Lomiga mo le Polokalame mo le Sauniga o le Faiva ma le Olaga Faa-Kerisiano
APERILA 3-9
ʻOA TAUTELE MAI I LE AFIOGA A LE ATUA | IEREMIA 17-21
“Ia Faataga Ieova e Faatonutonuina Ou Manatu ma Amioga”
(Ieremia 18:1-4) Ua oo mai le afioga a Ieova iā Ieremia, ua faapea mai: 2 “Inā tulaʻi ia, ma ia e alu ifo i le fale o le fai ipu omea, ona ou faailoa atu ai lea iā te oe o aʻu upu i inā.” 3 Ona ou alu ifo lea i le fale o le fai ipu omea, faauta foʻi, o loo faia lana galuega i luga o mea taavilivili a le fai ipu omea. 4 O le ipu foʻi na ia faia i le omea, ua faaleagaina i le lima o le fai ipu omea, ona ia toe liliu atu lea ma faia se isi ipu, e tusa ma le mea ua tonu i le manatu o le fai ipu omea e fai ai.
O Ai o Fauina Ou Mafaufauga?
O le manaʻoga mo sau tali naunau atu ma le usiusitaʻi pe a e fia maua aogā mai le taaʻiga o faufauga a Ieova, sa matuā faataʻitaʻia mai ina ua faatonuina e Ieova le perofeta o Ieremia e asiasi atu i le fale o fai ai galuega a se tagata fai ipu omea. Na vaaia e Ieremia le fai ipu omea ua sui lona mafaufau i le mea o le a ia faia i se tasi ipu ona ua ʻfaaleaga e lona lima’ le mea sa ia taumafai e fai. Ona fetalai loa lea o Ieova: “Le aiga o Isaraelu e, ou te le mafaia ea ona fai ia te outou e pei o lenā fai ipu omea? . . . Faauta, le aiga o Isaraelu e, e pei o le omea i le lima o le fai ipu omea, e faapea foʻi outou i loʻu lima.” (Ieremia 18:1-6) Pe na uiga ea lenā manatu faapea o tagata i Isaraelu sa pei o ni potopotoi omea e lē o iai se ola ma o loo uu e aao o Ieova, ina ia fafauina e ia i se tasi ituaiga o ipu po o se isi?
(Ieremia 18:5-10) Ua toe oo mai foʻi iā te aʻu le afioga a Ieova, ua faapea mai: 6 “ʻLe aiga o Isaraelu e, po ou te lē mafaia ea ona ou faia outou e pei lava o lenei ipu omea?’ ua fetalai mai ai Ieova. ʻFaauta! le aiga o Isaraelu e, e pei o le omea i le lima o le fai ipu omea, e faapea foʻi outou i loʻu lima. 7 O so o se taimi ou te tautala atu ai faasaga i se atunuu ma se malo ina ia liaʻiina, ma lepetia, ma faaumatia, 8 ma afai e liliuese lenā atunuu mai i ana amioga leaga na ou fai atu ai, ona toe sui ai lea o loʻu manatu i le malaia na ou manatu e faaoo i ai. 9 O so o se taimi foʻi ou te tautala atu ai e faatatau i se atunuu ma se malo ina ia atiaʻe ma totōina, 10 ae e faia lava e i latou mea leaga i oʻu luma i le lē faalogo mai i loʻu leo, ona toe sui ai lea o loʻu manatu i mea lelei na ou faapea ifo ai iā te aʻu, e faia mo lo latou lelei.’
it-2 776 ¶4
Salamō
Atonu e faia e le fai ipu omea se ipu, ae e na te toe suia le auala e faia ai lenā ipu, pe afai e ʻfaaleagaina i lona lima.’ (Ie 18:3, 4) O lenei faaaʻoaʻoga ua faailoa mai ai e Ieova, e lē pei o ia o se fai ipu omea faaletagata i le “faaleagaina” o se ipu i lona lima, nai lo o lea e iai lana pule i le fanau a tagata, o lana pule lea e fetuunaʻi ai ana feutagaʻiga ma i latou, e fua i le auala e latou te tali atu ai i lona amiotonu ma lona alofa mutimutivale. (Faatusatusa i le Isa 45:9; Ro 9:19-21.) O lea, e mafai ona ʻtoe sui lona manatu i le malaia na ia manatu e faaoo’ i se atunuu, pe ʻtoe sui lona manatu i mea lelei na ia faapea ifo iā te ia lava, e faia mo lo latou lelei,’ e fua lava i le auala e tali atu ai atunuu iā te ia. (Ie 18:5-10) O lea, e lē faapea e iai se mea sesē a le Fai Ipu Omea Sili o Ieova, peitaʻi e tatau ona suia le “omea” po o le loto o le tagata, ina ia suia ai le finagalo o Ieova.
(Ieremia 18:11) “O lenei, inā fai atu ia faamolemole i tagata o Iuta ma ē o loo nonofo i Ierusalema, ʻ O le mea lenei ua fetalai mai ai Ieova: “O lea ua ou saunia se mala mo outou, ma ou mafaufau foʻi i se mea leaga e faia iā te outou. Inā taʻitasi ia outou ma liliu mai i lona ala leaga, ma ia fai ia lelei o outou ala ma a outou amioga.”’”
O Ai o Fauina Ou Mafaufauga?
E lē taitai ona faaaogāina e Ieova lona mana e iai le malosi uma lava e faapogaia ai tagata ina ia latou faia mea e feteenaʻi ma o latou manaʻoga; e lē tuuaʻia foʻi o ia i iʻuga lē lelei, e pei o le tulaga atonu na oo i le tagata fai ipu omea. (Teuteronome 32:4) O mea lē lelei e māfua pe a taumafai Ieova e fafau tagata i se auala lelei, ae teena e i latou ana taʻiala. O se tasi lenā eseesega tele i le va o oe ma se potopotoi omea e lē o iai se ola. O loo iai lau filifiliga saʻoloto. O le faatinoina o lenā filifiliga saʻoloto, e mafai ai ona e filifili e tali atu i le taaʻiga o faufauga a Ieova, po o lou teena ma le loto i ai.
