Akory ty Ampisehoantsika hoe Vatan-draha Amintsika ty Anaran’i Jehovah?

1-2. Akory ty ahaizantsika hoe vatan-draha tamy Jesosy ty anaran’i Jehovah?

TENA vatan-draha tamy Jesosy ty anaran’i Jehovah. Ie ro tena niaro ty anaran’ny Babany. Nihazavanin’ny lahatsoratsy taloha teo iny, fa parè ho maty Jesosy mba hanaporofoa hoe masy Jehovah sady ara-drariny ty raha iaby ataony. (Marka 14:36; Heb. 10:7-9) Lafa tampitsy koa ty Fanjakà Arivo Tao, le parè hanome ty fahefà iaby ho an’ny Babany Jesosy mba hanamasìna ty anarany. (1 Kor. 15:26-28) Hita tamy raha iaby nataon’i Jesosy ho an’ny Babany, fa tena tea an’i Jehovah ie.

² Tamy anaran’ny Babany ro niavian’i Jesosy tan-tany etoy. (Jaona 5:43; 12:13) Nambarany tamy mpanori-dia azy ty anaran’ny Babany. (Jaona 17:6, 26) Nampianatsy noho nanao fahagagà tamy anaran’i Jehovah ie. (Jaona 10:25) Nangataky tamy Jehovah mihintsy aza Jesosy mba hiaro ty mpianatsiny amy zay rozy ‘hanome voninahitsy ty anaran’i Jehovah.’ (Jaona 17:11) Hitantsika baka amy zay fa tena vatan-draha tamy Jesosy mandilatsy ty raha hafa ty anara-Ndranahary. Akory zany ty ahafahan’olo raiky mivola hoe mpanori-dia an’i Jesosy ie, kanefa tsy hainy, na tsy ampiasàny ty anaran’i Jehovah?

3. Ino ty hodinihintsika amy lahatsoratsy toy ato?

³ Amy maha Kristiana antsika, le miezaky manori-dia an’i Jesosy tsika, ka asehontsika hoe lafovily amintsika ty anaran’i Jehovah. (1 Pet. 2:21) Ho hitantsika amy lahatsoratsy toy hoe manino ro manday ty anaran’i Jehovah ze olo mitory “ty vaovao soan’ny Fanjakà iny.” (Mat. 24:14) Hodinihintsika koa hoe manino ro tokony ho vatan-draha amintsika kiraidraiky ty anaran’i Jehovah.

‘OLO HANDAY TY ANARANY’

4. a) Ino ty raha nivolanin’i Jesosy tamy mpianatsiny rey talohan’ny niakarany tan-danitsy any? b) Ino ty fanontanea mipetraky amy raha nivolaniny tamin-drozy io?

⁴ Taloha kelikelin’ny niakaran’i Jesosy tan-danitsy any, le nivola tamy mpianatsiny rey ie hoe: “Hahazo hery nareo lafa avy aminareo ty fanahy masy, le ho vavolombeloko a Jerosalema noho a Jodia noho a Samaria noho amy faritsy farany lavitsy an-tany etoy nareo.” (Asan’ny Apostoly 1:8) Midika zay, fa hitory amy faritsy hafa any koa mpianatsy rey, fa tsy an’Israely ao avao. Ka lafa mandeha ty fotoa, le afaky ho mpanori-dia an’i Jesosy ty olo baka amy firenena iaby any. (Mat. 28:19, 20) Fe nivola Jesosy hoe: ‘Ho vavolombeloko nareo.’ Mila mahay ty anaran’i Jehovah koa va ty olo lasa Kristiana sa ho vavolombelon’i Jesosy avao? Manampy antsika hamaly an’ny fanontanea zay ty raha niseho amy Asan’ny Apostoly toko faha-​15 ao.

5. Akory ty nampisehoan’ny apostoly noho anti-panahy ta Jerosalema tao hoe mila mahay ty anaran’i Jehovah ty olo iaby? (Henteo koa sary io.)

