Manàna Herim-po Manahaky an’i Zadoka

1-2. Ia Zadoka io? (1 Tantara 12:22, 26-28)

ALAO sary an-tsay ty raha niseho tamy zay. Nisy lahilahy 340 000 mahery nivory mba hanao an’i Davida ho mpanjaka amy Israely eo. Nipetraky tamy faritsy raiky feno vohibohitsy sady be vatovato tanilan’i Hebrona any lahilahy reo, tanatin’ny telo andro. Naresaky biby tao satria nihehy rozy, niresadresaky, noho nihira mba hiderà an’i Jehovah. (1 Tan. 12:39) Niaraky tamin’olo reo koa pamaraky atao hoe Zadoka zay. Fe tsy de nivoamarikin’olo ty fisiany. Nahita azy anefa Jehovah le teany ho haintsika hoe teo vatany Zadoka. (Vakio 1 Tantara 12:22, 26-28.) Ia Zadoka io?

² Mpisoro ie le niaraky niasa marìny tamy Abiatara Mpisorobe. Nampea-Ndranahary Zadoka ka lasa hendry kokoa noho afaky nahay ty sitrapony. (2 Sam. 15:27) Lafa nisy olo nila fanampea, le namonjy azy mba hangataky torohevitsy feno fahendrea. Lahilahy be herim-po koa ie. Hianarantsika ato hoe akory ty nampisehoan’i Zadoka an’ny toetsy io.

3. a) Manino ty mpanompon’i Jehovah ro mila mana herim-po? b) Ino ty hodinihintsika ato?

³ Tsy mirorororo mihintsy Satana amy andro farany zao, fa ataony ze kila fomba mba hanimbà ty finoantsika an’i Jehovah. (1 Pet. 5:8) Mila herim-po zany tsika mba hahavy antsika hiaritsy avao zisiky handripahan’i Jehovah an’i Satana noho tontolony raty toy. (Sal. 31:24) Ndao tsika handiniky raha telo azontsika ampisehoa hoe be herim-po manahaky an’i Zadoka tsika.

TOHANO TY FANJAKÀ-NDRANAHARY

4. Manino ty vahoakin’i Jehovah ro mila herim-po mba hanohana ty Fanjakà-Ndranahary? (Henteo koa sary io.)

⁴ Manoha tanteraky ty Fanjakà-Ndranahary tsika satria vahoakin’i Jehovah. Fe miay amy tontolo raty toy eto tsika, ka mila herim-po matetiky vo mahavita ani-zay. (Mat. 6:33) Mila herim-po, ohatsy, tsika mba hiay mifanaraky amy ty fitsipikin’i Jehovah noho hitoria ty vaovao soan’ny Fanjakà iny. (1 Tes. 2:2) Vomaiky mizarazara koa tontolo toy amy zao vokatsin’ny resaky politiky. Mila herim-po zany tsika mba tsy hanoha ndre ia ndre ia, na hilitsy amy alihevitsy politiky. (Jaona 18:36) Lasa tsy nanan-drala mihintsy ty ankamaroan’ny vahoakin’i Jehovah, na nivangoa, na nigadrà satria tsy mety manao politiky na manao maramila.

5. Manino Zadoka ro nila herim-po mba hanohana an’i Davida?

⁵ Tsy hoe hiaraky hifalifaly amy Davida avao ty antony nandehanan’i Zadoka a Hebrona any, zany hoe hiaraky hifalifaly aminy satria lasa mpanjaka ie. Nanday ty fitaovam-pialiany ie sady parè hialy. (1 Tan. 12:38) Parè hialy miaraky amy Davida noho hiaro ty Israely amy ty fahavalony ie. Tena nila herim-po raha zay satria mety tsy ampy traikefa amy resaky aly Zadoka.

6. Akory ty nampisehoan’i Davida hoe be herim-po ie ka modely ho an’i Zadoka? (Salamo 138:3)

⁶ Ka manao akory ty hahavy ty mpisoro manahaky an’i Zadoka hana herim-po? Nisy lahilahy maro natanjaky sady be herim-po nanodidy an’i Zadoka. Azo antoky fa nianatsy baka amy modelin’ny lahilahy rey ie. Anisani-zay Davida. Be herim-po ie ka “nitariky ty Israely lafa nisy aly.” Lasa ie amy zay ro tean’ny vahoaky rey ho mpanjaka. (1 Tan. 11:1, 2) Niantehitsy tamy Jehovah avao Davida mba hanampy azy hialy amy ty fahavalony. (Sal. 28:7; vakio Salamo 138:3.) Nisy olo hafa be herim-po koa nitahafin’i Zadoka, anisani-zay Joiada noho Benaia anakilahiny. Nisy sefon’ny maramila 22 be herim-po baka amy fianakaviamben-drozy koa nanoha an’i Davida. (1 Tan. 11:22-25; 12:26-28) Tapa-kevitsy hanao an’i Davida ho mpanjaka noho hiaro azy lahilahy iaby reo.

