Ieremia
28 I lenā lava tausaga, i le amataga o le pulega a le malo o Setekaia+ le tupu o Iuta, i le tausaga lona fā, i le masina lona lima, na faapea mai ai iā te aʻu Hanania+ le atalii o Asure le perofeta mai i Kipeona,+ i le fale o Ieova i luma o ositaulaga ma le nuu uma: 2 “O le mea lenei ua fetalai mai ai Ieova o ʻau, o le Atua o Isaraelu, ‘Ou te gauia le amo a le tupu o Papelonia.+ 3 A o leʻi mavae tausaga atoatoa e lua, ou te toe aumaia i lenei mea o ipu uma o le fale o Ieova na ave e Nepukanesa le tupu o Papelonia+ mai i lenei mea, ma avatu ai i Papelonia.’” 4 “‘Ou te toe faafoʻisia mai i lenei mea o Iekonia+ le atalii o Ioakima,+ le tupu o Iuta, ma ē uma na ave faapagota o Iuta na ō atu i Papelonia,’+ ua fetalai mai ai Ieova, ‘auā ou te gauia le amo+ a le tupu o Papelonia.’”
5 Ona fai atu lea o le perofeta o Ieremia iā Hanania le perofeta, i luma o ositaulaga ma luma o le nuu uma o ē o loo tutū ai i le fale o Ieova;+ 6 ua fai atu le perofeta o Ieremia: “Amene!+ Ia faapea ona faia e Ieova! Tau ina ia faataunuu e Ieova au upu ua e vavalo mai ai, i le toe aumaia o ipu o le fale o Ieova ma ē uma na ave faapagota mai i Papelonia i lenei mea!+ 7 Ae seʻi e faalogo mai faamolemole i lenei upu ou te tautala atu ai iā te oe ma le nuu uma.+ 8 O perofeta foʻi na muamua atu iā te aʻu ma na muamua atu iā te oe i aso anamua,+ na latou vavalo atu foʻi e faatatau i le tele o nuu ma malo tetele, o taua, o mala, ma faamaʻi.+ 9 O le perofeta foʻi ua vavalo i le filemu,+ pe a taunuu le upu a lea perofeta, ona iloa ai lea e moni o le perofeta lea na auina mai e Ieova.”+
10 Ona tago ai lea o le perofeta o Hanania i le amo sa i le ua o le perofeta o Ieremia, ma ia gauia.+ 11 Ona fai mai lea o Hanania+ i luma o le nuu uma: “O le mea lenei ua fetalai mai ai Ieova,+ ‘E faapenei ona ou gauia le amo a Nepukanesa le tupu o Papelonia a o leʻi mavae tausaga atoatoa e lua, mai i ua o atunuu uma.’”+ Ona alu ai lea o Ieremia i lona ala.+
12 Ona oo mai lea o le afioga a Ieova iā Ieremia,+ ina ua uma ona gauia e le perofeta o Hanania le amo mai i le ua o le perofeta o Ieremia, e faapea: 13 “Ia e alu ma fai atu iā Hanania, ‘O le mea lenei ua fetalai mai ai Ieova: “Ua e gauia amo laau,+ ae e te faia amo uʻamea e sui ai.”+ 14 Auā o le mea lenei ua fetalai mai ai Ieova o ʻau, o le Atua o Isaraelu: “Ou te faaee le amo uʻamea i ua o nei atunuu uma, e auauna ai iā Nepukanesa le tupu o Papelonia;+ latou te auauna ai iā te ia.+ Ou te tuuina atu foʻi manufeʻai o le fanua iā te ia.”’”+
15 Ona fai atu lea o le perofeta o Ieremia i le perofeta o Hanania:+ “Hanania e, inā faalogo mai ia faamolemole! E leʻi auina mai oe e Ieova, a o oe lava ua e faatupuina i lenei nuu le faatuatua i upu pepelo.+ 16 O le mea lea ua faapea ona fetalai mai ai o Ieova, ‘Faauta! ou te auina ese atu oe mai i luga o le fogāeleele. E te oti lava i le tausaga lenei,+ auā ua e tautala ma le matuā fouvale iā Ieova.’”+
17 Ona oti ai lea o le perofeta o Hanania i lenā tausaga, i le masina lona fitu.+