Mataio

15 Ona ō mai lea iā Iesu o le ʻau Faresaio ma tusiupu mai Ierusalema,+ ma faapea mai: 2 “Aiseā ua solia ai e ou soo tū masani a tagata mai anamua? Auā ua lē fafano o latou lima a o leʻi aai.”+

3 Ona tali atu ai lea o ia iā i latou: “Aiseā foʻi ua outou solia ai le poloaʻiga a le Atua i a outou tū masani?+ 4 Auā ua fetalai le Atua, ‘Ia e āva i lou tamā ma lou tinā’;+ ma ‘O lē e fai upuleaga i lona tamā ma lona tinā e fasiotia lava o ia.’+ 5 A ua outou fai mai, ‘O sē e faapea atu i lona tamā po o lona tinā: “O mea uma ua iā te aʻu e aogā iā te oe, o meaalofa na e ave i le Atua,” 6 e lē tatau ona āva o ia i lona tamā.’+ Ua outou faalēaogā ai le afioga a le Atua i a outou tū masani.+ 7 O outou o tagata faafiaamiotonu,+ ua moni ai le valoaga a Isaia+ iā te outou e faapea, 8 ‘Ua āva mai nei tagata iā te aʻu i o latou laugutu, a ua mamao ese lava o latou loto mai iā te aʻu.+ 9 E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.’”+ 10 Ona ia valaau atu lea i le motu o tagata ma fetalai atu: “Inā faalogo ia ma ia malamalama:+ 11 E lē leaga se tagata i mea e ʻai ai; ae e faaleagaina o ia i mea e sau mai i lona fofoga.”+

12 Ona ō mai ai lea o le ʻausoo iā te ia ma faapea mai: “Pe e te silafia ua lē malilie* le ʻau Faresaio i au fetalaiga?”+ 13 Ona ia tali atu lea: “O laau uma e leʻi totōina e loʻu Tamā o i le lagi, e liaʻieseina.+ 14 Tuu ai pea i latou. Auā o i latou o taʻitaʻi tauaso. Afai e taʻitaʻi e le tauaso le isi tauaso, e paʻuʻū uma i laʻua i le lua.”+ 15 Ona tali mai lea o Peteru iā te ia: “Ia e faamalamalama mai le talafaatusa iā i matou.”+ 16 Ona ia fetalai atu lea: “Pe e tou te leʻi malamalama lava?+ 17 Pe e tou te lē iloa ea, o meaʻai uma e alu atu i le fofoga, e ui atu i le manava ma toe alu atu i fafo?* 18 Ae peitaʻi, o mea e sau mai i le gutu e sau lea mai i le loto, ma o mea na e leaga ai le tagata.+ 19 Auā e sau mai i le loto o mafaufauga leaga,+ o le fasioti tagata, mulilua, faitaaga, gaoi, molimau pepelo, ma upuleaga.*+ 20 O mea na e leaga ai le tagata; ae e lē leaga se tagata pe a ʻai ae lē fafanoina ona lima.”+

21 Ua tuua e Iesu lea nofoaga, ae maliu atu i ni vaega o Turo ma Saitonu.+ 22 Faauta! Ua sau se fafine Foinie*+ mai i na vaipanoa ma alaga mai: “Le Alii e, le Atalii o Tavita, ia e alofa* mai iā te aʻu.+ Ua matuā temonia lava laʻu tama teine.” 23 Ae e leʻi tali atu o ia i le fafine. Ona ō mai lea o ona soo ma talosaga mai iā te ia: “Ia fai i ai e alu, auā ua fai o ia ma faalavelave iā i tatou.” 24 Ua tali atu o ia e faapea: “E leʻi auina mai aʻu i nisi, ae na o mamoe o le aiga o Isaraelu ua leiloloa.”+ 25 Ua faalatalata mai le fafine, ua tootuli ma faapea mai iā te ia: “Le Alii e, ia e fesoasoani mai iā te aʻu!”+ 26 Ua tali atu o ia: “E lē tatau ona lafo falaoa a tamaiti i tamaʻi taʻifau.” 27 Ua faapea mai le fafine: “E saʻo lava oe le Alii e, a o le mea moni, e ʻai e tamaʻi taʻifau fasi falaoa e paʻuʻū mai i laulau a o latou matai.”+ 28 Ona tali atu lea o Iesu iā te ia: “Tinā e, maʻeu le malosi o lou faatuatua, ia taunuu e pei ona e moomoo i ai.” Ona mālōlō ai lea o lana tama teine i le taimi lava lenā.+

29 Ua agaʻi atu o ia i le isi itu o le nuu, ma ui ane e latalata i le sami* o Kalilaia,+ ona maliu aʻe lea o ia i luga o le mauga,+ ma nofo ai i lalo. 30 Ona ō mai lea o le motu o tagata e toʻatele iā te ia, ua aumai tagata pipili, mumutu, tauaso, gūgū ma isi lava maʻi eseese, ma faavave lava ona tuu atu i latou i ona vae, ma ia faamālōlōina i latou.+ 31 Ona matuā ofo ai lea o le motu o tagata auā ua latou vāai ua tautatala o ē e gūgū, ua savavali pipili, ua pupula foʻi tauaso, ma ua latou faamamaluina le Atua o Isaraelu.+

32 Ua valaau atu Iesu i ona soo ma faapea atu:+ “Ua ou alofa+ tele i le motu o tagata, ona ua atoa aso e tolu o latou faatasi ma aʻu, ae e leai ni a latou meaʻai. Ou te lē manaʻo e tuu atu i latou e ō ae e leʻi aai, ina neʻi matapogia i latou i le auala.” 33 A ua fai mai le ʻausoo iā te ia: “O fea e tatou te maua mai ai ni falaoa e tele i lenei nofoaga tuufua, e maoona ai lenei motu o tagata e toʻatele?”+ 34 Ona fetalai atu lea o Iesu iā i latou: “E fia ni falaoa o iā te outou?” Ua latou tali mai: “E fitu, ma nai tamaʻi iʻa.” 35 Ina ua uma ona faatonuina le motu o tagata e taooto i lalo, 36 ona tago ai lea o ia i falaoa e fitu ma iʻa, ua fai le faafetai, ona ia vaevae lea ma tuu atu i le ʻausoo, ona tufatufa atu lea e le ʻausoo i le motu o tagata.+ 37 Ua aai i latou uma ma ua maoona, ona latou faaputu lea o meaʻai ua totoe, ma ua tutumu ai ato tetele e fitu.+ 38 E toʻafā afe tane na aai ai, ae e leʻi faitauina ai fafine ma tamaiti. 39 Ina ua uma, ona ia tuuina atu lea o le motu o tagata e ō, ona maliu atu lea o ia i le vaa ma agaʻi atu i vaipanoa o Makatala.+