Numera

3 O gafa* nei o Arona ma Mose i le aso na fetalai mai ai Ieova iā Mose i le mauga o Sinai.+ 2 O igoa nei o atalii o Arona: O Natapu o le ulumatua, o Aviu,+ o Eleasaro+ ma Itamaro.+ 3 O igoa nei o atalii o Arona, o ositaulaga faauuina o ē na tofia* e auauna o ni ositaulaga.+ 4 Peitaʻi ua feoti Natapu ma Aviu i luma o Ieova, ina ua la faamū le afi ua faasāina i luma o Ieova+ i le toafa o Sinai, e leʻi maua foʻi ni o la atalii. Ae ua faaauau ona auauna Eleasaro+ ma Itamaro+ o ni ositaulaga faatasi ma lo la tamā o Arona.

5 Ona fetalai mai lea o Ieova iā Mose: 6 “Ia aami mai le ituaiga o Levi,+ ma tuuina atu i latou i luma o Arona le ositaulaga, ina ia latou fesoasoani+ iā te ia. 7 E latou te faataunuu o latou tiute tauave iā te ia ma le faapotopotoga uma i luma o le faleʻie o le feiloaʻiga, e ala i le faia o la latou auaunaga e fesoota‘i ma le faleʻie paia. 8 E ao ona latou vaaia mea uma e faaaogā+ i le faleʻie o le feiloaʻiga, ma faataunuu o latou tiute tauave i le fanauga a Isaraelu e ala i le faia o auaunaga e fesoota‘i ma le faleʻie paia.+ 9 Ia e tuuina atu le ʻau sa Levī iā Arona ma ona atalii. O i latou ua tofia mo ia, ma ua tuuina atu iā te ia mai i le fanauga a Isaraelu.+ 10 E te tofia Arona ma ona atalii, ma e latou te faataunuu a latou galuega faaositaulaga;+ e fasiotia so o se tagata ese* e faalatalata atu i ai.”+

11 Ua fetalai atili mai Ieova iā Mose e faapea: 12 “A o aʻu, ou te talia le ʻau sa Levī mai i le fanauga a Isaraelu e sui ai ulumatua uma lava* a le fanauga a Isaraelu,+ ma e fai mo aʻu le ʻau sa Levī. 13 E fai mo aʻu ulumatua uma.+ I le aso na ou faaumatia ai ulumatua uma a le atunuu o Aikupito,+ na ou faapaia ai mo aʻu o ulumatua uma o Isaraelu, o ulumatua a tagata atoa ma manu.+ E fai mo aʻu i latou uma. O aʻu o Ieova.”

14 Ua fetalai mai pea Ieova iā Mose i le toafa o Sinai+ e faapea: 15 “Ia lesitalaina atalii o Levi e tusa ma aiga o o latou tamā, e tusa foʻi ma o latou aiga. Ia e lesitalaina tane uma e amata mai i le tasi le masina agaʻi i luga le matutua.”+ 16 Ua lesitalaina i latou e Mose e tusa ma le poloaʻiga a Ieova, e pei ona faatonuina ai o ia. 17 O igoa nei o atalii o Levi: o Keresona, o Koato, ma Merari.+

18 O igoa nei o atalii o Keresona, o aiga ia na tupuga mai iā te ia: o Lipeni ma Semi.+

19 O atalii nei o Koato, o aiga ia na tupuga mai iā te ia, o Amaramo, o Isara, o Heperona, ma Usialu.+

20 O atalii nei o Merari, o aiga ia na tupuga mai iā te ia, o Maali+ ma Muse.+

O aiga ia o le ʻau sa Levī e tusa ma aiga o o latou tamā.

21 O aiga na tupuga mai iā Keresona o tagata Lipeni+ ma tagata Semi. O aiga ia o Keresona. 22 O le aofaʻiga o o latou tane uma e mai i le tasi le masina agaʻi i luga le matutua na lesitalaina, e 7,500.+ 23 E faatutū faleʻie o aiga o tagata Keresona i tua o le faleʻie paia+ i le itu i sisifo. 24 O le taʻitaʻi o le aiga o le tamā o tagata Keresona, o Eliasafo le atalii o Laeli. 25 O le tiute tauave o atalii o Keresona+ i le faleʻie o le feiloaʻiga, o le faleʻie paia+ lea ma mea eseese e ufiufi ai le faleʻie,+ o le ʻie pupuni+ i le faitotoʻa o le faleʻie o le feiloaʻiga, 26 o ‘ie e tautau+ i le lotoā, o le ʻie pupuni+ i le faitotoʻa o le lotoā lea e faataamilo i le faleʻie paia ma le fata faitaulaga, o maea o le faleʻie, ma mea uma e tusa ma lenei auaunaga.