Maʻeu se lesona uigā! Maʻeu le sili atu ona lelei o le faalogo i le siʻufofoga o Ieova na i lo le folafola atu ma le faamaualuga, “Ou te lē manaʻo e taʻu mai e se tasi ia te au le mea e ao ona ou faia!” Tatou te manaʻomia uma lava faaaafiaga a Ieova e taʻitaʻia ai i tatou. (Ioane 17:3) Ia pei o le faisalamo o Tavita, o lē na tatalo: “Ieova e, ia e faailoa mai ia te au ou ala; ia e aʻoaʻo mai ia te au i ou magāala.” (Salamo 25:4) Ia manatua le mea na fai mai ai le tupu o Solomona: “E faalogo mai le tagata poto, e tupu ai pea lona poto.” (Faataoto 1:5) Po o le a e faalogo ea? Afai e te faalogo, ona “faafeao [ai lea o] le mafaufau ia te oe; e leoleo ia te oe le faautauta.”—Faataoto 2:11.
Saʻiliʻiliga Loloto mo ʻOa Faalegaga
(Ieremia 17:9) “E sili ona faaʻoleʻole le loto nai lo o mea uma, ma e matuā leaga lava. O ai sē e mafai ona iloa?
Ia Leoleoina Lou Loto
13 Na lapataʻi mai Ieremia: “E sili le faaʻoleʻole o le loto i mea uma, ma ua matuā leaga lava.” (Ieremia 17:9) E ono aliaʻi mai lenei faaʻoleʻole o le loto pe a tatou fai faamolemolega i a tatou mea sesē e fai, pe tatou te taumafai e faaitiitia le matuiā o ni masei, pe taʻutonuina ni vaivaiga matuiā i uiga totino, pe soona faalialiavale foʻi i ni taulau manuia e maua. O se loto ua matuā leaga e mafai foʻi ona ia faapogaia se faiga uigalua—o laugutu molemole e fai atu le isi tala, ae matuā vala lava ma gaoioiga o loo fai. (Salamo 12:2; Faataoto 23:7) Maʻeu le matuā tāua o lo tatou faamaoni a o tatou iloiloina mea o loo puna mai i o tatou loto!
(Ieremia 20:7) Ieova e, ua e faasesēina aʻu, o le mea lea ua sesē ai. Ua e faaaogā lou malosi iā te aʻu, ma ua e manumalo. Ua avea aʻu ma mea e toē i ai i le aso atoa; ua tauemu mai foʻi tagata uma iā te aʻu.
Manatu Tāua Mai le Tusi o Ieremia
20:7—O le ā le auala na faaaogā ai e Ieova ʻlona malosi’ e faasagatau ma faaʻoleʻole ai Ieremia? Auā na lē amanaʻia ma na iai faasāsāga a o faalauiloa atu le feʻau a Ieova, atonu na lagona ai e Ieremia ua lē lava lona malosi e faaauau ai. Peitaʻi na faaaogā e Ieova lona malosi e teena ai nei uiga lē lelei, ma faamalosia ai Ieremia e faaauau. Sa faaʻoleʻole e Ieova Ieremia i le faaaogāina o ia e faataunuu ai mea sa manatu le perofeta e na te lē mafaia.
Faitau Tusi Paia
(Ieremia 21:3-14) Ona fai mai lea o Ieremia iā i latou: “O le mea lenei e tou te fai atu ai iā Setekaia, 4 ʻO le mea lenei ua fetalai mai ai Ieova le Atua o Isaraelu: “Ou te faaliliuina atu auupega o le taua o loo i o outou lima, o loo outou tau ai ma le tupu o Papelonia ma tagata Kaletaia o ē o loo siʻomia outou i fafo o le pā, ou te faapotopoto foʻi i latou i le ogatotonu o lenei aai. 5 O aʻu foʻi, ou te faasagatau atu iā te outou i le lima faaloaloa ma le lima malosi, ma le ita, o le lotoa, ma le ita tele. 6 Ou te taia ē o loo nonofo i lenei aai, o tagata atoa ma manu. E oti foʻi i latou i le faamaʻi tele.”’ 7 “ʻUa fetalai mai Ieova, “Pe a mavae lenā, ou te tuuina atu Setekaia le tupu o Iuta ma ana auauna, o tagata ma i latou o ē o loo totoe i le aai mai i le faamaʻi, ma le pelu, ma le oge, i le lima o Nepukanesa le tupu o Papelonia, e oo foʻi i lima o o latou fili, ma lima o i latou o loo saʻili ia oti i latou, e na te taia lava i latou i le pelu. E lē alofa o ia iā i latou, e lē tigā alofa i ai, pe alofa mutimutivale foʻi i ai.”’ 8 “E te fai atu foʻi i lenei nuu, ʻO le mea lenei ua fetalai mai ai Ieova: “O lenei, ua ou tuuina atu i o outou luma le ala o le ola, ma le ala o le oti. 9 O lē e nofo pea i lenei aai, e oti o ia i le pelu, o le oge, ma le faamaʻi; a o lē e alu ese, ma vavaeese atu i tagata Kaletaia o ē o loo siʻomia outou, e ola o ia ma e avea foʻi lona ola ma ana vete.”’ 10 “ʻ“Auā ua ou faasaga atu i lenei aai ia oo i ai le malaia, ae e lē o le manuia,” ua fetalai mai ai Ieova. “E tuuina atu i le lima o le tupu o Papelonia, e na te susunuina lava i le afi.” 11 “ʻA o le aiga o le tupu o Iuta, ia outou faalogologo mai i le afioga a Ieova. 12 Le aiga o Tavita e, o le mea lenei ua fetalai mai ai Ieova: “Ia faia le faamasinoga tonu i taeao uma, ma ia laveaʻiina lē ua faoa ana mea mai i le lima o lē ua ia ave faagaoia, ina ia lē alu atu ai loʻu ita e pei o se afi ma susunu ai, ae e leai foʻi se tasi e na te mafaia ona tineia, ona o le leaga o mea na outou faia.”’ 13 “ʻO oe o lē e nofo i le fanua laugatasi, o le papa o le mea laugatasi, ua ou tetee iā te oe,’ ua fetalai mai ai Ieova. ʻA o outou o ē ua faapea mai: “O ai e alu ifo e tau ma i tatou? O ai foʻi e sau i mea o loo tatou nonofo ai?” 14 Ou te faasalaina outou e tusa ma le fua o mea na outou faia,’ ua fetalai mai ai Ieova. ʻOu te faamūina foʻi se afi i lona vaomatua, ma e matuā faaumatia ai mea uma o loo siʻomia ai o ia.’”
