O le Tusi Lona Lua o Tupu

10 Sa i Samaria atalii e toʻa 70 o Aapo.+ O lea, na tusia ai e Ie‘u ni tusi ma aauina atu i Samaria i alii o Isereelu, i toeaina,+ ma ē na tausia fanau a Aapo,* e faapea: 2 “O lenei, pe a oo atu lenei tusi iā te outou, o loo iā te outou atalii o lo outou alii, faapea foʻi kariota tau, o solofanua, o le aai malupuipuia, ma auupega. 3 Ia outou filifili po o ai e sili ona lelei ma sili ona talafeagai* mai i atalii o lo outou alii, ma faanofo o ia i le nofoālii o lona tamā. Ia outou tau foʻi mo le aiga o lo outou alii.”

4 Ae ua matuā fefefe i latou ma faapea ane: “Faauta! Afai e leʻi mafai ona faasagatau atu tupu e toʻalua iā te ia,+ pe faapefea la ona tatou faasagatau atu iā te ia?” 5 Ona aauina atu lea e lē na vaavaaia le maota o le tupu, ma lē na pule i le aai, ma toeaina, ma ē na tausia fanau a Aapo, o se feʻau iā Ieʻu e faapea: “O i matou o au auauna, ma e matou te faia mea uma e te fai mai ai. E matou te lē faia se tasi ma tupu. A o le mea e lelei iā te oe, ia e faia lea.”

6 Ona ia tusia lea o le tusi lona lua, ua faapea atu: “Afai e tou te ʻau ma aʻu ma lotomalilie e usiusitaʻi iā te aʻu, ia outou aumai ulu o atalii o lo outou alii, ma ō mai iā te aʻu i le taimi faapenei i le aso a taeao i Isereelu.”

Ua faatasi foʻi atalii o le tupu e toʻa 70 ma tagata tāua o le aai, o ē na tausia aʻe i latou. 7 Ina ua oo atu le tusi iā i latou, ona latou ave lea o atalii o le tupu ma fasiotia i latou, o tane e toʻa 70,+ ona tuu lea o o latou ulu i ato, ma aauina atu iā Ieʻu i Isereelu. 8 Ua sau le avefeʻau ma taʻu mai iā Ieʻu, e faapea: “Ua latou aumaia ulu o atalii o le tupu.” Ona ia fai atu lea: “Ia outou tuu i ni faaputuga se lua i le faitotoʻa o le pā o le aai, seʻia oo i le taeao.” 9 Ua oo i le taeao, ona alu lea o ia i fafo. Ua tū o ia ma fai atu i le nuu uma: “O outou o tagata amiotonu. A o aʻu, na ou foua loʻu alii ma na ou fasiotia o ia;+ ae o ai na fasiotia nei tagata uma? 10 Ia outou iloa, e leai se afioga a Ieova e lē faataunuuina,*+ o afioga uma na fetalai ai Ieova e faatatau i le aiga o Aapo; ma ua faia e Ieova le mea na ia fetalai mai ai e ala i lana auauna o Elia.”+ 11 Ona alu lea o Ieʻu ma fasiotia i latou uma na totoe o le aiga o Aapo i Isereelu, o ona tagata tāua uma, o ē e masani ai, ma ana ositaulaga,+ seʻia leai se tasi e totoe o lona aiga.+

12 Ua tulaʻi o ia ma alu atu i lona ala i Samaria. Sa iai fo‘i i le ala le fale e sele ai fulufulu o mamoe a leoleo mamoe. 13 Ua fetaui Ieʻu i inā ma uso o Aasaia+ le tupu o Iuta. Ua ia fai atu iā i latou, “O ai outou?” Ua latou fai mai: “O i matou o uso o Aasaia, ma o loo matou ō ifo e fesili atu po o lelei mea uma e tusa ai ma atalii o le tupu, ma le fanau tama a le masiofo.” 14 Ona fai atu loa lea o ia: “Ia pupuʻe ola i latou!” Ona latou pupuʻe ola lea o i latou ma fasiotia i le vaieli i le fale e sele ai fulufulu o mamoe, e toʻa 42 tane, e na te leʻi faatotoeina foʻi se tasi o i latou.+

15 A o alu ese o ia mai i inā, ona la fetaui lea ma Ionatapa+ le atalii o Rakapa+ o sau e faafetaui o ia. Ina ua ia faafeiloa‘i* iā te ia, na faapea atu Ieʻu iā te ia: “Po o atoatoa* lou loto iā te aʻu, e pei ona atoatoa o loʻu loto iā te oe?”

Ua tali mai Ionatapa: “O lea lava.”

“Afai o lea, tuu mai lou lima iā te aʻu.”

