Levitiko

8 Ua toe fetalai mai Ieova iā Mose e faapea: 2 “Ia aumai Arona ma ona atalii faatasi ma ia,+ o ofu,+ o le suāuu e faauu ai,+ o le povi poʻa o le taulaga o agasala, o mamoe poʻa e lua, o le ato o falaoa e lē faafefeteina,+ 3 ma ia faapotopoto le faapotopotoga atoa i luma o le faitotoʻa o le faleʻie o le feiloaʻiga.”

4 Ua faia e Mose e pei ona poloaʻi mai ai Ieova iā te ia, ma ua faapotopoto faatasi le faapotopotoga uma i luma o le faitotoʻa o le faleʻie o le feiloaʻiga. 5 Ua faapea atu Mose i le faapotopotoga: “O le mea lenei ua poloaʻi mai Ieova e fai.” 6 Ona aumaia lea e Mose o Arona ma ona atalii, ua ia faatonuina i latou e tāʻeele i le vai.+ 7 Ona ia faaofu lea o ia i le ofu talaloa,+ fusi o ia i le fusi ʻie,+ faaofu o ia i le ofu talaloa lima pupuu,+ ma faaofu o ia i le efota+ ma fusi ai i le fusi ua teuteuina+ o le efota, ina ia mau lelei ai iā te ia. 8 Ona ia avane ai lea o le ufifatafata,+ ma tuu ai le Urima ma le Tumema+ i le ufifatafata. 9 Ona ia nonoa lea i luga o lona ulu o le pulou ʻie,+ ma tuu le pale auro iila o le faailoga paia lea o le tuuina atu*+ i luma o le pulou ʻie, e pei ona poloa‘i mai ai Ieova iā Mose.

10 Ua ave foʻi e Mose o le suāuu e faauu ai ma faauu i le faleʻie paia, ma mea uma lava ua iai,+ ma faapaiaina na mea. 11 Ua ia sausau faafitu sina vaega o le suāuu i luga o le fata faitaulaga, ma faauu ai le fata faitaulaga, o mea uma e faaaogā ai, o le faatanoa ma lona tulaga, ina ia faapaiaina ai ia mea. 12 Ona ia liligi lea o se vaega o le suāuu e faauu ai i luga o le ulu o Arona, ma faauu ai o ia ina ia faapaiaina ai o ia.+

13 Ona aumaia lea e Mose o atalii o Arona ma faaofu i latou i ofu talaloa, ma fusi iā i latou i fusi ʻie, ma nonoa pulou i o latou ulu,+ e pei ona poloaʻi mai ai Ieova iā Mose.

14 Ona ia aumai lea o le povi poʻa e fai ai le taulaga o agasala, ua faaee foʻi e Arona ma ona atalii o latou lima i luga o le ulu o le povi poʻa o le taulaga o agasala.+ 15 Ona fasi lea e Mose o le povi poʻa ma ave le toto,+ ua lolō i ai lona tamatamaʻilima ma nini ai seu o le fata faitaulaga i ona itu uma, ma faapaiaina ai le fata faitaulaga mai i le agasala, a o le toto ua totoe, ua ia sasaa i lalo o le fata faitaulaga, ina ia faapaiaina ai ma faia ai le togisala i luga o le fata faitaulaga. 16 Ona ia ave lea o gaʻo uma ua ufiufi ai gaʻau, o le gaʻo o le ate, ma fatugaʻo e lua ma gaʻo o ia mea, ma ua susunuina ai e Mose i luga o le fata faitaulaga.+ 17 Ona ia susunu lea o isi vaega uma o le povi poʻa na totoe, e aofia ai lona paʻu, o lona aano, ma ona otaota i tua o le togālauapi,+ e pei ona poloaʻi mai ai Ieova iā Mose.

18 Ona ia aumaia lea o le mamoe poʻa o le taulaga mū, ma ua faaee foʻi e Arona ma ona atalii o latou lima i luga o le ulu o le mamoe poʻa.+ 19 Ona fasi lea e Mose o le mamoe poʻa ma sausau le toto i itu uma o le fata faitaulaga. 20 Ua ia pena le mamoe poʻa i tufaaga, ona susunuina ai lea e Mose o le ulu, o tufaaga, ma le gaʻo.* 21 Ua ia fufulu gaʻau ma vae* i le vai, ona susunu atoa lea e Mose o le mamoe poʻa i luga o le fata faitaulaga. O le taulaga mū ua fai ma manogi lelei.* O se taulaga iā Ieova ua faia i le afi, e pei ona poloaʻi mai ai Ieova iā Mose.