APERILA 10-16
ʻOA TAUTELE MAI I LE AFIOGA A LE ATUA | IEREMIA 22-24
“Po o iā te Oe ʻse Loto Ina ia Iloa ai’ Ieova?”
(Ieremia 24:1-3) Ona faaali mai lea e Ieova iā te aʻu, faauta foʻi! o ato mati e lua ua tuuina i luma o le malumalu o Ieova, ina ua uma ona ave faapagota e Nepukanesa le tupu o Papelonia o Iekonia le atalii o Ioakima o le tupu o Iuta, o perenise o Iuta, o tufuga ma ē e fauina pā mai i Ierusalema, ina ia ave i latou i Papelonia. 2 O le tasi ato, o mati e matuā lelei lava, e pei o mati ua muaʻi pula; a o le isi ato, o mati e matuā leaga lava, e lē mafai ona ʻaina ona o le leaga. 3 Ona fetalai mai lea o Ieova iā te aʻu: “Ieremia e, o le ā se mea o e vaai atu i ai?” Ona ou fai atu lea: “O mati, o mati e matuā lelei lava ma mati e matuā leaga lava, e lē mafai ona ʻaina ona o le leaga.”
“Po o iā te Oe ʻse Loto Ina ia Iloa ai’ Ieova?”
2 Ua faatusa e Ieova loto o tagata i le mati. E mafai ona aafia o tatou loto i lenā fetalaiga a Ieova. E leʻi uiga Lana fetalaiga i le taumafaina o se mati moni. Peitaʻi, na ia fetalai i se uiga faafaatusa. A o iloiloina lana fetalaiga, seʻi vaai po o le ā le auala e mafai ona tatou aafia ai.
(Ieremia 24:4-7) Ona oo mai ai lea o le afioga a Ieova iā te aʻu, ua faapea mai: 5 “O le mea lenei ua fetalai mai ai Ieova le Atua o Isaraelu, ʻE pei o nei mati lelei, e faapea ona ou manatu i se auala lelei i ē ua ave faapagota o Iuta, o le a ou aauina ese atu mai i lenei mea i le nuu o Kaletaia. 6 E faasaga atu oʻu mata iā i latou i se auala lelei, ou te faafoʻisia foʻi i latou i lenei nuu. Ou te atiaʻe i latou, ma ou te lē lepetiaina; ou te totōina foʻi i latou, ma ou te lē liaʻiina lava. 7 Ou te foaʻiina atu iā i latou se loto ina ia iloa ai aʻu, o aʻu o Ieova; e avea i latou ma oʻu nuu, e avea foʻi aʻu ma o latou Atua, auā e toe foʻi mai i latou iā te aʻu ma o latou lotoatoa.
“Po o iā te Oe ʻse Loto Ina ia Iloa ai’ Ieova?”
4 Na fetalai Ieova i ē na faaāta mai e mati lelei e faapea: “Ou te foaʻiina atu iā i latou le loto e iloa ai aʻu, o aʻu o Ieova; e avea i latou ma oʻu nuu.” (Iere. 24:7) E faalaeiauina i tatou i le iloa o loo naunau Ieova e foaʻi mai ʻse loto e iloa’ ai o ia. E faasino le “loto” i inei i le ituaiga o tagata e iai i tatou. E tatou te mananaʻo i se loto e iloa ai Ieova, ma avea i tatou ma ona tagata. Ina ia ausia lenā vala, e tatau ona suʻesuʻe ma faatatauina le Tusi Paia, salamō ma liliuese mai ala leaga, tuuina atu iā Ieova, ma papatiso i le suafa o le Tamā, le Alo, ma le agaga paia. (Mata. 28:19, 20; Galu. 3:19) Atonu ua māeʻa po ua amata foʻi ona e uia na laasaga, ma faatasitasi foʻi ma Molimau a Ieova.
(Ieremia 24:8-10) “ʻE pei o mati leaga e lē mafai ona ʻaina ona o le leaga, o le mea moni lenei ua fetalai mai ai Ieova: “E faapea ona ou tuuina atu o Setekaia le tupu o Iuta, o ona perenise, o ē o totoe o Ierusalema o loo totoe i lenei nuu, ma i latou o loo nonofo i le nuu o Aikupito — 9 ou te tuuina atu i latou ina ia gatete ai, ma ia puapuagatia ai i malo uma o le lalolagi, e avea foʻi i latou ma luma, o upu faatusa, ma tauemuga, ma malaia, i mea uma ou te faataapeape i ai i latou. 10 Ou te aauina atu iā i latou le pelu, o le oge, ma le faamaʻi, seʻia faaumatia i latou mai i le laueleele na ou tuuina atu iā i latou ma o latou augātamā.”’”
“Po o iā te Oe ʻse Loto Ina ia Iloa ai’ Ieova?”
3 Seʻi o tatou iloiloina le fetalaiga a Ieova iā Ieremia e faatatau i le mati. Sa matuā leaga le tulaga faaleagaga o le nuu o Iuta i le 617 T.L.M. O lea na faailoa atu ai e Ieova se vaaiga e faatatau i lo latou lumanaʻi, ma na faaāta mai e ʻmati lelei’ ma ʻmati leaga.’ (Faitau le Ieremia 24:1-3.) Na faasino atu mati leaga i le tupu o Setekaia, ma i latou uma na faapuapuagatia e Nepukanesa ma ana ʻau. Peitaʻi o mati lelei sa aofia ai Esekielu, faapea Tanielu ma ana aumea. Sa aofia ai foʻi nisi o tagata Iutaia ua toeitiiti ona faaaunuua lea. O nisi o i latou na toe foʻi ma fausia le malumalu i Ierusalema.—Iere. 24:8-10; 25:11, 12; 29:10.
Saʻiliʻiliga Loloto mo ʻOa Faaleagaga
(Ieremia 22:30) O le mea lenei ua fetalai mai ai Ieova, ʻIa outou tusia lenei tagata o sē e leai sana fanau, ma o se tagata e lē manuia i lona olaga; auā e lē manuia se isi o lana fanau, e lē nofo foʻi i le nofoālii o Tavita pe toe pule foʻi i Iuta.’”