⁵ Niaraky nivory ty apostoly noho ty anti-panahy ta Jerosalema any tamy tao 49 A.K., mba handiniky hoe ino ty tokony hataon’ny hafa firenena mba hahavy an-drozy ho lasa Kristiana. Lafa nitampitsy resaky iny, le nivola Jakoba rahalahin’i Jesosy hoe: “Nitantara tamy an-tsipiriany [Petera] teo hoe vo sambany zay Ndranahary ro naneky an’ny olo firenena hafa reo, mba hangalany olo baka amin-drozy handay ty anarany.” Anaran’ia tean’i Jakoba hovolany io? Nanono ty safàn’i Amosa mpaminany ie le nivola hoe: “Amy zay hazoto hila an’i Jehovah ty olo sisa tavela, miaraky amin’olo baka amy firenena iaby any, zany hoe olo kaihy amy anarako, hoy Jehovah.” (Asan’ny Apostoly 15:14-18) Tsy vitany hoe hianatsy mikasiky an’i Jehovah mpianatsy vaovao reo, fa ‘ho kaihy amy anarany’ koa. Midika zay fa hanambara ty anara-Ndranahary amin’olo rozy sady ho hain’olo hoe misolo tena azy.

6-7. a) Manino Jesosy ro niavy tan-tany etoy? b) Fe ino ty tena antony bevata niaviany tetoy?

⁶ Ty anaran’i Jesosy le midika hoe “Jehovah ro Fanavota.” Nampiasan’i Jehovah ie mba hanavotsy ze olo nino azy. Niavy tan-tany etoy ie mba hanome ty ainy ho an’olombelo. (Mat. 20:28) Naloany ty vilim-panavota, ka afaky ho voavonjy ty olombelo sady afaky hahazo fiaina mandrakizay.​—Jaona 3:16.

⁷ Manino moa ty olombelo ro mila vilim-panavota? Tiarovo raha niseho tamy zariday Edena tao iny. Nihitantsika tamy lahatsoratsy taloha teo iny, fa nizizo tamy Jehovah Adama noho Eva, azy ray aman-drenintsika voalohany rey, ka tsy afaky niay mandrakizay. Lasa nandova ota noho fahafatesa ty olombelo vokatsini-zay. (Gen. 3:6, 24) Fe tsy hoe hanavotsy ty olombelo avao ro niavian’i Jesosy tan-tany etoy, fa mbo misy raha hafa bevata mandilatsy ani-zay koa. Tsy ino zay fa ty hanamasy ty anaran’i Jehovah. (Gen. 3:4, 5) Nila nahay zany ty olombelo hoe tsy nanao raha raty Jehovah sady masy ty anarany. Ka ia ty soa pilasy hanaporofo ani-zay? Tsy ia fa Jesosy, satria nisolo tena an’i Jehovah ie sady nanday ty anarany ka nandramby anjara bevata tamy fanamasìna ty anaran’i Jehovah.

8. Ino ty raha mila eken’ny mpanori-dia an’i Jesosy iaby?

⁸ Mila mieky ty mpanori-dia an’i Jesosy iaby hoe Jehovah Ndranahary, azy Baban’i Jesosy iny ro tena hanavotsy an-drozy. (Jaona 17:3) Ho kaihy amy anaran’i Jehovah manahaky an’i Jesosy koa rozy. Mila mieky koa rozy hoe vatan-draha ty fanamasìna an’ny anara io. Mianky amy zay ty hahavotsy an-drozy. (Asan’ny Apostoly 2:21, 22) Mila mianatsy mikasiky an’i Jehovah noho Jesosy zany ty mpanori-dia an’i Jesosy tsy mivaliky iaby. Tsy mahatseriky zany laha nitamperin’i Jesosy manahaky ani-zao vavaky nataony amy Jaona toko faha-​17 ao iny: “Fa nambarako an-drozy ty anaranao sady mbo hambarako avao, amy zay hanahaky ty nitiavanao ahy ty hitiavan-drozy ty olo hafa, le mba hiaraky amin-drozy koa aho.”​—Jaona 17:26.

“NAREO RO VAVOLOMBELOKO”

9. Akory ty ampisehoantsika hoe vatan-draha amintsika ty anaran’i Jehovah?

⁹ Tsy maintsy manamasy ty anaran’i Jehovah tsika laha teantsika ty hanori-dia an’i Jesosy. (Mat. 6:9, 10) Ty anaran’i Jehovah ro tokony ho vatan-draha marè amintsika, le mila asehontsika amy raha ataontsika raha zay. Fe misy raha azontsika atao va mba hanamasìna ty anaran’i Jehovah noho hanaporofoa hoe diso ty raha nivolanin’i Satana mikasiky azy?

