O le Tusi Lona Lua o Nofoaiga a Tupu

32 Ina ua uma ona faia ma le faamaoni+ e Esekia nei mea, ona sau lea o Sanerivi le tupu o Asuria ma osofaʻia Iuta. Ua ia siʻomia aai malupuipuia ma le faanaunauga e osofaʻia na aai e fai mo ia.+

2 Ina ua iloa e Esekia ua sau Sanerivi ma ua fuafua e siitaua mai iā Ierusalema, 3 ona ia filifili lea e punitia vai o vaipuna sa i fafo o le aai,+ ina ua uma ona talatalanoa ma ona perenise ma ona tagata malolosi, ma ua latou lagolagoina o ia. 4 Ua faapotopoto faatasi tagata e toʻatele, ma ua latou punitia vaipuna uma ma ālia ua tafe atu i le nuu, ua latou faapea ane: “Aiseā o le a ō mai ai tupu o Asuria ma maua vai e tele?”

5 Ua ia galue pea ma le maumaua‘i ma ia toe fausia le pā atoa na soloia ma faatutū ai ni ʻolo, ma na ia fausia se isi pā i fafo. Ua ia toe faaleleia foʻi le Mea Maupuʻepuʻe*+ o le Aai a Tavita, ma faia le tele o auupega ma talipupuni. 6 Ona ia tofia lea o taʻitaʻi o ʻautau e vaavaaia le nuu, ma faapotopotoina i latou i le nofoaga faitele o le faitotoʻa o le aai, ma ua ia faalaeiauina i latou* e faapea: 7 “Ia outou lototetele ma faamalolosi. Aua tou te fefefe pe matataʻu ona o le tupu o Asuria,+ ma le motu o tagata o loo faatasi ma ia, auā e sili atu ona toʻatele o loo faatasi ma i tatou nai lo o ē o loo iā te ia.+ 8 O loo iā te ia le lima o le tagata,* ae o loo iā i tatou Ieova lo tatou Atua e fesoasoani mai ma tauina a tatou taua.”+ Ona faamalosia lea o le nuu i upu a Esekia le tupu o Iuta.+

9 Ua mavae lenei mea, ma a o iai Sanerivi le tupu o Asuria i Lakisa+ faatasi ma ana fitafita uma,* ona ia aauina atu lea o ana auauna i Ierusalema iā Esekia le tupu o Iuta, ma tagata Iutaia uma sa i Ierusalema,+ ua faapea atu:

10 “O le mea lenei na fai mai ai Sanerivi le tupu o Asuria, ‘O le ā ea le mea ua outou faatuatua i ai, ua outou nonofo ai pea i Ierusalema a o si‘osi‘omia le aai?+ 11 Pe e lē o ‘olegia ea outou e Esekia ma tuu ai outou e feoti i le oge ma le fia feinu, ma faapea atu: “E laveaʻia e Ieova lo tatou Atua i tatou mai i lima o le tupu o Asuria”?+ 12 Pe e lē o Esekia ea foʻi lenei na aveesea mea maualuluga+ a lo outou Atua ma Ona fata faitaulaga,+ ma faapea atu iā Iuta ma Ierusalema: “Ia outou ifo atu i luma o le fata faitaulaga e tasi, ma ia outou faamū ai foʻi taulaga”?+ 13 Pe e tou te lē iloa ea mea na ou faia ma mea na faia e oʻu augātamā i tagata uma o nuu?+ Pe na mafai e atua o nuu ona laveaʻia o latou nuu mai i loʻu lima?+ 14 O ai fo‘i i atua uma o nei nuu na faaumatia e oʻu augātamā, na mafai ona lavea‘iina lona nuu mai i loʻu lima, e mafai ai e lo outou Atua ona lavea‘iina outou mai i lo‘u lima?+ 15 O lenei, aua neʻi ʻolegia pe ta‘ita‘isesēina outou e Esekia!+ Aua foʻi neʻi faatuatua iā te ia, auā e leai se atua o se nuu po o se malo na mafai ona laveaʻia lona nuu mai i loʻu lima ma lima o oʻu augātamā. E matuā lē mafai lava la e lo outou Atua ona laveaʻia outou mai i loʻu lima!’”+