Manatu Tāua Mai le Tusi o Ieremia
22:30—Pe na mafai e lenei faalauiloaga ona faalēaogāina le aiā a Iesu e nofo ai i le nofoālii o Tavita? (Mataio 1:1, 11) E leai. Na taofia e le faalauiloaga suli o Iekonia mai le “tiʻetiʻe i le nofoālii o Tavita . . . i Iuta.” O le a pule mai Iesu i le lagi, ae lē o se nofoālii i Iuta.
(Ieremia 23:33) “Afai e fesili mai lenei nuu, o le perofeta, po o le ositaulaga iā te oe, e faapea, ʻO le ā le avega mai iā Ieova?’ ona e fai atu lea iā i latou, “ʻO outou na o le avega! Ou te tuulafoaʻiina lava outou,” ua fetalai mai ai Ieova.’
Manatu Tāua Mai le Tusi o Ieremia
23:33—O le ā “le avega mai iā Ieova”? I aso o Ieremia, o le feʻau tāua na avatu e le perofeta e faatatau i le faaumatiaga o Ierusalema sa avea ma avega mamafa mo ona tagatānuu. I le isi itu, o i latou na lē faalogo i le feʻau na avea ma avega mamafa iā Ieova ma iʻu ai ina ia tuulafoaʻia i latou. I se tulaga talitutusa, ua avea le feʻau a le Tusi Paia i le faaumatiaga o lotu sesē ma se avega mamafa i lotu sesē, ma o ē lē faalogo ua avea i latou ma avega mamafa i le Atua.
Faitau Tusi Paia
(Ieremia 23:25-36) “Ua ou faalogo i mea ua fai atu ai perofeta, o ē ua vavalo ma le pepelo i loʻu igoa, ua faapea atu, ʻUa fai laʻu miti! Ua fai laʻu miti!’ 26 O le ā le umi e iai pea i loto o le ʻauperofeta o ē o loo vavalo atu i mea pepelo, ma o perofeta lava i latou o le taufaaʻoleʻole o o latou loto? 27 Ua mafaufau i latou ina ia faagalo e loʻu nuu loʻu igoa e ala i a latou miti ua latou faamatala atu i le tasi i le isi, e pei foʻi ona faagalo e o latou tamā loʻu igoa ona o Paala. 28 O le perofeta ua fai lana miti, ia faamatala atu e ia le miti; a o lē ua iā te ia laʻu upu, ia tautala atu o ia i laʻu upu ma le faamaoni.” “E faapefea ona tutusa ʻau mamago o saito ma fatu o le saito?” ua fetalai mai ai Ieova. 29 “Pe e lē pei ea laʻu upu o le afi,” ua fetalai mai ai Ieova, “ma e pei o le samala e tuʻininii ai le papa?” 30 “O le mea lea ou te tetee atu ai i perofeta,” ua fetalai mai ai Ieova, “o ē ua gaoia aʻu upu, e taʻitasi mai i lana aumea.” 31 “O le mea lea ou te tetee atu ai i perofeta,” ua fetalai mai ai Ieova, “o ē ua faaaogā o latou laulaufaiva e faapea atu ai, ʻUa fetalai mai o ia!’” 32 “O le mea lea ou te tetee atu ai i perofeta o ē e faia miti pepelo,” ua fetalai mai ai Ieova, “o ē ua faamatala atu na miti ma faasesēina ai loʻu nuu ona o a latou mea pepelo, ma lo latou gugutu.” “Ae ou te leʻi aauina atu i latou pe poloaʻia foʻi i latou. O le mea lea e lē aogā ai i latou i lenei nuu,” ua fetalai mai ai Ieova. 33 “Afai e fesili mai lenei nuu, o le perofeta, po o le ositaulaga iā te oe, e faapea, ʻO le ā le avega mai iā Ieova?’ ona e fai atu lea iā i latou, “ʻO outou na o le avega! Ou te tuulafoaʻiina lava outou,” ua fetalai mai ai Ieova.’ 34 A o le perofeta, o le ositaulaga, po o le nuu o ē e faapea mai, ʻ O le avega mai iā Ieova!’ Ou te liliu atu foʻi i lenā tagata ma lona aiga. 35 O le mea lenei e tou te fesili atu ai pea, e taʻitasi i lona tuaoi, e taʻitasi foʻi i lona uso, ʻO le ā le tali mai a Ieova? O le ā foʻi le mea na fetalai mai ai Ieova?’ 36 E tou te lē toe taʻua le avega mai iā Ieova, auā e taʻitasi le tagata ma fai lana lava upu ma avega, ma ua outou suia foʻi afioga a le Atua soifua, o Ieova o ʻau, o lo tatou Atua.
APERILA 17-23
ʻOA TAUTELE MAI I LE AFIOGA A LE ATUA | IEREMIA 25-28
“Ia Lototele e Pei o Ieremia”
(Ieremia 26:2-6) “O le mea lenei ua fetalai mai ai Ieova, ʻIa e tū i le lotoā o le fale o Ieova, ma ia e tautala atu e faatatau i aai uma o Iuta, o ē ua ō mai e ifo i le fale o Ieova, o upu uma ou te poloaʻi atu ai iā te oe e tautala atu ai iā i latou. Aua lava neʻi tuua se upu e tasi. 3 Atonu e latou te faalogo i ai, ona taʻitasi lea ma liliuese mai i lona ala leaga, ona sui ai lea o loʻu manatu i le malaia na ou mafaufau e faaoo atu iā i latou, ona o le leaga o a latou mea na fai. 4 E te fai atu foʻi iā i latou: “O le mea lenei ua fetalai mai ai Ieova, ʻAfai e tou te lē faalogo mai iā te aʻu i le savavali i laʻu tulafono ua ou tuuina atu i o outou luma, 5 ma outou faalogo i upu a aʻu auauna le ʻauperofeta, o ē na ou aauina atu iā te outou, na ou alapō ma aauina atu i latou, ae e tou te leʻi faalogo i ai, 6 ona ou faia lea o lenei fale e pei ona ou faia i Sailo, ou te faia foʻi lenei aai ma mala i atunuu uma o le lalolagi.’”’”
Pe na Faamamulu Ieremia?
