Hainao va ty Manavaky ty Fahamarina amy ty Vandy?

1. Ino ty tsapanao mikasiky ty fahamarina?

MPANOMPON’i Jehovah tsika ka teantsika ty fahamarina amy Safà-Ndranahary ao. Ataontsika miory amy raha io ty finoantsika. (Rom. 10:17) Mino tsika fa nataon’i Jehovah “andry noho toha ho an’ny fahamarina” ty fiangona kristiana. (1 Tim. 3:15) Falifaly koa tsika maneky ty safàni-“azy mitariky reo” satria manampy antsika hahay ty fahamarina amy Baiboly ao rozy sady manome tari-dala manampy antsika hanao ty sitrapo-Ndranahary.​—Heb. 13:17.

2. Laha hentea ty Jakoba 5:19, ino ty raha mety hiseho lafa tsika nahay ty fahamarina?

² Fe mety mbo ho voatariky hiala amy fahamarina tsika ndre fa nahay an’ny raha io sady nahay hoe mila manaraky ty tari-dala baka amy fandamina-Ndranahary tsika. (Vakio Jakoba 5:19.) Zay ty raha tena tean’i Satana. Teany laha tsy matoky ty Baiboly na ty tari-dala azontsika baka amy fandamina-Ndranahary sasy tsika.​—Efes. 4:14.

3. Manino tsika ro mila mivahatsy amy fahamarina avao? (Efesianina 6:13, 14)

³ Vakio Efesianina 6:13, 14. Kely sisa le hampiasa vandy tena maharesy lahatsy Satana mba hamitaha ty firenena iaby, amy zay rozy hanohitsy an’i Jehovah. (Apok. 16:13, 14) Fa haintsika koa fa tsy maintsy hanao ze azony atao Satana mba hamitaha antsika. (Apok. 12:9) Tena mila miezaky zany tsika mba hahay hanavaky ty fahamarina amy ty vandy, sady ho zatsy hankatò ty fahamarina. (Rom. 6:17; 1 Pet. 1:22) Mianky amy zay ro hahavy antsika ho tafaboaky velo lafa amy fijalea bevata!

4. Ino ty hodinihintsika ato?

⁴ Misy toetsy roe mila ananantsika laha teantsika ty hahay ty fahamarina amy Baiboly ao noho haneky ty tari-dala baka amy fandamina-Ndranahary. Ino toetsy reo? Hodinihintsika ato raha rezay. Bakeo tsika handiniky raha telo tsy maintsy ataontsika mba hahavy antsika hivahatsy amy fahamarina avao.

TOETSY MANAMPY ANTSIKA HAHAY TY FAHAMARINA

5. Manino ty tahotsy an’i Jehovah ro manampy antsika hahay ty fahamarina?

⁵ Tahotsy an’i Jehovah. Matahotsy an’i Jehovah tsika laha tena tea azy ka tsy hanao raha mampalahelo azy mihintsy. Teantsika ty mianatsy mba hahay hanavaky ty soa noho ty raty, ty fahamarina noho ty vandy, amy zay tsika hahazo hatò amy Jehovah. (Ohab. 2:3-6; Heb. 5:14) Manao akory laha ty tahotsy olo ro mahazo vahatsy anatintsika ao mandilatsy ty fitiavantsika an’i Jehovah? Laha manao ani-zay tsika, le olo ro ampifalifaliantsika fa tsy Jehovah. Matetiky anefa tsy mampifaly an’i Jehovah ty raha mampifaly olo. Tsy tokony hengantsika hiseho mihintsy raha zay.