Ona ia tuu atu lea o lona lima, ma ua toso aʻe o ia e Ieʻu i le kariota, ua faatasi ma ia. 16 Ua ia fai atu: “Inā ta ō ia faatasi ma aʻu, ina ia e iloa ai loʻu lē faapalepale i ē e tetee iā* Ieova.”+ Ona tiʻetiʻe ai lea o Ionatapa faatasi ma ia i le kariota tau a Ieʻu. 17 Ona alu atu lea o ia i Samaria ma fasia i latou uma na totoe o le aiga o Aapo i Samaria, seʻia faaumatia ai i latou+ e tusa ma le afioga a Ieova na ia fetalai mai ai iā Elia.+

18 Ua faapotopoto faatasi foʻi e Ieʻu le nuu uma, ua faapea atu iā i latou: “E laʻitiiti le tapuaʻiga a Aapo iā Paala.+ A o Ieʻu, e matuā tele lana tapuaʻiga iā te ia. 19 O lenei, ia valaau atu i perofeta uma a Paala,+ o ona tagata tapuaʻi uma, ma ona ositaulaga uma+ e ō mai iā te aʻu. Aua lava neʻi iai se isi e lē sau, auā o le a ou faia se taulaga tele iā Paala. O le tagata e lē sau, e lē ola.” Ae ua faia e Ieʻu se togafiti, ina ia faaumatia ai tagata tapuaʻi o Paala.

20 Ua fai atu Ieʻu: “Ia talaʻi atu se fonotaga paia mo Paala.” Ona latou talaʻi atu lea. 21 Ona auina atu lea e Ieʻu i Isaraelu uma o se feʻau, ina ia ō mai tagata tapuaʻi uma o Paala. E leai foʻi se tasi na totoe e leʻi sau. Ua latou ō mai i le malumalu o Paala,+ ma ua matuā faatumulia tulimanu uma o le malumalu. 22 Ona ia fai atu lea i lē na vaaia le potu e tuu ai ofu: “Ia aumai ni ofu mo tagata tapuaʻi uma o Paala.” Ona ia aumaia lea o ofu mo i latou. 23 Ona ulufale atu lea o Ieʻu ma Ionatapa+ le atalii o Rakapa i le malumalu o Paala. Ua ia fai atu i tagata tapuaʻi uma o Paala: “Ia saʻili lelei ma vaai pe e lē o iai se tagata tapuaʻi o Ieova iā te outou, ae na o tagata tapuaʻi lava o Paala.” 24 Mulimuli ane, ua latou ō mai i totonu e fai taulaga ma taulaga mū. Ua tuu e Ieʻu ona tagata e toʻa 80 i fafo, ma faapea atu: “O se tasi e sola ese mai i tagata ua ou tuuina atu i o outou lima, e suia o ia i se tasi o outou.”

25 Ina ua uma ona ia faia le taulaga mū, ona fai atu loa lea o Ieʻu i leoleo* ma auauna: “Inā ō mai ia i totonu ma fasiotia i latou! Aua lava neʻi sola se tasi.”+ Ona fasia lea o i latou i le pelu e leoleo ma auauna, ua oo atu lava i le potu pito i totonu* o le malumalu o Paala, ma ua lafo o latou tino oti i fafo. 26 Ona latou aumai lea i fafo o poutū paia+ o le malumalu o Paala, ma susunu uma.+ 27 Ua latou talepe i lalo poutū paia+ o Paala, ma talepe le malumalu o Paala,+ ua latou faatū foʻi e fai ma faleese, seʻia oo mai i le aso nei.

28 O lea, ua tafiesea ai e Ieʻu Paala mai i Isaraelu. 29 Peita‘i, e leʻi liliuese Ieʻu mai i agasala a Ierepoamo le atalii o Nepata, lea na ia faapogaia ai Isaraelu e agasala, e tusa ai o tamaʻi povi poʻa auro ia sa iai i Peteli ma Tanu.+ 30 Ona fetalai mai lea o Ieova iā Ieʻu: “Talu ai sa e faia le mea ua tonu i oʻu luma, e ala i le faataunuuina o mea uma na i loʻu loto e faia i le aiga o Aapo,+ o le a nonofo ai ou atalii i le nofoālii o Isaraelu, e oo atu lava i lona fā o tupulaga.”+ 31 Ae e leʻi savali Ieʻu i le Tulafono a Ieova le Atua o Isaraelu ma lona lotoatoa.+ E leʻi liliuese foʻi o ia mai agasala a Ierepoamo, lea na ia faapogaia ai Isaraelu e agasala.+

32 I na aso, na amata faaitiitia ai e Ieova Isaraelu. Na faaauau fo‘i ona osofa‘ia e Asaeli i latou i le laueleele uma o Isaraelu,+ 33 e amata mai i Ioritana e agaʻi atu i le itu i sasa‘e, o le nuu uma o Kiliata, lea e nonofo ai ituaiga o Kato, o Reupena, ma Manase.+ E aofia ai le vaipanoa mai i Aroeru, lea e i tafatafa o le vanu o Arinona,* e oo atu i Kiliata ma Vasana.+

34 A o le olaga uma o Ieʻu, o mea uma na ia faia, ma lona malosi uma, po ua lē o tusia ea i le tusi o le talafaasolopito o tupu o Isaraelu? 35 Ona taoto lea o Ieʻu faatasi ma ona augātamā, ma ua latou tanu o ia i Samaria; ona avea lea o Ioasasa+ lona atalii ma tupu e sui iā te ia. 36 O le umi* na pule ai Ieʻu i Isaraelu mai i Samaria, e 28 tausaga.