Na faatonu e Ieova Ieremia ia lapataʻi tagata o le a faaumatia Ierusalema pe afai e lē suia o latou ala leaga. Ina ua lapataʻi atu Ieremia, na feita tele tagata ma fai mai: “E tatau ona oti o lenei tagata.” Peitaʻi na augani atu Ieremia iā i latou, ia “faalogo i le siʻufofoga o Ieova.” Ona faapea atu lea o ia: ʻIa outou iloa, afai tou te fasioti iā te aʻu, ua outou fasiotia le tagata e lē sala auā ua auina mai aʻu e le Atua e tautala atu ia te outou.’ E te iloa la le mea na tupu?—
(Ieremia 26:8, 9) Ina ua uma ona fai atu e Ieremia o mea uma na poloaʻi mai ai Ieova iā te ia e fai atu ai i le nuu uma, ona puʻea lea o ia e ositaulaga, o le ʻauperofeta, ma le nuu uma, ua faapea atu: “E te oti lava. 9 Aiseā ua e vavalo mai ai i le suafa o Ieova, e faapea, ʻE pei ona faia i Sailo e faapena foʻi ona faia i lenei fale, ma e faatafunaina lenei aai ina ia leai se tasi e toe nofo ai’?” Ua faapotopoto mai pea le nuu uma iā Ieremia i le fale o Ieova.
(Ieremia 26:12, 13) Ona fai atu lea o Ieremia i perenise uma ma le nuu uma: “O Ieova na auina mai aʻu e vavalo atu e faatatau i lenei fale, ma e faatatau foʻi i lenei aai i upu uma ua outou faalogo i ai. 13 O lenei, ia fai ia lelei o outou ala ma a outou amio, ma ia faalogo i le siʻufofoga o Ieova lo outou Atua, ona toe sui ai lea o le manatu o Ieova i le mala na ia fetalai ai e oo mai iā te outou.
jr 21 ¶13
Auauna “i Aso e Gata Ai”
13 Pe a fua i lotu ma faiga faapolotiki na taatele i Iuta, o le a faapefea ona tali atu taʻitaʻi lotu i le feʻau a Ieremia? E tusa ai ma le faamatalaga a le perofeta lava ia, “ona puʻea lea o [aʻu] e ositaulaga, o le ʻauperofeta, ma le nuu uma, ua faapea atu: ʻE te oti lava.’” Na latou matuā feita ma faapea atu: “E tatau ona faasala i le oti lenei tagata.” (Faitau le Ieremia 26:8-11.) Peitaʻi e leʻi manumalo ē na tetee iā Ieremia. Na laveaʻia e Ieova lana perofeta, ma e leʻi fefe foʻi Ieremia i uiga sauā o ē na tetee iā te ia. E lē tatau foʻi la ona e fefe.
(Ieremia 26:16) Ona fai atu lea o perenise ma le nuu uma i ositaulaga ma le ʻauperofeta: “E lē tatau ona faasala i le oti lenei tagata, auā na tautala mai o ia iā i tatou i le suafa o Ieova lo tatou Atua.”
(Ieremia 26:24) Ae peitaʻi, na puipuia Ieremia e le lima o Aikamo le atalii o Safana, ina ia lē tuuina atu o ia i lima o le nuu e fasioti iā te ia.
Pe na Faamamulu Ieremia?
Ua faapea mai le Tusi Paia: “Ona fai atu ai lea o alii ma le nuu uma i faitaulaga ma perofeta, ʻE lē tatau ona oti o lenei tagata, auā ua tautala mai o ia iā te i tatou i le suafa o Ieova lo tatou Atua.’” O lea ina ua lē faamaamulu Ieremia ona o lona fefe, na puipuia o ia e Ieova. Ae seʻi o tatou vaai i le mea na tupu iā Uria, o le isi perofeta a Ieova, ae e ese lana mea na fai.
Saʻiliʻiliga Loloto mo ʻOa Faaleagaga
(Ieremia 27:2, 3) “O le mea lenei ua fetalai mai ai Ieova iā te aʻu, ʻIa e faia mo oe ni noanoaga ma ni amo, ma ia e tuu i lou ua. 3 Ia e avatu na mea i le tupu o Etoma, o le tupu o Moapi, o le tupu o le fanauga a Amoni, o le tupu o Turo, ma le tupu o Saitonu, e ala i lima o avefeʻau o ē e ō mai i Ierusalema iā Setekaia le tupu o Iuta.
jr 27 ¶21
Auauna “i Aso e Gata Ai”
21 I le amataga o le nofoaiga a Setekaia, na ō mai ai i Ierusalema avefeʻau mai le tupu o Etoma, Moapi, Amoni, Turo ma Saitonu. Atonu o la latou fuafuaga ia aufaatasi atu Setekaia e latou te tetee iā Nepukanesa. Peitaʻi na faalaeiauina e Ieremia Setekaia ina ia gauaʻi atu iā Nepukanesa. O lea, na avatu ai e Ieremia i nei avefeʻau ni amo e faailoa atu ai e tatau ona auauna nei atunuu iā Papelonia. (Iere. 27:1-3, 14) E leʻi fiafia tagata i lenā feʻau, ma na atili ona faigatā le feʻau lē logoleleia a Ieremia ona o Hanania. O ia o se perofeta pepelo na faaaogāina i luma o le lautele le suafa o le Atua e faailoa atu ai o le a gauia le amo a Papelonia. Peitaʻi na fetalai mai Ieova e ala iā Ieremia, o le a oti Hanania i lenā lava tausaga, ma o le mea lenā na tupu.—Iere. 28:1-3, 16, 17.
(Ieremia 28:11) Ona fai mai lea o Hanania i luma o le nuu uma: “O le mea lenei ua fetalai mai ai Ieova, ʻE faapenei ona ou gauia le amo a Nepukanesa le tupu o Papelonia a o leʻi mavae tausaga atoatoa e lua, mai i ua o atunuu uma.’” Ona alu ai lea o Ieremia i lona ala.
jr 187-188 ¶11-12
“Ua Ou Lē Manofo”
11 E tāua ona manatua e lē o Ieremia o se tagata e maelega valea. Na ia faaaogā le mafaufau lelei ina ua feagai ma tagata tetee. Na ia iloa le taimi e tatau ona tuumuli ai. O se faaaʻoaʻoga, seʻi mafaufau i le mea na tupu iā i laʻua ma Hanania. Ina ua uma ona faasesēina e lenā perofeta pepelo upu faavaloaga a Ieova i luma o le lautele, na faasaʻo o ia e Ieremia ma faamatala le auala e iloa ai le perofeta moni. Na tauave e Ieremia se amo e faailoa atu ai e tatau ona latou auauna iā Papelonia; na matuā ita Hanania ma gauia le amo. Atonu na ono faia e Hanania se isi gaoioiga e sili atu ona leaga. Ae o le ā na faia e Ieremia? Ua taʻua: “Ona alu ai lea o Ieremia i lona ala.” Ioe, na tuua e Ieremia lenā nofoaga. Mulimuli ane, e ala i le taʻitaʻiga a Ieova na toe foʻi ai Ieremia ma taʻu atu iā Hanania mea o le a faia e le Atua, o le a ave faapagota Iuta e le tupu o Papelonia ma o le a oti Hanania.—Iere. 28:1-17.