6. Manino ty tahotsy olo ro nahavy an’ny mpiadidy folo israelita rey ho voatariky hiala amy fahamarina?

⁶ Laha olo ro atahorantsika marè mandilatsy a-Ndranahary, le mety ho voatariky hiala amy fahamarina tsika. Diniho moa ty ohatsin’ny mpiadidy 12 tamy Israely teo. Nirahy rozy mba hanentinenty an’ny tany nampitamanin’i Jehovah an-drozy iny. Natahotsy an’ny Kananita rey marè ty 10 amin-drozy, ka lasa nihena ty fitiavan-drozy an’i Jehovah. Farany, nivola tamy Israelita naman-drozy rey rozy hoe: “Tsy ho vitantsika ty hiakatsy hialy amy firenena io, satria mahery mandilatsy antsika rozy.” (Nom. 13:27-31) Laha amintsika olombelo aloha, le tena mahery mandilatsy ty Israelita vatany ty Kananita. Fe tsy nieritseritsy an’i Jehovah ze olo nivola hoe tsy ho vitan’ny Israelita rey ty handresy an’ny fahavalon-drozy reo. Tokony ho nitiarovin’ny mpisafo tany folo rey hoe ino ty tean’i Jehovah hataon’ny Israelita. Tokony ho nivetsevetsen-drozy koa hoe ino ty raha fa nataony ho an-drozy taloha tany. Laha nanao ani-zay rozy, le ho nieky hoe tsy misy dikany amy Jehovah Kananita zao, ndre atao hoe mahery aza satria mbo mana hery faratampony Jehovah. Tsy nanahaky an’ny mpiadidy tsy ampy finoa reo Josoa noho Kaleba fa ta hahazo hatò tamy Jehovah. Nivola tamy vahoaky rey rozy hoe: ‘Laha ankasitrahan’i Jehovah tsika, le tena handesiny hilitsy amy tany io ao, ka hameany antsika tany io.’​—Nom. 14:6-9.

7. Akory ty hahavy antsika hatahotsy marè an’i Jehovah? (Henteo koa sary io.)

⁷ Vomaiky hatahotsy an’i Jehovah tsika laha ze raha mampifaly azy avao ro ifantohantsika saky tsika handramby fanapahan-kevitsy. (Sal. 16:8) Lafa mamaky tantara amy Baiboly ao iha, le eritsereto zao: ‘Ino ty ho nataoko laha zaho ro tamy pilasin’olo io?’ Mba alao sary an-tsay, ohatsy, hoe nijanjy teo iha tamy mpiadidy israelita folo rey nanao tatitsy raty iny. Ho nino an-drozy va iha ka lasa natahotsy olo, sa iha vomaiky nitea an’i Jehovah sady naniry ta hampifaly azy? Tsy nino ty taranakin’ny Israely iaby hoe marina ty raha nivolanin’i Josoa noho Kaleba. Vokany, tsy nengan’i Jehovah hilitsy amy Tany Nampitamany any rozy.​—Nom. 14:10, 22, 23.

8. Ino ty toetsy tokony hiezahantsika hanana, le ino ty antony?

⁸ Fiambanea. Ze olo miambany avao ro engan’i Jehovah hahay ty fahamarina. (Mat. 11:25) Niambany tsika ka naneky lafa nampianary ty fahamarina. (Asa. 8:30, 31) Fe tsy maintsy mitandrina tsika mba tsy ho lasa hanambony tena. Laha manambony tena tsika, le mety hanomboky hieritseritsy hoe ty hevitsintsika ro soa kokoa laha ampitovizy amy ty torolalan’ny Baiboly noho ty tari-dala baka amy fandaminan’i Jehovah.

9. Ino ty hanampy antsika hiambany avao?

⁹ Ino ty hanampy antsika hiambany avao? Mila tiarovintsika hoe tena farani-ze kelikely tsika laha ampitovizy amy Jehovah. (Sal. 8:3, 4) Afaky mivavaky koa tsika mba hahavy antsika tena hiambany noho mora ampianary. Hanampy antsika Jehovah, amy zay ty hevitsiny ianarantsika amy Baiboly ao noho baka amy fandaminany ro lasa vatan-draha kokoa amintsika mandilatsy ty hevitsintsika manoka. Saky mamaky Baiboly iha, le henteo hoe ino ty porofo mampiseho fa tean’i Jehovah ty olo miambany fa halany ty olo miavonavo, mirengirengy, noho manambony tena. Le miezaha avao hiambany lafa mahazo tombotsoam-panompoa mety hahavy anao lasa mana fahefà na maro mpahay.

INO TY HANAMPY ANTSIKA HIVAHATSY AMY FAHAMARINA AVAO?

