Esera

6 Ona faia lea e le tupu o Tariu o se faatonuga, ma ua latou faia ai se suʻesuʻega i le fale o faamaumauga, lea na tuuina ai oloa i Papelonia. 2 Ona maua lea o se tusi tāʻai i le nofoaga malupuipuia i Akemeta, i le itumalo o Metai, ma o upu faamanatu nei na tusia ai:

3 “I le tausaga muamua o le tupu o Kuresa, na avatu ai se faatonuga e le tupu o Kuresa e faatatau i le fale o le Atua i Ierusalema:+ ʻIa toe fausia le fale e fai ma mea e latou te ofo atu ai taulaga, ma ia matuā faamausalīina ona faavae, o lona maualuga e 60 kupita,* o lona lautele foʻi e 60 kupita,+ 4 ia faia ni atu maa tetele se tolu ma se atu laupapa e tasi;+ ma ia tuuina atu le tupe e totogi ai mai i le fale o le tupu.+ 5 O mea auro foʻi ma mea siliva o le fale o le Atua na aveese e Nepukanesa mai i le malumalu sa i Ierusalema, ma ave i Papelonia,+ ia toe faafoʻi atu ina ia tuu i o latou tulaga i le malumalu o loo i Ierusalema, ma ia tuu ai i le fale o le Atua.’+

6 “O lenei, Tatenai e, le kovana o le vaipanoa i tala atu o le vaitafe,* ma Setara-posenai e, ma a oulua aumea, o isi kovana ia o le vaipanoa i tala atu o le vaitafe,+ ia outou taumamao ese mai i inā. 7 Tuu ai pea le galuega o le fale o le Atua. O le a toe fausia e le kovana o Iutaia ma toeaina o Iutaia le fale lenā o le Atua i lona tulaga na iai. 8 E lē gata i lea, ou te tuuina atu se faatonuga i le mea e tou te faia mo nei toeaina o Iutaia, auā le toe fausiaina o le fale lenā o le Atua: E mai i oloa a le tupu,+ o lafoga ia e aoina mai i le vaipanoa i tala atu o le vaitafe, ia vave ona totogi ai nei tane ina neʻi taofia le galuega.+ 9 O so o se mea foʻi e manaʻomia, o tamaʻi povi poʻa,+ o mamoe poʻa+ faapea tamaʻi mamoe+ mo taulaga mū i le Atua o le lagi, o saito,+ o masima,+ o uaina,+ ma suāuu,+ e pei ona fai mai ai le ʻauositaulaga o loo i Ierusalema, ia tuuina atu pea na mea i lea aso ma lea aso ma ia aua neʻi misia, 10 ina ia latou faia ai pea taulaga e finagalo malie i ai le Atua o le lagi, ma tatalo ina ia faafualoa le soifua o le tupu ma ona atalii.+ 11 Ua ou tuuina atu foʻi le faatonuga e faapea, o se tasi e na te solia lenei poloaʻiga, ia aumai se laau mai i lona fale ma ia sisi a‘e o ia ma faamau i luga o le laau,* ma ia faia foʻi lona fale ma faleese o tagata uma* ona o lenei mea. 12 Ia faatoʻilalo foʻi e le Atua o lē na tuuina lona suafa i lona fale,+ o so o se tupu po o tagata e lē usita‘ia lenei poloa‘iga ma taumafai e faaleagaina lenā fale o le Atua, o loo i Ierusalema. O aʻu o Tariu, ua ou tuuina atu lenei faatonuga. Ia faia lava e aunoa ma le faatuai.”

13 Ona faavave lea ona faia e Tatenai le kovana o le vaipanoa i tala atu o le vaitafe, o Setara-posenai+ ma a la aumea, o mea uma na poloaʻi mai ai le tupu o Tariu. 14 Ua faaauau ona faia e toeaina o Iutaia le fale ma ua agaʻigaʻi i luma le galuega,+ ona na faalaeiauina i latou i le valoaga a Hakai+ le perofeta, ma Sakaria+ le atalii o le atalii o Ito; ua latou faamāeʻaina le fale e tusa ai ma le faatonuga a le Atua o Isaraelu,+ ma e tusa ai foʻi ma le faatonuga a Kuresa,+ o Tariu,+ ma Aretaseta+ le tupu o Peresia. 15 Ua latou faamāeʻaina le fale i le aso lona tolu o le masina o Atara,* i le tausaga lona ono o le nofoaiga a le tupu o Tariu.

16 Ona faapaiaina* lea o lenei fale o le Atua ma le olioli tele, e le fanauga a Isaraelu, o le ʻauositaulaga, o le ʻau sa Levī,+ ma isi tagata uma o ē na aveina faapagota. 17 Ua latou avatu foʻi mo le faapaiaga o lenei fale o le Atua, o povi poʻa e 100, o mamoe poʻa e 200, o tamaʻi mamoe e 400, ma ʻoti poʻa e 12 mo le taulaga o agasala a Isaraelu uma, e tusa ma le aofaʻiga o ituaiga o Isaraelu.+ 18 Ua latou tofia foʻi le ʻauositaulaga i o latou vaega ma le ʻau sa Levī i o latou vaega, mo le auaunaga a le Atua i Ierusalema,+ e tusa ai ma le mea ua tusia i le tusi a Mose.+

19 Ona faia lea o le Paseka i le aso lona 14 o le masina muamua,+ e tagata na aveina faapagota. 20 Ua faamamāina e le ʻauositaulaga ma le ʻau sa Levī i latou lava,+ ma ua mamā i latou uma; na latou fasia manu o le Paseka mo ē uma na aveina faapagota, o o latou uso o le ʻauositaulaga, faapea ma i latou lava. 21 Ona aai ai lea o le fanauga a Isaraelu o ē na toe foʻi mai i le aveina faapagota, ma i latou uma na faatasi ma i latou, o ē na vavaeese mai i amioga lē mamā a isi atunuu, ina ia tapuaʻi atu* iā Ieova le Atua o Isaraelu.+ 22 Ua latou faamanatuina foʻi ma le olioli le Tausamiga o Falaoa e Lē Faafefeteina+ mo aso e fitu, auā na faapogaia e Ieova lo latou olioli, ma ua ia uunaʻia le loto o le tupu o Asuria ina ia fiafia iā i latou,+ ma ua ia lagolagoina ai i latou* i le galuega o le fale o le Atua moni, o le Atua o Isaraelu.