12 E manino mai i lenei tala faagaeeina, pe a tatou auai i le talaʻiga, e tāua le faaalia o le lototele ma le mafaufau lelei. Pe a teena e se tagata i le talaʻiga se manatu faale-Tusi Paia, faaalia ni uiga sauā, pe faamataʻu mai, e ao ona tatou tuua ma le faaaloalo lona fale ae ō atu i se isi aiga. E lē tatau ona faia ni finauga ma so o se tasi e faatatau i le tala lelei o le Malo. Pe a “pulea lelei [i tatou] lava i tulaga leaga,” o le a maua ai le avanoa e fesoasoani ai i le tagata e ana le fale i se isi taimi talafeagai.—Faitau le 2 Timoteo 2:23-25; Faata. 17:14.
Faitau Tusi Paia
(Ieremia 27:12-22) Na ou tautala atu foʻi iā Setekaia le tupu o Iuta e tusa ma nei upu uma, e faapea: “Ia tuu atu o outou ua i le amo a le tupu o Papelonia, ia auauna iā te ia ma lona nuu ma ola ai pea. 13 Aiseā e te fia oti ai ma lou nuu i le pelu, o le oge, ma le faamaʻi, e tusa ma le mea na fetalai mai ai Ieova i le atunuu e lē auauna i le tupu o Papelonia? 14 Aua neʻi faalogo atu i upu a perofeta ua faapea mai iā te outou, ʻE tou te lē auauna i le tupu o Papelonia,’ auā ua latou vavalo atu mea pepelo iā te outou. 15 “ʻAuā ou te leʻi aauina atu i latou,’ ua fetalai mai ai Ieova, ʻa ua faia e i latou valoaga pepelo i loʻu igoa, o le mea lea ou te faataapeapeina ai outou, ma fano foʻi outou, o outou ma le ʻauperofeta o loo vavalo atu iā te outou.’” 16 Na ou fai atu foʻi i ositaulaga ma lenei nuu uma, e faapea: “O le mea lenei ua fetalai mai ai Ieova, ʻAua neʻi outou faalogo atu i upu a o outou perofeta ua vavalo atu iā te outou, e faapea: “Faauta! Ua toeitiiti nei ona toe aumaia lea o ipu o le fale o Ieova mai i Papelonia!” Auā ua latou vavalo atu mea pepelo iā te outou. 17 Aua neʻi faalogo atu iā i latou. Ia auauna i le tupu o Papelonia ma ola ai pea. Aiseā o le a fai ai lenei aai ma mea e faatafunaina? 18 Ae afai o ni perofeta i latou ma afai foʻi ua iā i latou le afioga a Ieova, seʻi o latou ʻaiʻoi atu iā Ieova o ʻau, ina ia lē avatua i Papelonia ipu o loo totoe i le fale o Ieova, ma le fale o le tupu o Iuta, ma Ierusalema.’ 19 “Auā o le mea lenei ua fetalai mai ai Ieova o ʻau e faatatau i poutū, o le vai, o taavale toso, ma e faatatau foʻi i ipu o loo totoe o loo iai pea i lenei aai, 20 o mea e leʻi avea e Nepukanesa le tupu o Papelonia, ina ua ia ave faapagota Iekonia le atalii o Ioakima, o le tupu o Iuta, mai i Ierusalema i Papelonia, faatasi ai ma tamālii uma o Iuta ma Ierusalema; 21 auā o le mea lenei ua fetalai mai ai Ieova o ʻau, o le Atua o Isaraelu e faatatau i ipu o loo totoe pea i le fale o Ieova, ma le fale o le tupu o Iuta, ma Ierusalema, 22 ʻ“E aveina atu lava na mea i Papelonia, ma e iai pea i inā seʻia oo i le aso ou te manatua ai i latou,” ua fetalai mai ai Ieova. “Ou te ave aʻe na mea ma toe faafoʻisia mai i lenei nofoaga.”’”
APERILA 24-30
ʻOA TAUTELE MAI I LE AFIOGA A LE ATUA | IEREMIA 29-31
“Na Valoia Mai e Ieova le Feagaiga Fou”
(Ieremia 31:31) “Faauta! E oo mai aso,” ua fetalai mai ai Ieova, “ou te osia ai se feagaiga fou ma le aiga o Isaraelu ma le aiga o Iuta.
it-1 524 ¶3-4
Feagaiga
Feagaiga Fou. Na valoia mai e Ieova le feagaiga fou i le senituri lona fitu T.L.M., e ala mai i le perofeta o Ieremia, ma na taʻua ai e lē tutusa le feagaiga lenei ma le feagaiga o le Tulafono lea na solia e Isaraelu. (Iere 31:31-34) Iā Nisani 14 i le 33 T.A i le po a o leʻi maliu Iesu, na ia faavae ai le Talisuaga Afiafi a le Alii, ma faalauiloa mai le feagaiga fou lea e faamaonia e ala i lana taulaga. (Lu 22:20) I le aso lona 50 talu ona toetū Iesu ma o le aso lona 10 lea talu ona toe afio aʻe i lona Tamā, na ia liligi mai ai le agaga paia lea na ia mauaina mai i lona Tamā, i luga i ona soo na faapotopoto i se potu pito i luga i Ierusalema.—Ga 2:1-4, 17, 33; 2Ko 3:6, 8, 9; Epe 2:3, 4.