10. Ia ty nampiasan’i Jehovah hanome toromariky noho tari-dala ty vahoakiny?

¹⁰ Miezaha avao hatòky ty tari-dala baka amy fandamina. Taloha tany, le nampiasa an’i Mosesy noho Josoa Jehovah mba hanome toromariky ho an’ny vahoakin’ny Israely. (Jos. 1:16, 17) Nahazo fitahia ty Israelita lafa neken-drozy hoe solotenan’i Jehovah Ndranahary lahilahy reo. Taonjato maro tafara atoy, lafa niforo ty fiangona kristiana le lasa ty apostoly 12 ro nanome toromariky. (Asa. 8:14, 15) Lafa nandeha ty fotoa le nisy anti-panahy hafa baka a Jerosalema ao koa niaraky amy apostoly reo. “Nihanatanjaky ty finoan’ny fiangona” lafa nanaraky ty tari-dala namean’ny lahilahy tsy nivaliky reo, ‘sady nihamaro avao rozy sanandro.’ (Asa. 16:4, 5) Mitahy antsika koa Jehovah amy zao lafa tsika manaraky ty toromariky amean’ny fandaminany. Fe ino ty tsapan’i Jehovah lafa tsika tsy maneky ani-azy nifiliny hitariky rey? Mba hahaizantsika ani-zay, le ndao hodinihintsika ty raha niseho lafa Israelita rey nandeha amy Tany Nampitamany any.

11. Nanao akory ze olo tsy naneky mihintsy hoe Jehovah ro nanendry an’i Mosesy hitariky ty Israely? (Henteo koa sary io.)

¹¹ Nanohitsy an’i Mosesy ty olo ambony tamy Israely teo tamy rozy nandeha amy Tany Nampitamany any, ka tsy neken-drozy hoe Jehovah ro nanendry azy. Nivola rozy hoe: “Masy iaby anè vahoaky iaby toy [fa tsy Mosesy avao], le amin-drozy eo Jehovah.” (Nom. 16:1-3) Marina aloha fa masy “ty vahoaky iaby” amy Ndranahary, fe Mosesy ro nifiliny hitariky an-drozy. (Nom. 16:28) Lafa nikinokino an’i Mosesy olo mpizizo reo, le Jehovah mihintsy ro nikinokinoen-drozy. Ta hana fahefà noho nila laza rozy, ka zay ro tena nifantohan-drozy fa tsy ze raha nitean’i Jehovah. Nivonoan’i Jehovah rozy satria nitariky olo hizizo, le nisy olo maro koa nivonoany satria nanoha an-drozy. (Nom. 16:30-35, 41, 49) Azo antoky koa fa tena tsy ankasitrahan’i Jehovah ze olo tsy manaja ty fandahara ataon’ny fandaminany amy henanizao.

12. Manino tsika ro afaky matoky ty fandaminan’i Jehovah avao?

¹² Afaky matoky ty fandaminan’i Jehovah avao tsika. Lafa hitani-azy mitariky reo hoe mila ovà ty fahazoantsika ty fahamarina amy Baiboly ao na ty fomba fanompoantsika an’i Jehovah, le tsy misalasala rozy manova an’ny raha zay. (Ohab. 4:18) Manao ani-zay rozy satria ta hampifalifaly an’i Jehovah fa tsy olo. Manao ze fara herin-drozy koa rozy mba hiory amy Safà-Ndranahary avao ty fanapahan-kevitsin-drozy. Zay ro modely orihin’ny mpanompon’i Jehovah iaby.

13. Ino “modelin’ny safà mahasoa” io, le tokony hataontsika akory raha io?

¹³ “Ka ialà mihintsy ty modelin’ny safà mahasoa.” (2 Tim. 1:13) Tsy ino “modelin’ny safà mahasoa” io fa ty fampianara kristiana hita amy Baiboly ao. (Jaona 17:17) Fampianara reo ro fototsin’ny raha iaby inoantsika. Nampianarin’ny fandaminan’i Jehovah tsika mba hataontsika miory amy raha io ty finoantsika. Hahazo fitahia tsika laha manao ani-zay.

