Numera

36 Ona faalatalata mai ai lea o ulu o aiga o ē na tupuga mai iā Kiliata le atalii o Makiro,+ o le atalii o Manase, o aiga o atalii o Iosefa, ma fai mai i luma o Mose, ma taʻitaʻi, o ulu o aiga o le fanauga a Isaraelu. 2 Ua latou faapea mai: “Ua poloaʻi mai Ieova iā te oe lo matou alii, ina ia vaevae le laueleele e ala i le vili+ e fai ma tofi o le fanauga a Isaraelu; ma ua poloaʻia foʻi lo matou alii e Ieova, ina ia tuu atu le tofi o Selofeata lo matou uso i ona afafine.+ 3 Afai e latou te faaipoipo atu i tane mai i se isi ituaiga o le fanauga a Isaraelu, o le a aveesea le tofi o ia tamaʻitaʻi mai i tofi o o matou tamā, ae faaopoopo atu i le tofi o le ituaiga o tane ia o le a latou faaipoipo atu i ai, ona aveese lea o ia fanua mai i lo matou tofi. 4 A faapea e oo i le Iupelī+ a le fanauga a Isaraelu, ona faaopoopo atu lea o le tofi o ia tamaʻitaʻi i le tofi o le ituaiga o tane ia o le a latou faaipoipo atu i ai, ona aveese lea o o latou tofi mai i le tofi o le ituaiga o o matou tamā.”

5 Ona fai atu lea o Mose i le fanauga a Isaraelu e tusa ma le faatonuga a Ieova e faapea: “E saʻo le mea o loo fai mai ai le ituaiga o atalii o Iosefa. 6 O le poloaʻiga lenei a Ieova ua ia fetalai mai ai e tusa ma afafine o Selofeata, ‘Ia latou faaipoipo i ē ua latou loto i ai. Peita‘i, e ao ona latou faaipoipo i se tasi mai i se aiga o le ituaiga o lo latou tamā. 7 E lē feaveaʻia tofi o le fanauga a Isaraelu mai i le tasi ituaiga i le isi ituaiga, auā e ao i le fanauga a Isaraelu ona taofimau i le tofi o le ituaiga o o latou augātamā. 8 O so o se fafine ua maua se tofi mai i ituaiga o Isaraelu, e ao iā te ia ona faaipoipo atu i se tasi e tupuga mai i le ituaiga o lona tamā,+ ina ia faatumauina ai e le fanauga a Isaraelu le tofi o o latou augātamā. 9 E lē feaveaʻia tofi mai i le tasi ituaiga i le isi ituaiga, auā e ao i ituaiga o Isaraelu ona taofimau o latou lava tofi.’”

10 Ua faapea lava ona faia e afafine o Selofeata, e pei ona poloaʻi mai ai Ieova iā Mose.+ 11 Ona faaipoipo lea o Maala, o Tiresa, o Hakelu, o Meleka, ma Noa, o afafine ia o Selofeata,+ i atalii o uso o lo latou tamā. 12 Ua latou faaipoipo atu i tane mai i aiga o Manase le atalii o Iosefa, ina ia tumau ai pea lo latou tofi i le ituaiga o le aiga o lo latou tamā.

13 O poloaʻiga lava ia ma iʻuga o faamasinoga na tuuina mai e Ieova e ala iā Mose, i le fanauga a Isaraelu i le fanua laugatasi o le toafa o Moapi, e lata ane i Ioritana e faafesagaʻi ma Ieriko.+