1 Peteru

1 O aʻu o Peteru, o le aposetolo+ a Iesu Keriso, o le tusi lenei i ē o loo aumau+ ma nonofo solo+ i Pono, i Kalatia, i Kapatokia,+ i Asia ma Pitunia, o le tusi lenei i ē ua filifilia+ 2 e tusa ai ma le muaʻi silafia e le Atua le Tamā,+ ma le faapaiaina e ala i le agaga,+ ina ia usiusitaʻi ma sausauina+ i latou i le toto o Iesu Keriso:+

Tau ina ia faateleina atu iā te outou le agalelei faifua ma le filemu mai i le Atua.+

3 Ia viia le Atua le Tamā o lo tatou Alii o Iesu Keriso,+ auā e tusa ma lona alofa mutimutivale tele, ua ia fanaufouina+ ai i tatou i se faamoemoe+ ola e ala i le toe faatūina+ o Iesu Keriso mai i le oti, 4 i se tofi e lē pala, e lē faaleagaina, ma e lē mavae.+ Ua taofia mo outou i le lagi,+ 5 o ē ua leoleomaluina e le mana o le Atua i le faatuatua+ mo le faaolataga,+ lea ua saunia e faaalia+ mai i le taimi mulimuli.+ 6 Ua outou matuā olioli ai ona o lenei mea, e ui lava ua outou mafatia nei i tofotofoga eseese mo sina taimi puupuu pe afai e tatau ai,+ 7 o le tofotofoina foʻi o le malosi o lo outou faatuatua,+ lea e sili atu nai lo o le auro e faaumatia e ui lava ina faamamāina i le afi,+ e avea ma mea e iʻu ai i le viiga, o le mamalu ma le migao i le faaaliga+ o Iesu Keriso. 8 E ui e tou te leʻi vāai lava iā te ia, a ua outou alolofa iā te ia.+ E ui e tou te lē o vāai atu iā te ia i le taimi nei, ae ua outou faatuatua iā te ia, ma ua matuā fiafia i le olioli tele e lē mafaamatalaina, 9 a o outou maua le iʻuga o lo outou faatuatua, o le faaolaina lea o outou.+

10 E tusa ai ma lenei faaolataga, sa matuā saʻiliʻili ma suʻesuʻe ma le filigā+ le ʻauperofeta, o ē na faia valoaga+ e faatatau i le agalelei faifua e tatau ona oo iā te outou.+ 11 Sa latou suʻesuʻe pea po o le ā le taimi patino,+ ma e faapeʻī ia aso ua faailoa mai e le agaga+ o loo iā i latou e faatatau i le Keriso,+ a o ia muaʻi molimau atu e uiga i puapuaga o le Keriso,+ ma mea mamalu+ o loo mulimuli mai i nei mea. 12 Sa faaali atu iā i latou e faapea, e leʻi auauna i latou iā i latou lava,+ a o outou. Na latou saunia mea ia ua faailoa+ atu nei iā te outou, e ala iā i latou o ē ua folafola atu le tala lelei iā te outou, ona o le agaga paia+ lea na auina mai i le lagi. E naunau tele agelu e vaavaai i nei mea.+

13 O lea, inā sauniuni ia o outou mafaufau mo galuega fitā,+ ia faaauau ona outou matuā mafaufau lelei;+ ia taulaʻi atu lo outou faamoemoe i le agalelei faifua+ lea e tuuina atu iā te outou i le faaaliga+ o Iesu Keriso. 14 E faapei o fanau usiusitaʻi, aua le amioaʻi+ e tusa ai ma o outou tuʻinanauga na iai muamua a o leʻi malamalama outou, 15 ae e tusa ai ma Lē e Paia na valaauina outou, ia faapea foʻi ona paia outou uma i a outou amio,+ 16 auā ua tusia: “E tatau ona paia outou, auā o aʻu nei e paia lava aʻu.”+

