Levitiko

7 “‘O le tulafono lenei i le taulaga o le nofosala:+ O se mea e sili ona paia. 2 O le a latou fasi le taulaga o le nofosala i le nofoaga e fasi ai taulaga mū, ma e sausau lona toto+ i itu uma o le fata faitaulaga.+ 3 E na te aumaia ona gaʻo uma,+ e aofia ai le siʻusiʻu gaʻoa, le gaʻo e ufiufi ai gaʻau, 4 ma fatugaʻo e lua ma le gaʻo i luga o na mea e lata i suilapalapa. E na te aveesea foʻi gaʻo o le ate faatasi ma fatugaʻo.+ 5 E susunu e le ositaulaga na mea i luga o le fata faitaulaga o se taulaga iā Ieova ua faia i le afi.+ O le taulaga lea o le nofosala. 6 E aai ai tane uma ua fai ma ositaulaga,+ ma e ‘aina i se nofoaga paia. O a latou tufaaga o ni mea e sili ona paia.+ 7 O le tulafono mo le taulaga o agasala, e faatatau atu fo‘i i le taulaga o le nofosala; o le aano o le manu e fai ai le taulaga, e fai lea mo le ositaulaga e faia le togisala.+

8 “‘O le ositaulaga e faia le taulaga mū a se tagata, e fai mo ia le paʻu o le manu+ lea ua aumaia i le ositaulaga e fai ai le taulaga mū.

9 “‘O taulaga uma i meaʻai ua tao i le ogaumu, pe faia i se ulo po o se uʻamea mafolafola,+ e faia ia mea mo le ositaulaga o lē e faia le taulaga. E fai mo ia nei mea.+ 10 A o taulaga i meaʻai ua iai sina suāuu+ pe mātūtū foʻi,+ o le a fai ia mo atalii uma o Arona; e vaevae tutusa iā i latou ta‘ito‘atasi.

11 “‘O le tulafono lenei i le taulaga faifaatasi+ e aumaia e se tasi iā Ieova: 12 Afai e na te aumaia le taulaga e faaalia ai le faafetai,+ e ao la ona ia aumaia faatasi ma le taulaga o le faafetai, o falaoa lapotopoto lē faafefeteina ua iai sina suāuu, ma falaoa manifinifi lē faafefeteina ua nini i le suāuu, ma falaoa lapotopoto ua fai mai i le falaoamata lelei, ua lelei ona palu ma liligi i ai le suāuu. 13 E na te avatu lana taulaga faatasi ma falaoa lapotopoto ua faafefeteina, atoa ma le taulaga faafetai o ana taulaga faifaatasi. 14 E ao ona ia aumaia mai i lana taulaga o mea taʻitasi e fai ma tufaaga paia iā Ieova; e fai ia mea mo le ositaulaga na te sausauina le toto o taulaga faifaatasi.+ 15 E ʻai uma le aano o le manu o le taulaga faafetai o ana taulaga faifaatasi, i le aso lava e faia ai lana taulaga. Aua lava neʻi teua se mea seʻia oo i le taeao.+

16 “‘Afai o le taulaga ua ia ofoina atu o se tautoga+ po o se taulaga tauofo,+ ia ʻaina lea taulaga i le aso e faia ai lana taulaga, ma e mafai foʻi ona ʻaina mea e totoe i le aso e sosoo ai. 17 A o mea e totoe o le aano o le taulaga i le aso lona tolu, e susunuina i le afi.+ 18 Peitaʻi, pe afai e ʻaina lava sina aano o le taulaga faifaatasi i le aso lona tolu, o lē e aumaia le taulaga o le a lē finagalo malie i ai le Atua. E lē aogā lana taulaga iā te ia; e avea ma mea inosia, ma e tali atu lē na ʻaina sina aano ona o lana agasala.+ 19 Aua neʻi ʻaina le aano e paʻi i se mea lē mamā. E susunu i le afi. O ē uma e mamā e aai i le aano mamā.

