Salamo

38 Ieova e, aua e te aʻoaʻi mai iā te aʻu i lou toʻatamaʻi,+

Aua foʻi e te faatonu mai iā te aʻu i lou toʻasā.+

 2 Auā ua matuā ati au aū i totonu iā te aʻu,+

Ua mamafa foʻi lou aao i luga iā te aʻu.+

 3 E leai se itu o loʻu tino ua sao ona o lau aʻoaʻiga.+

E leai foʻi se filemu i oʻu ivi ona o laʻu agasala.+

 4 Auā ua oo i luga aʻe o loʻu ulu oʻu sesē;+

Ua mamafa tele mo aʻu e pei o se avega mamafa.+

 5 Ua manogi leaga oʻu manuʻa ma ua aloua,

Ona o loʻu valea.+

 6 Ua ou lē mautonu, ma ua ou matuā ifo toʻele;+

Ua ou fesavaliaʻi solo ma le faanoanoa i le aso atoa.+

 7 Auā ua mū loʻu manava,

Ma e leai foʻi se itu o loʻu tino ua sao.+

 8 Ua gase loʻu tino ma ua matuā nutimomomo;

Ua ou faataiō ona o le ōi o loʻu loto.+

 9 Ieova e, ua i ou luma oʻu faanaunauga uma,

Ma e lē o lilo foʻi iā te oe loʻu ōi.+

10 Ua matuā tātā vale loʻu fatu, ma ua mou atu loʻu malosi,

O le malamalama foʻi o oʻu mata, ua lē iā te aʻu lea.+

11 A o ē ou te alofa i ai ma aʻu aumea, ua tutū mamao ese i latou mai i loʻu mala,+

Ma o ē foʻi e matou te masani lelei, ua tutū mamao ese i latou.+

12 A ua faia ni mailei e i latou o ē e saʻili e fasioti iā te aʻu,+

Ma ua tautatala foʻi faasaga iā te aʻu i latou ua taumafai e faaleaga iā te aʻu,+

Ua latou tautatala pea i upu taufaasesē i le aso atoa.+

13 A ua pei aʻu o se tagata tutuli, ua ou lē faalogo;+

Ua pei foʻi aʻu o se tagata gūgū, ua lē tautala loʻu gutu.+

14 Ua pei aʻu o se tagata e leʻi lagona,

Ma e leʻi finau atu foʻi loʻu gutu i ni upu.

15 Auā ou te faatalitali atu iā te oe Ieova e;+

Ieova e, loʻu Atua, e te tali mai lava.+

16 Auā na ou faapea ifo: “Ina neʻi latou olioli iā te aʻu;+

Pe a tautevateva loʻu vae,+ ona latou tautatala lea i upu faasausili e faasagatau mai iā te aʻu.”+

17 Na toeitiiti lava a ou paʻū,+

Ma sa iai pea i oʻu luma loʻu tigā.+

18 Auā na ou taʻu atu loʻu sesē;+

Ona ou fāʻatu ai lea i laʻu agasala.+

19 Ua malolosi oʻu fili o loo feola,+

E toʻatele foʻi o ē ua feita fua mai iā te aʻu.+

20 Ua latou taui mai iā te aʻu le leaga i le lelei;+

Ua latou tetee mai pea iā te aʻu e taui mai ona o loʻu faia o le mea lelei.+

21 Ieova e, aua e te tuua aʻu.

Loʻu Atua e, aua e te taumamao mai iā te aʻu.+

22 Ia e fesoasoani vave mai iā te aʻu,+

Ieova e, loʻu faaolataga.+