17 I le ma lea, afai e tou te valaau i le Tamā, o lē e na te faamasino ma le lē faailoga tagata+ e tusa ma galuega a tagata taʻitoʻatasi, ia outou matataʻu+ i le taimi lea a o aumau outou o ni tagata ese.+ 18 Ua outou iloa e leʻi laveaʻiina outou+ i mea e pala,+ o le siliva po o le auro mai i a outou amioga e lē aogā, lea na outou maua mai i tū ma aga a o outou tuaa. 19 A o le toto+ tāua o Keriso,+ ua pei o se tamaʻi mamoe e lē ponā ma e leai se ila.+ 20 E moni, na muaʻi silafia o ia a o leʻi faavaeina le lalolagi,+ ae na faaalia mai o ia i le gataaga o taimi ona o outou,+ 21 o ia lea ua talitonu ai tagata i le Atua,+ o lē na toe faatūina o ia mai i le oti,+ ma avatu iā te ia le mamalu;+ ina ia outou faatuatua ai ma faamoemoe i le Atua.+

22 Talu ai ua faamamāina+ o outou olaga e ala i le usiusitaʻi i le upu moni, lea e iʻu ai i le alofa faamaoni+ o uso, ia matuā alofa le tasi i le isi mai i le loto.+ 23 Auā ua fanaufouina+ outou, e lē ala i se fua e pala,+ ae o se fua+ e lē pala,+ e ala i le afioga+ a le Atua soifua, o lē e tumau.+ 24 Auā “o tagata uma ua pei o le mutia, ma o lo latou mamalu uma foʻi ua pei o le fuga o le mutia;+ e magumagu le mutia ma e toʻulu ese ona fuga,+ 25 a o le afioga a Ieova, e tumau lea e faavavau.”+ O le “afioga”+ lenei, ua folafolaina+ atu iā te outou, o le tala lelei lea.

2 O le mea lea, inā tuu ese ia o mea leaga uma,+ ma faiga taufaasesē uma, ma le faafiaamiotonu, ma le matauʻa, ma le taumuimui uma lava,+ 2 a ia faapei o pepe faatoʻā fananau mai,+ ia naunau outou i le suāsusu+ e lē suia mai i le afioga a le Atua, ina ia mafai ai ona outou tutupu aʻe ia maua le faaolataga,+ 3 ma pe afai foʻi ua outou tofo i le agalelei+ o le Alii.

4 Ua outou ō mai iā te ia e faapei ua ō mai i se maa ola,+ e moni sa tuulafoaʻiina+ e tagata,+ a ua filifilia e le Atua ma ua tāua iā te ia,+ 5 o outou foʻi ua pei o ni maa ola ua fausia aʻe ai le fale faaleagaga,+ o le ʻauositaulaga paia, e ofo atu ai taulaga faaleagaga+ e fiafia i ai le Atua, e ala iā Iesu Keriso.+ 6 Auā ua tusia i Tusitusiga Paia: “Faauta! Ua ou tuuina i Siona se maa ua filifilia, o se maa tulimanu faavae, e tāua; ma e lē faanoanoa se tasi e faatuatua i ai.”+

7 O le mea lea, e tāua ai o ia iā te outou, auā ua outou talitonu; a o i latou o ē e lē talitonu “o le maa lea na tuulafoaʻiina+ e tufuga, ua avea ma maa tulimanu sili,”+ 8 ma “maa e tausuai ai, ma papa e tautevateva ai.”+ Ua tausuai i latou nei ona o le lē usiusitaʻi i le upu. O le mea foʻi lea ua tofia ai i latou.+ 9 A o outou o “se vaega ua filifilia, o ositaulaga ua avea ma tupu, o le nuu paia,+ o tagata ua faapitoa mo le Atua,+ ina ia outou faalauiloa atu uiga silisili ona lelei”+ o lē na valaauina outou mai i le pōuliuli i lona malamalama ofoofogia.+ 10 Auā e leʻi avea muamua outou ma nuu, a ua avea nei outou ma nuu o le Atua;+ o ē e leʻi maua le alofa mutimutivale, a ua outou maua nei le alofa mutimutivale.+