22 Ua ia aumaia le mamoe poʻa lona lua, o le mamoe poʻa o le tofiga,+ ma ua faaee foʻi e Arona ma ona atalii o latou lima i luga o le ulu o le mamoe poʻa.+ 23 Ona fasi ai lea e Mose ma ave sina toto ma tuu i le lautaliga taumatau o Arona, ma i luga foʻi o le limamatua o lona lima taumatau, ma le vaematua o lona vae taumatau. 24 Ona aumaia ai lea e Mose o atalii o Arona ma tuu sina vaega o le toto i lautaliga o o latou taliga taumatau, i limamatua o o latou lima taumatau, ma vaematua o o latou vae taumatau; a o le toto ua totoe ua sausau e Mose i itu uma o le fata faitaulaga.+

25 Ua ia ave foʻi le gaʻo, o le siʻusiʻu gaʻoa, o gaʻo uma i luga o gaʻau, o le gaʻo o le ate, o fatugaʻo e lua ma le gaʻo o ia mea, ma le alagavae taumatau.+ 26 Ua ia aumai mai i le ato o falaoa e lē faafefeteina lea o loo i luma o Ieova, o le falaoa e lē faafefeteina lapotopoto+ e tasi, atoa ma le falaoa lapotopoto e tasi ua iai sina uu,+ ma le falaoa manifinifi e tasi. Ona ia tuu lea o ia mea i luga o le gaʻo ma le alagavae taumatau. 27 Ua ia tuu o ia mea uma i luga o alofilima o Arona ma luga o alofilima o ona atalii, ona lūlū ai lea o ia mea i le isi itu ma le isi itu, o le taulaga lūlū lea iā Ieova. 28 Ona aveese lea e Mose o ia mea mai i o latou lima ma susunu i luga o le fata faitaulaga, e susunu faatasi ma le taulaga mū. O le taulaga o le tofiga lea, o se manogi lelei.* O le taulaga iā Ieova ua faia i le afi.

29 Ua ave foʻi e Mose o le fatafata ma lūlū i le isi itu ma i le isi itu, o le taulaga lūlū lea i luma o Ieova.+ E fai mo Mose lenei tufaaga mai i le mamoe poʻa o le tofiga, e pei ona poloaʻi mai ai Ieova iā Mose.+

30 Ona ave lea e Mose o sina suāuu e faauuina ai,+ ma se vaega o le toto o loo i luga o le fata faitaulaga, ua sausau i luga o Arona ma ona ofu, i luga o ona atalii ma ofu o ona atalii faatasi ma ia. O le mea lea, ua ia faapaiaina ai Arona ma ona ofu, faapea ona atalii+ ma o latou ofu.+

31 Ona fai atu lea o Mose iā Arona ma ona atalii: “Ia saka+ le aano o le manu i luma o le faitotoʻa o le faleʻie o le feiloaʻiga, ma o i inā foʻi tou te aai ai i le aano o le manu, atoa ma le falaoa ua i totonu o le ato o le tofiga, e pei ona ou poloaʻi atu e faapea, ‘E ʻai e Arona ma ona atalii.’+ 32 A o mea ua totoe o le aano o le manu ma falaoa, e tou te susunuina i le afi.+ 33 Aua neʻi outou ulufafo i le faitotoʻa o le faleʻie o le feiloaʻiga mo aso e fitu, se‘ia māe‘a aso e tofia ai outou, auā e fitu aso e tofia ai outou o ni ositaulaga.*+ 34 Ua poloaʻi mai Ieova e faia mea ua tatou faia i le asō, ina ia faia ai le togisala mo outou.+ 35 Ia outou nonofo i le faitotoʻa o le faleʻie o le feiloaʻiga i le ao ma le pō i aso e fitu,+ ma faia la outou tiute iā Ieova,+ ina neʻi outou feoti; auā ua faapea lava ona poloa‘iina ai a‘u.”

36 Ua faia e Arona ma ona atalii o mea uma ua poloaʻi mai ai Ieova e ala iā Mose.