O ē e aofia ai i le feagaiga fou lenei, o Ieova ma le “Isaraelu a le Atua.” O le Isaraelu a le Atua e faasino atu i ē ua faauuina i le agaga, ua latou aufaatasi ma Keriso, ma faia aʻe ai le faapotopotoga po o le tino. (Epe 8:10; 12:22-24; Ka 6:15, 16; 3:26-28; Ro 2:28, 29) Ua faagaoioia le feagaiga fou e ala i le toto na maligi (taulaga e faia i le soifua faaletagata) o Iesu Keriso, ma o le tāua o lenei taulaga na ofoina atu e Iesu iā Ieova ina ua afio i le lagi. (Mat 26:28) Pe a filifilia e le Atua se tasi i le valaau mo le lagi (Epe 3:1), e avatu e le Atua lenā tagata i Lana feagaiga e ala i le taulaga a Keriso. (Sl 50:5; Epe 9:14, 15, 26) O Iesu Keriso le Puluvaga o le feagaiga fou (Epe 8:6; 9:15) ma o le vaega autū o le Fanau a Aperaamo. (Ka 3:16) I le avea ai o Iesu ma Puluvaga o le feagaiga fou ua ia fesoasoani ai iā i latou e iai i le feagaiga ina ia avea ma suli moni o le fanau a Aperaamo (Epe 2:16; Ka 3:29) e ala i le faamagaloina o a latou agasala. Ua taʻuamiotonuina i latou e Ieova.—Ro 5:1, 2; 8:33; Epe 10:16, 17.
(Ieremia 31:32, 33) E lē pei o le feagaiga na ou osia ma o latou augātamā, i le aso na ou tago ai i o latou lima ma taʻitaʻi ese i latou mai i le nuu o Aikupito, ʻo laʻu feagaiga lea na latou solia, e ui ina avea aʻu ma tane o lē e ona i latou,’ ua fetalai mai ai Ieova.” 33 “Auā o le feagaiga lenei ou te osia ma le aiga o Isaraelu pe a mavae na aso,” ua fetalai mai ai Ieova. “Ou te tuuina laʻu tulafono i totonu iā i latou, ma ou te tusiaina foʻi i o latou loto. E fai aʻu ma o latou Atua, e fai foʻi i latou ma oʻu nuu.”
jr 173-174 ¶11-12
E Mafai Ona E Maua Aogā Mai i le Feagaiga Fou
11 Pe e te fia iloa isi vala e ese mai ai le feagaiga fou? O se tasi o eseesega tele o le feagaiga lenei ma le feagaiga a Mose, o le mea e tusia ai. (Faitau le Ieremia 31:33.) O Tulafono e Sefulu o le feagaiga o le Tulafono, na tusia i papamaa lea na mavae atu. Peitaʻi na valoia e Ieremia o tulafono o le feagaiga fou e tusia i loto o tagata, lea e lē mavae atu. E talisapaia e i latou e iai i le feagaiga fou, po o Kerisiano faauuina lenei tulafono. Ae faapefea i latou e lē aofia i le feagaiga fou po o “isi mamoe” ia e faamoemoe e ola e faavavau i le lalolagi? (Ioane 10:16) E latou te fiafia foʻi i le tulafono a le Atua. I se tulaga talitutusa, e pei i latou o tagata ese na aumau i Isaraelu, o ē na taliaina ma maua aogā mai i le Tulafono a Mose.—Levi. 24:22; Nu. 15:15.
12 Ae o le ā lau tali pe a fesili atu se tasi, ʻO le ā lenei tulafono e tusia i loto o Kerisiano faauuina?’ O lenei tulafono e taʻua foʻi o le “tulafono a le Keriso.” Na tuuina atu muamua lenei tulafono i le Isaraelu faaleagaga, o ē e iai i le feagaiga fou. (Kala. 6:2; Roma 2:28, 29) E mafai ona aotele le “tulafono a le Keriso” i le upu e tasi: alofa. (Mata. 22:36-39) E faapefea ona tusia lenei tulafono i loto o le ʻaufaauuina? O auala autū e faia ai faapea, o le suʻesuʻeina lea o le Afioga a le Atua ma faalatalata iā Ieova i le tatalo. O le mea moni, o na vala o le tapuaʻiga moni e tatau foʻi ona avea ma vala masani o le olaga o Kerisiano moni uma, e aofia ai ē e lē o iai i le feagaiga fou ae e fia maua aogā mai i lenā feagaiga.
(Ieremia 31:34) “E lē toe aʻoaʻo atu foʻi se tasi i lana aumea, e lē toe aʻoaʻo atu foʻi se tasi i lona uso, e faapea atu, ʻIa outou iloa Ieova!’ auā e iloa aʻu e i latou uma, e amata mai i lē e aupito faatauvaa e oo i lē e sili o i latou,” ua fetalai mai ai Ieova. “Auā ou te faamagaloina a latou mea sesē, ma ou te lē toe manatuaina a latou agasala.”
jr 177 ¶18
E Mafai Ona E Maua Aogā Mai i le Feagaiga Fou
18 O le feagaiga fou ua faamatilatila ai se vala mataʻina o feutagaʻiga a Ieova ma tagata agasala, e aofia ai le ʻaufaauuina o loo iai i le feagaiga, ma i latou e maua le faamoemoe i le lalolagi. Ia e mautinoa, o le taimi lava e faamagalo ai e Ieova au agasala e na te lē toe taʻua lava. O le folafolaga a Ieova e faatatau i le feagaiga fou ua tatou aʻoaʻoina mai ai se lesona. Ia fesili ifo, ʻPo o oʻu taumafai e faaaʻoaʻo iā Ieova, i le lē toe taʻua o sesē o isi ua uma ona ou faamagaloina?’ (Mata. 6:14, 15) E faatatau atu lenei manatu i mea sesē lāiti ma mea sesē matuiā, e pei o le faia e le paaga a se Kerisiano o le mulilua. Pe afai ua salamō lē na mulilua ma ua faamagalo e le paaga o loo mamā, pe lē talafeagai la ona ʻlē toe manatuaina lenā agasala’? Atonu e lē faigofie le faamagaloina o se mea sesē, peitaʻi o se tasi lenā o auala e tatou te faaaʻoaʻo ai iā Ieova.
Saʻiliʻiliga Loloto mo ʻOa Faaleagaga
(Ieremia 29:4) “O le mea lenei ua fetalai mai ai Ieova o ʻau, o le Atua o Isaraelu i le nuu uma na ave faapagota, o ē na ou ave faapagota mai i Ierusalema i Papelonia,
(Ieremia 29:7) Ia outou saʻili foʻi i le filemu o le aai na ou ave faapagota i ai outou, ma ia tatalo iā Ieova mo le aai, auā o lona filemu e tou te filemu ai foʻi.