11 Le ʻaupele e, ou te ʻaiʻoi atu iā te outou o tagata ese ma ē e aumau,+ ina ia faamamao pea mai i tuʻinanauga o le tino,+ o mea lava ia e feteenaʻi ma le loto.+ 12 Ia outou tausisi i le amiolelei i luma o tagata o le lalolagi+ auā o le mea lea latou te faia ai tala taufaaleaga e faapea, o outou o tagata amioleaga, ae ina ua latou vāai i a outou amioga lelei,+ ona latou faamamaluina ai lea o le Atua i le aso o lana asiasiga.+

13 Ia outou gauaʻi+ ona o le Alii i foafoaga uma a tagata:+ e tusa lava po o se tupu+ ona ua sili o ia, 14 po o kovana ua ia aauina atu e faasala i tagata amioleaga, ae e viia ai o ē ua faia mea lelei.+ 15 Auā o le finagalo lea o le Atua, o le faia o mea lelei, ua outou pupuni ai gutu o tagata lē mafaufau mai i le faia o tala valea.+ 16 Ia amioaʻi e pei o tagata saʻoloto,+ ma ia tausisi i lo outou saʻolotoga, e lē ina ia ufiufia ai mea leaga,+ ae o ni pologa a le Atua.+ 17 Ia āva i ituaiga uma o tagata,+ ia alolofa i le ʻauuso atoa,+ ia matataʻu i le Atua,+ ma ia āva i le tupu.+

18 Ia gauaʻi+ atu auauna o le aiga i o latou matai ma le mataʻu+ tatau, e lē na o ē ua amiolelei ma magafagafa, ae faapea foʻi i latou o ē e faamaliegatā. 19 Auā afai e onosaia e se tasi mea tigā ma mafatia i faiga lē tonu ona o lona lotofuatiaifo i luma o le Atua, o se mea lea e fiafia ai o Ia.+ 20 Auā o le ā ea le aogā o lo outou tutumau, pe afai ua outou agasala ma ua sasaina outou?+ Ae afai ua outou faia mea lelei ma ua outou puapuagatia ai,+ ma ua outou tutumau foʻi, o le mea lea e fiafia ai le Atua.+

21 O le mea moni lenei na valaauina ai outou, auā e oo lava iā Keriso na puapuagatia mo outou,+ ua ia tuuina mai ai le faaaʻoaʻoga mo outou ina ia outou mulimulituʻi ai i ona tulaga aao.+ 22 E leʻi faia e ia se agasala,+ e leʻi tautala foʻi lona fofoga i ni upu taufaasesē.+ 23 Ina ua upuleagaina+ o ia, e leʻi toe fai atu e ia ni upuleaga.+ Ina ua puapuagatia o ia,+ e leʻi faamataʻu atu, ae na ia tuuina atu pea o ia lava i lē+ e faamasinotonu. 24 Ua tauaveina e ia o a tatou agasala+ i lona tino i luga o le laau,+ ina ia lē toe aafia i tatou i agasala,+ ma ola ai i le amiotonu. O “ona manuʻa foʻi ua faamālōlō ai outou.”+ 25 Auā na faapei outou o mamoe ua sē;+ a o lenei ua outou toe foʻi mai i le leoleo mamoe,+ ma le ovasia o o outou ola.