7. a) Ia koa ty olo mana herim-po amy zao ka azontsika tahafy? b) Ino ty ianaranao baka amy ty modelin’ny Rahalahy Nsilu, araky ty hitantsika amy video io?

⁷ Ho be herim-po koa tsika laha mandiniky ty modelin’olo hafa nana herim-po ka nanoha ty fanjakàn’i Jehovah. Anisani-zay Jesosy Kristy Mpanjakantsika. Tsy naneky hilitsy amy politiky amy tontolon’i Satana toy eto mihintsy ie, tamy ie tan-tany etoy. (Mat. 4:8-11; Jaona 6:14, 15) Niantehitsy tamy Jehovah avao ie mba hanome hery azy, amy zay ie ho tapa-kevitsy hanao raha soa avao. Maro rahalahy tanora be herim-po koa amy zao. Tsy naneky hanao maramila na hilitsy amy resaky politiky rozy. Manino laha mba mamaky ty sisany amy tantaran-drozy amy jw.org ao?a

AMPEO TY MPIARA-MANOMPO AMINAO

8. Ombia ty anti-panahy ro mila herim-po mba hanampea ty mpiara-manompo amin-drozy?

⁸ Tea mifanampy ty vahoakin’i Jehovah. (2 Kor. 8:4) Fe tsy mora kindraiky ty manao ani-zay fa mila herim-po. Lafa misy aly, ohatsy, amy faritsy raiky, le hain’ny anti-panahy fa mila fampahereza, fanohana, hany ara-panahy na hany ara-nofo, akanjo, noho pilasy hipetraha ty rahalahy noho anabavin-drozy. Tea an’ny rahalahy noho anabavy reo ty anti-panahy ka miezaky manome ze raha ilàn-drozy avao, ndre mampidi-doza raha zay. (Jaona 15:12, 13) Be herim-po manahaky an’i Zadoka rozy lafa manao ani-zay.

9. Laha hentea ty 2 Samoela 15:27-29, ino ty nampanovin’i Davida an’i Zadoka? (Henteo koa sary io.)

⁹ Diniho hoe akory ty nanampean’i Zadoka ty rahalahiny lafa rozy niatriky raha nampidi-doza. Tapa-kevitsy hamono an’i Davida, Absaloma anakilahiny, amy zay ie ho lasa mpanjaka. (2 Sam. 15:12, 13) Nila niala malaky baka Jerosalema ao Davida! Nivola tamy mpanompony rey ie hoe: “Ndao hilay, fa tsy hisy ho afa-miala amy Absaloma tsika!” (2 Sam. 15:14) Lafa nandeha iaby mpanompon’i Davida rey, le hitan’i Davida hoe mila asia olo hijano a Jerosalema ao mba hanome vaovao azy mikasiky ze raha hataon’i Absaloma. Farany nalefany noly an-tanà any Zadoka noho mpisoro rezay mba hanara-maso ze raha miseho any. (Vakio 2 Samoela 15:27-29.) Tsy maintsy niamby soa rozy. Tena nampidi-doza ty raha nampanovin’i Davida an’ny mpisoro reo. Olo satà Absaloma, sady tea tena noho mpamadiky. Mba alao sary an-tsay amy zay hoe ino ty raha hataony amy Zadoka noho mpisoro rey laha hainy hoe nanara-maso azy rozy mba hiarova an’i Davida!

10. Akory ty niarovan’i Zadoka noho namany rey an’i Davida?

¹⁰ Nanao tetiky hafa koa Davida, le nangataky an’i Zadoka noho Hosay namany natokisany ie mba hanampy azy. (2 Sam. 15:32-37) Nanaraky an’ny raha nampanovin’i Davida iny Hosay ka lasa natokisan’i Absaloma. Lafa natoky azy amy zay Absaloma le natorony azy ty fomba hanafiha an’i Davida. Tetiky anefa io mba hahafahan’i Davida mioma sandrany hilay lafa misy manafiky azy. Bakeo nivolanin’i Hosay tamy Zadoka noho Abiatara tetiky nataony zay. (2 Sam. 17:8-16) Nataon-drozy roe lahy azo antoky amy zay hoe hain’i Davida ty raha hataon’i Absaloma. (2 Sam. 17:17) Nampean’i Jehovah Zadoka noho mpisoro rey ka afaky niaro ty ain’i Davida.​—2 Sam. 17:21, 22.