27 Na tupuga mai iā Koato le aiga o Amaramo, o le aiga o Isara, o le aiga o Heperona, ma le aiga o Usialu. O aiga ia o Koato.+ 28 E 8,600 le aofaʻi o tane uma e amata mai i le tasi le masina agaʻi i luga le matutua, o loo tausia le tiute tauave e tusa ma le mea paia.+ 29 Ua faatutū faleʻie o aiga o atalii o Koato i le itu i saute o le faleʻie paia.+ 30 O le taʻitaʻi o le aiga o le tamā o aiga o Koato, o Elisafano le atalii o Usialu.+ 31 O la latou tiute tauave o le vaavaaia lea o le Atolaau,+ le laulau,+ le tuugāmolī,+ o fata faitaulaga,+ o mea uma e faaaogā+ e fai ai le auaunaga i le mea paia, o le ʻie pupuni,+ ma mea uma e tusa ma lea auaunaga.+

32 O le taʻitaʻi o taʻitaʻi uma o le ʻau sa Levī, o Eleasaro+ le atalii o Arona le ositaulaga, o lē e vaaia ē e tausia tiute tauave e tusa ma le mea paia.

33 Na tupuga mai iā Merari le aiga o Maali ma le aiga o Muse. O aiga ia o Merari.+ 34 O le aofaʻiga o tane uma e mai i le tasi le masina agaʻi i luga le matutua na lesitalaina, e 6,200.+ 35 O le taʻitaʻi o le aiga o le tamā o aiga uma o Merari, o Surielu le atalii o Aviaila. Ua latou faatutū o latou faleʻie i le itu i mātū o le faleʻie paia.+ 36 O le tiute tauave o atalii o Merari, o le vaavaaia lea o auivi laupapa+ o le faleʻie paia, o ona faalava,+ o ona poutū,+ o ona lagolago, ma ona ipu uma+ ma mea uma e tusa ma lenei auaunaga,+ 37 faapea poutū uma e soo ai le lotoā, o lagolago,+ o pine ma maea o le faleʻie.

38 O i latou e faatutū o latou faleʻie i le itu i sasaʻe o le faleʻie paia, i luma o le faleʻie o le feiloaʻiga i le mea e oso aʻe ai le lā, o Mose ma Arona ma ona atalii. O i latou ia e tausia le tiute tauave e tusa ai ma le faleʻie paia, o lo latou tiute tauave lea mo le fanauga a Isaraelu. E fasiotia so o se tagata ese* e faalatalata ane i ai.+

39 O tane uma o le ʻau sa Levī e amata mai i le tasi le masina agaʻi i luga le matutua, na lesitalaina e Mose ma Arona ona o le faatonuga a Ieova e tusa ma o latou aiga, e 22,000 i latou.

40 Ona fetalai mai lea o Ieova iā Mose: “Ia lesitalaina tane ulumatua uma o le fanauga a Isaraelu e amata mai i le tasi le masina agaʻi i luga le matutua,+ ia faitau lo latou aofaʻi, ma faamau o latou igoa. 41 Ia e aumai le ʻau sa Levī mo aʻu, e sui ai ulumatua uma o le fanauga a Isaraelu,+ ma manu lalata a le ʻau sa Levī e sui ai ulumatua uma o manu lalata a le fanauga a Isaraelu.+ O aʻu o Ieova.” 42 Ona lesitalaina lea e Mose o ulumatua uma o le fanauga a Isaraelu, e pei ona poloaʻi mai ai Ieova iā te ia. 43 O le aofa‘iga o tane ulumatua uma e amata mai i le tasi le masina agaʻi i luga le matutua na lesitalaina o latou igoa, e 22,273.

44 Ua fetalai mai pea Ieova iā Mose e faapea: 45 “Ia e ave le ʻau sa Levī e sui ai ulumatua uma o le fanauga a Isaraelu, ma ia ave manu lalata a le ʻau sa Levī e sui ai a latou manu lalata; e ao ona avea le ʻau sa Levī ma oʻu tagata. O aʻu o Ieova. 46 O le tau e faatauina mai ai+ ulumatua e 273 o le fanauga a Isaraelu, ia ua sili atu i le aofaʻi o le ʻau sa Levī,+ 47 e tatau ona e talia o sekeli* e lima mo le tagata e toʻatasi+ e tusa ma le fua masani o le mea paia.* O le sekeli e tasi, e 20 kire.*+ 48 Ia e avatu iā Arona ma ona atalii le tupe, o le tau ua faatauina ai i latou ua sili atu i lo latou aofaʻi.” 49 Ona ave lea e Mose o le tupe na totogi mo i latou ua sili atu lo latou aofaʻi nai lo o le aofaʻi o le ʻau sa Levī, e fai ma tau e faatauina ai. 50 Na ia talia le tupe mai i ulumatua o le fanauga a Isaraelu, e 1,365 sekeli, e tusa ma le fua masani o le mea paia. 51 Ona tuuina atu lea e Mose o le tau na faatauina ai iā Arona ma ona atalii e tusa ma le afioga a* Ieova, e pei ona poloaʻi mai ai Ieova iā Mose.