Iosua

23 Ua mavae aso e tele talu ona avatu e Ieova iā Isaraelu le mapusaga+ mai i o latou fili i itu uma, ua toeaina Iosua ma ua afu lona soifua,+ 2 ona aami lea e Iosua o Isaraelu uma,+ o toeaina, o ulu o aiga, o faamasino, ma alii,+ ma ua faapea atu iā i latou: “Ua ou toeaina ma ua ou matua foʻi. 3 A o outou, ua outou vāai i mea uma na faia e Ieova lo outou Atua i nei nuu uma ona o outou, auā na tau Ieova lo outou Atua mo outou.+ 4 Silasila foʻi, ua ou tofia atu iā te outou nuu uma+ nei o loo totoe, e fai ma tofi o o outou ituaiga,+ ma nuu uma na ou faaumatia+ e mai i Ioritana e oo atu i le Sami Tele* i le itu i sisifo.* 5 O Ieova lo outou Atua na ia teena i latou i o outou luma,+ ma ia tuliesea i latou ona o outou, ma fai mo outou lo latou laueleele, e pei lava ona folafola mai e Ieova lo outou Atua iā te outou.+

6 “Ia outou matuā lototetele e tausi ma faia mea uma ua tusia i le tusi o le Tulafono+ a Mose, ia lē liliuese mai ai i le itu taumatau po o le itu tauagavale,+ 7 ia aua lava neʻi outou faifaimea faatasi ma nei nuu+ o loo totoe pea iā te outou. Aua lava neʻi outou taʻua igoa o o latou atua+ pe tautō i ai, aua foʻi neʻi outou auauna pe ifo i ai.+ 8 Ae e tatau ona outou faamaoni pea iā Ieova lo outou Atua,+ e pei ona outou faia e oo mai i le aso nei. 9 E tuliesea foʻi e Ieova o nuu tetele ma malolosi mai i o outou luma,+ auā e leai se tasi ua mafai ona faasagatau atu iā te outou e oo mai lava i le aso nei.+ 10 E na o le toʻatasi o outou e tulia le toʻa 1,000,+ auā o loo tau Ieova lo outou Atua mo outou,+ e pei lava ona ia folafola mai iā te outou.+ 11 Ia outou matuā faaeteete+ e ala i lo outou alolofa iā Ieova lo outou Atua.+

12 “Ae afai e tou te tuulafoa‘ia o ia ma outou pipii i ē o i nuu o loo totoe+ iā te outou, ma outou faaipoipo atu i o latou atalii ma afafine,+ ma faifaimea faatasi ma i latou, 13 ia outou iloa lelei, e lē toe tuliesea e Ieova lo outou Atua nei nuu mai i o outou luma;+ ae e fai i latou ma mailei ma matāsele iā te outou, ma sasa i o outou tua,+ e fai foʻi ma mea matuitui i o outou mata seʻia faaumatia outou mai i lenei laueleele lelei, na foaʻiina atu e Ieova lo outou Atua iā te outou.

14 “Faauta! O le a ou oti,* ae ua outou iloa lelei ma o outou lotoatoa, ma o outou ola atoa, e leʻi i‘uvale se upu e tasi o folafolaga lelei uma na fetalai mai ai Ieova lo outou Atua iā te outou. Ua faataunuuina uma iā te outou. E leʻi i‘uvale se tasi o na upu.+ 15 O lea, e pei ona taunuu o folafolaga lelei uma na fetalai mai ai Ieova lo outou Atua iā te outou,+ e faapea foʻi ona faaoo mai e Ieova iā te outou o mala uma na ia folafolaina mai,* ma faaumatia outou mai i lenei laueleele lelei na foaʻiina mai e Ieova lo outou Atua.+ 16 Pe afai e tou te solia le feagaiga a Ieova lo outou Atua na ia poloaʻi mai iā te outou e tausia, ma outou ō atu ma auauna i isi atua ma ifo i ai, ona matuā toʻasā ai lea o Ieova iā te outou,+ ma vave ona faaumatia outou mai i le nuu lelei na ia foaʻiina mai.”+