Esera

3 Ina ua oo i le masina lona fitu+ ma ua iai le fanauga a Isaraelu* i o latou aai, ona latou faapotopoto lea ma le lotogatasi i Ierusalema. 2 Ua tulaʻi Iesua+ le atalii o Iosatako, o ona uso o le ʻauositaulaga, o Serupapelu+ le atalii o Salatielu+ ma ona uso, ua latou fauina le fata faitaulaga o le Atua o Isaraelu, ina ia mafai ai ona latou fai ai taulaga mū, e tusa ma le mea ua tusia i le Tulafono a Mose+ le tagata o le Atua moni.

3 Ua latou faatūina le fata faitaulaga i luga o lona tulaga sa iai, e ui i lo latou matataʻu i tagata o nuu o loo si‘omia ai i latou,+ ma ua latou ofoina atu ai taulaga mū iā Ieova, o taulaga mū o le taeao ma le afiafi.+ 4 Ua latou faia le Tausamiga o Fale Lauvao* e tusa ma mea ua tusia,+ ma ua latou faia taulaga mū i lea aso ma lea aso, e tusa ai ma le aofaʻiga o taulaga mū e tatau ona faia i aso taʻitasi.+ 5 Mulimuli ane, ona latou faia lea o taulaga mū+ masani, o taulaga o masina faatoʻā vaaia,+ o taulaga o tausamiga uma ua faapaiaina+ a Ieova, ma taulaga tauofo+ a tagata uma na lotomalilie e foaʻi atu iā Ieova. 6 Ua latou amata ofo atu taulaga mū iā Ieova mai i le uluaʻi aso o le masina lona fitu,+ e ui e leʻi faataatiaina le faavae o le malumalu o Ieova.

7 Ua latou avatu tupe i tagata tipi maa+ ma tufuga,+ faapea meaʻai, o vai ma suāuu i tagata Saitonu ma tagata Turo, ona o le aumaia o laupapa arasi mai i Lepanona aga‘i i Iopa,+ e ala mai i le sami, e tusa ma le faatagaga na avatu e Kuresa le tupu o Peresia+ iā i latou.

8 I le tausaga lona lua talu ona latou ō mai i le fale o le Atua moni i Ierusalema, i le masina lona lua, na amata ai le galuega e Serupapelu le atalii o Salatielu, o Iesua le atalii o Iosatako, ma ē ua totoe o o latou uso, o le ʻauositaulaga ma le ʻau sa Levī, ma i latou uma na ō mai i Ierusalema, o ē na aveina faapagota;+ ua latou tofia le ʻau sa Levī, e amata mai i ē e taʻi 20 tausaga ma matutua atu, ina ia auauna o ni ē e vaavaaia le galuega o le fale o Ieova. 9 Ona ‘au faatasi lea o Iesua, o ona atalii ma ona uso, o Katameeli ma ona atalii, o atalii ia o Iuta, faapea atalii o Henatati,+ o o latou atalii, ma o latou uso o le ʻau sa Levī, ina ia latou vaavaaia ē e faia le galuega i le fale o le Atua moni.

10 Ina ua uma ona faataatia e le ʻaukamuta le faavae o le malumalu o Ieova,+ ona tutulaʻi lea o ositaulaga o loo fai o latou ofu o le malumalu ma o loo iai a latou pū,+ ua tutulaʻi foʻi le ʻau sa Levī, o atalii ia o Asafo faatasi ma sumepalo,* ua latou vivii atu iā Ieova e tusa ai ma faatulagaga na faia e Tavita le tupu o Isaraelu.+ 11 Ona latou pepese fetaliaʻi+ lea i viiga ma faafetai iā Ieova, “auā e lelei o ia; e tumau e faavavau lona alofa faamaoni iā Isaraelu.”+ Ua alalaga foʻi le nuu uma i le alaga leotele i viiga iā Ieova, ona ua uma ona faataatia le faavae o le fale o Ieova. 12 O le toʻatele o le ʻauositaulaga, o le ʻau sa Levī ma alii sili o aiga o o latou tamā, o toeaina ia na vāai i le fale muamua,+ ua fetagisi leotetele ina ua latou vāai atu ua faataatia le faavae o lenei fale, a o alalaga leotetele le toʻatele o isi ona o le olioli.+ 13 Ua lē iloa e le nuu le eseesega o le leo o le alaga fiafia mai i le leo o le fetagisi, auā ua alalaga leotetele le nuu, ma ua lagona atu foʻi mai i se mea mamao.