nataony? Vakio Marka 5:25-34 na alefaso VIDEO toy. Bakeo iaraho midiniky fanontanea reo.
Ino ty raha natokisani-ampela narary iny?
Ino ty raha naninto anao tamy fahagagà iny?
Vakio Jaona 5:36, bakeo iaraho midiniky fanontanea toy:
“Manaporofo” ino fahagagà nataoni-Jesosy rey?
Fa nihainao va?
Hita amy boky efatsy kaihy hoe Filazantsara ty maro amy raha haintsika mikasiky ani-Jesosy. Retoa boky reo: Matio, Marka, Lioka, Jaona. Niresaky tsipiriany samby hafa mikasiky ani-Jesosy ty mpanoratsy an-drozy. Lasa haintsika soa ty fiainani-Jesosy lafa mamaky ani-boky efatsy reo tsika.
MATIO
Ty bokiny ro vita voalohany. Ty raha nampianarini-Jesosy ro tena resahy ao, sirtò ty Fanjakà-Ndranahary.
MARKA
Ty bokiny ro farany boribory amy Filazantsara reo. Mitantara ty raha tena niavaky tamy fiainani-Jesosy ie.
LIOKA
Resahy ao hoe tena vatan-draha tamy Jesosy ty vavaky. Hita ao koa fa nampiseho hasoam-panahy tamy ampela Jesosy.
JAONA
Volaniny ao ty raha maro niresahini-Jesosy tamy ty namany marìny azy noho ty olo hafa. Manampy antsika hahay ty toetsini-Jesosy raha zay.
MIERITSERITSY TY OLO SISANY HOE: “Lahilahy soa fanahy avao Jesosy, fa tsy Mesia zao.”
Akory ty hevitsinao?
FAMINTINA
Nitory mikasiky Fanjakà-Ndranahary Jesosy, nanao fahagagà, le naneky noho nanoriky ty safàni-Jehovah avao.
Famerena
Ino ty asa bevata marè nataoni-Jesosy tamy ie tan-tany etoy?
Manaporofo ino fahagagà nataoni-Jesosy rey?
Ino iaby ty raha tena ilà nampianarini-Jesosy?
DINIHO KOA RETOA
Ino ty tena niresahini-Jesosy?
“Nahoana i Jesosy no Nitory ny Fanjakan’Andriamanitra?” (Ny Tilikambo Fiambenana 1 Oktobra 2014)
Ino ty porofo ahità hoe niseho vatany fahagagà nataoni-Jesosy rey?
Henteo hoe nanino ro nanjary tsy tea tena sasy ty lahilahy raiky lafa nametsivetsy ty modelini-Jesosy.
“Tia Tena Be Aho Taloha” (Ny Tilikambo Fiambenana 1 Oktobra 2014)
Henteo ty raha niavaky tamy fanompoani-Jesosy, mifanaraky amy fotoa nisehoany.
a Handiniky soa mikasiky ani-Fanjakà-Ndranahary io tsika amy fianara 31-33.