Manino ty Vavolombelo Jehovah ro Tsy Mandeha Mialy?
Retoa ty antony mahavy ty Vavolombelo Jehovah tsy mandeha mialy:
Fanoriha ty safà Ndranahary. Mivola ty Baiboly fa “hanefy ty sabatsiny ho angadinomby” ty mpanompo Ndranahary sady “tsy hianatsy aly sasy.”—Isaia 2:4.
Fanoriha ty safà Jesosy. Ho zao ty safà Jesosy tamy Petera: “Ampolio amy tranony ty sabatsinao, fa ho maty ty sabatsy ze mampiasa sabatsy.” (Matio 26:52) Hita amy safà Jesosy zay fa tsy handramby na hampiasa fitaova fialia ty mpanori-dia azy.
Nanoriky ty didy Jesosy mba ‘tsy hiharo amy zao tontolo zao’ ty mpianatsiny ka tsy nikasikasiky resaky politiky mihintsy. (Jaona 17: 16) Tsy nanohitohitsy ty raha natao ty maramila rozy na nanakantsaka ty olo nifily hanao maramila mpialy.
Fitiava ty olo hafa. Nandidy ty mpianatsiny Jesosy mba ‘hifankatea.’ (Jaona 13: 34, 35) Miharo raiky manahaky mpirahalahy io rozy amy tany toy iaby, ka tsy hisy amin-drozy mihintsy hialy amy ty rahalahiny na anabaviny.—1 Jaona 3:10-12.
Ty ohatsy nengà ty Kristiana voalohany. Mivola ho zao ty Bokim-pahaia Mikasiky ty Fivavaha noho ty Aly: ‘Tsy nety nandeha nialy ty mpianatsy Jesosy voalohany, satria nampianariny hifankatea noho ho tea ty fahavalony.’ Mbo nivola koa Peter Meinhold, teolojianina Alemà, fa tamy ty mpianatsy Jesosy voalohany, le “tsy nety mihintsy ty hoe sady Kristiana noho maramila.”
Fanasoava ty fiaraha-monina
Olo ilà amy ty fiaraha-monina misy azy ty Vavolombelo Jehovah sady tsy mampisy raha manahira amy filamina ty tany ipetrahany. Manaraky didy Baiboly retoa zahay, ka manaja ty manam-pahefà amy fanjakà eo:
“Soa ty olo iaby laha samby maneky ty manam-pahefà.”—Romanina 13:1.
“Aloavo amy Kaisara moa ze ahy Kaisara, fa amy Ndranahary ze ahy Ndranahary.”—Matio 22:21
Manoriky safà reo zahay ka manara-dalàna, mandoa hetra, noho miaraky miasa amy fanjakà amy ty ezaky ataony hanasoava vahoaky.