O le Tusi Lona Lua o Nofoaiga a Tupu

33 E 12 tausaga o Manase+ ina ua fai o ia ma tupu, ma na pule o ia mai i Ierusalema i tausaga e 55.+

2 Na ia faia mea leaga i le silafaga a Ieova, e tusa ma mea inosia na faia e nuu ese na tuliesea e Ieova mai i luma o le fanauga a Isaraelu.+ 3 Na toe faia e ia o mea maualuluga na lepetia e Esekia lona tamā,+ na ia faatūina foʻi fata faitaulaga iā Paala, ma faia pou paia,* ua ifo foʻi o ia i ʻau uma o le lagi ma auauna i ai.+ 4 Ua ia faia fata faitaulaga i atua sesē i le fale o Ieova,+ lea na fetalai ai Ieova e faapea: “E iai loʻu igoa i Ierusalema e faavavau.”+ 5 Ua ia faia foʻi fata faitaulaga i ʻau uma o le lagi i lotoā e lua o le fale o Ieova.+ 6 Ua ia faaui ane foʻi ona atalii i le afi+ i le vanu o Hinoma;*+ na ia faia faiga faaagaga,+ o valovaloga faataulāitu, o togafiti faataulāitu, ma ua ia tofia taulāitu ma ē e vavalo i mea e tutupu.+ E matuā tele lava mea leaga na ia faia i le silafaga a Ieova e faatigā ai iā te ia.

7 Ua ia tuu foʻi le faatusa ua tā na ia faia i totonu o le fale o le Atua moni,+ lea na fetalai ai le Atua iā Tavita ma Solomona lona atalii e faapea: “O lenei fale ma Ierusalema, ua ou filifilia mai i ituaiga uma o Isaraelu, ou te tuu ai loʻu igoa i aso uma lava.+ 8 Ou te lē toe tuliesea foʻi Isaraelu mai i le laueleele na ou tofia i o latou augātamā, pe afai e latou te faia e tusa ma mea uma na ou poloaʻi atu ai iā i latou, o le Tulafono uma, o poloaʻiga, ma iʻuga o faamasinoga na ou avatu e ala atu iā Mose.” 9 Ae ua taʻitaʻisesēina pea Iuta ma tagata e nonofo i Ierusalema e Manase, ma faapogaia ai i latou ina ia faia mea leaga e sili atu nai lo o nuu na faaumatia e Ieova, mai i luma o le fanauga a Isaraelu.+

10 Na fetalai mai pea Ieova iā Manase ma lona nuu, ae e leʻi faalogo i latou.+ 11 Ona aumaia lea e Ieova o taʻitaʻi o le ʻautau a le tupu o Asuria e faasagatau mai iā i latou. Ua puʻeina Manase e Asuria a o lafi o ia i se lua i papa, ua latou saisai o ia i faamau ʻapamemea e lua, ma ave i Papelonia. 12 Ina ua mafatia o ia, ona ia ʻaiʻoi atu lea ina ia maua le finagalo malie o Ieova lona Atua, ma ua matuā faamaulalo pea o ia i luma o le Atua o ona augātamā. 13 Ua ia tatalo atu pea iā te Ia, ona faafofoga mai lea o Ia i lana ʻaiʻoi atu ma lana talosaga ina ia maua Lona finagalo malie, ma ua Ia toe faafoʻisia o ia i Ierusalema i lona tofi o le tupu.+ Ona iloa ai lea e Manase o Ieova o le Atua moni.+

14 Ua mavae lenei mea, ona ia fausia lea o se pā e matuā maualuga lava i tua o le Aai a Tavita,+ i le itu i sisifo o Kiona+ lea o loo i le vanu,* e oo atu lava i le Faitotoʻa o Iʻa.+ Ua alu atu le pā ma faataamilo i Ofele.+ Ua ia tofia fo‘i ta‘ita‘i o le ʻautau i aai malupuipuia uma o Iuta. 15 Ona ia aveesea lea o atua ese ma le faatusa o le tupua mai i le fale o Ieova,+ ma fata faitaulaga uma na ia faia i le mauga o le fale o Ieova+ ma Ierusalema, ona ia lafoaʻi lea i tua o le aai. 16 Ua ia saunia foʻi le fata faitaulaga a Ieova+ ma faia ai i luga taulaga faifaatasi,+ ma taulaga faafetai,+ ma fai atu iā Iuta ina ia auauna iā Ieova le Atua o Isaraelu. 17 Peitaʻi, ua faia pea e le nuu taulaga i luga o mea maualuluga, e ui e na o Ieova lo latou Atua ua latou fai taulaga i ai.

18 A o le olaga uma o Manase, o lana tatalo i lona Atua, ma upu a ē e vaaia faaaliga na tautatala atu iā te ia i le suafa o Ieova le Atua o Isaraelu, ua tusia ia i le talafaasolopito o tupu o Isaraelu. 19 O lana tatalo+ foʻi ma le auala na talia ai lana ʻaiʻoiga, o ana agasala uma ma lona lē faamaoni,+ o nofoaga uma na ia fausia ai mea maualuluga ma faatutū ai pou paia*+ ma faatusa ua tā a o leʻi faamaulalo o ia, ua tusia ia i upu a ona tagata e vaaia faaaliga. 20 Ona taoto lea o Manase faatasi ma ona augātamā, ma ua latou tanu o ia i lona fale; ae ua avea lona atalii o Amone ma tupu e sui iā te ia.+

21 E 22 tausaga o Amone+ ina ua fai o ia ma tupu, ma e lua tausaga na ia pule ai mai i Ierusalema.+ 22 Na ia faia pea mea leaga i le silafaga a Ieova, e pei ona sa faia e Manase lona tamā;+ ua fai taulaga foʻi Amone i faatusa uma ua tā na faia e Manase lona tamā,+ ma ua ia auauna pea i ai. 23 Ae e leʻi faamaulalo Amone i luma o Ieova+ e pei ona faamaulalo o lona tamā o Manase;+ ae ua faateleina e Amone ana agasala. 24 Mulimuli ane, ona fouvale lea o ana auauna iā te ia,+ ma fasiotia o ia i lona lava fale. 25 Ae ua fasiotia e tagata o le nuu ē uma na fouvale i le tupu o Amone,+ ma latou faia Iosia+ lona atalii ma tupu e sui iā te ia.