3 Ia faapea foʻi outou avā,+ ia gauaʻi+ atu i a outou lava tane, ma afai e lē usiusitaʻi+ nisi i le upu, e mafai ona maua+ i latou i le amiolelei a a latou avā+ e aunoa ma se upu, 2 auā ua latou vāaitino i a outou amioga mamā+ ma le matuā faaaloalo. 3 Aua foʻi neʻi faia a outou teuga e tusa ai ma le vaaiga a tagata, o le fili lea o le lauulu+ ma teuteu i auro+ po o le oofu i ofu tele, 4 ae o le tagata lilo+ i totonu, ia teu i le mea e lē pala+ o le agaga agamalu ma le filemu,+ o le mea tautele lava lea i le silafaga a le Atua. 5 Auā sa faapea foʻi ona teuteu e fafine paia i latou lava i aso ua mavae, o ē na faamoemoe i le Atua, na gauaʻi atu i latou i a latou lava tane, 6 e pei ona sa masani ona usiusitaʻi Sara iā Aperaamo, ma sa ia taʻua o ia o le “alii.”+ Ua avea foʻi outou ma ana fanau, pe afai tou te faia pea mea lelei ma lē fefefe i se mea e faamataʻu mai.+

7 Ia faapea outou tane,+ ia faaauau ona nonofo faatasi ma i latou e tusa ma le poto,+ ia āva+ i fafine e pei o se ipu e sili ona vaivai, auā o outou foʻi o suli+ faatasi ma i latou i le meaalofa foaʻifua o le ola, ina ia lē faalavelavea ai a outou tatalo.+

8 O lea la, ia autasi+ outou uma, ia tigā alofa le tasi i le isi, ia iā te outou le alofa faaleuso, ia māfana lo outou alofa,+ ia lotomaulalo,+ 9 aua le taui atu le leaga i le leaga,+ po o le upuleaga atu i ē e upuleaga mai,+ a ia outou faamanuia atu,+ auā o le mea lava lea na valaauina ai outou ina ia outou maua se faamanuiaga.

10 Auā “o lē e naunau i le ola ma iloa aso lelei,+ ia pulea lona laulaufaiva+ mai i mea leaga ma ona laugutu mai le tautala i mea taufaasesē,+ 11 ia liliuese o ia mai i mea leaga+ ma fai le mea lelei; ia saʻili e ia le filemu ma tausisi i ai.+ 12 Auā o loo silasila mai fofoga+ o Ieova i ē e amiotonu, e faafofoga mai foʻi ona taliga i la latou talosaga;+ ae e faasagatau atu fofoga o Ieova i ē o faia mea leaga.”+

13 O ai foʻi le tagata e na te agaleaga iā te outou pe afai e tou te maelega i mea lelei?+ 14 Ae e tusa lava pe e tou te mafatia ona o le amiotonu, e fiafia lava outou.+ Peitaʻi, aua tou te fefefe i mea latou te fefefe ai,+ aua foʻi neʻi outou popole.+ 15 A ia faapaiaina le Keriso le Alii i o outou loto,+ ma ia nofosauni pea e tali atu+ i luma o tagata uma e fesili mai iā te outou i le māfuaaga o lo outou faamoemoe, a ia faia faapea faatasi ma le agamalu+ ma le matuā faaaloalo lava.

16 Ia taofimau i se lotofuatiaifo lelei,+ ina ia faamāina+ ai i latou o ē na faia tala leaga e faatatau iā te outou, o ē e tautatala lē migao e uiga i a outou amioga lelei o ni soo o Keriso.+ 17 Auā e sili ona lelei lo outou mafatia ona o le faia o mea lelei,+ pe afai o le finagalo lea o le Atua, nai lo o lo outou faia o mea leaga.+ 18 Auā foʻi e na o le faatasi ona maliu o Keriso ona o agasala,+ o le tagata amiotonu mo ē amiolētonu,+ ina ia taʻitaʻiina e ia outou i le Atua,+ na fasiotia o ia i le tino,+ ae na toe faaola mai i le agaga.+ 19 Ona maliu atu lea o ia ma talaʻi atu i agaga i le falepuipui,+ 20 o ē na lē usiusitaʻi+ a o faatalitali ma le onosaʻi le Atua+ i aso o Noa, ina o fausia le vaa+ lea na faasaoina ai mai i le vai ni nai tagata, e na o le toʻavalu lava.+