16 Ua upuleaga atu fo‘i auauna a Sanerivi iā Ieova le Atua moni ma lana auauna o Esekia. 17 Na ia tusia foʻi ni tusi+ e faifai ai iā Ieova le Atua o Isaraelu+ ma upuleaga ai iā te ia, e faapea: “E pei o atua o nuu na lē mafai ona laveaʻia o latou tagata mai i oʻu lima,+ e faapea foʻi ona lē mafai e le Atua o Esekia ona ia laveaʻia lona nuu mai i oʻu lima.” 18 Ua latou valaau atu pea ma le leotetele i le gagana a tagata Iutaia, i tagata o Ierusalema na i luga o le pā, e faafefe ma faaatuatuvale ai i latou, ina ia latou faatoʻilaloina le aai.+ 19 Ua latou upuleaga atu i le Atua o Ierusalema, e pei ona upuleaga foʻi i atua o nuu o le lalolagi, ia na faia e lima o tagata. 20 Ae ua tatalo atu pea le tupu o Esekia ma le perofeta o Isaia+ le atalii o Amota e faatatau i lenei mea, ma alalaga atu i le lagi mo se fesoasoani.+

21 Ona auina mai lea e Ieova o se agelu ma faaumatia tagata totoa uma,+ ma taʻitaʻi uma o le ʻautau a le tupu o Asuria, ma ua toe foʻi atu ai o ia ma le māsiasi i lona nuu. Mulimuli ane, ua ia ulu atu i le fale* o lona atua, ona fasiotia ai lea o ia e nisi o ona atalii i le pelu.+ 22 Ua laveaʻia Esekia ma tagata o nonofo i Ierusalema e Ieova mai i lima o Sanerivi le tupu o Asuria, ma lima o isi tagata uma, ma foaʻi mai iā i latou le mapusaga i itu uma. 23 Na aumaia e le toʻatele meaalofa iā Ieova i Ierusalema, ma mea mananaia iā Esekia le tupu o Iuta,+ ma ua faaaloalogia o ia e nuu uma ina ua mavae lenā mea.

24 I na aso, na maʻi ai Esekia ma ua toetoe lava a oti, ona tatalo atu lea o ia iā Ieova,+ ma ua tali mai o ia ma tuuina mai iā Esekia se faailoga.+ 25 Ae e leʻi talisapaia e Esekia mea lelei uma na faia iā te ia, auā ua faamaualuga lona loto, ma na oo mai ai le toʻasā o le Atua iā te ia atoa ai ma Iuta ma Ierusalema. 26 Peitaʻi, ua faamaulalo Esekia mai i lona lotofaamaualuga,+ o ia ma tagata o nonofo i Ierusalema, ma ua lē oo mai ai le toʻasā o Ieova iā i latou i aso o Esekia.+

27 Ua maua e Esekia o ʻoa ma le mamalu e matuā tele lava;+ na ia faia foʻi mo ia o fale teuoloa+ mo siliva, o auro, o maa tāua, o suāuu pasama, o talipupuni, ma mea matagofie uma. 28 Na ia faia foʻi fale e tuu ai fua o saito, o uaina fou ma suāuu, o fale mo ituaiga o manu eseese uma, ma fale mo lafumanu. 29 Na ia maua foʻi aai mo ia, ma le tele o manu eseese, o lafu mamoe ma lafu povi e tele, auā na foaʻiina mai e le Atua iā te ia o mea e matuā tele lava. 30 Na punitia e Esekia le mea pito i luga e puna mai ai le vai+ o Kiona,+ ma taʻi saʻo ifo i le itu i sisifo i le Aai a Tavita,+ ma ua taulau manuia Esekia i ana galuega uma. 31 Peitaʻi, ina ua aauina atu fofoga fetalai a perenise o Papelonia, e fesili atu iā Esekia e uiga i le faailoga+ lea na iai i le nuu,+ na tuu o ia e le Atua moni ina ia filifili po o le ā e na te faia, auā na finagalo le Atua e tofotofo+ o ia ma silafia ai mea uma o loo i lona loto.+

32 A o le olaga uma o Esekia ma gaoioiga o lona alofa faamaoni,+ ua tusia ia i le faaaliga a le perofeta o Isaia+ le atalii o Amota, i le Tusi o Tupu o Iuta ma Isaraelu.+ 33 Ona taoto lea o Esekia faatasi ma ona augātamā, ma ua latou tanu o ia i le aʻega, ae e lē i le fanuatanu o atalii o Tavita;+ ma na faamamaluina foʻi o ia e Iuta uma ma ē na nonofo i Ierusalema i lona maliu. Ona avea lea o Manase lona atalii ma tupu e sui iā te ia.