11. Akory ty ampisehoantsika hoe be herim-po manahaky an’i Zadoka tsika lafa manampy ty mpiara-manompo amintsika?

¹¹ Akory ty ampisehoantsika hoe be herim-po manahaky an’i Zadoka tsika lafa miatriky raha mampidi-doza ty mpiara-manompo amintsika, le tsika amy zay ro asà hanampy an-drozy? 1) Oriho ze toromariky amea anao. Tena ilà ty mankatò amy fotoa rey, amy zay tsika ho afaky hiharo raiky avao. Oriho ty toromariky baka amy biròn’ny sampana. (Heb. 13:17) Mahazo toromariky ty anti-panahy hoe akory ty hiomana lafa misy loza ho avy, le akory ty atao lafa miseho loza iny. Tokony handiniky an’ny toromariky rey tsy tampaky ty anti-panahy. (1 Kor. 14:33, 40) 2) Manàna herim-po fe miambena soa avao koa. (Ohab. 22:3) Mandiniha tse zay vo manao raha. Ka manao raha mety hahavoan-draha anao. 3) Miantehera amy Jehovah. Tiarovo fa tean’i Jehovah ho voaro soa iha noho mpiara-manompo aminao reo. Afaky manampy anao ie lafa iha hanampy an’ny rahalahinao noho anabavinao reo.

12-13. Ino ty ianaranao baka amy tantaran’i Viktor noho Vitalii? (Henteo koa sary io.)

¹² Diniho ty tantaran’i Viktor noho Vitalii, rahalahy roe an’Ukraine any. Nitendrè hanatitsy hany noho rano ho an’ny mpiara-manompo amin-drozy rozy. Hoy Viktor: “Nila hany mbaombao zahay. Nisy tifitifitsy avao matetiky ze ombanao. Nisy rahalahy raiky zay nanajary hany, le nangalany raha iny ka nameany anay. Nanampy mpitory maro hany nameany io, ka mba nahazo ze raha nilan-drozy rozy tanatin’ny andro maromaro. Matetiky misy bomba avao marìny anay mbeny lafa zahay nitao enta tanatin’ny kamion fandesinay iny. Tsy lavitsy ty nisy an’ny raha rey fa eo amy 20 metra eo. Fe soa avao fa tsy nipoaky raha rey. Nisoloho tamy Jehovah avao aho tontolo andro mba hanome herim-po ahy, amy zay aho afaky manampy ty mpiara-manompo.”

¹³ Hoy Vitalii: “Tena nila herim-po zahay. Naharitsy 12 lera eo ty lala nandehanako tamy voalohany. Nivavaky tamy Jehovah avao aho tan-dala teny.” Be herim-po Vitalli, fe niamby soa avao koa ie. Hoy ndraiky ie: “Nivavaky tamy Jehovah avao aho mba hana fahendrea. Nivavaky koa aho mba hampeany, amy zay tsy hanaonao raha mety hahavoan-doza ahy sady hankatò ty manam-pahefà. Ze lala nivolanin-drozy hoe azo andehana avao ro nandehanako. Lafa nahita an’ny rahalahy noho anabavy reo niaraky niasa aho, le nihanatanjaky ty finoako. Nalan-drozy ze raha nanakatsaka tan-dala eny, nitao hany, siky, noho raha hafa tanatin’ny kamion tao rozy, sady nanome hany noho pilasy hitofatofànay amy Viktor.”

KA MIVALIKY AMY JEHOVAH MIHINTSY

14. Mety hanao akory tsika lafa misy olo teantsika mivaliky amy Jehovah?

¹⁴ Mety ho kivy tsika lafa miatriky raha sarotsy. Fa ty tena tsy zakantsika lafa misy fianakavia na namantsika marìny miala amy Jehovah. (Sal. 78:40; Ohab. 24:10) Vomaiky sarotsy aminao raha zay laha olo tena teanao ro miala amy Jehovah. Mety hamparary ty fonao mihintsy aza raha zay. Laha zay ie, le hampahery anao ty modelin’i Zadoka.

