Teuteronome

11 “E ao ona e alofa iā Ieova lou Atua+ ma tausia pea lau matafaioi iā te ia, o ana tulafono, o iʻuga o ana faamasinoga+ ma ana poloaʻiga. 2 Ua outou iloa lelei ou te tautala atu ai iā te outou i le asō. (Ou te lē tautala atu i ou atalii o ē e leʻi iloa ma e leʻi vāai foʻi i aʻoaʻiga a Ieova+ lo outou Atua, o lona silisili ese,+ o lona aao malosi+ ma lona aao faaloaloa,+ 3 i ana faailoga ma ana galuega na ia faia i Aikupito+ iā Farao le tupu o Aikupito, atoa ma lona atunuu uma; 4 o le mea foʻi na ia faia i ʻautau a Aikupito, o ana solofanua, o ana kariota o le taua, ma faasagatau i ē na ia ufitia i suāsami o le Sami Ulaula o ē na tuliloaina i latou,+ ma na faaumatia i latou e Ieova seʻia oo mai i le aso nei;+ 5 po o mea na ia faia iā te outou i le toafa seʻia oo ina outou ō mai i lenei nofoaga; 6 po o le mea na ia faia iā Tatano ma Apiramo+ o atalii ia o Eliapo, o le atalii lea o Reupena, ina ua faamaga le gutu o le eleele ma folo ai i latou ma o latou aiga ma o latou faleʻie, ma so o se mea e iai le ola na mulimuli iā i latou i luma o Isaraelu uma).+ 7 Na vāai i ai o outou lava mata i ia galuega mamana na faia e Ieova.+

8 “Ia outou tausia poloaʻiga uma+ ua ou poloaʻi atu ai i le aso nei iā te outou, ina ia outou malolosi ai ma ō atu ma fai mo outou le laueleele lea o le a outou sopo atu i ai ina ia fai mo outou,+ 9 ma ia faaumiumi+ ai o outou aso i le laueleele lea na tautō atu ai Ieova i o outou augātamā, e avatu iā i latou ma a latou fanau,+ o le laueleele e tafe ai le suāsusu ma le meli.+

10 “Auā e lē pei le laueleele lea o le a fai mo outou, e pei o le atunuu o Aikupito lea na outou ō ese mai ai, o le mea na masani ona outou lūlū ai fatu ma faasūsū le laueleele i lou vae, e pei o se faatoʻaga laau ʻaina. 11 Ae o le laueleele lea o le a outou sopo atu i ai e fai mo outou, o se laueleele e tele ai mauga ma vanu laugatasi.+ E inu lava i le timu mai i le lagi; 12 o le laueleele lea ua tausia e Ieova lou Atua. O loo silasila pea i ai fofoga+ o Ieova lou Atua, e mai i le amataga o le tausaga seʻia oo i le faaiʻuga o le tausaga.

13 “Pe afai tou te usiusitaʻi lava i aʻu poloaʻiga+ ua ou poloaʻi atu ai iā te outou i le asō, ia alolofa iā Ieova lo outou Atua, ma auauna iā te ia ma o outou lotoatoa, ma o outou ola atoa,+ 14 ou te avatua le timu i o outou laueleele i ona taimi atofaina,+ o timuga i le tau e afu ai mea ma timuga i le tau e totogo ai mea,+ e te aoao foʻi au fatu ma lau uaina suamalie ma lau suāuu. 15 Ou te avatu foʻi vao i lou fanua mo au manu lalata,+ ma e te ʻai ma e maʻona ai.+ 16 Ia outou leoleo iā te outou lava ina neʻi faasesēina o outou loto,+ ma outou liliuese ai ma tapuaʻi atu i isi atua ma ifo atu i ai,+ 17 ma e matuā toʻasā Ieova iā te outou ma ia punitia le lagi ina ia lē timu ai,+ e lē fua mai foʻi le laueleele ma e vave ona fano outou mai i le nuu lelei lea e avatu e Ieova iā te outou.+

18 “E ao ona outou manatua aʻu upu nei i o outou loto+ ma i o outou olaga, ia e fusi i ia mea i lou lima e fai ma faailoga, ia fai foʻi ma fusi i lou muāulu.*+ 19 Ia outou aʻoaʻo ia upu i a outou fanau, ina ia e tautala atu iā i latou pe a e nofo i lou fale, pe a e savali i le ala, pe a e taoto, pe a tulaʻi foʻi.+ 20 E ao ona e tusi foʻi ia mea i pou o le faitotoʻa o lou fale ma faitotoʻa o le aai,+ 21 ina ia faateleina ai o outou aso ma aso o a outou fanau+ i le laueleele lea na tautō ai Ieova e avatu i o outou augātamā,+ e pei ona iai pea le lagi i luga o le lalolagi.+

22 “Auā afai tou te matuā tausisi i nei poloaʻiga+ uma ua ou poloaʻi atu ai iā te outou ina ia faia ia mea, ia alolofa iā Ieova lo outou Atua,+ ia savavali i ona ala+ uma ma pipii atu iā te ia,+ 23 ona tuliesea lea e Ieova o nei nuu uma ona o outou,+ e tou te faatoʻilaloina nuu malolosi ma e toʻatele ona tagata nai lo o outou.+ 24 E fai mo outou o mea uma e savavali ai alofivae o o outou vae.+ O lo outou tuaoi+ e mai i le toafa e oo i Lepanona, e mai i le Vaitafe, o le vaitafe lea o Eufirate, e oo atu i le sami i le itu i sisifo. 25 E leai se tagata e mafai ona tū mausalī e tetee atu iā te outou.+ E tuuina atu le atuatuvale ma le fefe e Ieova lo outou Atua i tagata o le laueleele+ atoa lea o le a outou savavali ai, e pei ona ia folafola mai iā te outou.

26 “Vaai, ua ou tuuina i o outou luma i le asō, le manuia ma le malaia:+ 27 o le manuia, pe afai e tou te usiusitaʻi i poloaʻiga a Ieova lo outou Atua,+ ia ua ou poloaʻi atu ai iā te outou i le asō; 28 o le malaia,+ pe afai e tou te lē usiusitaʻi i poloaʻiga a Ieova lo outou Atua,+ ma outou liliuese mai i le ala ua ou poloaʻi atu ai iā te outou i le asō, ma mulimuli i isi atua e tou te leʻi iloa.

29 “O le mea e tupu, pe a avatu e Ieova lou Atua oe i le laueleele lea e te alu i ai ma fai mo oe,+ ia e tuuina atu le faamanuiaga mai i le Mauga o Keresema,+ a o le faamalaia mai i le Mauga o Evalu.+ 30 Pe e lē o iai ia mauga i le itu o Ioritana i le itu e goto i ai le lā, i le laueleele o tagata Kanana i le laufanua o Arapa,+ i luma o Kilikala,+ i autafa o laau maualuluga o Morē?+ 31 Auā o le a outou sopo atu i Ioritana ma ō atu e fai mo outou le laueleele e avatu e Ieova lo outou Atua iā te outou, ma e ao ona fai mo outou lea laueleele ma nonofo ai.+ 32 Ia outou tōʻaaga e faia tulafono ma iʻuga o faamasinoga+ ua ou tuuina atu i o outou luma i le asō.+