Iona
4 Ae ua matuā leaga lava lenei mea iā Iona, ma ua matuā ita tele ai o ia. 2 Ona ia tatalo ai lea iā Ieova e faapea: “Auē, Ieova e, pe e lē o le mea ea lenei na ou popole ai a o oʻu iai i loʻu lava atunuu? O le mea lea na ou taumafai ai ou te sola i Tasesa+ i le taimi muamua; auā ua ou iloa o oe o le Atua e tigā alofa* ma alofa mutimutivale, e telegese lou toʻasā ae e tele lou alofa faamaoni+ ma e mafai ona suia lou finagalo ma lē faaooina mai le mala. 3 O lenei, Ieova e, faamolemole ia e aveese loʻu ola, auā e sili pe a ou oti nai lo o loʻu ola pea.”+
4 Ona fetalai mai lea o Ieova: “Pe e iai ea se māfuaaga talafeagai o lou ita?”
5 Ona alu ese lea o Iona mai i le aai ma nofo i le itu i sasaʻe o le aai. Ua ia faia foʻi mo ia i inā se mea e malu ai, ma nofo ai i lona paolo seʻi vaai po o le ā le mea e oo i le aai.+ 6 Ua saunia e Ieova le Atua se laau o le kikaiona ina ia sosolo i luga aʻe o Iona, e faapaolo ai lona ulu, ma tuuitiitia ai lona mafatia. Ona matuā fiafia ai lea o Iona i le laau o le kikaiona.
7 Ae ua saunia e le Atua moni se anufe ina ua tafa mai ata o le aso na sosoo ai, ua ʻaina e le anufe le laau o le kikaiona, ma ua mamae ai. 8 Ina ua susulu mai le lā, ona saunia foʻi lea e le Atua o se matagi e matuā vevela mai i sasaʻe, ua velasia ai le ulu o Iona, ma ua toetoe a matapogia ai o ia. Ua ia talosaga atu pea ina ia oti o ia, ma fai atu pea: “E sili pe a ou oti nai lo o loʻu ola pea.”+
9 Ua fetalai mai le Atua iā Iona: “Pe e iai ea se māfuaaga talafeagai ua e ita tele ai ona o le laau o le kikaiona?”+
Ae ua tali atu o ia: “E iai le māfuaaga talafeagai ua ou ita tele ai, o le mea lea ua ou manaʻo ai ou te oti.” 10 Ae ua fetalai mai Ieova: “Ua e manatu mamafa i le laau o le kikaiona, o se mea e te leʻi galue ai pe faatupuina; na tupu i le pō e tasi ma ua mamae foʻi i le pō e tasi. 11 Pe e lē tatau foʻi la ona ou manatu mamafa iā Nineva le aai telē,+ o loo iai tagata e sili atu i le toʻa 120,000, o ē e lē iloa le eseesega o le mea e saʻo mai i le mea e sesē,* atoa ma le tele o a latou manu?”+