Levitiko

12 Ua toe fetalai mai Ieova iā Mose: 2 “Ia e fai atu i le fanauga a Isaraelu, ‘Afai e tō* se fafine ma fanau mai se tama tama, e lē mamā o ia mo aso e fitu, e pei o aso e lē mamā ai pe a fai lona maʻi masina.+ 3 E peritomeina le tama i le paʻu o lona tino i le aso lona valu.+ 4 E faaauau ona ia faamamāina o ia mai i le toto mo le isi 33 aso. E lē tatau ona ia paʻi i se mea paia, pe ulufale atu i le mea paia seʻia atoa aso o lona faamamāina.

5 “‘Afai e fanau mai e ia se tama teine, e lē mamā o ia i aso e 14, e pei o le taimi o lona maʻi masina. E faaauau ona ia faamamāina o ia mai i le toto mo le isi 66 aso. 6 Pe a atoa aso o lona faamamāina mo lana tama tama po o lana tama teine, e na te aumaia i le ositaulaga o se tamaʻi mamoe poʻa, e faatoʻā atoa le tausaga mo le taulaga mū+ ma se tamaʻi lupe po o se manutagi, mo le taulaga o agasala i le faitotoʻa o le faleʻie o le feiloaʻiga. 7 E avatu e le ositaulaga le taulaga i luma o Ieova ma fai le togisala mo ia, ina ia mamā ai o ia mai i lona punatoto. O le tulafono lenei e faatatau i le fafine e fanaua se tama tama po o se tama teine. 8 Ae afai e na te lē gafatia se mamoe, e ao ona ia aumai ni manutagi se lua po o ni tamaʻi lupe se lua,+ e tasi mo le taulaga mū ma le tasi mo le taulaga o agasala, e fai e le ositaulaga le togisala mo ia, ona mamā ai lea o ia.’”