Esera

1 O le tausaga muamua o Kuresa+ le tupu o Peresia, na faatupu+ ai e Ieova le agaga o Kuresa le tupu o Peresia, ina ia faataunuu ai le afioga a Ieova na fai mai ai Ieremia,+ ona ia faaoo atu lea o le feʻau+ i lona malo uma, ma na tusia i le tusi+ e faapea:

2 “O le mea lenei ua fai mai ai Kuresa le tupu o Peresia,+ ‘Ua foaʻi mai e Ieova le Atua o le lagi+ o malo uma o le lalolagi iā te aʻu,+ ua ia tofia foʻi aʻu e fauina se fale i Ierusalema+ o loo i Iuta. 3 O so o se tasi o outou mai i lona nuu uma, ia faatasi lona Atua iā te ia.+ Inā alu aʻe ia o ia i Ierusalema, o loo i Iuta, ma toe fausia le fale o Ieova le Atua o Isaraelu, (o le Atua moni o ia)+ o loo iai i Ierusalema.+ 4 O so o se tasi o totoe i nuu uma o loo aumau ai o ia o se tagata ese,+ ia fesoasoani ane i ai se tagata o lona nuu i siliva, o auro, o oloa, o manu lalata, faatasi ai ma taulaga tauofo+ mo le fale o le Atua moni, o loo i Ierusalema.’”

5 Ona tutū lea i luga o ulu+ o aiga o tamā o Iuta ma Peniamina, o ositaulaga ma le ʻau sa Levī, e oo lava i ē uma na uunaʻia*+ e le Atua moni ina ia ō aʻe ma toe fausia le fale o Ieova+ o loo i Ierusalema. 6 E oo foʻi i o latou tuaoi, ua latou fesoasoani+ iā i latou i ipu siliva, o auro, o oloa, o manu lalata, ma mea mananaia e ese mai i mea uma na foaʻi+ atu.

7 Na aumaia foʻi e le Tupu o Kuresa ipu o le fale o Ieova,+ na ave e Nepukanesa mai i Ierusalema+ ma tuu i le fale o lona atua.+ 8 Ona aumaia lea o ia mea e Kuresa le tupu o Peresia i le vaavaaiga a Metereta le teutupe, ma ua ia faitauina atu iā Sesepasara+ le taʻitaʻi o Iuta,+ ma tuuina atu iā te ia.

9 O le aofaʻi nei o ia mea: e tolu sefulu ipu auro e pei o ni ato, e afe ipu siliva e pei o ni ato, e lua sefulu iva ipu e sui aʻi, 10 e tolu sefulu tamaʻi ipu+ auro faaofuofu, e fā selau sefulu tamaʻi ipu siliva faaofuofu e faaaogā i isi mea, ma isi ipu e afe. 11 O ipu auro uma ma ipu siliva e lima afe fā selau. Na ave aʻe e Sesepasara+ mea uma faatasi ma le aveina aʻe o le nuu na ave faapagota+ mai i Papelonia i Ierusalema.