10. Ino ty fitsarà an’ohatsy resahin’ny Isaia toko faha 42-44? (Isaia 43:9; 44:7-9) (Henteo koa sary io.)

¹⁰ Resahy amy Isaia toko faha 42-44 ao hoe ino ty azontsika atao mba hanamasìna ty anaran’i Jehovah. Tantaranin’ny toko reo, fa nangataky ty olo tsy manompo azy Jehovah mba hanaporofo laha tena misy ty ndranaharin-drozy. Nangataky koa ie mba hisy vavolombelo ho avy eo mba hanaporofo laha tena misy ndranaharin-drozy reo. Fe tsy nisy olo nitsanga ho vavolombelo mihintsy!​—Vakio Isaia 43:9; 44:7-9.

11. Ino ty nivolanin’i Jehovah tamy vahoakiny amy Isaia 43:10-12?

¹¹ Vakio Isaia 43:10-12. Nivola tamy vohoakin’i Jehovah hoe: “Nareo ro vavolombeloko, ... le zaho ro Ndranahary.” Nangataky an-drozy Jehovah mba hamaly an’ny fanontanea toy: “Misy Ndranahary hafa ankoatsy ahy va?” (Isa. 44:8) Mana tombotsoa hamaly an’ny fanontanea zay tsika. Tokony asehontsika amy raha volanintsika noho ataontsika hoe Jehovah raiky avao ro tena Ndranahary. Anabo mandilatsy ty anara hafa iaby ty anarany. Asehontsika amy fiainantsika hoe tena tea an’i Jehovah tsika sady tsy mivaliky aminy, ndre ino ndre ino ty raha sarotsy ataon’i Satana antsika. Mandramby anjara amy fanamasìna ty anaran’i Jehovah tsika laha manao ani-zay.

12. Akory ty nahatanteraky an’ny faminania amy Isaia 40:3, 5 ao iny?

¹² Nivola koa Isaia hoe hisy olo ‘hanoma ty lala homban’i Jehovah.’ (Isa. 40:3) Akory ty nahatanteraky ani-zay? Jaona Mpanao Batisa ro nanoma ty lalan’i Jesosy, azy niavy tamy anaran’i Jehovah sady nivola tamy anaran’i Jehovah iny. (Mat. 3:3; Marka 1:2-4; Lioka 3:3-6) Mbo nivola avao koa faminania io hoe: “Hiseho ty voninahitsin’i Jehovah.” (Isa. 40:5) Akory ty nahatanteraky ani-zay? Nisolo tena tanteraky an’i Jehovah, Jesosy lafa niavy tan-tany etoy, ka sahala hoe tan-tany etoy mihintsy Jehovah.​—Jaona 12:45.

13. Akory ty azontsika anahafa an’i Jesosy?

¹³ Manahaky an’i Jesosy Kristy tsika laha miaro ty anaran’i Jehovah noho ty lazany. Vavolombelon’i Jehovah manahaky an’i Jesosy tsika. Manday ty anarany tsika sady miresaky amin’olo ty raha soasoa nataony. Fe mba hahavitantsika ani-zay, le tsy maintsy resahintsika amin’olo ty raha iaby nataon’i Jesosy mba hanamasìna ty anaran’i Jehovah. (Asan’ny Apostoly 1:8) Jesosy ro Vavolombelon’i Jehovah tena niavaky, le manaraky ty modeliny koa tsika. (Apok. 1:5) Fe manino ro tokony ho vatan-draha amintsika kiraidraiky ty anaran’i Jehovah?

MANINO RO VATAN-DRAHA AMINTSIKA TY ANARAN’I JEHOVAH?

14. Ino ty tokony ho tsapantsika mikasiky ty anaran’i Jehovah, laha hentea ty Salamo 105:3?

¹⁴ Mirengirengy tsika manday ty anaran’i Jehovah. (Vakio Salamo 105:3.) Tena falifaly Jehovah lafa mirengirengy mikasiky ty anarany tsika. (Jer. 9:23, 24; 1 Kor. 1:31; 2 Kor. 10:17) Ty hoe ‘manao an’i Jehovah ho rengirengintsika,’ le midika hoe mirengirengy tsika fa mana azy ho Ndranaharintsika. Tombotsoa ho antsika ty manome voninahitsy ty anarany noho miaro ty lazany. Tsy tokony ho menatsy mihintsy tsika hivola amy mpiaraky miasa amintsika, mpiaraky mianatsy, ty olo tanà raiky noho amin’olo hafa hoe Vavolombelon’i Jehovah tsika! Tean’i Devoly tsika laha tsy miresaky mikasiky ty anaran’i Jehovah amin’olo. (Jer. 11:21; Apok. 12:17) Tean’i Satana noho ty mpaminany sandoky mihintsy aza laha manalino ty anaran’i Jehovah ty olo. (Jer. 23:26, 27) Fe tea ty anaran’i Jehovah tsika ka midera azy avao “sanandro.”​—Sal. 5:11; 89:16.

