Fanontaneani-mpamaky

Nivola Davida amy Salamo 61:8 ao hoe hidera ty anara-Ndranahary “mandrakizay” ie. Ta hivola va Davida amy andininy io hoe tsy ho maty mihintsy ie?

Aha, tsy zay. Tena marina safàni-Davida reo.

Mariho ty raha nisoratiny amy andininy io noho ty andininy hafa mitovitovy amin’io. “Hihira fiderà ho ani-anaranao mandrakizay aho, sady hanatanteraky sanandro ani-voady nataoko reo.” “Midera anao amy foko iaby lahy aho, Jehovah Ndranahariko, le hameako voninahitsy mandrakizay ty anaranao.” “Hidera ty anaranao mandrakizay mandrakizay aho.”​—Sal. 61:8; 86:12; 145:1, 2.

Lafa nanoratsy ani-safà reo Davida le tsy nieritseritsy hoe tsy ho maty mihintsy ie. Hainy fa nivola Jehovah hoe ho maty ty olombelo satria nanota, le nieky Davida hoe mpanota koa ie. (Gen. 3:3, 17-19; Sal. 51:4, 5) Tsy zay avao fa hainy hoe ndre ty olo nankasitraha-Ndranahary aza nimaty, ohatsy hoe Abrahama, Isaka, noho Jakoba. Le nihaini-Davida hoe ndre ie koa aza mbo ho maty avao ndraiky andro any. (Sal. 37:25; 39:4) Ka ino zany ty teani-Davida hovolany amy Salamo 61:8 io? Hita amy raha nivolaniny io hoe ta hidera a Ndranahary mandrakizay ie sady tapa-kevitsy hanao ani-zay, zany hoe hidera azy avao ie laha mbo velo.​—2 Sam. 7:12.

Miresaky mikasiky ty fiainani-Davida tamy fotoa zay ty raha sisany nisoratiny. Manaporofo ani-zay ty safà fampilira ty Salamo faha-​18, faha-​51, noho faha-52. Mpiaraky aondry Davida, le resahiny amy Salamo faha-​23 ao hoe manahaky ani-zay koa Jehovah. Manome tari-dala, mamelombelo, noho miaro ty aondriny ie. Lasa ta hanompo a Ndranahary avao amy zay Davida ‘amy ty andro iaby ahavelomany.’​—Sal. 23:6.

Tiarovo koa fa Jehovah ro nampanoratsy ani-Davida ani-reo. Nanoratsy faminania mbo hiseho afara atoy, ohatsy, ie. Anisani-zay ty Salamo faha-​110. Resahini-Davida ao hoe ‘hipetraky [ankavana-Ndranahary]’ an-danitsy any ty Tompony, sady hahazo fahefà bevata. Mba hanaova ino? Mba hanjakàny tanteraky amy ty fahavalo-Ndranahary noho ‘hampiharany didim-pitsarà amy firenena’ an-tany etoy. Mesia iny teany horesahy amy zay io, le Davida ty razambeny. Hanjaka baka an-danitsy any Mesia io, sady ho “mpisoro mandrakizay.” (Sal. 110:1-6) Nihamafisini-Jesosy fa ie resahini-faminania amy Salamo faha-​110 ao iny, le ho tanteraky raha io afara atoy.​—Mat. 22:41-45.

Nivolanini-Jehovah Davida mba hanoratsy ty raha niseho tamy androny. Fe nivolanini-Jehovah koa ie mba hanoratsy mikasiky ty hoavy, zany hoe amy fotoa hameloma azy amy maty, ka ho afaky hidera ani-Jehovah mandrakizay ie. Fa nitanteraky tan’Israely tany zany ty Salamo 37:10, 11, 29 sady mbo ho tanteraky amy hoavy koa lafa hanatanteraky ty fampitamanany Ndranahary.​—Henteo ty fehintsoratsy faha-8 amy lahatsoratsy hoe “Hiaraky Amiko amy Paradisa any Iha”, amy gazety toy ato.

Ino zany ty teani-Davida hovolany amy Salamo 61:8 io noho amy andininy hafa mitovitovy amin’io? Hita amy raha nivolaniny reo hoe ta hidera ani-Jehovah ie zisiky hahafaty azy. Le haintsika baka amy andininy reo koa hoe afaky hidera ani-Jehovah mandrakizay Davida lafa hovelominy ndraiky.