14. Manino ty Kristiana sisany ro niala tamy “modelin’ny safà mahasoa”?

¹⁴ Ino ty mety hiseho laha miala amy “modelin’ny safà mahasoa” tsika? Diniho ohatsy raiky toy. Tamy taonjato voalohany, le nisy Kristiana sisany nanaparitaky raha diso. Nivola rozy fa niavy zao ty andron’i Jehovah. Mety nisy taratasy mihintsy aza nivola ani-zay, ka nieritseritsy ty olo hoe apostoly Paoly ro nanoratsy azy. Tsy nandiniky soa ty raha nisy ty Kristiana sisany ta Tesalonika tany fa avy le nino sady nanaparitaky an’ny raha iny mihintsy aza. Tsy ho nivoafitaky rozy laha nitiarovin-drozy ty raha nampianarin’i Paoly an-drozy tamy ie mbo tamin-drozy teo. (2 Tes. 2:1-5) Nanoro hevitsy an’ny mpiara-manompo aminy reo Paoly mba tsy hino ze raha iaby ren-drozy. Ka mba hanampea an-drozy tsy hinohino fahatany amy manaraky, le zao ty namaranan’i Paoly ty taratasiny faharoe ho an’ny Tesalonianina: “Toy ty veloma nisoratin’ny tanako, zaho Paoly, sady amantara ty taratasiko iaby. Io ty sora-tanako.”​—2 Tes. 3:17.

15. Akory ty hiarovantsika ty vatantsika mba tsy ho voafitaky lafa misy vandy atao raha maharesy lahatsy? Manomeza ohatsy. (Henteo koa sary reo.)

¹⁵ Ino ty ianarantsika baka amy raha nivolanin’i Paoly tamy Tesalonianina rey? Mila mampiasa ty fahaizantsika mandiniky tsika lafa maharè raha tsy mifanaraky amy raha nianarantsika amy Baiboly ao, na maharè siosion-dresaky. Nisy fotoa, ohatsy, ty mpiara-manompo amintsika tamy Firaisana Sovietiky any nahavoaramby taratasy, le atao raha baka amy foibe any. Fe olo baka amy fanjakà io ao avao laha ty marina ro nandefa an’ny raha io. Nampirisiky an’ny rahalahy reo hamoro fandamina raiky mahaleo tena taratasy iny. Le atao raha tena izy io raha iny. Fe tsy nivoafitaky rahalahy tsy mivaliky rey. Nihitan-drozy fa tsy nifanaraky tamy raha nampianary an-drozy ty raha nivolanin’ny taratasy iny. Mbo manao manahaky ani-zay koa ty fahavalon’ny fahamarina henanizao. Miezaky rozy manao ze hampikoronta ty saintsika noho hampizarazara antsika, le ty internet noho ty tranonkala fifandrambesa kindraiky ro ampiasan-drozy. Ho voaro tsika laha tsy “malaky mikorontan-tsay” fa mandiniky soa hoe mifanaraky amy fahamarina fa nianarantsika va raha rentsika na vakintsika iny.​—2 Tes. 2:2; 1 Jaona 4:1.

16. Laha hentea ty Romanina 16:17, 18, ino ty tokony hataontsika lafa misy olo mampiparitaky fanazavà tsy marina?

¹⁶ Miaraha avao amin’olo tsy mivaliky amy Jehovah. Tea-Ndranahary tsy hisaratsaraky tsika lafa manompo azy. Hiharo raiky avao tsika laha tsy miala amy fahamarina mihintsy. Misy olo sisany mampiparitaky fanazavà tsy marina ka lasa mampisaratsaraky ty fiangona. Farany mampitandrina antsika Ndranahary mba ‘hanalavitsy an’olo rey.’ Laha tsy zay, le mety ho voatariky hiala amy fahamarina tsika.​—Vakio Romanina 16:17, 18.

17. Ino ty soa ho azontsika laha tsika mahay ty fahamarina noho mivahatsy amy raha io avao?

¹⁷ Laha tsika mahay ty fahamarina noho mivahatsy amy raha io avao, le hifandramby soa amy Jehovah sady hatanjaky avao ty finoantsika. (Efes. 4:15, 16) Tsy ho voafitakin’ny fampianaran-diso noho ty vandin’i Satana tsika, sady harovan’i Jehovah avao lafa amy fijalea bevata. Ka miala amy fahamarina mihintsy, le ‘hitahy anao azy Ndranaharin’ny fiadana iny!’​—Fil. 4:8, 9.