Esera

7 Ua mavae ia mea, ma a o faagasolo le nofoaiga a Aretaseta+ le tupu o Peresia, na toe fo‘i mai ai Esera.*+ O ia o le atalii o Seraia,+ le atalii o Asaraia, le atalii o Hilikia,+ 2 le atalii o Saluma, le atalii o Satoka, le atalii o Akitopo, 3 le atalii o Amaria, le atalii o Asaraia,+ le atalii o Meraiota, 4 le atalii o Serakia, le atalii o Usi, le atalii o Puki, 5 le atalii o Apisua, le atalii o Fineaso,+ le atalii o Eleasaro,+ o le atalii o Arona+ le ositaulaga sili. 6 O Esera lenei na alu a‘e mai i Papelonia. Sa avea o ia o se tusiupu e tomai i le Tulafono a Mose,+ lea na tuuina mai e Ieova le Atua o Isaraelu. Na tuuina mai e le tupu o mea uma na talosaga atu ai Esera, auā sa i luga iā te ia le aao o Ieova lona Atua.

7 I le tausaga lona fitu o le nofoaiga a le tupu o Aretaseta, na ō aʻe ai i Ierusalema nisi o le fanauga a Isaraelu, o le ʻauositaulaga, o le ʻau sa Levī,+ o tagata pepese,+ o leoleo faitotoʻa,+ ma auauna o le malumalu.*+ 8 Ona sau lea o Esera i Ierusalema i le masina lona lima, o le tausaga lona fitu o le nofoaiga a le tupu. 9 I le aso muamua o le uluaʻi masina, na amata ai lana malaga mai i Papelonia, ma o le aso muamua o le masina lona lima na oo atu ai o ia i Ierusalema, ona o le aao agalelei o lona Atua sa iā te ia.+ 10 Ua saunia e Esera lona loto e saʻili atu ma tausia le Tulafono a Ieova,+ ma aʻoaʻo atu i Isaraelu tulafono ma le faamasinogatonu.+

11 O le kopi lenei o le tusi na avatu e le tupu o Aretaseta iā Esera le ositaulaga, o ia o le tusiupu ma o sē e tomai i le suʻesuʻeina o poloaʻiga ma tulafono a Ieova iā Isaraelu:

12 * “O Aretaseta,+ le tupu o tupu, iā Esera le ositaulaga, o le tusiupu o le Tulafono a le Atua o le lagi: Ia iā te oe le filemu atoatoa. O lenei, 13 ua ou avatu le faatonuga iā i latou uma o le nuu o Isaraelu o loo i loʻu malo, o o latou ositaulaga ma le ʻau sa Levī, o i latou uma o loo naunau e fia ō i Ierusalema, ia latou ō faatasi ma oe.+ 14 Auā ua auina atu oe e le tupu ma ana faufautua e toʻafitu, ina ia suʻesuʻe po o tausia e Iuta ma Ierusalema le Tulafono a lou Atua ua i lou lima, 15 ma ave siliva ma auro ua foaʻi atu ma le loto i ai e le tupu ma ana faufautua mo le Atua o Isaraelu, o lē e afio i Ierusalema, 16 faatasi ma siliva uma ma auro na e maua i le itumalo o Papelonia, faapea ma meaalofa tauofo a le nuu ma ositaulaga na foaʻi atu i le fale o lo latou Atua, o loo i Ierusalema.+ 17 Ia vave ona e faatauina mai i lenei tupe o povi poʻa,+ o mamoe poʻa,+ o tamaʻi mamoe,+ faapea meaʻai ma meainu e ofoina atu+ faatasi ma nei mea, ma ia e ofoina atu ia mea i luga o le fata faitaulaga o le fale o lo outou Atua o loo i Ierusalema.

18 “O mea uma e lelei iā te oe ma ou uso e fai i siliva ma auro ua totoe, ia outou faia e tusa ai ma le finagalo o lo outou Atua. 19 O ipu foʻi ua avatu iā te oe mo le auaunaga i le fale o lou Atua, ia avatu uma i Ierusalema i luma o le Atua.+ 20 A o isi mea uma e manaʻomia o le fale o lou Atua e tatau ona e avatu, ia e avatua ia mai i le fale teuoloa a le tupu.+

21 “O aʻu o le tupu o Aretaseta, ua ou tuuina atu le faatonuga i teutupe uma i le vaipanoa i tala atu o le vaitafe,* ia outou vave faia mea uma lava e talosaga atu ai Esera+ le ositaulaga, o le tusiupu o le Tulafono a le Atua o le lagi, 22 e oo lava i le 100 taleni* o siliva, o le 100 kori* o saito, o le 100 paita* o uaina,+ o le 100 paita o suāuu,+ ma masima+ e matuā tele lava. 23 Ia faia ma le maelega mea uma ua faatonu mai e le Atua o le lagi, mo le fale o le Atua o le lagi,+ ina ia lē oo mai ai le toʻatamaʻi i le malo o le tupu ma ona atalii.+ 24 Ua faailoa atu foʻi iā te outou, e faasā ona tāpā ni lafoga a tagata taʻitoʻatasi, o lafoga o oloa,+ po o lafoga o auala mai i le ʻauositaulaga, o le ʻau sa Levī, o ē e tāina meafaifaaili,+ o leoleo faitotoʻa, o auauna o le malumalu,*+ ma ē e galulue i le fale o le Atua.

25 “A o oe Esera, e tusa ma le atamai ua foaʻi mai e lou Atua iā te oe,* ia e tofia ni faamasino lagolago ma faamasino, ina ia latou faamasinoina le nuu uma o loo i le vaipanoa i tala atu o le vaitafe, o i latou uma ua iloa tulafono a lou Atua; ma o so o se tasi e na te lē iloa tulafono, ia outou aʻoaʻo atu iā i latou.+ 26 O tagata uma foʻi e lē tausia le Tulafono a lou Atua ma le tulafono a le tupu, ia vave faaoo i ai le faasalaga iā te ia, a lē o le oti, o le faate‘aese, o se sala tupe, pe faafalepuipui foʻi.”

27 Ia viia Ieova le Atua o o tatou augātamā, o lē ua tuuina lenei mea i le loto o le tupu, ina ia faamatagofieina le fale o Ieova o loo i Ierusalema!+ 28 Ua alofa faamaoni mai o ia iā te aʻu i luma o le tupu+ ma ana faufautua,+ ma luma o perenise malolosi uma a le tupu. Ona ou lototele lea ona sa iā te a‘u le aao o Ieova loʻu Atua, ma na ou faapotopotoina ai mai i tagata Isaraelu, o tane e ta‘imua e matou te ō aʻe faatasi.