21 Ua fai lenā mea ma faatusa o le papatisoga lea ua faaolaina ai nei outou,+ (e lē o le aveesea o palapala o le tino, a o le talosaga i le Atua mo se lotofuatiaifo lelei)+ e ala i le toe faatūina mai o Iesu Keriso.+ 22 Ua afio o ia i le lagi ma o loo i le itu taumatau o le Atua;+ ma ua faia e le Atua ina ia gauaʻi atu agelu,+ ma pule ma ē malolosi iā te ia.+

4 Talu ai na mafatia Keriso i le tino,+ o lea ia faaauupegaina ai foʻi outou i na lava mafaufauga;+ auā o le tagata ua mafatia i le tino, ua lē toe faia e ia le agasala,+ 2 ina ia mafai ona ola o ia i aso o totoe o lona olaga i le tino,+ e lē ina ia faia ai o tuʻinanauga o tagata, ae o le faia o le finagalo o le Atua.+ 3 Ua lava ia na taimi+ i aso ua mavae na outou faia ai le manaʻo o tagata o le lalolagi,+ o amioga matagā,+ ma le tuʻinanau, le inu tele i le uaina,+ ma patī lē taupulea, ma tauvaga o inuga ʻava, ma le ifo i tupua e inosia.+ 4 Auā ua outou lē toe taufetuli ma i latou i lenei lava ala e tasi, i le faia o amioga e sili ona matagā+ ma inosia, ua faateʻia i latou ma faia tala leaga e uiga iā te outou.+ 5 Ae o le a taʻu atu e nei tagata le tala i lē+ ua nofosauni na te faamasinoina o ē o ola ma ē ua oti.+ 6 O le mea foʻi lea ua folafola atu ai le tala lelei i ē ua oti,*+ ina ia faamasinoina i latou i le tino e tusa ma le vaaiga a tagata,+ a ia ola i le agaga+ e tusa ma le silafaga a le Atua.

7 Ua lata mai le iʻuga o mea uma lava.+ O lea, ia outou mafaufau lelei,+ ma ia mataala i le faia o tatalo.+ 8 Ae e sili i nei mea uma, ia tele le alofa o le tasi i le isi,+ auā o le alofa e ufiufi ai le anoanoaʻi o agasala.+ 9 Ia faaalia le agaga talimālō o le tasi i le isi e aunoa ma le tomumu.+ 10 E pei ona maua e tagata taʻitoʻatasi se meaalofa, ia faaaogā e auauna ai le tasi i le isi e pei o auauna pule lelei o le agalelei faifua o le Atua, lea ua faaalia i auala eseese.+ 11 Afai e tautala se tasi, ia tautala o ia e tusa ma afioga paia+ a le Atua; afai foʻi e auauna+ se tasi, ia auauna o ia ma faalagolago atu i le malosi mai i le Atua;+ ina ia faamamaluina+ ai le Atua i mea uma lava e ala iā Iesu Keriso. Ia iā te ia le mamalu+ ma le mana e faavavau, faavavau lava. Amene.

12 Le ʻaupele e, aua neʻi faateʻia outou i le afi ua mumū iā te outou, lea ua oo iā te outou e fai ma tofotofoga,+ e peiseaʻī o se mea uiga ese ua oo iā te outou. 13 Ae ia outou olioli+ pea auā ua tofusia outou i mafatiaga o Keriso,+ ina ia outou fiafia ma olioli foʻi i le taimi o le faaaliga+ o lona mamalu. 14 Afai e faalumaina outou ona o le suafa o Keriso,+ ua outou fiafia,+ auā ua iā te outou le agaga mamalu, o le agaga lea o le Atua.+