15. Nanino Zadoka ro nila herim-po mba tsy hivaliha amy Jehovah? (1 Mpanjaka 1:5-8)

¹⁵ Tsy nivaliky tamy Jehovah mihintsy Zadoka ndre nivaliky aza Abiatara namany. Niseho raha zay lafa narìny ho tampitsy ty fanjakàn’i Davida. Fa antitsy Davida tamy zay sady kely sisa le ho maty. Nanao ty vatany ho mpanjaka amy zay Adonia anakilahiny, ndre Solomona aza ro tean’i Jehovah ho mpanjaka. (1 Tan. 22:9, 10) Nanoha an’i Adonia Abiatara. (Vakio 1 Mpanjaka 1:5-8.) Hita amy raha nataon’i Abiatara io fa tsy hoe nivaliky tamy Davida avao ie fa tamy Jehovah koa! Azonao sary an-tsay va hoe mety nanao akory zay Zadoka? Azo antoky fa nalahelo biby ie sady nidiso fanantenà. Samby mpisoro rozy roe, le niaraky niasa avao tanatin’ny 40 tao mahery. (2 Sam. 8:17) Niaraky nitarazo an’ny “Vata masin’ny Ndranahary marina iny” rozy. (2 Sam. 15:29) Niaraky nanoha an’i Davida rozy roe lahy mba ho mpanjakan-drozy, sady nanao raha maro tamy fanompoa an’i Jehovah.​—2 Sam. 19:11-14.

16. Ino ty mety nanampy an’i Zadoka tsy hivaliky mihintsy?

¹⁶ Tsy nivaliky tamy Jehovah mihintsy Zadoka ndre teo aza ty safidy raty nataon’i Abiatara. Hain’i Davida fa afaky matoky an’i Zadoka avao ie. Lafa nihay tetiky ratin’i Adonia iny, le nirahin’i Davida Zadoka, Natana, noho Benaia mba hanosotsy an’i Solomona ho mpanjaka. (1 Mpanj. 1:32-34) Azo antoky fa nampahery an’i Zadoka ty modelin’ny mpanompon’i Jehovah sisany tsy nivaliky, anisani-zay Natana noho ty olo hafa nanoha an’i Davida Mpanjaka. (1 Mpanj. 1:38, 39) Lafa nilasa mpanjaka amy zay Solomona, le ‘nitendreny Zadoka mpisoro mba hisolo an’i Abiatara.’​—1 Mpanj. 2:35.

17. Akory ty hanahafanao an’i Zadoka laha misy olo marìny anao mivaliky amy Jehovah?

¹⁷ Akory ty azonao anahafa an’i Zadoka? Lafa misy olo marìny anao mivaliky amy Jehovah, le asehò hoe tsy mivaliky amy Jehovah iha. (Jos. 24:15) Hanome hery anao Jehovah ka ho vitanao ty hanao raha soa avao. Mivavaha amy Jehovah le minamà avao amy ze olo tsy mivaliky aminy. Lafovily amy Jehovah iha satria tsy mivaliky, ka hamaly soa anao ie.​—2 Sam. 22:26.

18. Ino ty ianaranao baka amy tantaran’i Marco noho Sidse?

¹⁸ Diniho ty tantaran’i Marco noho Sidse valiny. Mana anakampela roe fa be rozy, le samby niala tamy fahamarina rozy roe vavy. Hoy Marco: “Tena teanao ty ananao manomboky ie vo ateraky iny. Manao ze azonao atao iha mba hiarova an-drozy. Ka lafa rozy miala amy Jehovah, le marary ty ain-tena.” Hoy koa ty asany: “Fe nanampy anay hiaritsy Jehovah. Nataony azo antoky hoe lafa malemy aho, le matanjaky valiko, lafa valiko koa malemy, le matanjaky aho.” Hoy Sidse: “Tsy ho nahavita niaritsy aloha zahay laha tsy teo Jehovah nanome hery anay. Nanome tsiny ty vatako avao aho hoe baka amiko ro nahavy an’ny anako rey niala amy Jehovah, farany niresahiko tamy Jehovah ze raha tsapako. Tsiela tafara atoy, le nisy rahavavy zay namonjy ahy. Fa ela ty tsy nahitako azy. Nataony an-tsoroko eo ty tanany, le nihenteany aho sady nivola ie hoe: ‘Tsy fahadisoanao mihintsy zao Sidse!’ Manampy ahy Jehovah, ka falifaly avao aho manompo azy.”

19. Tapa-kevitsy hanao ino iha?

¹⁹ Tean’i Jehovah laha be herim-po manahaky an’i Zadoka ty mpanompony iaby. (2 Tim. 1:7) Fe ndre zay, tsy teany hiantehitsy amy ty herintsika avao tsika fa teany laha miantehitsy aminy. Ka laha misy fotoa iha miatriky raha sarotsy ka mila herim-po, le milà fanampea amy Jehovah. Afaky matoky iha fa hampeany ka ho be herim-po manahaky an’i Zadoka!​—1 Pet. 5:10.