20 “‘Ae o so o se tagata e lē mamā e ʻaina le aano o le taulaga faifaatasi lea e avatu iā Ieova, o le a fasiotia lava o ia.+ 21 Afai e paʻi se tasi i se mea lē mamā, e tusa po o se mea e lē mamā ai se tagata,+ po o se manu lē mamā,+ po o so o se mea lē mamā e inosia,+ ma ua ia ʻai i sina aano o le taulaga faifaatasi lea e avatu mo Ieova, e fasiotia lea tagata.’”

22 Ua toe fetalai mai Ieova iā Mose e faapea: 23 “Ia fai atu i le fanauga a Isaraelu, ‘Aua neʻi outou aai i le gaʻo+ o le povi, po o se tamaʻi mamoe poʻa, po o se ʻoti. 24 E mafai ona faaaogā le gaʻo o le tino o le manu ua mate ma le gaʻo o se manu ua saeia e se isi manu mo se isi lava fuafuaga, ae aua lava tou te aai ai.+ 25 Auā o so o se tasi e ʻai i le gaʻo o le manu lea e ofo atu o le taulaga iā Ieova ua faia i le afi, e fasiotia lea tagata.

26 “‘Aua neʻi outou aai i le toto+ i so o se nofoaga tou te nonofo ai, e tusa lava po o le toto o manufelelei po o le toto o manu. 27 O so o se tasi e ʻai i le toto, e fasiotia lea tagata.’”+

28 Ua fetalai mai pea Ieova iā Mose e faapea: 29 “Ia fai atu i le fanauga a Isaraelu, ‘O lē na te avatua lana taulaga faifaatasi iā Ieova, e na te aumaia lana taulaga iā Ieova mai i lana taulaga faifaatasi.+ 30 E na te aumaia i ona lava lima le gaʻo+ faatasi ma le fatafata o le taulaga iā Ieova ua faia i le afi, ma e na te lūlū i le isi itu ma le isi itu, e fai ma taulaga lūlū+ i luma o Ieova. 31 E susunu e le ositaulaga le gaʻo i luga o le fata faitaulaga,+ ae e fai mo Arona ma ona atalii le fatafata.+

32 “‘Ia outou avatu le alagavae taumatau i le ositaulaga, o le tufaaga paia mai i a outou taulaga faifaatasi.+ 33 O le atalii o Arona o lē e avatua le toto o taulaga faifaatasi ma le gaʻo, e fai mo ia le alagavae taumatau, o lana tufaaga lea.+ 34 Ou te aumaia le fatafata o le taulaga lūlū, ma le alagavae o le tufaaga paia mai i taulaga faifaatasi a le fanauga a Isaraelu, ma ou te avatua na mea iā Arona le ositaulaga ma ona atalii, e fai ma tuutuuga tumau mo le fanauga a Isaraelu.+

35 “‘O le tufaaga lenei mai i taulaga iā Ieova ua faia i le afi e tuuesea mo ositaulaga, o Arona ma ona atalii, i le aso na ia aumaia ai i latou ina ia auauna o ni ositaulaga iā Ieova.+ 36 Na poloaʻi mai Ieova e avatu iā i latou lenei tufaaga mai i le fanauga a Isaraelu, i le aso na ia faauuina ai i latou.+ O se tulafono tumau lea mo i latou ma o latou tupulaga o loo mulimuli mai.’”

37 O le tulafono lenei i le taulaga mū,+ o le taulaga i meaʻai,+ o le taulaga o agasala,+ o le taulaga o le nofosala,+ o le taulaga o le tofiga,+ ma le taulaga faifaatasi,+ 38 e pei ona poloaʻi mai ai Ieova iā Mose i le mauga o Sinai,+ i le aso na ia poloaʻi mai ai i le fanauga a Isaraelu ia avatu a latou taulaga iā Ieova i le toafa* o Sinai.+