Failauga

6 E iai foʻi se isi mea leaga ua ou vaaia i lalo o le lā, ma ua taatele i tagata: 2 E foaʻiina e le Atua moni i se tagata le tamaoaiga, o meafaitino, ma le mamalu, ina ia lē mativa ai i so o se mea e naunau i ai o ia; peitaʻi e lē faataga e le Atua moni o ia ina ia fiafia i ia mea, ae e na te faatagaina se tagata ese e fiafia ai. E iʻuvale foʻi lea mea, ma o se maʻi e matuā leaga. 3 Afai ua fanaua e se tagata ni fanau se toʻaselau, ma ola mo le tele o tausaga ma oo ina toeaina o ia, ae e lē fiafia o ia i ana mea lelei a o leʻi alu atu o ia i le tuugamau,* ou te fai atu e sili atu le pepe ua fanau lē au nai lo o ia.+ 4 Auā ua sau lea pepe ma le i‘uvale ma e alu ese o ia i le pogisa, e ufitia foʻi lona igoa i le pogisa. 5 E ui e leʻi vaai lava o ia i le lā pe iloa foʻi se mea, ae e sili atu* o ia nai lo o lē na taʻua muamua.+ 6 O le ā le aogā e ola ai mo le lua afe tausaga ae e lē maua ai le fiafia? Pe e lē tasi ea le mea e ō i ai tagata uma?+

7 O galuega mamafa uma a se tagata, e fai ina ia faamalieina ai lona gutu;+ ae e lē faamalieina ai lava lona manaʻo. 8 Auā o le ā se mea e sili ai le tagata atamai i lo o le tagata valea?+ O le ā foʻi le aogā o le iloa e se tagata mativa o le auala e ola ai?* 9 E sili atu le fiafia i mea e vaai i ai mata nai lo o le manaʻonaʻo i mea e lē mafai ona maua. E i‘uvale foʻi lea mea, ma o le ʻai a le matagi.

10 Po o ā lava mea e oo mai, ua uma ona faaigoaina, ua iloa foʻi le tulaga o le tagata; ma e lē mafai ona finau lana mataupu ma lē e sili atu lona malosi nai lo o ia. 11 O le tele o upu,* o le tele fo‘i lea o le i‘uvale; o le ā la le aogā o na mea i le tagata? 12 O ai e na te iloa le mea e sili ona lelei e faia e le tagata i nai aso o lona olaga iʻuvale, ia e mou atu e pei o se ata lafoia?+ O ai foʻi e mafai ona taʻu i le tagata le mea o le a tupu i lalo o le lā pe a mavae atu o ia?