15. Ino ty dikan’ny hoe mikaiky ty anaran’i Jehovah?

¹⁵ Mikaiky ty anaran’i Jehovah avao tsika. (Joela 2:32; Rom. 10:13, 14) Tsy hoe mahay noho mampiasa ty anara-Ndranahary avao ty hoe mikaiky ty anaran’i Jehovah. Fa tafilitsy amy zay koa ty fahaiza hoe ie ro Ndranahary, matoky azy, noho mila fanampea noho tari-dala aminy. (Sal. 20:7; 99:6; 116:4; 145:18) Ambarantsika amin’olo koa ty anarany noho ty toetsiny, le ampirisihintsika rozy mba hibebaky noho hanao raha mampifalifaly an’i Jehovah.​—Isa. 12:4; Asan’ny Apostoly 2:21, 38.

16. Akory ty anaporofoantsika hoe mpavandy Satana?

¹⁶ Parè hijaly ho an’ny anaran’i Jehovah tsika. (Jak. 5:10, 11) Laha tsy mivaliky amy Jehovah mihintsy tsika ndre miatriky fijalea, le manaporofo hoe mpavandy Satana. Nivola ty olo manompo an’i Jehovah, Satana tamy andron’i Joba hoe: “Hanome ty raha iaby ananany ty olo mba hiarovany ty ainy.” (Joba 2:4) Nivola Satana hoe hanompo an’i Jehovah ty olo laha mbo milamindamy ty fiainany, fa lafa miatriky raha sarotsy rozy le hiala azy. Fe lafa miatriky raha sarotsy rozy, le tsy hanompo azy sasy. Tsy nivaliky Joba ka voaporofo hoe vandy raha zay. Mana tombotsoa koa tsika mba hanaporofo fa ndre ino ndre ino ty raha ataon’i Satana antsika, le tsy hivaliky amy Jehovah mihintsy tsika. Afaky matoky tanteraky tsika fa hiaro antsika avao Jehovah mba hanomeza voninahitsy ty anarany.​—Jaona 17:11.

17. Ino koa ty azontsika atao mba hanomeza voninahitsy ty anaran’i Jehovah, laha hentea ty 1 Petera 2:12?

¹⁷ Asehontsika hoe manaja ty anaran’i Jehovah tsika. (Ohab. 30:9; Jer. 7:8-11) Misolo tena an’i Jehovah noho manday ty anarany tsika, ka afaky midera ty anarany na manala baraka an’ny anara io. (Vakio 1 Petera 2:12.) Hiezaky zany tsika hanao ze azontsika atao mba hiderà an’i Jehovah amy alalan’ny raha volanintsika noho ataontsika. Laha manao ani-zay tsika, le hanome voninahitsy ty anarany avao ndre tsy lavorary aza.

18. Ino koa ty azontsika atao mba hanaporofoa hoe vatan-draha amintsika ty anaran’i Jehovah? (Henteo koa ty fanamariha ambany pejy.)

¹⁸ Ty anaran’i Jehovah ro vatan-draha marè amintsika, fa tsy ty lazantsika. (Sal. 138:2) Ino ty maha vatan-draha ani-zay? Satria lafa manao raha mampifalifaly an’i Jehovah tsika, le mety tsy ho tean’olo raha zay sady mety hanimba ty lazantsika ty olo manodidy antsika.a Lafa nimaty, ohatsy, Jesosy, le maro ty nieritseritsy hoe olo raty ie. Fe ndre teo zay, le niparè ho maty Jesosy mba hanomeza voninahitsy an’i Jehovah. (Heb. 12:2-4) Nifantoky tamy fanaova ty sitrapo-Ndranahary ie.​—Mat. 26:39.

19. Ino ty tsapantsika mikasiky ty anaran’i Jehovah, le ino ty antony?

¹⁹ Mirengirengy tsika fa manompo an’i Jehovah sady voninahitsy ho antsika ty kaihy hoe Vavolombelon’i Jehovah. Parè zany tsika hiatriky ze fanalam-baraka mety hataon’olo antsika. Ty anaran’i Jehovah ro vatan-draha marè amintsika mandilatsy ty lazantsika. Enganè tsika ho tapa-kevitsy hidera ty anaran’i Jehovah avao ndre ino ndre ino ty raha ataon’i Satana antsika. Asehontsika amy zay hoe ty anaran’i Jehovah ro vatan-draha marè amintsika manahaky ty nataon’i Jesosy.