Le Atua ma Kaisara
5 I senituri mulimuli ane, sa faagaeeina ai e Ieova le perofeta o Ieremia e taʻu atu i tagata Iutaia na faatafea, ina ia latou gauaʻi atu i pule a o latou faatafea ai i Papelonia ma ia tatalo foʻi mo se manuia o lenā aai. I lana tusi atu i ia tagata, na ia tusi ai: “O loo faapea ona fetalai mai o Ieova o ʻau, le Atua o Isaraelu, i le tafeaga uma, . . . Ia outou saʻiliʻili foʻi ia manuia le aai ua ou faatāfea ai outou; ma ia outou tatalo atu ia Ieova mo lenā aai; auā o lona manuia e manuia ai outou.” (Ieremia 29:4, 7) E masani pea ona iai i tagata o Ieova māfuaaga e ao ai ona “saʻili i le filemu” mo i latou lava ma i le atunuu o loo latou nonofo ai, ina ia maua le saʻolotoga e tapuaʻi atu ai iā Ieova.—1 Peteru 3:11.
(Ieremia 29:10) “Auā o le mea lenei ua fetalai mai ai Ieova, ʻPe a atoa tausaga e fitu sefulu i Papelonia, ona ou liliu atu lea iā te outou, ma ou faataunuuina iā te outou laʻu upu lelei i le toe faafoʻisia mai o outou i lenei mea.’
Le Tusi Paia—O se Tusi o Valoaga e Saʻo Aʻiaʻi, Vaega 2
Faataunuuga: Ina ua mavae le 70 tausaga o le tafeaga, mai i le 607 e oo i le 537 T.L.M., na faasaʻolotoina ai e le tupu o Peresia o Kuresa, ia tagata Iutaia mai le faaaunuua, ma faataga i latou e toe foʻi i lo latou laueleele e toe fausia le malumalu i Ierusalema.—Esera 1:2-4.
Mea o loo faaalia mai i le talafaasolopito:
● Pe na faaauau ona faaaunuua tagata Isaraelu i Papelonia mo le 70 tausaga e pei ona valoia i le Tusi Paia? Mātau le faamatalaga a Ephraim Stern, o se tagata Isaraelu e sili ona atamai i suʻesuʻega o toega o mea i le eleele. “Mai i le 604 T.L.M e oo i le 538 T.L.M.—e leai ni faamaoniga e iloa ai na toe nofoia e se tasi le aai o Isaraelu. I lenā taimi atoa, e leai ma se aai e tasi na faatamaʻia e ʻautau a Papelonia na toe nofoia.” O le taʻua o le umi e leʻi toe nofoia pe galueaʻiina ai le aai na faaumatia, e tutusa lelei lava ma le taimi na faaaunuua ai Isaraelu i Papelonia mai i le 607 e oo i le 537 T.L.M.—2 Nofoaiga a Tupu 36:20, 21.
Faitau Tusi Paia
(Ieremia 31:31-40) “Faauta! E oo mai aso,” ua fetalai mai ai Ieova, “ou te osia ai se feagaiga fou ma le aiga o Isaraelu ma le aiga o Iuta; 32 e lē pei o le feagaiga na ou osia ma o latou augātamā, i le aso na ou tago ai i o latou lima ma taʻitaʻi ese i latou mai i le nuu o Aikupito, ʻo laʻu feagaiga lea na latou solia, e ui ina avea aʻu ma tane o lē e ona i latou,’ ua fetalai mai ai Ieova.” 33 “Auā o le feagaiga lenei ou te osia ma le aiga o Isaraelu pe a mavae na aso,” ua fetalai mai ai Ieova. “Ou te tuuina laʻu tulafono i totonu iā i latou, ma ou te tusiaina foʻi i o latou loto. E fai aʻu ma o latou Atua, e fai foʻi i latou ma oʻu nuu.” 34 “E lē toe aʻoaʻo atu foʻi se tasi i lana aumea, e lē toe aʻoaʻo atu foʻi se tasi i lona uso, e faapea atu, ʻIa outou iloa Ieova!’ auā e iloa aʻu e i latou uma, e amata mai i lē e aupito faatauvaa e oo i lē e sili o i latou,” ua fetalai mai ai Ieova. “Auā ou te faamagaloina a latou mea sesē, ma ou te lē toe manatuaina a latou agasala.” 35 O le mea lea ua fetalai mai ai Ieova, O Lē na tuuina mai le lā ina ia malamalama ai le ao, o tulafono o le masina ma fetu ina ia malamalama ai le pō, o Lē e faagaepu le sami ina ia ū mai ona galu, o Lē foʻi o lona suafa o Ieova o ʻau: 36 “ʻAfai e mafai ona aveesea nei tulafono mai i oʻu luma,’ ua fetalai mai ai Ieova, ʻe mafai foʻi la ona lē toe avea i latou o le fanau a Isaraelu ma nuu i oʻu luma i aso uma.’” 37 O le mea lenei ua fetalai mai ai Ieova: “ʻAfai e mafai ona fuatia le lagi i lugā, ma suʻesuʻeina faavae o le lalolagi i lalō, o aʻu foʻi, e mafai ona ou teena le fanau atoa a Isaraelu ona o mea uma na latou faia,’ ua fetalai mai ai Ieova.” 38 “Faauta! E oo mai aso,” ua fetalai mai ai Ieova, “e fausia ai lava le aai iā Ieova, e amata mai i le ʻOlo o Hananiali e oo atu i le Faitotoʻa o le Tulimanu. 39 E alu atu lava le manoa e fua ai, e alu atu saʻo i luma o le aʻega o Karepa, ma faataamilo ane ai i Koata. 40 E avea o se mea e paia iā Ieova o fanua laugatasi uma ua iai tino oti, o lefulefu gaʻoa, o fanua uma e oo atu i le vanu o Ketarono, e oo atu i le tulimanu o le Faitotoʻa o Solofanua, ma agaʻi atu i le mea e oso aʻe ai le lā. E lē liaʻiina, pe e toe soloia foʻi i lalo e oo lava i le faavavau.”