Fitantarà

Miezaha Hiferinay Olo

Ndraiky zay, nanenty ty video hoe “Aoka Ianareo Hifampiahy” amy jw.org ao iny, ranabavy raiky mipetraky a Nouvelle-Zélande any zay. Resahiny ao fa tsy hoe niferinay olo avao Jehovah fa nasehony tamy ty raha nataony koa raha zay. (Isaia 63:7-9) Nanapa-kevitsy ranabavy iny hoe horihiny raha nianarany io, ka nila fomba hanampea olo ie. Lafa nandeha am-bazary any amy zay ie hamarain’iny, le nahita ampela raiky mahantra zay. Nivolaniny ampela io hoe hiviliany raha hohany. Naneky ampela iny. Lafa baka nivily hany iny amy zay ranabavy iny, le nanararaotsy nitory tamy ampela iny sady nanome azy ty taratasy mivalo hoe Mbo ho Tampitsy Avao va ty Fijalea?

Nilatsa-dranomaso ampela iny. Nivola ie fa nitezà tamy fahamarina, fe fa ela ie ro nijano ka tsy nandeha tany sasy. Fe vo betibety hoasany ie nivavaky tamy Jehovah, le nangataky taminy mba hanampy azy himpoly aminy. Nameani-ranabavy iny Baiboly ampela iny, le nifanao fotoa rozy mba hianara Baiboly.a

Afaky miezaky hahay hiferinay olo manahaky ani-Jehovah koa tsika, anatini-zay ty longontsika noho rahalahy noho anabavy amy fiangona eo reo. Asehontsika hoe miferinay olo tsika laha mila fomba hitoria amin-drozy.