Fanontaneani-mpamaky

Nanino Josefa noho Maria ro nijano ta Betlehema tao avao lafa niteraky ani-Jesosy fa tsy noly ta Nazareta any?

Tsy miresaky ani-zay ty Baiboly. Fe misy raha sisany tena mahakinto resahiny, afaky hanampy antsika hahay ty antony nahavy an-drozy tsy noly ta Nazareta any tamy fotoa io.

Nivola tamy Maria anjely raiky zay hoe ho bevoka ie le hiteraky. Nipetraky ta Nazareta any Maria noho Josefa tamy anjely iny niresaky ani-hafatsy io, zany hoe nipetraky ta Galilia tanà nahabe ani-Josefa. (Lioka 1:26-31; 2:4) Tafara atoy, lafa baka a Ejipta any rozy le nimpoly ta Nazareta any. Nibe tao Jesosy le nikaihy hoe Nazareanina. (Mat. 2:19-23) Avy le Nazareta amy zay ro avy an-tsaintsika ao lafa tsika miresaky ani-Jesosy, Josefa, noho Maria.

Nisy longoni-Maria zay nipetraky ta Joda any. Elizabeta ty anarany. Valini-Zakaria mpisoro Elizabeta io sady lasa renini-Jaona Mpanao Batisa. (Lioka 1:5, 9, 13, 36) Namangy ani-Elizabeta ta Joda any Maria le nijano tany tanatini-telo vola. Bakeo Maria nimpoly ta Nazareta any. (Lioka 1:39, 40, 56) Tsy vahiny ani-Maria zany tanà io.

Tafara atoy, niala ta Nazareta ao Josefa le nandeha ta Betlehema any satria nandidy ty Romanina fa tsy maintsy ‘sorata anara’ amy “tanà niaviany” ty olo iaby. Sady fa nivola koa moa ty faminania fa hateraky a Betlehema any ty Mesia. (Lioka 2:3, 4; 1 Sam. 17:15; 20:6; Mika 5:2) Lafa niteraky ani-Jesosy Maria, le tsy teani-Josefa handeha hanao lia lavitsy himpoly a Nazareta any ie satria vo baka niteraky. Nijano ta Betlehema ao avao rozy, tanà sivy kilomety miala ani-Jerosalema. Ho mora amin-drozy koa zany ty handay ani-anan-drozy iny amy tempoly ao le hanao fanatitsy, satria zay ty nitakini-Lalàna.—Lev. 12:2, 6-8; Lioka 2:22-24.

Fa nivola tamy Maria anjeli-Ndranahary iny fa hahazo ty “sezim-panjakàni-Davida” anakilahiny io sady “ho Mpanjaka.” Mety nieritseritsy zany Josefa noho Maria hoe ara-dalàna laha nateraky tamy tanàni-Davida io tao Jesosy. (Lioka 1:32, 33; 2:11, 17) Mety nieritseritsy amy zay rozy hoe soa laha mijano ao avao le mandiny ze raha tea-Ndranahary hampanaovy an-drozy.

Tsy haintsika hoe zisiky nombia ty fotoa nijanonan-drozy ta Betlehema ao. Fe ndre zay le nana trano fianakavia io, sady fa nibebè anakilahin-drozy io fa tsy ajà menavava sasy. (Mat. 2:11) Hita baka amin’io zany fa naleon-drozy nijano ta Betlehema tao tse, le nanamboatsy trano tao tozay himpoly a Nazareta any.

Nanome didy Heroda hoe hovonoa ‘ze ajà lahilahy iaby a Betlehema any, le ze ajà roe tao latsaky.’ (Mat. 2:16) Nampitandrina ani-Josefa mikasiky ani-zay anjely raiky zay, farany nilay nana Ejipta any Josefa noho Maria niaraky amy Jesosy, le nijano tany avao zisiky nahafaty ani-Heroda. Nandesini-Josefa a Nazareta any ty fianakaviany tafarani-zay. Nanino rozy tsy nimpoly a Betlehema any io? Satria tamy fotoa io, nanjaka ta Jodia tany Arkelaosy anakilahini-Heroda sady olo raty fanahy. Nisy anjely koa nampitandrina ani-Josefa hoe hahita loza rozy laha mandeha any, farany nandesiny nilay a Nazareta any ty fianakaviany. Afaky niteza soa ani-Jesosy ie tany satria tsy nampatahotsy ty tany.—Mat. 2:19-22; 13:55; Lioka 2:39, 52.

Nampalahelo fa nimaty talohani-Jesosy Josefa, kanefa tafarani-zay vo nisy olo afaky hiay an-danitsy any. Hovelomy hiay an-tany etoy zany Josefa. Maro ty olo hahita azy amy fotoa zay, le hazava soa amintsika hoe ino ty antony nahavy azy noho Maria nijano ta Betlehema tao lafa nateraky Jesosy