15 Ae peitaʻi, aua neʻi mafatia+ se tasi o outou ona ua fasioti tagata, pe e gaoi, pe fai mea leaga, po o le isuisu fua+ i mataupu a isi. 16 Ae afai e mafatia+ o ia ona o ia o se Kerisiano, aua neʻi mā+ o ia, ae ia faamamaluina pea le Atua a o tauaveina lenei igoa. 17 Auā ua oo mai le taimi atofaina e amata ai le faamasinoga i le aiga o le Atua.+ O lenei, afai e amata muamua iā i tatou,+ o le ā la le iʻuga o i latou o ē e lē usiusitaʻi i le tala lelei a le Atua?+ 18 “Afai foʻi e faigatā ona faaolaina le tagata amiotonu,+ o fea la e faaali mai ai le tagata faalēmataʻu ma le tagata agasala?”+ 19 O lea la, o i latou foʻi ua mafatia ona o le faia o le finagalo o le Atua, latou te tuuina atu pea o latou ola i Lē e faamaoni na foafoaina mea, a o latou faia mea lelei.+

5 O le mea lea, ou te matuā fautua atu ai i toeaina o iā te outou, auā o aʻu foʻi o le toeaina+ faatasi ma i latou, ma o le molimau+ i mafatiaga o le Keriso, o lē foʻi ua tofusia faatasi i le mamalu o le a faaalia mai:+ 2 Ia leoleo+ i le lafu mamoe a le Atua+ o loo outou tausia, aua le manatu i ai o se avega mamafa, ae ia faia ma le lotomalie;+ aua le faia ona o le fia maua o mea i se auala faapiʻopiʻo,+ ae ia faia ma le lotonaunau; 3 aua foʻi le fia pule+ i tagata o le Atua,+ a ia avea ma faaaʻoaʻoga lelei i le lafu mamoe.+ 4 Pe a faaalia mai le leoleo mamoe sili,+ ona outou maua ai lea o le pale mamalu+ e lē mamae.+

5 Ia faapea foʻi outou tauleleʻa, ia gauaʻi+ i toeaina. Ia fusia foʻi outou uma i le lotomaulalo o le tasi i le isi,+ auā e tetee le Atua i ē e faamaualuluga, ae e foaʻi mai e ia le agalelei faifua i ē e lotomaulalo.+

6 O le mea lea, ia faamaulalo ai outou i lalo o le aao malosi o le Atua, ina ia faaeaina e ia outou i le taimi e tatau ai;+ 7 ma ia taʻu atu o outou popolega+ uma iā te ia, auā o loo manatu mamafa mai o ia iā te outou.+ 8 Ia faaauau ona outou mafaufau lelei ma ia mataala.+ O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.*+ 9 A ia outou tutumau e tetee atu iā te ia,+ ma ia mausalī lo outou faatuatua, auā ua outou iloa o mea lava ia o loo faapuapuagatia ai foʻi lo outou ʻauuso atoa i le lalolagi.+ 10 Ina ua uma ona outou mafatia mo sina taimi,+ o le Atua o loo foaʻi atu le agalelei faifua i auala uma, o lē ua valaauina outou i lona mamalu+ e faavavau ona o le autasi+ ma Keriso, e na te faamāeʻaina le aʻoaʻoina o outou, e na te faamausalīina+ ma faamalosia outou.+ 11 Ia iā te ia le malosi+ e faavavau lava. Amene.

12 O loʻu manatu o Siluano*+ o le uso faamaoni, ua ou tusi atu e ala iā te ia i ni nai upu,+ ina ia avatu le faalaeiauga ma se molimau faamaoni e faapea, o le agalelei faifua moni lenei o le Atua; ia outou tutū mausalī ai.+ 13 O loo momoli atu iā te outou alofaaga o le tuafafine o loo i Papelonia,+ o ia foʻi o lē ua filifilia e pei o outou, faapea foʻi ma Mareko+ loʻu atalii. 14 Ia faafeiloaʻi e le tasi le isi i le sogi alofa.+

Tau ina ia iā te outou uma o ē ua autasi ma Keriso le filemu.+